برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة الثلاثاء 6 مارس 2012 يوتيوب كاملة
بلدنا بالمصري: الجنزوري زود "لم" على "لن تركع"
يسعد مساكم وحلقة جديدة من بلدنا بالمصري هنكمل فيها اللي بدأناه امبارح وتحديداً علامات الاستفهام والتعجب حوالين اللي فاضل لنا من محطات على طول المرحلة الانتقالية اللي ثبت بالدليل القاطع انها ما كانتش دغري كفاية وياما لفت ودارت بينا ومازالت.. دة غير الحفر والمطبات ومن ضمنهم طبعاً مطب الجمعية التأسيسية ويمكن هي ديه علامة الاستفهام اللي هنقف عندها النهاردة ونركز عليها والسؤال اللي هنطرحه الجمعية التأسيسية ديه لازم يكون شكلها ايه عشان تكون شبهنا كلنا، شبه كل المصريين سواء اللي في مصر او اللي في اي حتة في الدنيا مهما اختلفوا ومن غير ما يكون في حد أحسن من حد ولا حد على راسه ريشة ولا حد على راسه بطحة لا سمح الله ولا حد ليه نسبة أكبر ولا حد ليه نصيب اقل... السؤال دة وغيره هنطرحه على ضيوفنا لكن بعد آخر أخبار بلدنا... واللي هنبدأها من "مصر" اللي المرة ديه "لم ولن تركع"_والواحد ماعادش بيخاف وقلبه بيطب الا من قولة "لم ولن"، نسمعها من هنا وعينينا ما تشوف الا اللي "لم ولن يحصل" بحذافيره والعينات بينات ومافيش داعي لتقليب المواجع"!!!... قائل هذه العبارة النهاردة هو نفسه صاحب العبارة الأصلية "مصر لن تركع"، ألا وهو رئيس الوزرا، الدكتور كمال الجنزوري، اللي اكد النهاردة في مؤتمر صحفي بما معناه يعني انه اصلاً ماكانش ناوي يتكلم في الموضوع اللي سماه "الافراج عن المتهمين الاجانب"، وانه كان عازف تماماً عن الحديث فيه لولا اللي اتكتب في الصحافة واتقال في وسائل الاعلام!!! وبالمناسبة ديه اللي اضطر لها رئيس وزراء مصر وفي الظرف دة، اضاف على النهاردة على عبارته الشهيرة اضافة جديدة وقال "لم".. و"لم" ديه أداة نفي زي ما احنا عارفين دة غير انها معروفة نحوياً بانها بتقلب الفعل من مضارع لماضي وكأن شيئاً لم يكن!!!
بلدنا بالمصري: الجنزوري رمى الفضيحة على القضاء
طيب يعني الدكتور كمال الجنزوري ولو انه جه على نفسه مضطراً واتكلم في الموضوع ومع انه مر مرور الكرام_ويمكن من باب جبر الخواطر_ الا انه رمى المسؤولية كلها على القضاء وقال بالحرف الواحد ان "قضية الجمعيات الأهلية متعلقة بالقضاء بالكامل.. وحتى مسألة الإفراج عن بعض المتهمين الأجانب، يرجع إلى القضاء وليس في سلطة أي مسئول تنفيذي، أن يتدخل في هذا الموضوع". و تعقيباً عن مؤتمر رئيس الوزراء معانا على الهاتف المستشار / أحمد الفقي رئيس محكمة الإستئناف
ياسر الزيات: تصريحات الجنزوري بها الكثير من السذاجة
و للتعقيب عن مؤتمر د/ كمال الجنزوري إحنا معنا على الهاتف أ/ ياسر الزيات الكاتب الصحفي للتعقيب عن المؤتمر من أول التوقيت للمكان و هو في الهيئة العامة للإستثمار وليس مجلس الوزراء و ماجاء في المؤتمر الصحفي
بلدنا بالمصري: الجنزوري ووزرائه .. حد قال حاجة!
يعني اذا هو دة موقف رئيس الحكومة وهو دة أقصى مدى لاحساسه بمسؤولية الحكومة عن قضية تكسر مناخير أكبرها دولة، فبالتالي يمكن مش غريب بقة ان السادة الوزراء أعضاء نفس الحكومة الموقرة، والمعنيين بالقضية ديه وعددهم اربعة، يغيبوا كلهم عن اول جلسة من جلسات مجلس الشورى المنتخب اللي استدعاهم لمناقشة نفس القضية.. والغايب كانت حجته حضور إجتماع وزاري في هيئة الأستثمار لمناقشة موضوعات تهم الاقتصاد المصري!!! فكانت النتيجة رفع الجلسة بعد تلت ساعة احتجاجا على عدم التزام الحكومة بالحضور، قبل ما يحضروا الغايبين وتبدأ الجلسة التانية ويتفتح باب المناقشة شديدة اللهجة ولكن بدون أي اجابة تشفي الغليل او حتى توضح حقيقة اللي حصل.
بلدنا: حفلة فايزة أبو النجا الفخورة في مجلس الشورى
كل دة كوم، والأخد والرد من وعلى الوزيرة فايزة أبو النجا كان كوم تاني خالص لدرجة انها في لحظة من ذات اللحظات، وبعد ما أعانت انها فخورة بدورها في قضية التمويل وان لو الزمن رجع بيها لورا هتقوم بنفس الدور من غير زيادة ولا نقصان، خدت بعضها وانسحبت من اللجنة.
وزير الطيران: الطائرة الأمريكية حكومية على الورق فقط
تصريحات وزير الطيران المدني كمان محتاجة تفسير.. يعني ايه الطيارة غيرت صفتها؟ ويعني ايه الطيارة مش دبلوماسية وما تخصش الحكومة الأمريكية.. امال تخص مين؟ وللإجابة عن كل هذة الإسئلة إحنا معنا وزير الطيران المدني م/ حسين مسعود
بلدنا بالمصري: مجلس القضاء يحقق في فضيحة قضية التمويل
من ناحية تانية، مجلس القضاء الأعلى أعلن النهاردة في بيان لأمينه العام المستشار محمد عيد سالم أن مجلس القضاء الأعلى قرر إجراء التحقيقات اللازمة في شأن ما أثير حول قضية التمويل الأجنبي غير المشروع لمنظمات المجتمع المدني، وذلك استجلاء لحقيقة الأمر. وقال المستشار محمد عيد سالم، الأمين العام لمجلس القضاء الأعلى، في بيان له اليوم الثلاثاء: "إن المجلس يهيب بالمواطنين ووسائل الإعلام الكف عن التعرض لهذا الشأن، صونًا لاستقلال القضاء وهيبته في داخل البلاد وخارجها".
وأكد مجلس القضاء الأعلى، حرصه على اتخاذ الإجراءات القانونية ضد كل من يثبت في حقه انتهاك استقلال القضاء أو التدخل في أحكامه، أيًا كان موقعه
بلدنا بالمصري: سفر متهمين التمويل خدعة أمريكية
اما المستشار أحمد الزند، رئيس نادي القضاة فمن وجهة نظره ان السماح بسفر الأجانب المتهمين فى قضية التمويل الأجنبى خدعة نفذتها أمريكا للوقيعة بين الشعب والقضاة..
بلدنا بالمصري: إقتراحات المختصين لتأسيسية الدستور
هنرجع تحت قبة البرلمان، وتحديدا فيما يخص الجمعية التأسيسية لكتابة الدستور وآليات عملها ومعايير انتخاب اعضاءها _ولسة هيكون لنا كلام كتير حواليها في حلقتنا النهاردة وفي حلقات كتير جاية_ النهاردة، الأمانة العامة في مجلس الشعب ومجلس الشورى الهيئات الحكومية والخاصة والأفراد والنقابات والاتحادات الرسمية وغير الرسمية، إلى تقديم المقترحات الخاصة بتشكيل الجمعية التأسيسية للدستور، والتي ستتولى إعداد الدستور الجديد للبلاد في موعد غايته الخميس المقبل، بمقر مجلس الشعب.
بلدنا بالمصري: مقترح عمرو حمزاوي لتأسيسية الدستور
اذا من حق المواطنين انهم يقدموا اقتراحاتهم فدة واجب على النواب، وفعلاً فيه عدد لا بأس بيه منهم بدأ في تقديم اقتراحاته من ضمنهم النائب عمرو حمزاوي اللي اتقدم النهاردة باقتراح مفصل للضوابط والمعايير والاليات اللازمة لعمل الجمعية وانتخاب اعضاءها، هنعرف خطوطه العريضة منه هو شخصياً
بلدنا: الموافقة بتلتين أعضاء المجلس مش الحاضرين
أما فيما يخص آلية عمل مجلس الشعب وتحديداً عند مناقشة القوانين والموافقة عليها.. الجمعية العمومية لقسمي الفتوى والتشريع في مجلس الدولة، اصدرت النهاردة فتوي بالتأكيد علي مجلس الشعب عند مناقشته لأي قوانين، خاصة ذات الأثر الرجعي وتستدعي المصلحة العامة، أن تكون الموافقة علي القانون بأغلبية تلتين أعضاء المجلس بالكامل مش تلتين الحاضرين.
بلدنا بالمصري: حكم بتسليم ماجدة حسين سالم لمصر
بعد الأحكام الصادرة من القضاء الأسباني بتسليم رجل الأعمال حسين سالم وابنه خالد، صدر النهاردة الحكم التالت بتسليم بنته ماجدة لجهات التحقيق القضائية فى مصر على خلفية الاتهامات الموجهة ليهم ما بين التربح واستغلال النفوذ وغسيل الأموال وطبعاً تصدير الغاز لإسرائيل. و التفاصيل أكتر هانعرفها من الدكنور خالد أبو بكر المحامي
بلدنا بالمصري: أهالي الدويقة .. معاناة لا تنقطع
خلونا نروح لأهالي المحروسة لحد عندهم.. والنهاردة عندنا اكتر من مشوار هنبدأهم بمشوار لحد أهالي منطقة الدويقة في منشية ناصر.
بلدنا بالمصري: فلاحين قنا مش لاقيين السماد
من ضمن المشاوير لأهالي المحروسة في الصعيد، هنبدأهم من قنا كمجرد عينة بينة لأزمة الأسمدة اللي على ما يبدو لسة مستمرة على الرغم من الوعود بحلها والكلام المعسول عن انتهاءها.
بلدنا بالمصري: ضباط الشرطة هيدافعوا عن نقابتهم
أما أهالي المحروسة من ظباط الشرطة_والشرطة بنص الدستور هيئة نظامية مدنية_ هم كمان بيحلموا بنقابة ترتقي بمهنتهم وتصون حقوقهم وتدافع عنها عند اللزوم، وزيهم زي كتير من أهالي المحروسة بيحاولوا يحققوا الحلم اللي شكله كدة مش هيكون بالساهل
بلدنا: الفلاحين والفنانين والرياضيين وصياغة الدستور
هنفضل ورا الجمعية التأسيسية اللي هتكتب دستورنا الجديد لحد ما تشوف النور.. والهدف انها تكون شبه كل المصريين بكل اختلافاتهم والاختلاف ماهواش علة ولا هو ابتلاء بالعكس دة نعمة من عند ربنا مش من حقنا نتبتر عليها ومن واجبنا نصونها ونحميها برموش عينينا وبدستورنا اللي لازم نطمن ونتأكد وما نقبلش الا انه يكون في ايدين أمينة..
الجمعية التأسيسية اللي هكتب أول دستور لينا بعد ثورة دفعنا ولسة بندفع تمنها غالي عشان خاطر عيون لقمة عيش بالهنا والشفا، عشان خاطر عيون الحرية والكرامة الانسانية والعدالة والمساواة والحق في الحياة وفي الوطن اللي يليق بمقامنا ويساعنا بالملايين، ازاي تكون شبهنا كلنا وازاي كلنا نلاقي فيها نفسنا وازاي تكون هي كمان تكون على مستوى طموحاتنا وقد التمن اللي دفعناه ولسه بندفعه في الوطن اللي بنحلم بيه؟!!! سؤال الود ودنا نسأله لكل مصري لكن أضعف الايمان اننا من هنا ولحد الجمعية التأسيسية ما تشوف النور هنفضل نسأله لأكبر عدد ممكن من المواطنين بكل اختلافاتهم لإنهم الطرف المعني صاحب المصلحة العليا والطرف الأصيل.. سؤالنا هنطرحه النهاردة على ضيوفنا بصفتهم مواطنين أولاً ثم بصفاتهم ثانياً:
- المواطنة: تيسر فهمي: الفنانة ورئيسة حزب المساواة والتنمية
- المواطن: محمد عبد القادر: الفلاح ونقيب الفلاحين
- المواطن: نادر السيد .. محلل رياضي وحارس مرمى منتخب مصر السابق
ليست هناك تعليقات:
إرسال تعليق