برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة الاحد 25 مارس 2012 يوتيوب كاملة
بلدنا بالمصري: الإعلان عن تشكيل الجمعية التأسيسية
يسعد مساكم وحلقة اول الأسبوع من بلدنا بالمصري.. الأسبوع اللي بدأ والدنيا واقفة على رجل من بورسعيد لأسوان: من أول أزمة بنزين مش مفهومة ولا مبررة واسبابها ما يعلم بيها الا ربنا وان كان البعض شاف فيها بوضوح يسد عين الشمس أزمة مفتعلة ولا ليها اي اساس ولا لزمة غير الهاء الناس لحد ما تتشكل الجمعية التاسيسية لصياغة الدستور اللي من قبل حتى الاعلان عن تشكيلها والدنيا قايمة ومش قاعدة..وجه الاعلان النهائي عن تشكيلها فجر النهاردة وزي ما يكون القشة اللي قطمت ضهر عدد من رموز التيار المدني ما بين احزاب وشخصيات عامة فاعلنوا الانسحاب والمقاطعة.. وهو دة تحديداً موضوعنا اللي هنناقشه بالتفصيل في فقرتنا اللي جاية: "مقاطعة رموز التيار المدني لاعمال الجمعية التاسيسية: اسبابها وعيوبها ومميزاتها وهل منها فايدة والفايدة ديه هتعود على مين ولا هتقف على الجميع بخسارة"؟!
بلدنا بالمصري: بيان الإخوان المسلمون وإتهام العسكري
التيار المدني اللي اعلن عن اعتراضه المبدئي على نسبة النص بالنص ما بين الببرلمانيين وغير البرلمانيين ومن قبل حتى ما يعلن عدد من رموزه انسحابهم او مقاطعتهم لاعمال الجمعية بعد تشكيلها، كان ليه نصيب امبارح من استنكار جماعة الاخوان المسلمين في بيانها اللي اصدرته امبارح واللي هددت فيه ب"اعادة انتاج الثورة"!!! ومع ان البيان شديد اللهجة كان موجه في المقام الأول لحكومة الدكتور الجنزوري والمجلس العسكري، الا ان الجماعة استنكرت اللي وصفته ب" الحملــــــة العلمانية واليسارية على تشكيل الجمعية التأسيسية المخولة بوضع الدستور».. واتهمت اللي سمتهم بأطراف الحملة بـ«التدليس على العامة، والجهل الفاضح بالدستور والقانون، والتحريض على تدخل المجلس العسكرى لإلغاء القرار، رغم أن تشكيل الجمعية التأسيسية لا يدخل ضمن صلاحيات المجلس العسكرى".. وربما المقصود هنا هو الدكتور ممدوح حمزة اللي اعلن عن صياغته لبيان موقع عليه من 137 شخصية عامة وحزبية لتوجيهه لرئيس اركان القوات المسلحة ونائب رئيس المجلس العسكري للمطالبة باللي وصفه ب"حماية مصر من القوى الدينية التي تريد السيطرة على دستور البلاد".. والموضوع دة هنرجعه بتفصيل اكتر خلال فقرتنا.
بلدنا بالمصري: رد المجلس العسكري على بيان الإخوان
البيان أثار ردود أفعال مختلفة، وخلونا نبدأ برد فعل المجلس العسكري اللي اصدر النهاردة بيان رداً على بيان الاخوان نصه كالآتي:
بلدنا بالمصري: مستقبل العلاقة بين الإخوان والعسكري
على ضوء بيان الإخوان المسلمون الذي كالت فيه الجماعة الاتهامات للمجلس العسكري ورد المجلس العسكري ببيان شديد اللهجة يحمل الكثير من التهديدات .. ما هو مستقبل العلاقة بين الجماعة المجلس العسكري وللإجابة عن هذا السؤال إحنا معانا على الهاتف د/ عمار علي حسن الكاتب والباحث في علم الإجتماع السياسي
بلدنا بالمصري: المحكمة الدستورية ترفض بيان الإخوان
تحديداً فيما يخص الجزء الخاص بالمحكمة الدستورية في البيان اللي بيتكلم عن اللي وصفه البيان ب"وجود طعن في أدراج المحكمة على دستورية بعض مواد قانون الانتخابات فيما يخص المقاعد الفردي، بهدف استخدامه لتهديد الجماعة لحل المجلس إذا أصرت على سحب الثقة من الجنزوري"، حسب نص البيان.. رد الفعل المحكمة الدستورية كان على لسان نائب رئيس المحكمة المستشارة تهاني الجبالي اللي رفضته رفض قاطع. للتعليق إحنا معانا على الهاتف المستشار حاتم بجاتو الأمين العان للجنة العليا للانتخابات
بلدنا بالمصري: سبحان مغير الإخوان ع الجنزوري
اما بقية ردود الأفعال المختلفة فاتفقت في معظمها على بما معناه: "سبحان مغير الأحوال" وسبحان مغير موقف الجماعة من حكومة الدكتور الجنزوري من يوم ما كلفها المجلس العسكري في عز احداث محمد محمود الأولى وما بين موقفها شديد اللهجة _وبدون فعل سياسي حقيقي_ النهاردة.. الموقف دة كان واضح جداً في بيان حركة 6 ابريل اللي اصدرته النهاردة رداً على بيان الاخوان.
بلدنا بالمصري: بلاغ لحل حزب الحرية والعدالة
من ناحية تانية خالص، قدمت منظمة اتحاد المحامين للدراسات القانونية والديمقراطية بلاغ للنائب العام، بيطالب بحل حزب الحرية والعدالة، الجناح السياسي لجماعة الإخوان المسلمين، والكشف عن مصادر تمويله. لتفاصيل أكتر إحنا معانا على الهاتف أ/
شادي طلعت مدير منظمة إتحاد المحامين للدراسات القانونية والديموقراطية
بلدنا بالمصري: منصور حسن ينسحب من سباق الرئاسة
آخر مفاجآت انتخابات الرئاسة اللي لا كانت على البال ولا على الخاطر كانت مفاجأة اعلان السيد منصور حسن النهاردة وبشكل مقتضب جداً في تصريح لوكالة انباء الشرق الأوسط عن انسحابه من سباق الترشح احتجاجاً على الأوضاع السياسية.. ثم اصدر البيان التالي
بلدنا بالمصري: عمر سليمان يعلن ترشحه للرئاسة
لكن في نفس اليوم اللي انسحب فيه السيد منصور حسن، أعلن اللواء عمر سليمان عن نيته الترشح للرئاسة وقال فى تصريحات صحفية النهاردة انه "لا يستطيع أن يرفض نداء الشعب اذا ما طالبه بذلك".
الزيات: مشهد ترشح سليمان بعد منصور أشبه بلعب الـ3 ورقات
في نفس اليوم اللي انسحب فيه السيد منصور حسن، أعلن اللواء عمر سليمان عن نيته الترشح للرئاسة وللتعليق عن هذا المشهد وعن هل هناك علاقة بين ترشح أحدهم وإنسحاب الأخر إحنا معانا على الهاتف أ / ياسر الزيات الكاب الصحفي
بلدنا بالمصري: كيف اشتعلت المظاهرات والحرب في بورسعيد
خلونا بقة نروح لبورسعيد باللي يجرى فيها ومنها من ساعة ما تم الاعلان عن قرارات اتحاد الكورة بتجميد نشاط كرة القدم فى النادى المصرى لمدة موسمين، واغلاق استاد بورسعيد ومنع فريق المصرى من اللعب على أرضة لمدة 3 سنين. من كلام فارغ عن اعلان بورسعيد دولة مستقلة اتبرى منه أهالي بورسعيد على الاقل اللي قابلناهم، مرورا بمحاولات اقتحام مبنى قناة السويس، راح ضحيتها طفل عمره 13 سنة ومنع الآلاف من العاملين في مصانع منطقة الاستثمار من دخول بورسعيد
بلدنا بالمصري: إستمرار محاولات إقتحام مبنى قناة السويس
لمزيد من المعلومات عن المناوشات ومحاولات إقتحام مبنى قناة السويس إحنا معانا أ/ جمال نوفل مراسل جريدة المصري اليوم ببورسعيد
بلدنا بالمصري: ألتراس أهلاوي يعتصم أمام مجلس الشعب
لكن قرارات اتحاد الكورة اللي خلت بورسعيد كانت على وشك تنتحر قبل ما تهدى هدوء حذر الله اعلم ممكن يدوم لحد امتى، كانت القشة اللي بعدها قررت مجموعة التراس اهلاوي الاعتصام قدام مجلس الشعب لحين اشعار آخر.
بلدنا بالمصري: العدل ان الناس تطالب بحقوقها
لو بصينا كدة على بيحصل في بورسعيد او على رد فعل مجموعات الالتراس، أو على العمال أو الأهالي اللي بيقطعوا الطريق، أو على الناس اللي بتموت بعض على لقمة عيش أو انبوبة بوتاجاز او لتر بنزين، او على صرخة أهالي الشهدا في عز لحظات الغضب والياس بانهم هيجيبوا حق ولادهم بايديهم وغيرها من اللقطات والمشاهد اللي ما بطلناش نشوفها ونعيشها على مدار 15 شهر هم عمر الثورة، يمكن هنلاقيهم مجرد عينة بينة لايه اللي ممكن يحصل للبشر وللمجتمعات ولبلاد بحالها من تحت راس الاحساس بالظلم وغياب العدالة أو على الأقل الاحساس بان مسطرة العدالة مايلة.. ايه بقى اللي ممكن يحصل اكتر من كدة لو فضلت مسطرة العدالة مايلة او مالت عن كدة كمان لا قدر الله.. دة السؤال اللي هنحاول نجاوب عليه في فقرتنا الأخيرة "انت مش لوحدك" مع الدكتورة منال عمر.
من ضمن العينات البينات كمان على غياب العدالة وبالذات العدالة الاجتماعية مطلب الثورة مع العيش والحرية والكرامة الانسانية: كتر الاعتصامات والاضرابات اللي بيحلى للبعض يسميها فئوية وكانها تهمة ولا عار على اللي بيطالب بحقه... بس لما تبقى المظاهرات والاعتصامات "الفئوية" تقريباً في كل القطاعات من أطباء التكليف، لمصلحة الضرايب للجهاز المركزي للمحاسبات، غير المصانع ولحد النقل العام.. ماعادش ينفع بقة نسميها فئوية.. لإن الظلم لما يعم في الحالة ديه يبقى عدل ان الناس تطالب بحقوقها
بلدنا بالمصري: ويستمر إضراب العاملين بالنقل العام
ويستمر إضراب العاملين بالنقل العام يوماً تلو الأخر دون أن يتحرك أحد لحل المشكلة
بلدنا بالمصري: مسيرة المركزي للمحاسبات للمجلس العسكري
دة حال العاملين في النقل العام، اما العاملين في الجهاز المركزي للمحاسبات وبعد سبعة ايام اعتصام ولا حياة لمن تنادي، لقوا انه ما بدهاش ووجبت مسيرة للمجلس العسكري، لعل وعسى.
بلدنا بالمصري: إزاي أهالينا في النوبة هيختاروا رئيسهم
وقبل الفاصل، خلونا نروح لحد أهالينا في النوبة، اللي ساعات كتير للأسف الشديد وحقهم على راسنا، بننسى أو بنعمل نفسنا مش واخدين بالنا انهم حتة أصيلة من البلد ديه.. خلونا نشوف ازاي هيختاروا رئيسهم ومنهم نستفيد.
بلدنا بالمصري: جدوى مقاطعة اللجنة التأسيسية للدستور
جدوى مقاطعة بعض قوى التيار المدني من داخل ومن خارج البرلمان لأعمال الجمعية التاسيسية لصياغة اول دستور لبلدنا بعد الثورة: هل بفايدة، هل هي شر لابد منه.. ولا لا منها ولا كفاية شرها؟!!!
صحيح انه بالاعلان عن تشكيل الجمعية التاسيسية لصياغة اول دستور مصري بعد الثورة، كان المفروض نكون بنخطي اهم خطوة على الطريق اللي حلمنا بيه واحنا واقفين الكل في واحد في ميادين التحرير ننادي بعلو الصوت مش بس على العيش والحرية والعدالة الاجتماعية والكرامة الانسانية، لكن كمان كنا بنادي جميعاً على مصر مدنية: لا دينية ولا عسكرية.. لكن السؤال النهاردة وبعد تشكيل اللجنة بالنسب الآتية: (جرفيكس النسب واطبعوه):
الحرية والعدالة والنور السلفي: 75% من عضوية الجمعية من داخل البرلمان و40% من عضوية الجمعية من خارج البرلمان.. يعني حوالى من 65% إلى 70% من عضوية الجمعية التأسيسية ككل.
سيدات: 5% من الجمعية ككل - أقباط: 6% من الجمعية ككل
أولا: الى اي مدى احنا على الطريق الصحيح أو لسة قدامنا مطبات ومتاهات؟
ثانياً: أما وان مقاطعة اعمال الجمعية التاسيسية اصبحت سيناريو دخل مبدئياً في حيز التنفيذ ومازال مطروح بقوة بالنسبة للتيار المدني، فالسؤال وجب عن جدوى المقاطعة وهل هي بفايدة ولا شر لابد منه ولا بالعكس ممكن تقف على الجميع بخسارة؟!!! الدكتور/ عمرو حمزاوي: احد اعضاء مجلس الشعب المنتخبين كعضو أساسي في الجمعية التاسيسية
الدكتور/ هاني سري الدين: عضو حزب المصريين الاحرار واحد الشخصيات الحزبية والعامة المنتخبة كعضو
احتياطي في الجمعية التاسيسية واول من تقدم باستقالته رسميا من اعمالها
الاستاذ/ محمد العجاتي: المدير التنفيذي لمنتدى البدائل العربي وعضو حزب التحالف الشعبي الاشتراكي
بلدنا بالمصري: بيحصلنا إيه لما يغيب العدل - د. منال عمر
لو بصينا كدة على بيحصل في بورسعيد او على رد فعل مجموعات الالتراس، أو على العمال أو الأهالي اللي بيقطعوا الطريق، أو على الناس اللي بتموت بعض على لقمة عيش أو انبوبة بوتاجاز او لتر بنزين، او على صرخة أهالي الشهدا في عز لحظات الغضب والياس بانهم هيجيبوا حق ولادهم بايديهم وغيرها من اللقطات والمشاهد اللي ما بطلناش نشوفها ونعيشها على مدار 15 شهر هم عمر الثورة، يمكن هنلاقيهم مجرد عينة بينة لايه اللي ممكن يحصل للبشر وللمجتمعات ولبلاد بحالها من تحت راس الاحساس بالظلم وغياب العدالة أو على الأقل الاحساس بان مسطرة العدالة مايلة.. ايه بقى اللي ممكن يحصل اكتر من كدة لو فضلت مسطرة العدالة مايلة او مالت عن كدة كمان لا قدر الله.. دة السؤال اللي هنحاول نجاوب عليه في فقرتنا الأخيرة "انت مش لوحدك" مع الدكتورة منال عمر.
من ضمن العينات البينات كمان على غياب العدالة وبالذات العدالة الاجتماعية مطلب الثورة مع العيش والحرية والكرامة الانسانية: كتر الاعتصامات والاضرابات اللي بيحلى للبعض يسميها فئوية وكانها تهمة ولا عار على اللي بيطالب بحقه... بس لما تبقى المظاهرات والاعتصامات "الفئوية" تقريباً في كل القطاعات من أطباء التكليف، لمصلحة الضرايب للجهاز المركزي للمحاسبات، غير المصانع ولحد النقل العام.. ماعادش ينفع بقة نسميها فئوية.. لإن الظلم لما يعم في الحالة ديه يبقى عدل ان الناس تطالب بحقوقها.
ايه اللي بيجرى لنا وبيطلع اسوأ ما فينا لما مسطرة العدل تميل؟!!
ليست هناك تعليقات:
إرسال تعليق