برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة الثلاثاء 24 يناير 2012 يوتيوب كاملة
ريم ماجد: بعد عام من الثورة أحلامنا بقت ممكنة
يسعد مساكم وحلقة خاصة جداً من بلدنا بالمصري.. حلقة ليلة العيد اللي بيهل علينا بعد سنة طويلة عريضة بحلوها ومرها.. سنة كان من حق البلد ديه وأهلها وناسها الجدعان حمالين القسية ان يبقى حلوها اكتر بكتير من مرها فتبقى الليلة ديه ليلة عيد بحق وحقيقي وبكرة نعيد بقلب جامد وضمير مرتاح والدنيا مش سايعانة من الفرحة.. لكن ليس كل ما يتمناه المرء يقدر يدركه_في سنة واحدة_ لكن بالتأكيد يقدر يدركه طول ما هو قادر يحلم وطول ما هو قادر يدافع عن حلمه وطول ما هو قادر يدفع التمن مهما كان غالي لحد ما يشوف الحلم حقيقة.. والحلم الوحيد اللي اكيد ما بيفارقش خيال حد فينا هو اننا نعيش ونشوف بلدنا احسن بلد في الدنيا: مستقرة لكن حرة عمرها ما تطاطي ولا تنخ.. قلبها كبير يساع كل الولاد مهما كتروا ومهما اختلفوا وتساع من الحبايب ملايين زي ما كانت طول عمرها لا بتخاف من خواجة ولا من أجنبي ولا بتخوفه منها، بالعكس يقع في غرامها وما يقدرش على بعدها ويشتاق لها ويمكن حتى يحس بالغربة بعيد عنها وييجي يزور فيجاور وعمره ما يفارقها.. بلد بتزرع وتحصد وتصنع وتصدر وتطرح علم وفن ويعم خيرها على الدنيا كلها.. بلد ما بتنساش ولادها ولا بتقسى عليهم ولا بتظلمهم ولا بتخونهم ولا بتكفرهم.. بتعلمهم احسن تعليم وتعالجهم احسن علاج وتشغلهم احسن شغل وتسكنهم في بيوت تليق بمقامهم وتشيل كرامتهم على راسها من فوق لا ذل ولا مهانة.. بلد ما عندهاش خيار وفقوس الكل عليه نفس الواجبات وليه نفس الحقوق وقدام القانون ما حدش على راسه ريشة وحد على راسه بطحة وما حدش احسن من حد!!! فيه حد ما بيحلمش الحلم دة ونفسه يغمض ويفتح يلاقيه حقيقة؟!!... في الأول وفي الاخر: تعددت الوسايل والحلم واحد..
صحيح ان السنة اللي فاتت كان مرها اكتر من حلوها، لكن مش حقيقي اننا ما خدناش حاجة من الثورة وكفاية ان الأحلام اللي كانت مستحيلة لحد زي النهاردة من سنة واحدة النهاردة بقت ممكنة... لكن الأحلام الممكنة ديه اللي لسة ما اتحققتش، بالناس تتحقق.. بالناس اللي هتنزل وتشارك والناس اللي مش هتنزل لكن هتبارك وحتى بالناس اللي لا هتشارك ولا هتبارك لكن هتسعى لتحقيق نفس الحلم بطريقتها، لكن في كل الحالات من غير لوم ولا عتاب وبالتأكيد من غير تخوين ولا اتهامات... وأهم حاجة ما حدش يدعي على حد.. خلونا ندعي كلنا ان ربنا يقدرنا ونحقق الحلم ونصبح على وطن نستاهله ويكون اجمل كمان من اللي بنحلم بيه!!!
انا طولت عليكم بس الليلة ديه مش زي أي ليلة، فيه اللي هيباتها خايف وحاطط ايده على قلبه.. وفيه اللي هيباتها مطمن وعارف ان اللي جاي أجمل.. وفيه اللي هيباتها قلقان بس مش خايف.. وفيه اللي هيباتها نفسه ومنى عينه تقلب بغم بس انشاءالله ربنا هيخيب ظنه.. وفي كل الحالات: "لن يصيبنا الا ما كتب الله لنا" وفي كل الحالات ربنا هيكون عند حسن ظننا بيه وهيسعى معانا وهيدينا على قد نوايانا وعلى قد تعبنا.
بلدنا: كلمة طنطاوي في الذكرى الأولى لثورة يناير
حلقة النهاردة من اولها لآخرها هنبص فيها على بكرة من زوايا مختلفة وبعيون مختلفة: بعيون المسؤولين والثوار والبرلمان والناس العادية اللي نازلة الميدان من غير ما ننسى "صوت الأغلبية الصامتة"..
وخلونا نبدأ المسؤولين، وتحديداً بالكلمة اللي وجهها النهاردة ل"شعب مصر العظيم" القائد العام رئيس المجلس الأعلى للقوات المسلحة المشير حسين طنطاوي بمناسبة عيد الثورة.
بلدنا: جلسة البرلمان لمناقشة حقوق الشهداء والمصابين
الغاء حالة الطوارئ كانت من المطالب الرئيسية والملحة لعدد كبير من نواب البرلمان المنتخب في أولى جلساته العامة، لدرجة ان بعضهم قال بوضوح انه عار على برلمان الثورة انه ينعقد ويمارس مهامه في ظل حالة الطوارئ وكفاية انه تم انتخابه في ظلها.. وبعضهم شاف انه الغاء حالة الطوارئ لا يجوز انه يكون مطلب من مطالب البرلمان وانه آن الوان ان البرلمان يتخذ اجراءات فورية لرفع حالة الطوارئ قبل بكرة.. فكان قرار المشير بالغاء حالة الطوارئ ابتداءاً من بكرة فيما عدا حالات البلطجة.. الجلسة العامة النهاردة تم تخصيصها بالاتفاق بين جميع النواب لمناقشة حقوق الشهدا والمصابين.. دة كان العنوان العريض اللي قلب على النواب مواجع كتير وكلها لها علاقة بثورة ما كملتش ولازم تستمر لحد ما تكمل وتحقق أهدافها اما من خلال البرلمان أو من خلال البرلمان والميدان في ايد واحدة.
بلدنا: بيان ثوار مصر في الذكرى الأولى للثورة
أما الثوار فأعلنوا بيانهم النهاردة بصريح العبارة وبالفم المليان. البيان دة بيعبر عن اكتر من 100 حزب وحركة وائتلاف سياسي واتحادات وقوى نقابية عمالية ومهنية وحملات لدعم مرشحي الرئاسة.. من ضمن الحركات والائتلافات: حركة شباب من أجل العدالة والحرية، الجبهة الحرة للتغيير السلمي، الجمعية الوطنية للتغير, اللجان الشعبية للدفاع عن الثورة، ائتلاف شباب الثورة، الائتلاف الإسلامي الحر، جمعية أطباء التحرير، اتحاد شباب ماسبيرو، تكتل شباب بورسعيد، حركة ثوار سيناء، ائتلاف الثورة الديمقراطي بقنا، اتئلاف ثورة 25 يناير في الصعيد، تكتل شباب السويس، الجبهة الثورية بدمياط، الجبهة الوطنية لمتحدي الإعاقة، وغيرها من الحركات الشعبية..
ومن الاتحادات الطلابية والنقابات والحركات التعليمية:" اتحادات طلاب جامعات القاهرة ، وحلوان، وعين شمس, و نقابة المعلمين المستقلة واتحاد المعلمين المصريين وحركة شباب المعلمين ".
ومن القوى العمالية:عمال النقابات المستقلة والنقابات المهنية واتحاد أصحاب المعاشات.
ومن الأحزاب: أحزاب تحالف الثورة مستمرة والكتلة المصرية والوسط، والوفد، والجبهة الديمقراطية، والكرامة، والعربي الناصري.. ومن الأحزاب الإسلامية (النور، والعمل، والأصالة)
بلدنا: بيان صوت الأغلبية الصامتة في ذكرى ثورتنا
حركة صوت الأغلبية الصامتة أكدت مشاركتها بكرة في ميدان العباسية على صفحتها على الفاس بوك و أن الحركة هتشارك ميدان التحرير ببعض أعضائها فقط و لكن دعوتهم للحضور الي ميدان العباسية و ليس لأي مكان أخر و سوف يحي الأحتفال النجم عمرو مصطفى بفقرات عاى حد وصفهم بالمفاجأة و لأول مرة سوف تشارك المطربة شذى
شباب الدبلوماسيين يضيئون مبنى الوزارة بـ ثورة يناير
أضىء مبنى وزارة الخارجية، ليل الاثنين ، بعبارة «ثورة يناير» على طول المبنى المكون من 34 دورا، بمبادرة من شباب الدبلوماسيين بالوزارة. قال المستشار عمرو رشدى، المتحدث الرسمى باسم وزارة الخارجية: إن فكرة إضاءة مبنى الوزارة بكلمة «ثورة يناير» جاءت بمبادرة من شباب الدبلوماسيين، ووافق عليها وزير الخارجية وأيدها وأصدر أوامره للإدارة الهندسية بالوزارة لتنفيذها، فى إطار الاحتفال بذكرى الثورة.
بلدنا: عملات تذكارية تحمل كرامة، حرية، عدالة
وزارة المالية قررت هي كمان الاحتفال بعيد الثورة بطريقتها، وطرحت عملات تذكارية: جنيه وخمسة جنيه شايلة شعار: "كرامة، حرية، عدالة"
بلدنا بالمصري: بلاغ .. تهديد صريح بقتل الثوار
قبل ما نطلع فاصل، عندنا بلاغ عاجل للنائب العام ووزير الداخلية والمجلس الأعلى للقوات المسلحة بخصوص فيديو منتشر على الانترنت فيه تهديد صريح بالقتل وباستخدام العنف والسلاح بحجة انهم شباب بيحب مصر بجد وبيحب الجيش بجد وسفك دماء "الخائن" عندهم مستباح.
بلدنا: استعدادات الثوار لاستكمال الثورة في عيدها
احنا معانا النهاردة مجموعة من اللي راجعين بكرة او بمعنى اصح اللي بقى لهم سنة في الميدان لكن بكرة بالنسبة لهم ليه معاني مختلفة وليه ترتيبات كمان مختلفةرامى غانم: عضو المكتب السياسى للجبهة القومية للعدالة الديمقراطية
الدكتور/ محمد فتوح: رئيس جمعية اطباء التحرير
عمرو على: عضو المكتب السياسى بحركة 6 إبريل ومسئول العمل الجماهيري ومنسق لتحركات ومسيرات ميدان التحرير فى 25 يناير
- المهندس/ إيهاب نجيب: من شباب الإخوان وعضو لجان الإخوان للدفاع عن الميدان
بلدنا بالمصري: الثورة في عيدها .. بين الميدان والبرلمان
الكل متفق على انه لولا الثورة ولولا الميدان ما كان البرلمان.. لكن هل البرلمان معناه ان الميدان راحت عليه والبركة في البرلمان يكمل الثورة ولا البرلمان يشوف شغله والميدان يعمل اللي عليه ولا البرلمان والميدان يمشوا كتف بكتف وايد واحدة.. الاجابة النهاردة هتكون على لسان ممثلين عن الشعب في مجلس الشعب وناس من الشعب اللي في الميدان.
ليست هناك تعليقات:
إرسال تعليق