برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة الاحد 11 مارس 2012 يوتيوب كاملة
البرلمان يسير في خطوات سحب الثقة من حكومة الجنزوري
يسعد مساكم وحلقة جديدة من بلدنا بالمصري.. وحلقة النهاردة زي كل يوم حد حلقة طويلة عريضة هنبداها بآخر أخبار بلدنا وهنختمها كالعادة زي كل يوم حد مع الدكتورة منال عمر والنهاردة ولأسباب كتير هنتكلم عنها بالتفصيل، آن الأوان نعرف ونبقى على بينة من أمرنا، بعد سنة أولى ثورة، احنا في سنة كام نمو أخلاقي ومعرفي كأفراد وكمجتمع وايه علاقة دة بالثورة اللي قامت وباللي خدناه منها لحد النهاردة.. وعلاقة دة بأخلاق الميدان، جت منين وراحت فين وأسئلة تانية يطول شرحها هنستعين عليها بالدكتورة منال عمر في الختام.. وما بين البداية والختام هيكون لنا كلام عن نعمة التنوع والاختلاف ولأي مدى احنا بنصونها وبنبني عليها أو بنهدرها ويمكن بنهدها أحياناً بوعي وأحياناً مش داريانين والسؤال دة هنطرحه النهاردة، فيما يخص المجتمع ككل والاعلام بشكل خاص..
أما في فقرتنا اللي جاية بعد آخر اخبار بلدنا_وبما ان من آخر أخبارها النهاردة ان المحكمة العسكرية حكمت ببراءة الطبيب المجند في قضية كشف العذرية_ فهيكون معانا ولأول مرة الأطراف الرئيسية في القضية وجهاً لوجه خارج ساحة القضاء العسكري ودة معناه انه هيكون معانا الدكتور أحمد عادل المتهم الوحيد في القضية واللي برأته المحكمة العسكرية النهاردة، في أول ظهور اعلامي ليه.. أما سميرة ابراهيم صاحبة القضية بصفتها المجني عليها فحالتها النفسية من بعد الحكم ما صدر لا تسمح لكن غيابها هيعوضه حضور محاميها الأستاذ أحمد حسام وفي حضور محامية الطبيب الأستاذة/ هويدا سالم..
فزي ما قلنا كدة من البداية انها هتكون حلقة طويلة عريضة، وهنبدأها بالتأكيد بجلسة مجلس الشعب اللي استنيناها بفارغ الصبر لاستجواب الحكومة حوالين قضية التمويل الأجنبي وسفر المتهمين الأجانب اللي طاروا في ظروف غامضة.. جلسة غاب عنها رئيس الحكومة لأسباب شخصية ما يعلم بيها الا ربنا وانتهت بموافقة المجلس على السير في اجراءات سحب الثقة من الحكومة ورفض المعونة الأمريكية، بعد تحميل المجلس العسكري المسؤولية الحقيقية بصفته الحاكم الفعلي
بلدنا: النواب يعتبرون غياب الجنزوري إهانة للمجلس
الجلسة الصباحية لمجلس الشعب غاب عنها رئيس الحكومة والنواب اعتبروا غيابه اهانة للشعب ونوابه ورفضوا أي أعذار ايا كانت، أما الجلسة المسائية واللي كانت مخصصة لمناقشة انتشار مرض الحمى القلاعية وتهديده للثروة الحيوانية اللي ضربها في مقتل، فغابت عنها الحكومة من حيث الأصل فما كان من رئيس المجلس الا انه رفع الجلسة بمجرد ما بدأت واعتبر ان الحكومة بغيابها غير المبرر عن الجلسة المسائية افتعال لأزمة بينها وبين المجلس.
وحيد عبد المجيد: لائحة البرلمان ليس بها كلمة سحب الثقة
و للتعقيب عن ما دار بمجلس الشعب اليوم من غضب النواب بسبب غياب الحكومة عن مجلس الشعب معنا على الهاتف أ/ وحيد عبد المجيد النائب بمجلس الشعب
بلدنا بالمصري: جمع التوقيعات لسحب تفويض عبد المعز
من ناحية تانية، قضاة الاستئناف مازالوا مستمرين في جمع التوقيعات لطلب جمعية عمومية طارئة لسحب التفويض من المستشار عبد المعز ابراهيم رئيس محكمة الاستئناف..
بلدنا بالمصري: أكثر من ٢٠٠ سحبوا أوراق الترشح للرئاسة
النهاردة كان من ضمن الأسئلة اللي طرحها عدد من النواب سؤال عن مين اللي ليه مصلحة في تشويه سمعة القضاء المصري في اللحظة ديه بالذات واحنا على دخلة اول انتخابات لأول رئيس للجمهورية بعد الثورة بتتم تحت اشراف قضائي كامل.. سؤال محتاج اجابة ومش لاقيها زي كتير من الأسئلة المصيرية اللي مالهاش عقاد نافع، خاصة وان العملية الانتخابية بدأت فعلاً من امبارح بفتح باب الترشح لانتخابات الرئاسة اللي هيفضل مفتوح لمدة شهر لحد 10 ابريل.. لكن هم يا دوب يومين لسة مافيش غيرهم وعدد اللي اتقدموا لسحب أوراق الترشح عدى ال200 وربنا يزيد ويبارك
بلدنا بالمصري: عصيان جماعي لحظر الدعاية للرئاسة
قرار اللجنة العليا المشرفة على الانتخابات الرئاسية بحظر الدعاية ليوم 29 ابريل، اثار جدل واسع دة غير ان معظم المرشحين المحتملين للرئاسة رفضوا القرار في حالة كدة اشبه بالعصيان الجماعي.
إحنا معانا على الهاتف د/ عمرو هاشم ربيع رئيس وحدة الدراسات المصرية بمركز الأهرام للدراسات السياسية
بلدنا بالمصري: أيمن نور يؤجل قرار الترشح حتى ٢١ مارس
أما الدكتور أيمن نور فأعلن النهاردة في مؤتمر صحفي عن موقفه من الترشح لرئاسة الجمهورية ولسبب ما ما كشفش عنه أعلن عن تأجيل التقدم بأوراق ترشحه ليوم 21 مارس!!!
بلدنا بالمصري: مذكرة للكتاتني لتعطيل مشروعات القوانين
هنرجع مرة تانية تحت قبة البرلمان، اللجنة التشريعية قررت النهاردة التقدم بمذكرة للدكتور سعد الكتاتنى، رئيس مجلس الشعب، حوالين اللي وصفته بتعطيل لجنة الاقتراحات والشكاوى للاقتراحات بمشروعات القوانين المعروضة عليها، وعدم الانتهاء منها لإحالتها إلى اللجنة التشريعية لمناقشتها.
بلدنا بالمصري: ردود أفعال براءة لطبيب كشوف العذرية
نروح للمحاكم والقضايا، وقضية الساعة النهاردة هي قضية كشوف العذرية اللي حكمت فيها المحكمة العسكرية النهاردة ببراءة المتهم الوحيد فيها الطبيب المجند أحمد عادل، واللي هيكون ضيفنا في فقرتنا اللي جاية في اول ظهور اعلامي ليه وفي أول لقاء بين أطراف القضية خارج ساحة القضاء العسكري.. لكن على ما ييجي اوان الفقرة هنستعرض سريعاً ابرز ردود الأفعال اللي توالت بمجرد النطق بالحكم. أولاً: بيان هيئة القضاء العسكري
بلدنا بالمصري: أولى جلسات قضية طلبة الجامعة الألمانية
النهاردة كانت الجلسة الولى من جلسات القضية المرفوعة قدام مجلس الدولة من طلبة الجامعة الألمانية المفصولين والمرفودين ضد ادارة الجامعة.... و إحنا معانا على الهاتف كل من أ/ فاطمة سراج المحامية لصالح طلبة الجامعة الألمانية و د / شوقي السيد المحامي لصالح الجامعة
بلدنا بالمصري: وزير الداخلية يرفض التطهير
وزير الداخلية أعلن النهاردة في مؤتمر صحفي ان موضوع اعادة هيكلة وزارة الداخلية لسة هياخد شوية والموضوع لسة محتاج شوية صبر ورفض التطهير واعلن عن مشروع قانون قدمته الوزارة لمجلس الشعب بالغاء المحاكمات العسكرية للظباط واستبدالها بمجالس تأديب واكد ان اطلاق الظباط للحية هيادي لفتنة بينهم وبين المواطنين.
بلدنا بالمصري: ٢٢ مارس يوم الجهاد لتطهير الشرطة
أما ائتلاف امناء الشرطة فأعلن هو كمان النهاردة في مؤتمر صحفي عن يوم 22 مارس يوم الجهاد لتطهير جهاز الشرطة.
بلدنا بالمصري: وقفة لترسيخ مفهوم المواطنة
تطبيق العدالة الاجتماعية والمساواة وترسيخ المواطنة واسقاط الأحكام الظالمة الصادرة ضد الأقباط وفتح ملفات وقضايا ازدراء الاديان، كانت أهم المطالب المرفوعة النهاردة في الوقفة الاحتجاجية قدام دار القضاءالعالي بدعوة من "اتحاد شباب ماسبيرو" وحركة "أقباط أحرار".
بلدنا بالمصري: أهالي المحروسة مش لاقيين لقمة العيش
من الحق في الصحة اللي رايح هدر للحق في لقمة العيش اللي بالضالين وطلوع الروح الله يكون في عون أهالي المحروسة اللي خرجوا من سنة يطالبوا بالعيش والحرية والعدالة الاجتماعية والكرامة الانسانية وبعد سنة واكتر لسة دة حالهم.
بلدنا بالمصري: مسرح العرائس يحتفل بيوبيله الذهبي
خلونا بقة نشم نفسنا شوية بعيد عن الزحمة ونروح لحد مسرح العرايس اللي احتفل امبارح ب100 سنة من عمره.
بلدنا بالمصري: مصور كفيف .. معجزة من معجزات الله
وقبل الفاصل، تعالوا نشوف بعينينا معجزة من معجزات الله في خلقه بتبصم بالعشرة ان مافيش مستحيل.
بلدنا: مواجهة بين طبيب كشف العذرية وسميرة إبراهيم
أول ظهور اعلامي للطبيب المجند اللي برأه القضاء العسكري النهاردة من تهمة الفعل الفاضح ومخالفة الأوامر العسكرية في القضية الشهيرة بقضية كشوف العذرية.
مرت سنة بالتمام والكمال بدأت بفض اعتصام 9 مارس بالقوة وما تلاه من اعتقالات، وما تلاه من أحاديث عن كشوف العذرية منها اللي في العلن ومنها في غرف مغلقة، ناهينا عن البيانات الرسمية والتقارير الحقوقية لحد ما قررت سميرة ابراهيم انها تكون البنت الأولى والوحيدة من أصل 17 بنت اللي تتقدم ببلاغ للمدعي العام العسكري تشكو فيه من توقيع كشف العذرية عليها وهتك عرضها من قبل أفراد من الجيش اثناء احتجازها في السجن الحربي بعد اعتقالها اثناء فض الاعتصام.. وانتهت السنة بحكم من المحكمة العسكرية ببراءة الطبيب المجند، دكتور/ أحمد عادل من تهمة الفعل الفاضح ومخالفة الأوامر العسكرية.. وبناءاً على طلب الأطراف الرئيسية في القضية أو على الأقل برضاهم، كلهم النهاردة ضيوف على بلدنا بالمصري ولأول مرة وجهاً لوجه في حوار بصريح العبارة خارج ساحة القضاء العسكري.. فيما عدا سميرة ابراهيم شخصياً لأسباب مختلفة من ضمنها حالتها النفسية بعد صدور الحكم ومن ضمنها رغبة الدكتور أحمد عادل في انه ياخد فرصته في التعبير عن نفسه لأول مرة بعد حوالي 10 شهور.. فقررنا احترام رغبته واحترام الحالة النفسية اللي بتمر بيها سميرة في نفس الوقت والبركة في محاميها.. فاسمحوا لي ارحب بيهم أولاً:
- الدكتور/ أحمد عادل
- هويدا مصطفى سالم: المحامية
- احمد حسام محامي سميرة إبراهيم
د. عمار علي حسن وواقعة الاعتداء عليه من ضباط شرطة
إحنا معانا على الهاتف د. عمار علي حسن الباحث السياسي لأن على ما يبدو أنه تعرض لحادث إعتداء هو وأخيه
بلدنا بالمصري: نعمة التنوع والاختلاف في الإعلام المصري
اذا الاختلاف والتنوع نعمة من عند ربنا فربنا والحمد لله انعم علينا بيها من وسع.. لكن السؤال: الى اي مدى احنا بنصونها أو بنتبتر عليها سواء في مجتمعنا عموماً أوفي اعلامنا خصوصاً؟!
النهاردة واحنا بنحاول نخطي لمصر جديدة رغم الحفر والمطبات والمتاهات اللي بتلف وترجع بينا لورا كل ما نقول يا رب خطوة لقدام، الله أعلم اذا كان واضح بالنسبة لنا ولا لأ حقيقة ان ماحدش هيخطي لوحده حتى لو فاكر انه يقدر يقطع الألف ميل، برده هيبص يلاقي نفسه في الآخر محلك سر، واننا لا يمكن نخطي خطوة واحدة لقدام الا جماعة.. وسنة الله في خلقه وحكمته انهم مختلفين ومتنوعين ومتساويين، والمفروض اننا مش عجبة في وسط الخلق لكن لأي مدى احنا مدركين ومحترمين قيمة تنوعنا وأهميتها وازاي بنتعامل معاها وهل احنا بنبني عليها ولا بنهدها وبوعي ولا من غير وعي.. والسؤال دة الحقيقة مطروح على المجتمع ككل، لكن هنا مطروح على الصحافة والاعلام المصري بشكل خاص كعينة بينة من المجتمع بيتأثر بيه وبيأثر فيه بدرجات متفاوتة.. السؤال هنطرحه النهاردة على ضيوفنا
- رشا عبد الله
- ايمن الصياد
- ياسر الزيات
والتلاتة زي كتير غيرهم من الصحفيين والاعلاميين والمتخصصين معنيين ومهمومين بقيمة التنوع عموماً وقيمة التنوع الاعلامي خصوصاً
بلدنا بالمصري: مصر في سنة كام نمو أخلاقي
انت مش لوحدك النهاردة مختلفة الى حد ما ويمكن هنبعد النهاردة شوية عن كرب ما بعد الصدمة لكن في النهاية الهدف واحد وهو اننا نخطي سوا لقدام.. بس عشان نخطي سوا لقدام لازم نبقى مدركين احنا اصلاً فين كأفراد وكمجتمع مش بس على المستوى السياسي والاقتصادي والاجتماعي والثقافي لكن كمان ويمكن قبل كل دة على المستوى الاخلاقي.. وبالتالي السؤال اللي هنحاول نجاوب عليه النهاردة هو احنا كمجتمع في سنة كام نمو اخلاقي؟!!!
ليست هناك تعليقات:
إرسال تعليق