برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الثلاثاء 3 ابريل 2012 يوتيوب كاملة
عندنا إعلاميين أحرار ومعندناش إعلام حر
يسعد مساكم وحلقة جديدة من بلدنا بالمصري.. هنختمها بمحاولة الاجابة على السؤال اللي ما اسعفناش الوقت في حلقة امبارح للاجابة عليه وهو بعد 70 يوم هم عمر اول برلمان مصري بعد الثورة، الى اي مدى بتنطبق عليه او لأ تسمية "برلمان الثورة" وبامارة ايه الاسم دة على مسمى أو لأ.. وهنحاول نجاوب على السؤال دة النهاردة من منظور شعبي اكتر منه اي حاجة تانية، وتحديدا من خلال تقييم "المؤسسة المصرية للمسؤولية الوطنية" اللي نشأت اصلا بهدف ترسيخ مبدأ الرقابة الشعبية على مؤسسات الدولة وأولهم البرلمان، على أساس انه من بعد الثورة المفروض ان "العصمة في ايد الشعب"... ودة كمان سؤال وارد نطرحه: "الى اي مدى العصمة لسة فعلا في ايد الشعب"... الاسئلة ديه هنطرحها في فقرتنا اللي جاية بعد آخر أخبار بلدنا..
اللي هنبدأها بتقييم تاني، لكن التقييم المرة ديه كان من نصيب "التغطية الاعلامية للمرحلة الانتقالية" واللي وصل في النهاية لنتيجة ان "الساحة الاعلامية في مصر بعد الثورة فيها اعلاميين احرار لكن مافيهاش اعلام حر".
ريم ماجد: الحرية ليها ثمن ومهرها غالي .. قدها؟
عمر الاعلام ما هيتحرر الا لو عصمته بقت في ايد الاعلاميين الاحرار.. وآن الأوان للاعلاميين الاحرار انهم يضموا على بعض ويحطوا ايديهم في ايدين بعض ويخوضوا معركتهم وياخدوا العصمة في ايدهم لإن لا العصمة ولا الحرية هيكونوا منحة ولا يجوز.. لإن اللي هيمنحهم النهاردة هيرجع بكرة الصبح يمنعهم براحته وبمزاجه وعلى كيف كيفه.. وخلوني اقولها كدة واضحة وصريحة وعلى عينك يا تاجر ورزقي على الله.. الثورة ديه مش هتنجح ولا هتقوم لها قومة والبلد ديه مش هتنضف ولا هتقف على حيلها الا لو الاحرار في كل شبر على ارضها عملوا ثورتهم وامتلكوا عصمتهم في ايدهم: في الاعلام وفي الداخلية وفي القضاء وفي الجامعة وفين ما كان... فيا احرار مصر اتحدوا ضد القمع وضد الفساد وضد الظلم وضد الجهل وضد التضليل وضد الفرقة وضد التمييز وضد الخوف.. ثوروا تصحوا ولكم في الشعب اسوة حسنة.. وما فيش حاجة ببلاش والحرية ليها تمن ومهرها غالي.. احنا بقة قده ولا لأ.. هو دة السؤال!!!
الأزهر والمنسحبين يرفضون العودة للتأسيسية
وخلونا صرحا مع بعض، جولة مش هينة ابدا من جولات المعركة هي جولة كتابة دستور يليق بمقام مصر وبمقام أهلها، يعبر عن تنوعهم ويتباهى بيه، ويحترم حقوقهم وحرياتهم، ويحقق املهم في بكرة حلموا بيه ودفعوا تمنه ولسة بيدفعوا.. ويساوي بينهم بالمللي: ليهم نفس الحقوق وعليهم نفس الواجبات ما فيش حد من احسن حد.. دستور تكون فيه السيادة للشعب لا هي لعمة ولا لدبورة وكاب... وبالتالي، طبيعي جدا ان ازمة زي ازمة تشكيل اللجنة التاسيسية ما تبقاش هينة وحلها ما يبقاش بالساهل.. خاصة لما اصحاب المواقف يثبتوا على مواقفهم من حيث المبدأ بعيد عن المساومة والحلول والوسط والرضا بالقليل.. آخر المواقف الثابتة، كان موقف الأزهر الشريف، اللي أعلن النهاردة بعد اجتماع طارئ لمجمع البحوث الاسلامية، قرار الأعضاء بالاجماع برفض عودة الأزهر الشريف للمشاركة في الجمعية التاسيسية.
الأزهر هو آخر من اعلن ثباته على موقفه النهاردة.. لكن من امبارح الكنائس التلاتة الارتودكسية والكاتوليكية والانجيلية كانت اعلنت موقفها امبارح بعدم المشاركة في اللجنة لحين تصحيح الاوضاع وضمان تمثيل حقيقي لطوائف الشعب المختلفة وفقا لمعايير موضوعية تضمن التوازن وتراعي الكفاءة.. تفاصيل أكتر إحنا معانا د/ عبدالله النجار - عضو مجمع البحوث الإسلامية
معايير تصحيح اللجنة التأسيسية.. رباب المهدي
كمان من امبارح، اعلن المنسحبين من عضوية اللجنة ثباتهم على موقفهم واصدروا النهاردة بيانهم بعنوان لماذا ننسحب ... تفاصيل أكتر إحنا معانا أ/ رباب المهدي أستاذ العلوم السياسية بالجامعة الأمريكية
صحفيون من أجل الدستور تطالب بحل التأسيسية
بالنسبة للنقابات المهنية، ومن اول لحظة تقريبا بعد اعلان تشكيل اللجنة، كان المجلس الرئاسي لاتحاد النقابات المهنية وبعد اجتماع طارئ، كان دعا المنتخبين لعضوية اللجنة التأسيسية من اعضاء النقابات المهنية والقوى الوطنية الاخرى لعدم المشاركة فى أعمالها والمشاركة بشكل فاعل مع جميع القوى الوطنية الرافضة لتشكيل اللجنة فى كل الفاعليات السياسية والقانونية.. والتزم بالدعوة تقريبا معظم النقابات فيما عدا عدد منهم من ضمنهم نقابة الصحفيين.. لكن النهاردة وعلى سلالم النقابة كانت حركة "صحفيون من أجل الدستور" بتطالب مش بانسحاب نقابة الصحفيين من اللجنة التاسيسية لكن كمان بحل اللجنة
المرشدين السياحيين يطلبون تمثيلهم بالتأسيسية
مش بعيد عن نقابة الصحفيين، وتحديدا قدام المتحف المصري في ميدان التحرير، كانت وقفة المرشدين السياحيين اللي كانت بالتزامن مع وقفات تانية ليهم في عدد من المحافظات.. صحيح ان مطالب المرشدين السياحيين كانت بالاساس ليها علاقة باحوالهم الوظيفية والمالية، لكن مطلب تمثيلهم في اللجنة التاسيسية لكتابة الدستور كان حاضر وبقوة.
تحركات جبهة دستور لكل المصريين
أما "جبهة دستور لكل المصريين"، فاصدرت بيان النهاردة دعت فيه المنسحبين من عضوية اللجنة لانضمام ليها في تحركاتها على كل المستويات السياسية والقانونية والشعبية.
دعوى جديدة للطعن على تشكيل الدستورية
وعلى مستوى التحركات القانونية، حزب المصريين الاحرار اعلن النهاردة انضمامه لدعوى جديدة للطعن على مشروعية قرار تشكيل اللجنى التاسيسية.. وحسب البيان، الدعوى الجديدة بتاخد مسلك قانوني مغاير للطعون السابقة.. ايه الفرق دة اللي هنعرفه من:د/ إيهاب الطماوي - المحامي
كل الهيصة ديه بقة: انسحابات، ودعاوى قضائية ووقفات احتجاجية وبيانات وتصريحات، لكن كل دة اكيد ما يمنعش ان اللجنة التاسيسية لكتابة الدستور هتعقد بكرة اجتماعها التاني في القاعة الفرعونية في مجلس الشعب بحضور 65 عضو من أصل 100
اهالي النوبة يعاودون الاعتصام أمام محافظة أسوان
أما أهالي النوبة، فمش عارفين يلاقوها منين ولا منين.. بعد احتجاهم واعتصامهم قدام مبنى المحافظة في اسوان احتجاجا على عدم تمثيلهم في الجمعية التاسيسية لكتابة الدستور، رجعوا لاعتصامهم النهاردة مرة تانية، لكن المرة ديه لأسباب أخرى. لمزيد من التفاصيل إحنا معانا المخرج السينمائي أحمد عواض
تظاهر طالبات الأزهر بعد حالة السل
طالبات جامعة الازهر المذعورات بعد اكتشاف حالة اصابة واحدة على الاقل بمرض السل في المدينة الجامعية للطالبات، نظموا النهاردة وقفة احتجاجية قدام مكتب رئيس الجامعة احتجاجا على الاهمال الطبي.. وفي نفس الوقت انضم عدد من طلاب جامعة الازهر للطالبات قدام باب المدينة في شارع يوسف عباس. تفاصيل أكتر هانعرفها من أ/ الأء طاهر - طالبة بجامعة الأزهر
عبدالله الأشعل يتنازل لخيرت الشاطر
نروح لآخر تطورات الترشح للرئاسة، وآخرها اعلان الدكتور عبد الله الأشعل في مؤتمر صحفي في مقر جماعة الاخوان المسلمين بحضور مرشد الجماعة ورئيس حزب الحرية والعدالة، عن التنازل عن الترشح للرئاسة لصالح المهندس خيرت الشاطر، لإن الاخوان آخر حصون الثورة_على حد تعبيره_
مفاجأة وراء تأخير عمر سليمان ترشحه
من ساعة ما تم الاعلان عن ترشيح الجماعة للمهندس خيرت الشاطر، والاخبار لا تنقطع عن احتمال تقدم اللواء عمر سليمان أول وآخر نائب للرئيس المخلوع باوراق ترشحه بعد قليل: بعد 48 ساعة، وبعدين خلال ساعات، وبعدين كانت الامور تتضح النهاردة الصبحن وبعدين بدا ينتشر خبر على المواقع الاخبارية، منسوب لمصادر مطلعة، بيقول ان نائب الرئيس المخلوع وفي نطاق التنسيق بينه وبين المجلس العسكري، تلقى نصيحة بتأجيل إعلان ترشحه في الانتخابات الرئاسية كم ساعة كمان، بحد أقصى بكرة الصبح انتظارًا لمفاجأة على مستوى المرشحين الإسلاميين.. ايه مدى قرب او بعد الخبر دة عن الصحة او الحقيقة.. وان صح ايه الحسبة ديه اللي ممكن تاجل ترشيح اللوا عمر سليمان بسبب مفاجاة في صفوف المرشحين الاسلاميين وايه نوع المفاجاة وهل هي مرشح اسلامي جديد ولا خروج واحد منهم من السباق وايه علاقة دة المجلس العسكري بالمفاجأة ديه؟!!!
سعد الصغير يترشح لرئاسة الجمهورية
اما آخر من خطى عتبة مقر لجنة الانتخابات الرئاسية للاستعلام عن اوراق الترشح لرئاسة مصر، واول من خطاها بزفة بلدي فكان المطرب الشعبي، سعد الصغير.
أبو الفتوح يعلن تفاصيل برنامجه الانتخابي
أما الدكتور عبد المنعم ابو الفتوح، وبعد ما اتقدم رسميا باوراق ترشحه، اعلن امبارح في مؤتمر صحفي في حديقة الازهر عن تفاصيل برنامجه الانتخابي.
كشف حساب برلمان ما بعد الثورة
ان الوقت ما اسعفناش في حلقة امبارح عشان نجاوب على سؤال: "برلمان الثورة" دة اسم على مسمى ولا لأ وبامارة ايه في الحالتين؟! فهنحاول نجاوب عليه في حلقتنا النهاردة من خلال تقييم "المؤسسة المصرية للمسؤولية الوطنية"
السؤال اللي احنا طرحينه في حلقة النهاردة: وبناءا على آداء البرلمان في ال70 يوم اللي فاتوا، الى اي مدى ممكن نسميه أو لأ، على الأقل لحد دلوقتي باسم "برلمان الثورة"؟! واجابة السؤال النهاردة هنعتمد فيها على تقييم "المؤسسة المصرية للمسؤولية الاجتماعية"، واللي يمكن الاختلاف ما بين تقييمها وما بين اي تقييم تاني انه مبني على فكرة الرقابة الشعبية في المقام الاول، على اساس انه بعد الثورة، المفروض ان العصمة في ايد الشعب.. فاسمحوا لي اولا ارحب بضيفنا النهاردة:
د. مصطفى حجازي: منسق المؤسسة المصرية للمسؤولية الاجتماعية
ليست هناك تعليقات:
إرسال تعليق