برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الخميس 8 ديسمبر 2011 يوتيوب كاملة
بالمفتشر: حق المتهمين في التصويت
يسعد مساكم وحلقة نهاية الأسبوع من بلدنا بالمصري.. هنبدأها بسؤال وهنحاول نلاقي رد غطاه في وسط الهيصة والزمبليطة والاحتفال ب"العرس الديمقراطي" اللي لولا الثورة واللي عملوها واللي دفعوا تمنها، عشم ابليس في الجنة كان هيبقى أهون بكتير من عشمنا في أي حاجة من ريحة الديمقراطية، مش في عرسها، وكان زماننا دلوقتي بنستعد لميتم التوريث وبئس المصير.. فالسؤال بقة اللي يطير برج من العقل: "هو مش المتهم برئ حتى تثبت ادانته"؟!! ومادام برئ مش يبقى من حقه زيه زي بقية مخاليق ربنا يباشر حقوقه السياسية تالتة ومتلتة بما فيها التصويت في الانتخابات ولا مش من حقه؟!!! وبصريح العبارة كدة: كل المحبوسين على ذمة التحقيقات عسكرية كانت ولا أمن دولة ولا قدام النيابة العامة وحتى اللي بيتحاكموا لكن لسة ما صدرتش ضدهم أحكام من حقهم يبقى لهم صوت في الانتخابات ولا مش من حقهم يكون لهم لا حس ولا خبر؟!!!
بلدنا: انسحاب الإخوان من المجلس الاستشاري
نروح لآخر أخبار بلدنا، وأولنا أخبار المجلس الاستشاري اللي مهمته المعلنة حتى الآن: "معاونة المجلس العسكري وحكومة الدكتور الجنزوري في إدارة شؤون البلاد لحد نهاية المرحلة الانتقالية وتسليم السلطة لرئيس مدني منتخب في أول يوليو 2012).. لحد امبارح كانت الأخبار بتأكد على قرار كان المفترض يصدر النهاردة من رئيس المجلس العسكري، المشير حسين طنطاوي، بتشكيل المجلس الاستشاري وتحديد مهامه واختصاصاته.. لكن اللي حصل النهاردة هو لقاء جمع بين نائب رئيس المجلس العسكري الفريق سامي عنان وحوالي 22 شخصية من ضمنهم اتنين من مرشحي الرياسة المحتملين وعدد من الممثلين عن الأحزاب والقوى السياسية والشخصيات العامة، لمناقشة أسس وآليات إنشاء المجلس وطبيعة تكوينه واختصاصاته ووضع المعايير والإجراءات القانونية المطلوبة وبحث ترتيبات إصدار مرسوم بقانون بتشكيله ومهامه واختصاصاته.
بلدنا: مطالب المعتصمين عند مجلس الوزراء
النهاردة اليوم أول يوم شغل لحكومة الدكتور كمال الجنزوري الموافق اليوم ال13 للاعتصام قدام مقر مجلس الوزرا احتجاجاً على إن حكومة الدكتور الجنزوري تكون هي نفسها حكومة الانقاذ الوطني اللي بيطالبوا بيها.. لكن الحقيقة إن مطالب المعتصمين مش بس إلغاء تشكيل الحكومة الجديدة وتشكيل حكومة انقاذ وطني يكون اسمها على مسمى على الأقل من وجهة نظرهم، لكن ليهم مطالب تانية هنعرفها لما نروح لحد عندهم
بلدنا: الجنزوري: لن أسمح باستخدام العنف ضد المتظاهرين
لحد دلوقتي ومع استمرار الاعتصام مش مؤكد لسة إذا كان الدكتور كمال الجنزوري هيبتدي يباشر مهام عمله بعد حلف اليمين من مقر مجلس الوزرا ولا ولا هيفضل في مقر وزارة التخطيط على ما تفرج، لكن المؤكد إنه صرح بإنه مش هيسمح باستخدام العنف مع المتظاهرين ولو بالكلمة.. ويمكن التصريح دة يكون وقعه أقوى لما نعرف إنه أدلى بيه أثناء اجتماعه مع وزير الداخلية، اللواء محمد ابراهيم يوسف، وعدد من مساعديه ومفتشين المباحث وعدد من قيادات مديريات الأمن في مقر قطاع الأمن العام في العباسية ومن ضمنهم اللوا سامى سيدهم، مساعد أول الوزير للأمن الإجتماعى، المنسوب ليه قرار فض اعتصام مصابين الثورة بالقوة يوم 19 نوفمبر. لكن الهدف الأساسي من الاجتماع كان أولاً مناقشة خطة عاجلة يبدأ تنفيذها من النهاردة لعودة الأمن والهدوء والاستقرار للشارع المصرى، بما فيها خطة لتحسين الأحوال المادية والمعيشية لظباط وأمناء الشرطة وتوفير الرعاية الصحية والإجتماعية والأسرية. وثانياً: مناقشة خطة تأمين الانتخابات في المرحلتين التانية والتالتة.
بلدنا: أول أيام وزير الداخلية ل. محمد إبراهيم
أما عن اول قرارات وزير الداخلية بعد حلف اليمين فكانت كالآتي: أولاً: منح الجنسية ل502 مواطن من ام مصرية واب غير مصرى وفقا لقانون الجنسية، من ضمنهم 445 فلسطيني و10 سودانيين و8 من ليبيا و5 من سوريا و6 من اليمن و11 من الاردن و7 عراقىين ونيجيرى. والقرار التاني: الإفراج عن 137 سجين بالعفو عن باقى المدة من اللي استوفوا شروط الإفراج وفقاً لقرار المجلس العسكرى.
بلدنا: معضلة دستورية في تفويض الصلاحيات للجنزوري
مربط الفرس فيما يخص حكومة الانقاذ الوطني وبغض النظر عن الشخص اللي اتكلف بتشكيلها، هي الصلاحيات الممنوحة ليها.. وبموجب المرسوم بقانون رقم 136 لسنة 2011، المجلس العسكري فوض رئيس الوزرا باختصاصات رئيس الجمهورية ما عدا الاختصاصات المنصوص عليها في قوانين القوات المسلحة والهيئات القضائية. لكن بجملة المتاهات والمعضلات الدستورية اللي اتكتبت علينا من ساعة التعديلات الدستورية والاعلان الدستوري اللي ما عدناش عارفين إن كان كملها ولا كمل عليها، على ما يبدو إن التفويض الأخير دة، هو كمان فيه معضلة دستورية على الأقل من وجهة نظر الدكتور/ شوقي السيد: أستاذ القانون
بلدنا: الانتخابات تمت في ظل فراغ تشريعي
بجملة المتاهات القانونية برده من وحي الاعلان الدستوري، والمرة ديه من وجهة نظر المستشار أحمد مكي نائب رئيس محكمة النقض السابق، إن انتخابات مجلس الشعب تمت في ظل فراغ تشريعي وقصور في الإعلان الدستوري يطيح بأي طعون ضد النواب، ويعرقل الحصول على أحكام بفصل نواب أو إبطال عضويتهم بعد فوزهم في الانتخابات.. الكلام دة معناه إيه بالظبط دة اللي هنحاول نفهمه من المستشار/ أحمد مكي.
بلدنا: قرار تشكيل المجلس الاستشاري وتحديد اختصاصاته
صدر قرار من رئيس المجلس العسكري، المشير حسين طنطاوي، بتشكيل المجلس الاستشاري وتحديد مهامه واختصاصاته
بلدنا: إجتماع مصابي الثورة باللواء الفنجري
احنا امبارح اعترفنا علناً وعلى الهوا اننا قصرنا في حق الشهدا والمصابين وخدنا عهد على نفسنا اننا هنفضل ورا الملف دة لحد ما ييجي اليوم اللي تترد فيه المظالم وكل واحد فيهم من أول 25 يناير ولحد محمد محمود، ياخد حقه في العلاج وفي عيشة كريمة وفي تكريم لائق وفي القصاص العادل. وهنفضل ورا كل الاقتراحات والمبادرات اللي ممكن تجيب لهم حقوقهم وبالطريقة اللي تليق بمقامهم، النهاردة قبل بكرة.. امبارح كان معانا مبادرة من مجموعة من مصابين الثورة بيطالبوا بان رئيس المجلس الأعلى لرعاية أهالي الشهدا والمصابين، يكون شخصية من شخصيات المجتمع المدني اللي تبنت قضية الشهدا والمصابين من أول يوم ويتم انتخابها من المصابين وإن المجلس يضم في هيكله الاداري مجموعة من المصابين يتم انتخابهم برده ويكونوا ادرى بمطالبهم وبمواجعهم وبافضل الطرق لتحقيقها.. والنهاردة كان فيه لقاء لمجموعة من المصابين لمناقشة نفس الملف مع اللواء/ محسن الفنجري نائب رئيس مجلس إدارة الصندوق، من ضمنهم:
بلدنا: رواية الجندي الذي انضم للمتظاهرين
المصابين في موقعة محمد محمود، ما كانوش بس من المتظاهرين، بالتأكيد إن كان فيه كمان مصابين في صفوف الأمن المركزي، معظمهم إن ماكانش كلهم مش معروفين وما تمش الاعلان عنهم ولا نعرف نوع اصاباتهم ولا اتصابوا إزاي وهل كلهم اتصابوا نتيجة لاشتباك مع المتظاهرين ولا يمكن فيه منهم اتصابوا بنيران صديقة.. حالة وحيدة هي اللي عندنا معلومات عنها منها المؤكد ومنها اللي لسة مجرد رواية محتاجة جهة تحقيق تفصل في مدى صدقها من عدمه، وهي حالة المجند اللي اتخبط على دماغه وفاق لقى نفسه في المستشفى الميداني في ميدان التحرير وكنا عرضنا قصته بدون الافصاح عن اسمه أو هويته نزولاً على طلب محاميه الأستاذ/ أحمد سيف الإسلام.. المعلومات المؤكدة والموثقة إنه مجند في قطاع الأمن المركزي وقدرنا نتحقق من رقمه القومي ومن الكارنيه بتاعه.. أما روايته اللي لسة محتاجة تحقيق فهي إنه:....
بلدنا: أزمة أنابيب البوتاجاز .. ليه ولفين؟
وقبل الفاصل خلونا نحلول نطمن أزمة أنابيب البوتاجاز ديه جاية منين ورايحة على فين وآخرتها إيه.
يتبع.................
ليست هناك تعليقات:
إرسال تعليق