برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة الاربعاء 18 يناير 2012 يوتيوب كاملة
بلدنا بالمصري: هاشتاج آدي اللي خدناه من الثورة
يسعد مساكم وحلقة جديدة من بلدنا بالمصري.. هنبدأها ب"آدي اللي خدناه من الثورة".. الجملة اللي بتبدأ بيها عادة وصلة الدعا على الثورة وأيام الثورة واللي عملوها واللي خدناه منها!!! بس هي النهاردة عبارة عن ما يعرف على تويتر بال"هاشتاج".. _أنا شخصياً قبل ما اكون على تويتر كان لما حد يقول قدامي هاشتاج احس اني من كوكب الأرض وهو من كوكب تاني ولا يمكن نتقابل في أي مكان في نفس الدنيا، والله بقة لو حاول يشرح لي، تزيد الطينة بلة_ بس الحقيقة ان الموضوع طلع بسيط، الهاشتاج هو عبارة عن فكرة أي فكرة تخطر على بال أي حد ويبتدي الكل يفكر فيها أو حواليها بصوت عالي من خلال التعليقات.. من ضمن الأفكار ديه واللي ظهرت مؤخراً فكرة "آدي اللي خدناه من الثورة" أنا أول ما قريتها حطيت ايدي على قلبي واستعديت للوصلات إياها بس لما لقيت التعليقات مبهجة ماهانش علينا تنشرح قلوبنا لوحدنا:
أما أنا فقعدت كتير افكر خدنا ايه ولا ايه من الثورة ومن كتر ما احترت قررت مش هاكتب حاجة خالص وكفاية اللي انا بقراه.. لحد ما قابلت النهاردة في السكة، مواطن صالح بيشتغل أمن في شركة، وقفني مخصوص عشان يقوللي انه زعلان مني.. فتوقعت على طول انه هيقولي اننا بنشعللها ولازم نهدى شوية ومصر مش كلها ميدان التحرير واستعديت تماماً لمناقشة صعبة: فلقيته زعلان مني لاني ساعات باقول ان "الثورة لسة ما وصلتش" مع انه شايف انها "الثورة وصلت لنا (دة تعبيره هو) وخدنا منها حاجات كتير حلوة"!!! فقلت في عقل بالي: "آدي اللي خدناه من الثورة"!!
بلدنا: قانون العسكري لانتخاب الرئيس غير دستوري
من ضمن كمان الحاجات اللي خدناها من الثورة اننا عاجلاً أو عاجلاً جداً هيكون عندنا رئيس احنا اللي هننتخبه وبعد ما ننتخبه لا هنعتبره زعيم خالد ولا مؤمن ولا رزين ولا زعيم اصلاً ولا هنعتبره راس الحكمة ولا أب وصي علينا وعارف مصلحتنا اكتر مننا.. هنعتبره موظف شفنا فيه الكفاءة اللازمة وهو بقة وشطارته والله طلع عند حسن ظننا انتخبناه مرة كمان وشكراً على كدة.. خيب ظننا يبقى شكراً على كدة وهنختار واحد غيره وهكذا.. أما بقة لو خلف وعده معانا اللي اقسم عليه بالله العظيم أو خالف القانون: هنحاسبه وهنحاكمه من غير ما يكون ولاد يتأسفوله بالنيابة عننا أو يعتبرونا قلالة الأصل!!! بس عشان كل دة يتم لازم اولاً يكون عندنا "قانون لانتخاب رئيس الجمهورية".. ولسبب ما مش مفهوم المجلس الأعلى للقوات المسلحة قرر يحط بنفسه القانون دة بالتشاور مع المجلس الاستشاري وبموافقة الحكومة عشان يصدر عنه بمرسوم بقانون، مع ان كلها كام يوم والبرلمان المنتخب يبدأ يمارس مهامه وساعتها هو الأولى باصدار القانون او بمعنى اصح مش من حق اي جهة تانية غيره تصدر اي قوانين في وجوده بما انه السلطة التشريعية المنتخبة!!! المهم يعني انه المجلس العسكري انتهى فعلاً من اعداد القانون وبعد موافقة الحكومة تمت احالته للمحكمة الدستورية لمراجعته وبيان مدى دستوريته.. فأصدرت المحكمة الدستورية قرار النهاردة بإن عدد من مواد القانون مش مطابق لأحكام الإعلان الدستورى الصادر فى 30 مارس عام 2011
بلدنا: دفاع مبارك يحمل الجيش مسئولية قتل المتظاهرين
أما الرئيس المخلوع اللي احنا بنحاكمه، فالنهاردة كانت تاني جلسات سماع مرافعة الدفاع عنه اللي نفى تماماً مسؤولية المتهمين عن قتل المتظاهرين ومن ضمن حججه إن الرئيس المخلوع اصدر أمر للجيش بالتدخل لحفظ الأمن الساعة 4 يوم الجمعة 28 يناير.
بلدنا: طارق العوضي متهم بزعامة عصابة وسرقة سلاح
فيه مثل شعبي بيقول: "التاجر لما يفلس يقلب في دفاتره القديمة".. مش عارفة ليه خطر على بالي المثل دة وانا باقرا خبر استدعاء النيابة للمحامي/ طارق العوضي، مدير مركز دعم دولة القانون وعضو الحزب المصري الديمقراطي الاجتماعي، لسماع أقواله في البلاغ المتقدم ضده من سنة فاتت، وبيتهمه بالتحريض على حرق قسم حدايق القبة، والاستيلاء على أسلحه ناريه من داخل القسم: (9 طبنجات و2 بندقية) وتهريب المسجونين وقيادة عصابة من الملثمين!!!
بلدنا: إلزام الحكومة بصرف معاش شهري لمصابي الثورة
القضاء الإداري فانتصر النهاردة لمصابين الثورة واصدر حكمه بالزام الحكومة بصرف معاش شهري ليهم. الحكم صدر في الدعوى المرفوعة من المركز المصري للحقوق الاقتصادية والاجتماعية.
بلدنا: ضرب نوارة نجم باعتبارها من أعداء الوطن
"اعرف عدوك".. دة شعار الحملة الجديدة اللي أطلقها النهاردة "ائتلاف الأغلبية الصامتة" واختاروا نطقة الانطلاق من عند ماسبيرو وبدأوها بتوزيع ورقتين على الناس اللي ماشية على رجليها أو في العربيات، فيهم قايمة طويلة باسماء شخصيات عامة واعلاميين محسوبين على الثورة.. واجنا كالعادة في كل فاعلياتهم من روكسي للعباسية لماسبيرو بنقوم بواجبنا كوسيلة اعلامية وبنبعت فريق لتغطية الحدث.. وكالعادة بيكون مصيرنا يا اما الضرب والطرد، يا اما الطرد باللتي هي احسن (من غير ضرب يعني) فالحمد لله النهاردة جت على قد كدة وفريقنا اتطرد واتمنع من انه يقوم بمهمته بس من غير ضرب.. لكن الضرب كان من نصيب نوارة نجم، خاصة وان اسماءها كان من ضمن أسماء "أعداء الوطن".
بلدنا بالمصري: وقف بث تريلر إسمي ميدان التحرير
في ماسبيرو برده سبحان الله، وعلى غفلة تم وقف بث المقدمة الإعلانية أو التنويه عن الفيلم الوثائقي "اسمي ميدان التحرير" بعد ما كان تم الإعلان فعلا عن عرضه في عيد الثورة الأول.. خلونا الأول نشوف ايه نوع المادة اللي اتمنعت وبعدين نحاول نفهم، لعل المانع خير.
شيخ الأزهر: 25 يناير مش للاحتفال احتراماً لذكرى الشهداء
هنحتفل بقة يوم 25 ولا مش هنحتفل يوم 25؟ السؤال دة كان مطروح بقوة النهاردة في اكتر من مناسبة وكانت الاجابة المشتركة: "25 يناير مش للاحتفال احتراماً لذكرى الشهداء".. الاجابة ديه اول ما جت جت على لسان شيخ الأزهر، الامام الاكبر الدكتور أحمد الطيب خلال لقاءه بمجموعة من شباب الثوار.
بلدنا: اليسار يرفض الاحتفال وسيطرة الإخوان على 25 يناير
نفس الاجابة تقريباً وتحديداً ان 25 يناير مش للاحتفال احتراماً لذكرى الشهداء ومش قبل القصاص، كانت كمان لسان حال عدد من الاحزاب اليسارية اللي اعلنوا النهاردة موقفهم من المشاركة في 25 يناير.
بلدنا: بيان الأخوان عن زيارة السفيرة الأمريكية
أصدرت جماعة الأخوان المسلمين بيان صحفي عن زيارة السفيرة الأمريكية للمرشد العام للجماعة أ/ محمود حسين و جاء فيه ما تم في الزيارو
بلدنا: تطوير المشاريع الصغيرة في مؤتمر رواد الأعمال
تعالوا قبل الفاصل نتعرف على طريقة جديدة لتطوير المشاريع الصغيرة المهتمة بالتكنولوجيا من خلال مؤتمر لرواد الاعمال
بلدنا بالمصري: الشعب يراقب أداء البرلمان
من ضمن أهم الحاجات اللي خدناها من الثورة اننا أخيراً بقى لنا صوت.. وصوت على صوت بقى عندنا برلمان منتخب شغلته الأساسية مع التشريع هي انه يراقب على الحكومة ويقف لها على الواحدة بالنيابة عننا.. هل دة معناه اننا كدة عملنا اللي علينا ومهمتنا انتهت ونروح نقعد على الكنبة الخمس سنين اللي جايين ونسيب البرلمان يعمل ما بداله؟!!! امال مين اللي هيراقب على آداء البرلمان؟!!!
كل واحد في البلد ديه من هنا ورايح لازم يتحمل مسؤوليته الوطنية مش بس في مكانه وعلى مستوى دايرته الضيقة لكن كمان على مستوى الدايرة الأكبر والأوسع اللي تساع من الحبايب ألف وبالتاكيد تساعنا كلنا وهنلاقي ألف صرفة صرفة عشان نتفق مهما اختلفنا.. يمكن تكون صرفة منهم: "المؤسسة المصرية للمسئولية الوطنية" اللي أعلن عن تأسيسها امبارح عدد من الأحزاب والقوى السياسية والمدنية منها المستقل ومنها اللي بينتمي لتيارات فكرية ودينية مختلفة..
- الدكتور/ مصطفى حجازي: مؤسس حركة احياء التيار الرئيسي
- د. نادر بكار: المتحدث الرسمي باسم حزب النور
ليست هناك تعليقات:
إرسال تعليق