برنامج بلدنا بالمصرى
تقديم ريم ماجد
على قناة ONTV
يوتيوب كاملة
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
ونبدا
برنامج بلدنا بالمصرى تقديم ريم ماجد على قناة ONTV حلقة الخميس 29 ديسمبر 2011 يوتيوب كاملة
بلدنا بالمصري: رغم مرها .. هتفضل ٢٠١١ الأجمل
يسعد مساكم.. النهاردة آخر حلقة من بلدنا بالمصري قبل ما سنة 2011 تلم عزالها بكل أيامها الحلوة وبكل أيامها المرة وترحل.. لكن بكل المرار اللي شربناه فيها من أول يوم في السنة ولحد النهاردة، هتفضل 2011 من أجمل سنين عمرنا إن ماكانتش أجملهم على الإطلاق.. كفاية انها السنة اللي اتولدنا فيها من جديد واكتشفنا اننا شعب لسة حي ولسة قادر يحلم ولسة قادر يدفع تمن الحلم من دم قلبه ومن نور عينيه لحد ما يصبح حقيقة في يوم من الأيام: يا رب يكون قريب.. ولو مش قريب: يا رب ادينا طولة العمر ونعيش ونشوفه.. ولو مش مكتوب لنا نعيش ونشوفه: يا رب يكون من نصيب ولادنا وولاد وولادنا ويارب ييجي اليوم اللي يفتكرونا فيه بالخير ويترحموا علينا ويدعولنا ويتمنوا لو كنا عشنا وشفنا بلدنا الحلوة اللي يمكن تكون اتولدت من تاني على ايدينا.... قولوا آمين
بلدنا: براءة المتهمين بقتل المتظاهرين بالسيدة زينب
وبمناسبة ما هي آخر حلقة في السنة الحلوة المرة ديه، فقررنا انها تكون مسك الختام من غير نكد ومن غير مرار وحتى من غير أخبار.. لكن فيها حاجات بعينها صعب أوي نعمل نفسنا ماخدناش بالنا او قال يعني سقطت ممن سهواً.. أهمها إنه يشاء السميع العليم إنه قبل ما تخلص السنة، يصدر أخيراً أول حكم في قضية من قضايا قتل المتظاهرين في الأيام الأولى للثورة.. ويشاء السميع العليم إن الحكم يكون ببراءة كل المتهمين.
اللهم ما لا تعليق على أحكام القضاء.. ولكن اللهم ارنا الحق حقاً وارزقنا اتباعه وارنا الباطل باطلا وارزقنا اجتنابه
بلدنا: اقتحام الجيش والشرطة لمنظمات المجتمع المدني
من ضمن أخبار بلدنا اللي ماكانش ينفع أبداً تسقط مننا لا عمداً ولا سهواً ولا حتى بمناسبة الجديدة: خبر اقتحام قوات من الجيش والشرطة مصحوبة بأعضاء من النيابة العامة، ل17 مقر من مقرات 10 منظمات من منظمات المجتمع المدني المصرية والأمريكية، بطلب من قاضي التحقيق في القضية المعروفة بقضية "التمويل الأجنبي لعدد من منظمات المجتمع المدني بالمخالفة للقانون" وبأمر من النيابة العامة.. من ضمن المراكز والمنظمات اللي تم اقتحام مقراتها: المركز العربي لاستقلال القضاء والمحاماة صاحب مبادرة العدالة الانتقالية، والمعهد الجمهوري الدولي والمعهد الديمقراطي المصري وبيت الحرية.
بلدنا: تعالوا نتلم في الميدان في ليلة رأس السنة
في حلقة امبارح من بلدنا بالمصري تبنينا مبادرة لاستقبال السنة الجديدة بوقفة بالشموع في ميدان التحرير وكل ميادين التحرير في مصر يوم السبت 31 ديسمبر من الساعة 11 للساعة واحدة.. والدعوة العامة لكل المصريين وغير المصريين من عرب وأجانب سواء المقيمين في مصر أو السياح لاستقبال السنة الجديدة وتأبين كل شهداءها من أول شهداء كنيسة القديسين ولحد شهداء مجلس الوزرا من غير ما ننسى أبداً شهداء الثورات العربية من أول تونس ولحد سوريا واليمن.. لكن على ما يبدو_وديه ظاهرة صحية_ ان فيه مبادرات تانية بنفس المعنى لكن في أماكن مختلفة، فاحنا من هنا من بلدنا بالمصري بندعو لتوحيد كل المبادرات والتنسيق بينها بحيث تتجمع في النهاية في ميادين التحرير قبل الساعة 12.. من ضمن المبادرات ديه مبادرة للاحتفال بالذكرى السنوية الأولى لشهداء كنيسة القديسين بوقفة بالشموع يوم السبت 31 قدام الكاتدرائية المرقسية في العباسية من الساعة 9 للساعة 12:30.. وفيه مبادرة من عدد الشباب المسيحيين لدعوة شباب ومصابين الثورة لحضور الصلاة في الكنايس وبعدها يتعشوا سوى في بيوتهم وغيرها من المبادرات وكلها تشرح القلب.. فاللي احنا بنقترحه وفي النهاية القرار لأصحاب المبادرات المختلفة، إنه ايا كانت البداية تكون اللمة في الآخر في الميدان وعلى ما تدق الساعة 12 يبقى الكل سوى في الميادين في استقبال السنة الجديدة وبدل ما نعيش ونفتكر شهداء أول السنة بس، نعيش ونفتكر شهداء السنة كلها كلنا مع بعض ومع أهاليهم فتهون المواجع ولو شوية باللمة الحلوة.
بلدنا بالمصري: مبادرة لدعم الاحتياطي النقدي لمصر
فيه كمان مبادرة أخيرة للسنة الجديدة، لكن المرة ديه مبادرة على قد ما هي سهلة وبسيطة على قد ما هي عملية والهدف منها دعم الاحتياطي النقدي بمساعدة المصريين في الخارج من غير ما نكلفهم فوق طاقتهم.
بلدنا بالمصري: الست المصرية .. أجمل ما في ٢٠١١
صحيح ان الثورة لسة مستمرة ولسة بندفع تمنها غالي، بس خلونا النهاردة نفتكر أجمل فيها اللي يمكن ما يسلمش برده من شوية وجع.
من أجمل ما في ثورتنا أمهاتها وبناتها الجدعان اللي ب100 راجل اللي هيفضلوا على راسنا من فوق رغم أنف اللي قرروا عمدا ومع سبق الاصرار وبكل الوسائل وأغلبها غير مشروعة إنهم يشوهوا أجمل وأنبل ما فينا
بلدنا بالمصري: الفن الحقيقي .. أجمل ما في ٢٠١١
قبل الثورة كنا ضحية لكم من التلوث السمعي والبصري المسمى زوراً وبهتاناً قال يعني "فن" والفن برئ منه ليوم الدين.. والحجة الزور برده كانت إنه "ما باليد حيلة" ما هي الناس عايزة كدة.. لكن لإن الثورة قدرت _على الأقل في وقت من الاوقات_انها تطلع أجمل فينا، اكتشفنا ان الناس مش عايزة كدة ولا حاجة وان الناس مشتاقة وروحها بتهفهف على كل جميل وحقيقي وطالع من القلب للقلب، لكن كانت الدنيا ضيقة عليه ومالوش فيها مكان قبل الثورة.
بلدنا بالمصري: شباب الانترنت .. أجمل ما في ٢٠١١
كداب اللي يقول إن الثورة ديه ثورة الشباب وبس ويسكت على كدة.. ديه ثورة لولا أهلها وناسها ما كانت قامت لها قومة ولا كانت عاشت واستمرت ومن غيرهم لا يمكن ينكتب لها طولة العمر أو ينكتب لها عمر جديد.. لكن زي ما بنقول كدة ربنا بيسبب الأسباب وفي الثورة ديه "شباب الانترنت" كانوا السبب.
بلدنا بالمصري: الثورة الضاحكة .. أجمل ما في ٢٠١١
من أجمل ما فينا: حلاوة الروح وإننا دايماً قادرين في الحزن نضحك ويمكن مافيش في الدنيا كلها اختراع "الهم يضحك" الا في بلدنا.. وبالتالي كان لازم العالم يضرب كف بكف قبل ما ينبهر ب"خفة دم" المصريين حتى وهم بيثوروا ويضرب تعظيم سلام لثورتهم الضاحكة.. حدوتة الثورة الضاحكة للزميل ناصر فرغلي على قناة بي بي سي العربية كانت من اجما ما اتحكى عن الثورة اللي مش تكون غير "بس في مصر".
بلدنا بالمصري: شهداء الثورة المصرية في ٢٠١١
صحيح ان ثورتنا كان دمها خفيف بس كمان كان دمها غالي وطول ما احنا عايشين وحسنا في الدنيا لا يمكن هيروح هدر.. يمكن لحد النهاردة لسة الحقوق ضايعة لكن طول ما وراها مطالب، لابد من يوم معلوم هتترد فيه المظالم وعلى داير المليم مهما طال الزمن ومهما كان التمن غالي.. لكن لحد ما ييجي اليوم دة ولحد يوم الدين "المجد للشهداء"
تحية وتعظيم سلام لأرواح كل الشهدا.. وتحية وتعظيم سلام لأمهات الشهدا.. وتحية وتعظيم سلام لكل من خد على نفسه عهد إنه يجيب حق الشهدا.. وحق اشهدا مش هيترد الا يوم ما بلدنا تبقى شبه البلد اللي حلموا بيها ودفعوا حياتهم عشان احنا نعيشها حقيقة.
وتحية خاصة جداً لمجموعة عمل "مصرين" للاعلام المستقل اللي اتولدت من قلب الثورة ومصرين على دعمها واستمرارها لحد ما تحقق أجمل أحلامها.. مجموعة مصرين هي صاحبة فيلم "المجد للشهداء" اللي اختاروا ان تتراته وعلى غير العادة ما تكونش لأسماء فريق العمل لكن لأسماء الشهداء فريق العمل الأسمى والأجمل
ليست هناك تعليقات:
إرسال تعليق