برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاحد 22 ابريل 2012 يوتيوب كاملة
ميدان التحرير من جمعة تقرير المصير
سعد مساكم وحلقة جديدة من بلدنا بالمصري.. هنختمها زي كل يوم حد مع الدكتورة منال عمر، استشاري الطب النفسي ومحاولة لفهم الأسباب والأمارات النفسية اللي بتخلينا نقرر اننا هندي صوتنا لفلان ونحرم علان منه او تخلينا نحتار ونقع في حيص بيص ومانبقاش عارفين نقرر صوتنا لمين او اللي بتخلينا نقرر وراسنا والف وسيف ما هنديه لحد اصلاً واحنا اولى بيه لحد ما ييجي اليوم ويتوجد اللي يقدر يقنعنا انه يستاهله وفي ظروف احسن من كدة بقة انشاءالله وعلينا خير.. لكن قبل الختام، وبعد آخر أخبار بلدنا، هنتكلم عن الدستور، بس مش الدستور على انه وثيقة معقدة وما ينفعش يكتبها غير الخبرا والمثقفين وعلية القوم والكبارات واحنا ايش نكون عشان نكتبها.. لكن هنتكلم عن الدستور باعتباره وثيقة لأحلامنا المشتركة وبالتالي فمن حقنا، او بمعنى اصح ما ينفعش يكتبه غيرنا وما ينفعش ينتمي غير لينا جميعاً وساعتها بس هنعمل المستحيل عشان نترجمه لحقيقة وساعتها بس هنعمل المستحيل عشان نحافظ عليه ونحميه برموش عينيا.. وغير كدة هيفضل "حبر على ورق" زيه زي اللي قبله.. ف"تعالوا نكتب دستورنا".. وهو دة بالظبط عنوان المبادرة الشعبية اللي هنتكلم عنها في فقرتنا اللي جاية بعد ىخر اخبار بلدنا..
وهنبدأ آخر اخبار بلدنا، بآخر أخبار الميدان، فخلونا نطل عليه طلة من ساعة ما ضم المليونية الأخيرة باسماءها المختلفة وشعاراتها واهدافها المشتركة والمختلفة، من يوم الجمعة ولحد النهاردة.
الإخوان يتهمون شاب بالإعتداء على أطفالهم
يعني أكيد مليونية يوم الجمعة كان فيها الكثير من المظاهر السلبية وأيضاً إيجابية .. لكن عيب أوي أن على أخر الزمن رفقاء الكفاح يعتدوا على بعض زي ماحصل في قهوة البورصة .. لكن نيجي هنا على الصورة اللي محطوطة على صفحة شباب الحرية والعدالة لشاب مكتوب تحت صورته أنه مطلوب عشان إعتدى على نساء الإخوان وأطفالهم
روح الميدان اللي محتاجين نفتكرها
صحيح ان شكل الميدان يوم الجمعة اللي فاتت فكرنا بالذي مضى وبعت رسالة شديدة اللهجة لكل من اتهيأله ان الثورة كانت هوجة وعدت وراحت عليها.. وفكرت اللي نسي او اللي عامل فيها ناسي او مطنش او مش واخد باله، انه على رأي الست العظيمة "أم علي" ان "الثورة تؤمر مش تتحايل" وانها حتى لو اتحايلت هييجي عليها يوم وعند اللزوم وهتؤمر... كل دة صحيح الى حد كبير، لكن دة ما يمنعش ان شكل الميدان يوم الجمعة كان شبة الميدان في عز ايامه الحلوة لكن ماكانش صورة طبق الاصل منه.. ومش كدة وبس، الاهم من كدة، روح الميدان.. فيه حاجة في روحه الحلوة كانت رايحة وغايبة، وانشالله بس يا رب ما تطولش الغيبة.. فيمكن في اللحظة ديه بالذات نكون محتاجين نفكر نفسنا بروح الميدان اللي ردت فينا الروح.. وخلونا نفتكرها على حس الخال عبد الرحمن الابنودي، اول مين اتغزل في الميدان في ايام عزه.
بكرة هنحتفل بـ سيد مكاوي وصلاح جاهين في بلدنا بالمصري
قبل ما نكمل آخر اخبار بلدنا وقبل ما ننسى، نعيش ونفتكر اتنين من ولاد البلد الجدعان اللي حسهم لسة في الدنيا وعمره ما غاب وروحهم عمرها ما فارقتنا، وكانت ومازالت حاضرة وطايرة ومرفرفة على كل ميادين التحرير.. القصد والنية هنا على العظيمين: سيد مكاوي وصلاح جاهين، اللي يشاء السميع العليم سبحان الله، ان ذكراهم تكون في يوم واحد، يوم 21 ابريل.. فبمناسبة "الليلة الكبيرة" ديه، ولان اللي خلف ما ماتش، وخاصة لما يكون يا زين ما خلف.. بكرة هنحتفل بذكراهم هم الاتنين في حضرة بناتهم، اللي كل بنت فيهم "بنت ابوها" بصحيح: ايناس سيد مكاوي وسامية صلاح جاهين.. (مستينكم بكرة بفارغ الصبر.. وتعيشوا وتفتكروا ونفتكر معاكم ولو ان اللي زيهم عمروا ما يتنسوا)
توصيات إجتماع العسكري بالفقهاء الدستوريين
نكمل بقة أخر اخبار بلدنا، اول كلمة بتبدأ بيها مبادرة "تعالوا نكتب دستورنا" اللي هنناقشها النهاردة، في تعريفها بنفسها هي ان اصحابها "مش معنيين اطلاقاً" بالجدل اللي حاصل حاليا حوالين الجمعية التاسيسية وتشكيلها.. والحقيقة انه الجدل دة لسة لحد دلوقتي مش باين له آخر، وخصوصا بعد تأجيل اجتماع المجلس العسكري بممثلين الاحزاب والقوى السياسية.. الاجتماع اتاجل من النهاردة ليوم الخميس اللي جاي، والسبب على ما يبدو ان الاحزاب والقوى السياسية كانت المفروض تجتمع باعضاء المجلس بعد الوصول لصيغة ما توافقية حوالين تشكيل اللجنة من برة البرلمان ولا من جواه ومن براه زائد طبعا التوافق حوالين معايير الاختيار وآلية عمل اللجنة.. ودة واضح جدا انه لسة ما حصلش.. لكن اللي حصل بعد تاجيل الاجتماع، هو اجتماع تاني تم بشكل مفاجئ امبارح وانتهى في انصاص الليالي.. الاجتماع كان بين الفريق سامي عنان، رئيس الاركان وعدد من الفقهاء الدستوريين واساتذة القانون والقانون الدستوري في الجامعات المصرية.. والاجتماع نفسه والتوصيات اللي خرج بيها فتح الباب لجدل جديد: واهمها ان الشعب هو اللي ينتخب اعضاء اللجنة التاسيسية من الاعضاء المنتخبين في المجلسين وان ال100 يكونوا من خارج البرلمان.. دة غير طبعا التوصية بتعديل قانون 71 واعتباره دستور انتقالي لحين ما نكتب الدستور الجديد على رواقة تفاصيل أكتر هانعرفها من د/ يحي الجمل - أستاذ القانون الدستوري.
عزل الفلول وتطبيع المفتي .. جلسة ساخنة
من أزمة الجمعية التاسيسية لازمة القانون الشهير بقانون "عزل الفلول".. بعد ما حكمت المحكمة الدستورية بعدم اختصاصها بالحكم بدستورية او عدم دستورية التعديل اللي اقره مجلس الشعب على قانون مباشرة الحقوق السياسية حيث انه مش من ضمن صلاحياتها المنصوص عليها في الاعلان الدستوري الرقابة السابقة على القوانين، مجلس الشعب طالب النهاردة المجلس العسكري باقرار التعديل، في جلسة شديد اللهجة تجاه مفتي الديار المصرية بسبب زيارته للقدس المحتلة، في نفس الوقت اللي تظاهر فيه عدد من النشطاء وممثلين للاحزاب والحركات السياسية قدام دار الافتاء لنفس السبب.
البرلمان يوافق على تعديلات القانون العسكري
لسة تحت قبة البرلمان.. تحديدا اللجنة التشريعية في مجلس الشعب اللي كانت بتناقش مرة تانية تعديلات قانون القضاء العسكري واقرت التعديلات المقترحة من المجلس العسكري.. وافقت على اللي وافق عليه ورفضت اللي رفضه. تفاصيل أكتر إحنا معانا محمود الخضيري - رئيس اللجنة التشريعية بمجلس الشعب
إسلام: أنا بريء من إتهامات الإخوان بالإعتداء عليهم
إحنا معانا على الهاتف أ/ إسلام أبو العزم المتهم من قبل الإخوان بالتهجم على أطفالهم كما يزعمون
لجنة المائة تنفي اختيار أبو الفتوح رئيساً
بعد ما اعلنت امبارح حملة الدكتور عبد المنعم ابو الفتوح، اختياره من اللجنة الشهيرة بلجنة المئة، على رأس الفريق الرئاسي اللي هتسعى لتاييده في الانتخابات الرئاسية، نفت اللجنة الخبر النهاردة. تفاصيل أكتر هانعرفها من د / كمال الهلباوي
الفريق شفيق لم ينسحب من سباق الرئاسة
من ضمن كمان الأخبار اللي تم نفيها هو نفي اللجنة الإعلامية لـ الفريق أحمد شفيق لانسحابه من الرئاسةبلدنا بالمصري: الفريق شفيق لم ينسحب من سباق الرئاسة
مصير البلاغات المقدمة ضد شفيق
إحنا معانا على الهاتف أ/ أحمد شلبي رئيس القسم القضائي بجريدة المصري اليوم وهنسأله حول تحقيق نيابة الاموال العامة في البلاغات المقدمة ضد أحمد شفيق
أحرار فاروس بيتكلموا ومين يسمع
النهاردة مؤسسة الحرية والتعبير نظمت مؤتمر عشان الطلبة المفصولين من جامعة فاروس يتكلموا فيه عن أزمتهم .. الطلبة التمانية اللي بدأت أزمتهم بعد الاحتجاجات التي شهدتها الجامعة في بداية مارس الماضي .. الطلبة بيتكلموا بس حد يسمع
بنت الصعيد المصارعة
تعالوا نخطف رجلينا لحد الصعيد نشوف إزاي الفتاة الصعيدية قدرت تتحدى الظروف والعادات والتقاليد اللي اتربت وسطيها وتتفوق في لعبه كانت حكر على الرجال
إعتصام طلبة الأكاديمية الدولية لهندسة وعلوم الإعلام
وإحنا داخلين مدينة الإنتاج عشان نطلع لحاضرتكم بالبرنامج. كان في مجموعة من الطلبه معتصمين .. معتصمين ليه هانعرف من الطالب/ أحمد فوزي
هيهدوا النادي اليوناني علشان يبنوا مول
النادي اليوناني واحد من المعالم الثقافية المهمة التي ستقضي عليها آلة غاشمة تهدف لمحو التراث والحضارة والجمال من عيون من تبقى من المصريين القادرين على إبصارها .. النادي اليوناني سيهدم ليحل محله مول تجاري قبيح .. من ينقذ الهوية المصرية؟
من فات قديمه تاه .. مبادرة بلدنا بالمصري
على حس النادي اليوناني في الإبراهيمية اللي فيه ناس كتير شايفاه أنه ملوش قيمة أثرية عليا لكن هو في النهاية قمته أنه شهد تاريخ كبير .. من هنا من بلدنا بالمصري بنفكر في حملة شعبية بمعني الكلمة و بنفكر يبقى أسمها من فات قديمه تاه
وثيقة الحلم المشترك .. تعالوا نكتب دستورنا
"تعالوا نكتب دستورنا" هي مبادرة لمحاولة ترجمة احلامنا المشتركة في وثيقة شعبية تنور الطريق للجمعية التاسيسية اللي هتصيغ احلامنا فتكون النتيجة دستورنا.. ولما تكون النتيجة دستورنا بصحيح، هنعمل المستحيل عشان نترجمه واقع نعيشه وهنعمل المستحيل عشان نحافظ عليه ونحميه من الهوا الطاير وبرموش عينينا، لإنه في النهاية هيكون احلامنا اللي بنحققها.. ازاي بقة هنكتب دستورنا.. دة اللي هنعرفه من ضيوفنا النهاردة:
- أحمد حشمت: منسق المبادرة
- منة عصام: منسقة المبادرة في القاهرة الكبرى
- اشرف عباس: متطوع ومنسق المبادرة في الاسماعيلية
- سيد الفقي: متطوع ومنسق المبادرة في طنطا
نفسياً، ليه بنبقى مع أو ضد مرشح بعينه
كل اللي احنا عارفينه، ان فيه ناس عارفة هتدي صوتها لمين وحاسمة أمرها وهانيالها.. وفيه ناس عارفة انها مش هتصوت اصلا في الانتخابات ديه ومقاطعاها كدة من بابها وحجتهم معاهم.. وفين ناس عارفة هي مش هتدي صوتها لمين لما السما تنطبق على الأرض بس لسة مش عارفة هتدي صوتها لمين؟ ويمكن كل الناس ديه على اختلافهم واختلاف مواقفهم عندهم اسباب موضوعية في كل حالة على الاقل من وجهة نظرهم لكن اللي يمكن كلنا لسة مش عارفينه او على الاقل مش مدركينه هي الاسباب النفسية اللي بتخلينا ناخد الموقف دة مع او ضد مرشح بعينه.. ودة اللي هتفتينا فيه الدكتورة/ منال عمر: استشاري الطب النفسي
حريق هائل بالشارع التجاري في طنطا
إحنا جالنا بس خبر عاجل أن هناك حريق في طنطا .. هانعرف التفاصيل من أ/ عادل درة مدير مكتب اليوم السابع - الغربية
ليست هناك تعليقات:
إرسال تعليق