برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاربعاء 18 ابريل 2012 يوتيوب كاملة
بالمصري ٤ سنين .. انتوا عزوتنا واحنا صوتكوا
يسعد مساكم وحلقة جديدة من بلدنا بالمصري اللي بيتم النهاردة 4 سنين بالتمام والكمال.. زي النهاردة من اربع سنين اتولد برنامج لو فاكرين كان اسمه "بالمصري" ولما كبر شوية وبقة غلباوي وطلع له صوت، خدنا بنصيحة عمنا احمد فؤاد نجم وسمناه "بالمصري الفصيح".. وبعدين ولأسباب ليها علاقة باعادة هيكلة القنوات اندمج بالمصري الفصيح مع برنامج "بلدنا" اللي كان من تقديم الزملاء الاعزاء مي الشربيني وخالد صلاح، فسميناه "بلدنا بالمصري" وشارك في تقديمه في البدايات الزميل العزيز ابراهيم عيسى.. لكن بغض النظر عن الاسماء، المهم انه اتولد بالمصري وكبر بالمصري، ولسة عايش بس على حس المصري.. المصري الجدع ابو دم خفيف.. المصري الاصيل ابن البلد حمال الآسية.. المصري اللي مهما طالت حبال صبره اللي بيشعلق فيها من كتر شيل الحمول، لكن لصبره حدود.. المصري اللي في لحظة وعلى غفلة وفي عز ما يبقى شكله كدة نايم على ودانه في سابع نومة ولا اهل الكهف ومافيش منه رجا.. يقوم ويشد حيله ويصلب طوله ويرفع راسه ويفاجئ نفسه قبل ما يفاجئ غيره بانه لسة حي ولسة فيه الرمق ولسة قادر يحلم ببكرة ويجيبه لحد عنده بايديه، ولو عصلج معاه شويتين هياخد بعضه ويعديله مهما طال بيه المشوار، ومهما لف بيه ودار ودخله في متاهات، يفضل برده وراه والزمن طويل، واديه بيتعلم في السكة واهيه مرة تخيب ومرة تصيب.. صحيح ان العلام مش ببلاش لكنه قدها وقدود ومهما كان التمن غالي، يهون عشان خاطر عيون بكرة اللي يليق بمقام بلدنا.. المصري دة هو اللي احنا عايشين على حسه وببركة دعاه.. وهو اللي بيوقفنا النهاردة في الشوارع والميادين عشان يقول لنا: " انتوا صوتنا واحنا عزوتكوا".. واحنا لينا الفخر والشرف وربنا يقدرنا ونكون عند حسن ظن كل مصري من اهالي المحروسة.. حتى اللي شايفنا اعلام مغرض ومحرض و "قلة مندسة" و"خربنا البلد".. الكل على العين والراس مادام الاصل ان كل واحد في البلد ديه من حقه يحبها ويخاف عليها ويدور على مصلحتها ويحلم بيها بطريقته.. ومادامت الأولة "بلدنا" والمركب واحدة يبقى مش فاضل على بكرة زمان... فعهد علينا ليفضل الصوت صوتكم وبيكم تكبر العزوة وربنا يزيد ويبارك..... بس على ذكر العزوة، اوعوا حد يفتكر عشان يعني انا اللي في صورة يوماتي، اني لوحدي كدة وبطولي في بلدنا بالمصري!!! انا كمان عندي عزوة، عزوة كبيرة وعزوة حلوة، كلهم هنا جنبي وحوالية ولولاهم ما كان بلدنا بالمصري ولا كنت انا!!! ولولا الملامة لكنت شكرتهم بالاسم واحد واحد وواحدة وواحدة، بس هم ماشالله كتير امسك الخشب وربنا يخلي.. فاسمحوا لي بس اعيد عليهم كلهم واقول لهم كل سنة وانتو طيبين يا اهلي وناسي وعزوتي.. يا اهل بلدنا بالمصري من يوم ما اتولد، الحاضر منكم واللي فارق ولسة هنا بيته ومترحه.. تسلم الايادي وتعظيم سلام.. وتعيشوا وتحققوا اللي حلمنا بيه سوا مش بس لبلدنا بالمصري لكن لبلدنا كلها...
يسقط حكم العسكر والفلول .. ٢٠ أبريل
نروح بقة لاخر اخبار بلدنا، وهنبدأها ب"يسقط حكم العسكر والفلول"، شعار مليونية الجمعة 20 ابريل لتحقيق اهداف الثورة وحمايتها من اعداءها واعداء الشعب ايا كان مسماهم.
خيرت الشاطر والتسليم الحقيقي للسلطة
طيب.. هي ديه الاهداف المعلنة لكل القوى اللي بتدعو للمليونية واللي هتشارك فيها، لكن على ما يبدو ان جماعة الاخوان المسلمين ليهم هدف اضافي، او على الاقل دة اللي فهمناه من تصريحات المهندس خيرت الشاطر خلال مؤتمره الصحفي النهاردة، حيث انه دعا لجمعة "التسليم الحقيقي للسلطة".
شباب الثورة والإخوان وخلافات جمعة لم الشمل
في 43 حزب وحركة دعوا لمليونية وأيضاً مليونية الإخوان هانعرف الفرق بين الجمعتين من وجهتينظر مختلفة أولاً من أ/ خالد عبدالحميد عضو حزب التحالف الشعبي الإشتراكي وأ/ ياسرأحمد عضو المكتب الإداري لجماعة الإخوان المسلمين
مليونية تقرير المصير لأنصار أبو إسماعيل
من مؤتمر المهندس خيرت الشاطر اللي دعا لمليونية "التسليم الحقيقي للسلطة" لمنصات الشيخ حازم ابو اسماعيل سواء قدام مقر اللجنة المشرفة على الانتخابات او في ميدان التحرير بعد الاعلان عن الدخول في اعتصام مفتوح.. منصة ميدان التحرير شبهت اللي بيحصل في قضية جنسية والدة الشيخ ب"حديث الافك" عن السيدة عائشة ام المؤمنين، واستنكرت قلة اعداد المعتصمين وتساءلت "هم فين من الحديث الشريف "انصر اخاك ظالما او مظلوما"!!! ومنصة اللجنة اعلنت عن ثورة جديدة هتبدأ بمليونية "تقرير المصير" يوم الجمعة وعن مجلس لانقاذ الثورة بقيادة الشيخ ابو اسماعيل. مزيد من المعلومات إحنا معانا على الهاتف الشيخ/ علي لاشين الداعية الإسلامي
مصر خسرت قائد عظيم .. عمر سليمان
اما انصار الرئيس المخلوع، فاعلنوا على الصفحة "آسفين يا ريس" ان مصر خسرت قائد عظيم اسمه "عمر سليمان" ومع ذلك لن يلجأوا لتصعيد الأمر أو الاحتجاج بصورة تضر مصلحة البلد.. واتمنوا التوفيق للنائب الوحيد لرئيس الجمهورية المخلوع، بعد ما قدمه لمصر من جهود ،على حد قولهم.
برنامج عمرو موسى لإعادة بناء مصر
ومن المرشحين المستبعدين للمرشحين المستمرين في سباق الرئاسة، السيد عمرو موسى اعلن النهاردة عن برنامجه لاعادة بناء مصر من عزبة الهجانة.
تكليف التشريعية بقانون انتخاب التأسيسية
نروح تحت قبة البرلمان، وتحديدا للجنة الشؤون التشريعية والدستورية واللي كانت في منتهى النشاط النهاردة، رفضت رفع الحصانة عن نائب من الثوار ووافقت على قوانين ورفضت قوانين واجلت مناقشة قوانين والاهم من كل دة انه تم تكليفها بقرار من رئيس المجلس بإعداد مشروع قانون ينظم انتخاب أعضاء الجمعية التأسيسية لوضع الدستور. تفاصيل أكتر هانعرفها من د/ حسني دويدار عضو اللجنة التشريعية بمجلس الشعب
تأجيل قضية التمويل الأجنبي ل ٥ يونيو
محكمة جنايات القاهرة اجلت النهاردة النظر في القضية الشهيرة بقضية التمويل الاجنبي لجلسة 5 يونية لفض الاحراز.. المحكمة نظرت القضية النهاردة في حضور المتهمين المصريين بس لان المتهمين الاجانب زي ما احنا عارفين خادهم الغراب وطار في ظروف غامضة.. بس شوفوا سبحان الله يشاء السميع العليم ان المحكمة تاجل القضية لجلسة 5 يونية، الموافق ذكرى "النكسة"!!!
زياد العليمي يدافع عن صبحي صالح
لسة تحت قبة البرلمان، او يعني جواليها، النائب زياد العليمي، عضو مجلس الشعب عن حزب «المصري الديمقراطي الاجتماعي»رفض النهاردة على حسابه على فيس بوك، تحويل القيادي الإخواني صبحي صالح إلى لجنة القيم في البرلمان، بعد ما وصف أعضاء المجلس العسكري بأنهم «من كفار قريش».
زيارة المفتي للقدس تطبيع ولا لا؟
لكن يفضل الخبر الاكثر اثارة للجدل النهاردة هو خبر زيارة مفتي الديار المصرية الدكتور علي جمعة للقدس المحتلة، وصلاته في مسجد الاقصى.. واللي تم اعتبارها نوع من انواع التطبيع مع الكيان الصهيوني
الا ان دار الافتاء المصرية نفت تماما شبهة التطبيع ووضحت الامور. للتعليق إحنا معانا د/ إبراهيم نجم المستشار الإعلامي لمفتي الديار المصرية
محمود عزب: فضيلة المفتي لم يستشير الأزهر بزيارة القدس
الخبر الاكثر اثارة للجدل النهاردة هو خبر زيارة مفتي الديار المصرية الدكتور علي جمعة للقدس المحتلة، وصلاته في مسجد الاقصى.. للتعليق إحنا معانا د/ محمود عزب مستشار شيخ الأزهر
في ذكرى التهجير .. التدوين للنوبة
قبل الفاصل، خلونا نطل طلة على شوية تدوينات وشوية زقزقة عشان خاطر عيون النوبة في ذكرى رحيل آخر نوبي من الارض القديمة.
قانون لا للمحاكمات العسكرية للمدنيين
ديه مجرد عينة من مواجع المعتقلين وأهالي المعتقلين في سجون العسكر من بعد الثورة اللي قامت ويا للعجب تنادي باعلى صوتها على الحرية والكرامة الانسانية.. وآن الاوان اللي اتاخر اوي وطال، عشان تترد المظالم ويتحط لها حد.. صحيح ان مجلس الشعب بيناقش حاليا او بمعنى اصح بيعافر لتعديل قانون القضاء العسكري بما يضمن الحد الادنى من حقوق المدنيين اللي لا والف لا لمحاكمتهم محاكمات عسكرية.. الا انهعلى ما يبدو ان الحد الادنى اللي بيعافر فيه مجلس الشعب مش كفاية لانهاء ملف المحاكمات العسكرية للمدنيين على الاقل من وجهة نظر مجموعة "لا للمحاكمات العسكرية للمدنيين" وحجتها معاها.. فاسمحوا لي اولا ارحب بضيوفنا:
النائب/ محمد شبانة: المحامي بالنقض وعضو مجلس الشعب عن تحالف الثورة مستمرة
الاستاذ/ احمد راغب: المحامي ومدير مركز هشام مبارك للقانون وعضو مجموعة لا للمحاكمات العسكرية للمدنيين
ليست هناك تعليقات:
إرسال تعليق