برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاربعاء 11 يناير 2012 يوتيوب كاملة
بلدنا: امتحان يصف الثوار بالمفسدين ورد فعل المحافظ
يسعد مساكم وحلقة جديدة من بلدنا بالمصري.. هنبدأها وكالمعتاد بآخر أخبار بلدنا وبعدها هيكون لنا كلام شرحه يطول عن ورقة التوافق الوطني لاستعادة روح الميدان واستكمال أهداف الثورة اللي بصمت عليها النهاردة بالعشرة كل أطياف الطيف السياسي والوطني والديني في بلدنا تحت سقف الأزهر الشريف وبدعوة من فضيلة الامام الأكبر، في لحظة بتحاول فيها الثورة تتم السنة على خير وبتعافر عشان تنفد بجلدها من محاولات تشويهها على كل شكل ولون لحد ما حصلت ورقة الامتحان من اعدادي للثانوي، ومن أسئلة الترجمة للتعبير حتى النحو ما سلمتش الثورة منه!!! ومن بورسعيد لاسكندرية للقاهرة للجيزة للشرقية والله اعلم يمكن ما خفي كان اعظم!!!
من كل العينات اللي عرضناها في اليومين اللي فاتوا لأسئلة الامتحانات اللي مش شايفة في الثورة غير العطلة ووقف الحال، أو اللي راجعة لريمة بعادتها القديمة في نفاق الكبارات وشكرهم على واجب_فيه ناس شايفة انهم قصروا فيه اصلاً!!! واللي زاد وغطى بقة ان على آخر الزمن وبقدرة قادر، الثوار على ما وصلوا ورقة امتحان العربي تانية اعدادي في مدرسة من مدارس الشرقية، كانوا اترقوا ماشاءالله مسافة السكة وبقوا: مفسدين ومخربين والله الموفق والمستعان... من كل العينات ديه بقة، رد الفعل الوحيد والفوري والمسؤول_على الأقل لحد دلوقتي_ صدر من محافظ الشرقية
بلدنا: التحقيق مع مظهر شاهين وطارق الخولي ونوارة
آخر صيحة بقة في محاولات التشويه ان كل يوم والتاني نلاقي أسماء زي الطبل وتاريخها بيشف ويرف ملطوطة وجاية رجليها في حاجات ليها العجب: اشي تمويل اجنبي على عمالة وآخرة المتمة بقة: تحريض على تخريب وحرق المنشآت والاعتداء على قوات الأمن (جيش وشرطة إيد واحدة) وبالمرة تعطيل حركة المرور والدليل "سمعنا وقالوله".. الدور النهاردة كان على الشيخ مظهر شاهين، امام وخطيب مسجد عمر مكرم ونوارة نجم وطارق الخولي.
بلدنا بالمصري: أنباء عن استدعاء علاء الأسواني للتحقيق
آخر اسم_على الأقل لحد دلوقتي برده_ بدأت تتنتور أخبار عن استدعاؤه للتحقيق معاه برده في احداث مجلس الوزرا وبرده بتهمة التحريض والتخريب وخلافه، الروائي الدكتور/ علاء الأسواني
بلدنا: الداخلية قالت مهند طلع طرف تالت واعترف
لى رأي الدكتور ايمن نور امبارح، الظاهر كدة ان الشيوخ والسياسيين والأدباء والمصابين والشهود ويمكن الشهدا كمان، هيطلعوا في الاخر هم الطرف التالت!!! مهند مصيلحي، الطالب اللي عنده 19 سنة وواحد من المصابين في أحداث مجلس الوزرا وحسب روايته اللي عرضناها امبارح انه تم استعاؤه كشاهد ولما راح يشهد تحول لمتهم وكان المفترض يتعرض النهاردة على قضاة التحقيق.. لكن حسب النشرة الاعلامية اليومية الصادرة عن المركز الاعلامي الأمني لوزارة الداخلية والصادرة النهاردة
بلدنا: اختفاء التقارير الطبية من البلاغات ضد العسكري
أما عن آخر صيحة في التحقيقات بعد المصابين والمجني عليهم اللي ما بيعرفوش يعملوا محاضر ولا يقدموا بلاغات ولا يشهدوا قدام قضاة التحقيق باللي جرى لهم وشافوه بعينيهم على اعتبار انهم لازم يحمدوا ربنا على انهم لسة عايشين، اللي زاد وغطى ان حتى اللي ربنا بيكرمهم وبيعرفوا يطلعوا تقارير طبية بحالتهم_لانها غالباً بتطلع بطلوع الروح_ حتى دول منهم اللي بيكتشف كدة بالصدفة ان التقرير ضاع، فص ملح وداب.. آخرهم: الدكتورة غادة كمال، صاحبة الفيديو الشهير وهي مشدودة من شعرها على ايد جندي مجند أثناء أحداث مجلس الوزراء
بلدنا: سؤال المجني عليهم المتهمين في أحداث ماسبيرو
يمكن الوضع فيما يخص التحقيقات في قضية ماسبيرو، مختلف شوية على الأقل النهاردة، حيث ان قاضي التحقيق قرر استدعاء ال27 متهم في القضية لسؤالهم باعتبارهم مجني عليهم بعد الاعتداء عليهم بالضرب اثناء وبعد القبض عليهم.
بلدنا: حبس قناص العيون 15 يوماً للمرة الثالثة
أما في قضية أحداث محمد محمود، قاضي التحقيق قرر تجديد حبس الملازم أول "محمود صبحى الشناوى"، الشهير بقناص العيون، للمرة الثالثة 15 يوم جديدة على ذمة التحقيقات بتهمة إصابة المتظاهرين، والشروع فى قتلهم.
بلدنا: اليوم الأخير لأنتخبات برلمان مابعد الثورة
في وسط الزحمة ديه، مش عايزين ننسى ان النهاردة كان اليوم التاني والاخير في جولة الاعادة في المرحلة التالتة والأخيرة لانتخابات برلمان ما بعد الثورة.. واحنا هنتابع معاكم أول باول عمليات الفرز واللي هيتيسر من نتايج هيتم الاعلان عنها النهاردة.. لكن خلونا نلخص أهم ملامح اليوم .
بلدنا: وقفات المصابين وأهالي الشهداء مستمرة
النهاردة هو اليوم الرابع لعمل المجلس القومي لرعاية أهالي الشهدا والمصابين، والمشهد ما اختلفش كتير من اول يوم ولحد النهاردة، يمكن اهدى شوية لكن مش مختلف على الاقل من حيث الأعداد الكبيرة للمصابين واهالي الشهدا واحتجاجاتهم والأمر ما يسلمش من شئ من الفوضى. (انسرتات للوقفات اللي احنا مصورينها عند المجلس)
بلدنا: بريطانيا لسه بتدرس تسليم يوسف بطرس غالي
امبارح وبعد ظهور وزير المالية الأسبق والمتهم الهارب من 30 سنة سجن، في ندوة سبحان الله عن الثورة المصرية في جامعة لندن، كنا بنضرب اخماس في اسداس هو ازاي كدة حر طليق وليه ما يتمش القبض عليه مادام فيه مذكرة توقيف صادرة ضده من الانتربول وهل فيه اتفاقية تسليم متهمين بيننا وبين بريطانيا ولا لأ، وجنسيته البريطانية ممكن تحميه لحد فين...الخ الرد جه النهاردة على لسان وزارة الخارجية اللي اكدت ان الخارجية المصرية طلبت من السلطات البريطانية تسليمه خمس مرات وفي كل مرة بيكون الرد الانجليزي: "لسة بندرس"
بلدنا - أحمد حرارة: سأستقبل رضا عبدالعزيز بالمطار
رضا عبد العزيز.. رضا هو احمد حرارة نمرة اتنين.. مع فرق بسيط في السن لان رضا عنده 19 سنة وخريج معهد سياحة وفنادق.. يوم جمعة الغضب يوم 28 يناير، رضا دفع عينه اليمين ويوم 19 نوفمبر في أحداث محمد محمود اتصاب في عينه الشمال وكان الأمل الوحيد في عملية سافر يعملها في ألمانيا مش على نفقة الدولة.. العملية فشلت ورضا فقد نور عينيه الاتنين.. رضا راجع بكرة من ألمانيا الساعة خامسة وأضعف الايمان ان كل من يقدر يكون في انتظاره ما يتأخرش في انه يروح لحد عنده ويقول له انه مش لوحده وان جميله هو واللي زيه في رقبتنا ليوم الدين وانه نور عينين بلدنا..
دعوة الأزهر لاستعادة روح الميدان واستكمال الثورة
الشعب يريد روح الميدان زيه زي الازهر والكنيسة والقوى السياسية والوطنية والحكومة.. يبقى فاضل ايه بقة عشان اللي احنا كلنا عايزينه يكون؟!!! لأول مرة بيجتمع تحت سقف واحد وفي نفس اللحظة: البابا والمرشد ورئيس الحكومة وكل ألوان الطيف السياسي والديني والدين السياسي وأهل الثورة.. السقف: سقف الأزهر الشريف.. والدعوة: دعوة فضيلة الامام الاكبر.. واللحظة: هي نفس اللحظة اللي بتحاول فيها الثورة تتم السنة على خير وبتعافر عشان تنجو من محاولات تشويهها هي واللي عملها واللي اتجرأ في يوم من الأيام واتشدد لها.. والهدف: استعادة روح الميدان واستكمال أهداف الثورة.. بشرة خير وطاقة نور ازاي ممكن نمسك فيها بايدينا وسنانا عشان نخطي على سكة السلامة اللي تهنا عنها كتير وآن الأوان بقة نخرج من المتاهة.. هنفكر بصوت عالي في اجابة السؤال دة مع ضيوفنا النهاردة
ليست هناك تعليقات:
إرسال تعليق