برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاحد 19 فبراير 2012 يوتيوب كاملة
بلدنا بالمصري: انتخابات الرئاسة .. محدش فاهم حاجة
يسعد مساكم وحلقة جديدة من بلدنا بالمصري.. هنبدأها بآخر أخبار بلدنا وهنختمها و"انت مش لوحدك" مع الدكتورة منال عمر وزي ما وعدناكم الأسبوع اللي فات، الجلسة النهاردة_ان جاز التعبير_ جلسة مفنوجة للجميع فهنستنى نسمع صوتكم بكل اللي في نفسكم سواء كانت أسئلة ومحتاجين ليها اجابات أو كانت مجرد فضفضة والأصل في الموضوع إن المواجع ممكن تهون لما نحس اننا في الكرب سوا واننا مش لوحدنا لحد ما تزول الغمة ونرجع صاغ سليم.
آخر أخبار بلدنا، هنبدأها بانتخابات الرئاسة اللي بدأ عدها التنازلي على الأقل لفتح باب الترشيح أما بداية التصويت فلسة في علم الغيب زيها زي مسائل تانية متعلقة برده بانتخابات الرئاسة ويا اما في علم الغيب، أو مش باين لها راس من رجل أو بنضرب أخماس في أسداس يمكن نعرف نحل شفرتها، من أول قانون انتخابات الرئاسة اللي صدر بمرسوم بقانون سكيتي ولا من شاف ولا من دري قبل انعقاد مجلس الشعب بأربعة ايام، لحد قصة الرئيس التوافقي اللي لسة ما حدش فاهم لها أصل من فصل
بلدنا بالمصري: قصة الرئيس التوافقي .. نفي وصمت
قصة الرئيس التوافقي اللي تم الاعلان عنها في صورة تسريبات صحفية من يوم الخميس اللي فات، قومت الدنيا وما قعدتهاش وما عادلناش سيرة غيرها من أول مرشحين الرياسة للسياسيين للمحللين للصحفيين لوسائل الاعلام لحد المواطن العادي اللي هو أصلاً الطرف الأول المعني بالموضوع.. في حين ان الأطراف اللي أشارت ليها التسريبات الصحفية وهي تحديداً: الدكتور نبيل العربي كمرشح توافقي للمجلس العسكري وجماعة الاخوان المسلمين فالتزمت الصمت تماماً في الكام يوم اللي فاتوا، اللي توالت فيهم ردود الأفعال اللي كانت في مجملها رافضة للفكرة من حيث المبدأ وبغض النظر عن الاسم.. امبارح بس بدأ الخروج عن الصمت، على لسان الدكتور/ نبيل العربي شخصياً اللي نفى امبارح في تصريحات صحفية والنهاردة في بيان رسمي، ان يكون عنده اي نية للترشح تحت أي ظرف من الظروف.
ونفس الشئ بالنسبة لجماعة الاخوان المسلمين.. الجماعة نفت على لسان المتحدث الرسمي باسمها الدكتور/ محمود غزلان:
أما المجلس العسكري فلسة ملتزم الصمت تماماً وما صدرش عنه اي تعقيب أو تعليق رسمي ولا حتى على عهدة مصدر سيادي أو عسكري ولا حتى على عهدة ادمن صفحة المجلس..
على أي حال، بعد آخر أخبار بلدنا هيكون للرئيس التوافقي نصيب كبير من كلامنا وتحديداً مع مجموعة من شباب التيارات السياسية المختلفة
بلدنا بالمصري: مؤتمر اللجنة العليا لانتخابات الرئاسة
من ضمن الحاجات كمان اللي لسة مش باين لها راس من رجل فيما يخص انتخابات الرئاسة_غير موضوع الرئيس أولاً ولا الدستور أولاً_ موضوع قانون انتخابات الرئاسة نفسه.. يعني النهاردة وفي نفس اليوم اللي بتقرر فيه اللجنة التشريعية في مجلس الشعب مراجعة كل المراسيم بقوانين اللي صدرت عن المجلس العسكري بما فيها قانون انتخابات الرئاسة، اللجنة العليا لانتخابات الرئاسة برئاسة رئيس المحكمة الدستورية بتعقد أول مؤتمر صحفي وبتعلن عن تاريخ فتح باب الترشيح.. ولما أجلت الاعلان عن الجدول الزمني للانتخابات، أكدت ان التأجيل لحد ما يتم تحديد مواعيد للتصويت تناسب المصريين في الخارج وما جابتش أي سيرة لا من بعيد ولا من قريب عن التأجيل لحين مراجعة البرلمان للقانون!!!
بلدنا بالمصري: مناقشة البطالة تنتهي بخناقة تحت القبة
هنروح تحت قبة البرلمان، نقل الرئيس المخلوع لمستشفى سجن طرة وقطع العلاقات مع النظام السوري كان ليهم نصيب النهاردة في المناقشات، لكن مشكلة البطالة هي اللي كان ليها نصيب الأسد وانتهت بشد وجذب وصوت عالي بين النواب وبين الحكومة
بلدنا: تقصي حقائق الشعب تنفي تهجير أقباط العامرية
من ناحية تانية، مجلس الشعب وافق النهاردة على تقرير لجنة تقصى الحقائق الخاص بأحداث العامرية، اللي عرضه النائب محمد أنور السادات رئيس لجنة حقوق الإنسان، واللي نفى فيه تعرض بعض الأسر القبطية بمنطقة العامرية بالإسكندرية لعمليات تهجير قسرى.
بلدنا بالمصري: ليه ندمر جامعة النيل علشان زويل
قدام مقر مجلس الشعب، وبالتزامن مع اجتماع لجنة التعليم والبحث العلمي، كانوا الطلبة والباحثين والاساتذة في جامعة النيل بيطالبوا بانقاذ جامعتهم.. والسؤال اللي رفعوه بالبنط العريض: "ليه عشان نبني مشروع زويل ندمر جامعة النيل"؟!!!
بلدنا بالمصري: اعتصام طلبة هندسة القاهرة مستمر
أما اعتصام طلبة كلية الهندسة جامعة القاهرة فلسة مستمر من حوالي أسبوع حتى بعد اخلاء سبيل الطالب عبد الرحمن موافي على ذمة الاحداث اللي اشتهرت باحداث وزارة الداخلية.. ليه بقة مستمر وعايزين ايه تاني؟! سؤال هنطرحه وهنحاول نجاوب عليه مع مجموعة من طلبة كلية الهندسة من ضمنهم: عبد الرحمن موافي.
بلدنا: قتلى في المنيا .. ومهاجمة النوبيين للمحكمة
شهدت قريتي أطسا البلد وأطسا المحطة مشاجرات بالأسلحة النارية وقع على إثرها عشرات المصابين وعدد من القتلى .. مئات النوبيين من قرية غرب سهيل يهاجمون محكمة أسوان ويحطمون الأبواب والنوافذ بالحجارة
بلدنا بالمصري: أبو العربي مش لاقي مكان يبات فيه
أما أبو العربي، ودة اسمه الحركي أو اسمه على حسابه على تويتر، كان متشحطط طول الليل امبارح وبيدور على مكان يبات فيه وكتب بالنص: "أنا مقيم ف القاهرة في مبني اسمه " بيت طلبة بورسعيد", المحافظة قفلته وبعتتلنا رسالة النهاردة ما تروحوش تباتوا الفترة دي حفاظاً على أمنكم
بلدنا: إخلاء سبيل 13 متهماً في أحداث وزارة الداخلية
قرر المستشار بكر أحمد رئيس محكمة جنح عابدين إخلاء سبيل 13 متهم بينهم محمود القرش وشريف نافع، وتجديد حبس 7 آخرين لمدة 15 يوم، علي ذمة التحقيقات في أحداث اشتباكات وزارة الداخلية التي إندلعت إحتجاجا علي مذبحة استاد بورسعيد.
وشهدت المحكمة تواجد أمني كثيف منذ ساعات الصباح الباكر، وتظاهر العشرات أمام باب المحكمة إعتراضا علي حبس المتهمين، فيما قام رجال الأمن بإغلاق أبواب المحكمة لمنع دخول المتظاهرين إلي مقر المحكمة ومشاركة أهالي المتهمين لهم في هذه الوقفة الإحتجاجية، وردد العشرات امام المحكمة هتافات تطالب بإخلاء سبيل المحبوسين وتندد بالحكم العسكري
بلدنا بالمصري: عرف وعلل الرئيس التوافقي
عرف وعلل واكمل ما يلي واعرب ما تحته خط في سياق اللحظة اللي بتمر بيها بلدنا والخط في اللحظة ديه تحت "الرئيس التوافقي" مع التوضيح: هل هو خط مستقيم ولا بيلف ويدور .. هل احنا في اللحظة ديه محتاجين فعلاً رئيس توافقي ولا مالوش عازة ويفتح الله؟!!! ولو فعلاً محتاجين رئيس توافقي، محتاجينه ليه وتوافقي بمعنى ايه؟ ومين دة أو مين دول اللي من حقهم يتوافقوا بالنيابة عن شعب بحاله امتلك عصمته في ايده ومش ناوي يتنازل عنها؟! وهل الرئيس التوافقي دة خط مستقيم واقصر طريق بين النقطة اللي احنا فيها وبر الأمان ولا متاهة جديدة؟!!! أسئلة هنطرحها على مجموعة من شباب التيارات السياسية المختلفة:
عبدالرحمن موافي بعد إخلاء سبيله في بلدنا بالمصري
طلبة كلية الهندسة جامعة القاهرة لساهم معتصمين ليه حتى بعد اخلاء سبيل زميلهم عبد الرحمن موافي؟!!!
طيب عبد الرحمن وخرج بالسلامة ايه لزمته الاعتصام بقة؟!!! سؤال مطروح على طلبة كلية الهندسة جامعة القاهرة المستمرين في اعتصامهم من حوالي أسبوع..
عبد الرحمن موافى -- طالب بكلية الهندسة وأحد معتقلى أحداث وزارة الداخلية الأخيرة
شريف محمد هانى -- عضو مجلس اتحاد طلاب كلية الهندسة
محمود سامى -- أحد الطلبة المعتصمين بالكلية
بلدنا: انت مش لوحدك - د. منال عمر - ١٩ فبراير ٢٠١٢
أنا منى أشتركت ف الثوره وكارها كل حاجه حتي ولادي وكل الناس وعايزه أسيب البلد مع أني بعشقها
انابحس ان بأذى نفسى عشان مش قادرة أنزل الميدان عشان مامتى مانعنى.. إيمى.
أنا أم مصريه راضية وصابره ومتفائله وعندى يقين وثقه بربى ووطنى وإن فرج ربى قريب وبحبكم أوى حتى لما بختلف معكم جزاكم الله خير.
أنا تعبانه أوى ومكتئبه ودائمه البكاء علي شهداء بورسعيد وحاسه انهم كلهم أولادى واخواتى
I feel i can't raise my daughter in my country no hope i want to leave but also i can't so i can't do anything so no hope
ليست هناك تعليقات:
إرسال تعليق