برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاحد 18 ديسمبر 2011 يوتيوب كاملة
مقدمة ريم ماجد وأحداث مجلس الوزراء كاملة
بنمسي عليكوا في ليلة من الليالي الصعبة الكئيبة اللي انكتبت علينا من يوم ما فرحنا بإسقاط المخلوع واتهيألنا إن الدنيا ضحكت لنا وآن الأوان نعيش في بلدنا معززين مكرمين، لينا كل الحقوق وعلينا كل الواجبات، وأولها إننا نشيلها على راسنا من فوق ونخطي بيها لقدام ونوصل بيها لبر الأمان، ومن ساعتها والأيام الحلوة اللي عشناها واستبشرنا فيها خير تتعد على الصوابع، وحتى الأيام اللي تتعد على الصوابع ديه ما كانتش عمرها بتسلم من اللي ينغصها علينا.. ومع ذلك فضلنا نتمسك بالأمل ونتفاءل لإن اليأس رفاهية مااحناش قدها، وبرده ما فيش فايدة، كل ما يتهيألنا إن هتقوم لنا قومة ولو بالعافية، يتهد حيلنا ويتقطع نفسنا وندفع التمن غالي والمقابل "صفر" ويا ريته مجرد صفر والسلام!!!
قلنا عيش وحرية .. مانبناش إلا الجوع والمهانة
بنمسي عليكوا في ليلة من الليالي الصعبة الكئيبة اللي انكتبت علينا من يوم ما فرحنا بإسقاط المخلوع واتهيألنا إن الدنيا ضحكت لنا وآن الأوان نعيش في بلدنا معززين مكرمين، لينا كل الحقوق وعلينا كل الواجبات، وأولها إننا نشيلها على راسنا من فوق ونخطي بيها لقدام ونوصل بيها لبر الأمان، ومن ساعتها والأيام الحلوة اللي عشناها واستبشرنا فيها خير تتعد على الصوابع، وحتى الأيام اللي تتعد على الصوابع ديه ما كانتش عمرها بتسلم من اللي ينغصها علينا.. ومع ذلك فضلنا نتمسك بالأمل ونتفاءل لإن اليأس رفاهية مااحناش قدها، وبرده ما فيش فايدة، كل ما يتهيألنا إن هتقوم لنا قومة ولو بالعافية، يتهد حيلنا ويتقطع نفسنا وندفع التمن غالي والمقابل "صفر" ويا ريته مجرد صفر والسلام!!!
قلنا عيش وعدالة اجتماعية: ما نابنا إلا الجوع والفقر والفلس.. واللي زاد وغطى كمان: "المعايرة بالفقر والمنظر اللي ما يسرش"، فبقى الفقير الغلبان: "شكله غلط ومش مظبوط، وما يشبهش الشباب الطاهر اللي نزل يوم 25_ وكإن الشباب الطاهر لازم يبقى متأيف ولابس اللي على الحبل ومتكلين ومسبسب الشعرتين!!! نفسي حد يدلني على شكل الشباب الطاهر دة أو يوريني نموذج يبقى كدة "كالمبين بالشكل" نقيس عليه الثائر الحق!!! ناس نايمين في الشارع وبيتضربوا وبيتسحلوا عايزين يبقى شكلهم إيه: على سنجة عشرة؟!!! ويا كدة يا يبقى "شكله بلطجي فيستاهل كل اللي يجرى له"؟!!!
يا أهل الله انتوا أحرار وما حدش وصي عليكوا وما حدش عارف مصلحتكم اكتر منكم ومش من حق حد يفرض عليكم حاجة.. ومش من حق حد يزايد عليكم ولا يعايركم ويتعالى عليكم.. لكن شئتم أم أبيتم الرهان عليكم.. "صامتة ولا مش صامتة" انتم الأغلبية، ومش من حق حد يطلب منكم تاخدوا مواقف مع أو ضد أي حاجة في الدنيا: لا الثورة ولا التحرير ولا الحكومة ولا حكم العسكر ولا أي حاجة في الدنيا، لكن مطلوب منكم تفتحوا عينيكم وتحكموا عقلكم حتى لو اختارتوا بعد كدة تقفلوا بقكم.. "انتوا أحرار" وبصراحة كتر ألف خيركم: انتم اللي بقى لكم عشر شهور متهددين في أمنكم ولقمة عيشكم وعمالين تشربوا السم في العسل بآلة إعلامية لا هي مهنية ولا اخلاقية ولا مسؤولة ولا حرة ولا مستقلة _ولا استثني حد واعتبروني شاهد من أهلها_!!! الحلقة ديه من بلدنا بالمصري ليكم انتم مع كل الاعزاز والتقدير، هنفكر فيها معاكم بصوت عالي وبالصورة، ورسالتنا من الأول عشان نبقى واضحين: أياً كان موقفكم في الحياة، ما تسمحوش لحد أياً كان يرتكب في حقكم أبشع جريمة وانتوا قاعدين في بيوتكم كافيين خيركم شركم.. ما تسمحوش لحد يحرمكم من إنسانيتكم ومن نخوتكم.. ما تسمحوش لحد ينزع عنكم صفة البني آدم اللي ربنا كرمه دوناً عن بقية المخلوقات بنعمة "الضمير"
ريم ماجد: لما يبقى عندنا ميت بنلبس أسود
تعالوا نفكر بصوت عالي ونحط شوية نقط على الحروف، وهابدأ بأهيف نقطة بس معلش عشان ديه حاجة تخصني أنا شخصياً: أمانة عليكم ما حد عاد يقابلني في حتة أو يبعت لي أي رسالة بأي وسيلة إن كانت يسألني: "هو انتي ليه ما تضحكيش في البرنامج؟!!! هو انتي إيه حبك في الرمادي؟!!! هو انتي ليه لابسة اسود؟!!!".... على فكرة أنا أكره ما علي النكد وما باحبش الرمادي أصلاً وباحب الأبيض والأحمر والأزرق والأخضر وكل ألوان الطيف المبهجة... بس احنا مش لاحقين نلون.. سلو بلدنا: لما يكون عندنا ميت بنلبس اسود لحد الأربعين، فما بالنا بالشهدا؟!!! واحنا بقى لنا عشر شهور، وقبل ما يعدي الأربعين نكون دافعين شهدا ومصابين جداد من دم قلبنا من زينة الشباب اللي مهندس واللي دكتور واللي طالب واللي شيخ واللي صنايعي واللي على باب الله ما فيهمش بلطجي ولا مسجل خطر.. يمكن هم بالنسبة لكم_وللأسف الشديد_ مجرد رقم أو خبر في نشرة أو في برنامج نادراً تحت مسمى شهيد وغالباً تحت مسمى قتيل أو ضحية، لكن في الحقيقة إنهم بشر لحم ودم.. الحقيقة إنهم أبهات وأمهات وضنا غالي.. الحقيقة إنهم ولاد ناس_وغالباً ناس على قد حالها لكن تعبوا وشقيوا عليهم وما طلعوش من الدنيا غير بيهم_ ولو بصيتوا حواليكم هتلاقوهم يا اما أهاليكم أو جيرانكم أو معارفكم أو معارف ناس معارفكم، لا هم العفاريت الزرق ولا من سلالة أمنا الغولة وابو رجل مسلوخة!!! ربنا يخليكوا ويخليلكم ولادكم وتفرحوا بيهم بس حطوا نفسكم ولو ثانية واحدة مكان أب ولا أم مكتوب عليهم يعيشوا محرومين من ابن ولا بنت عمرهم.. ولا أب وأم مستنيين ابنهم ولا بنتهم قدام باب المشرحة وبيعافروا عشان يطلعوا بتقرير يثبت إنه مات مقتول مش بهبوط في الدورة الدموية.. أو أب ولا أم مطلوب منهم يجيبوا صحيفة سوابق لابنهم الشهيد عشان يثبتوا إنه مش مسجل خطر.. أو أب أو أم شايفين المتهمين بقتل ولادهم أحرار طلقاء، بيمارسوا حياتهم وشغلهم أربعة وعشرين قيراط.. أو حطوا مكانكم حتى مكان أب أو أم مضطرين يغيروا أقوالهم ويتنازلوا عن حق ابنهم من خوفهم من كتر الضغط والتهديدات اللي بيتعرضوا لها من غير ما حد يحميهم ولا يقف جنبكم ولما ينزلوا يتحاموا في المعتصمين اللي في الميدان، تنزل الاتهامات ترف على دماغهم بالمزايدة والمتاجرة بدم ولادهم!!! حطوا نفسكم مكانهم لو قدرتوا وبعدين قولولي "اضحك ليه وعلى إيه وألون بأمارة إيه"؟!!!
بلدنا: اللي حصلنا من ٢٥ يناير حتى تاريخه
طب يمكن احنا فعلاً "آفة حارتنا النسيان".. وماله، كل داء وليه دوا.. ومادام بننسى خلونا نفتكر
ريم ماجد: حد قلنا مين قتلنا ودهسنا وعرانا
افتكرتوا؟!!! حد بقة يفكرني كدة: من 25 يناير لحد النهاردة وبكل الوعود الوردية بالتحقيق والمحاكمة والمحاسبة وتقديم المتورطين للعدالة، مين اتحاسب ومين اتحاكم؟! من 25 يناير لحد النهاردة، حد قالنا من اللي سيح دمنا ومين اللي قلع عينينا ومين اللي دهسنا ومين اللي سحلنا ومين اللي عرانا ومين دة اللي استجرى يمد إيده على أمهاتنا ويتبول على دماغنا ببدلة ميري؟! وما عادش حد يقولنا: "أيادي خفية وقلة مندسة وطرف تالت واحنا لم ولن وما عندناش.. ماعندناش قناصة ولا ذخيرة حية ولا خرطوش ولا غاز ولا كوتشي"!!! ما عادش حد يقول لنا: المدرعة اتسرقت على الكورنيش واللبس الميري اتسرق فوق السطوح!!! دة جيش مصر بجلالة قدره وقدرها، ممكن أفراد منه قلوا أو كتروا يغلطوا ويتجاوزا، حاسبوهم لكن ماحدش يقول لنا إن جيش مصر على آخر الزمن ممكن يتسرق!!! ثم إنه ماشي: "لم ولن وما عندكوش"، مين اللي عنده؟!!! مين دول ومين اللي وراهم؟!!! بقى لنا 11 شهر مش عارفين توصلوا للأيادي الخفية اللي هدفها أمن مصر واستقرارها، لكن قادرين توصلوا ل12 ألف مصري في السجون الحربية، منهم نشطا ومدونين وكلهم برده ولاد ناس حتى لو على قد حالهم.. ولو هم بلطجية ليه ما اتقرروش لحد قالوا مين اللي مشغلهم؟!!! بتعايرونا بيهم ليه؟!!! شغلتكم تحمونا من الأيادي الخفية ومن الطرف التالت اللي بيولع فينا.. تقبضوا عليهم وتحققوا معاهم وتعرفوا مين اللي وراهم وتحاكموهم وتجيبوا لنا حقنا منهم؟!!! ديه مش شغلة القوى السياسية ولا الإعلام ولا حتى الشباب الطاهر اللي نزل يوم 25.. ديه شغلة القائمين على إدارة البلاد وأجهزة الدولة... امبارح المجلس العسكري في رسالته رقم 90 بيسألنا سؤال غريب جداً: "أليس من حقنا حماية ممتلكات الدولة العامة التي أقسمنا على حمايتها"؟!!!: "بسم الله الرحمن الرحيم: الإجابة لأ مش من حقكم، دة من واجبكم.. من واجبكم مش بس حماية الممتلكات العامة، لكن معاها وقبلها وبعدها أرواح المواطنين وسلامتهم!!! تعالوا بقة سوى كدة نقرا رسالة المجلس رقم 90 ونشوف الفيديو
ريم ماجد: فين الحماية دي يا جيشنا
طيب دة كلام جميل وكلام معقول ما اقدرش اقول حاجة عنه.. بس خلينا نبص ونشوف ونفتح عينينا ونحكم عقلنا ونفكر بصوت عالي.. دلوقتي المجلس العسكري بيأكد على حقه في حماية المنشآت العامة واحنا بنقول لأ دة كمان واجبه.. طيب الأسئلة بقة اللي طارحة نفسها:
"فين حماية الممتلكات العامة لما المعتصمين كان بيتحدف عليهم من فوق السطوح عفش مجلس الشعب: اطباق وازايز ومكاتب ودواليب؟! هي مش الحاجات ديه ملكية عامة برده ولا أنا بيتهيألي؟!!!
"فين حماية الممتلكات العامة من الناس اللي فوق السطوح دول أصلاً سواء اللي لابسين ميري أو مدني: لو لابسين ميري يبقوا هم اللي بيددوا الملكية العامة على دماغ المتظاهرين.. ولو اللبس الميري دة مسروق، ازاي ما اتحماش من السرقة والأهم من كدة بكتير: لما الجيش هو اللي بيأمن مجلس الشعب ومن حقه يحمي المنشآت العامة واللي فوق السطوح دول ماهماش لا عساكر ولا ظباط، ازاي طلعوا فوق السطوح، بكم كسر الرخام اللي نزل يرف على الناس في الشارع؟!!! وازاي عدوا في سكتهم خدوا اللي يقدروا عليه من عفش المجلس؟!!! فين حماية الممتلكات العامة في كدة؟!!
طب بلاش: فين حماية الممتلكات العامة في الفيديو بتاع المجلس نفسه؟!!! مين دول؟!!! وليه سبتوهم يخربوا وليه ماحدش قبض عليهم ولا حتى اتدخل عشان يمنعهم؟!!! كنتم فين؟!!! وكنتم فين ومبنى هيئة الطرق والكباري بيتحرق وكنتم فين والمجمع العلمي بيتحرق؟!!! أنا ما عنديش إجابة، لكن يمكن الصور يكون عندها.. وتاني المطلوب منكم بس: تفتحوا عينيكوا وتحكموا عقلكم
بلدنا: دمنا سال وعرضنا اتهتك وشرفنا اتمرمط
لو بعد كدة، بعد ما فتحتوا عينيكم لسة فيه كلام من قولة: " ما هو الاعتصام دة أصلاً ماكانلوش لزمة؟! وهم ايه اللي مقعدهم في الشارع؟! وهم ليه أصلاً يلعبوا كورة؟!!! أو ابشع من كدة بكتير وما تزعلوش مني بس فيه كمان أسئلة من عينة: "وهي اللي البنت اللي اتسحلت ديه إيه اللي يخليها تلبس العباية من غير حاجة تحتها؟!!! _صحيح غلطانة ومالهاش حق كان لازم تعمل حسابها لساعة السحل وتلبس بدلة النينجا تحت العباية"!!! لو لسة قادرين تسألوا الأسئلة ديه أو حتى بتخطر على بالكم أو حتى قادرين تعذروا اللي بيسألوها أو حتى قادرين تسمعوها من غير ما تتهز لكم شعرة ومن غير ما تحسوا بإن فيه شئ مقزز لا يحتمل، يبقى لازم تخلوا بالكم وما تسمحوش لحد يجردكم من إنسانيتكم ومن نخوتكم ومن غيرتكم على بنات وأمهات بلدكم.. ما تسمحوش لحد يوصلكم لحد ما تسترخصوا الدم والعرض والشرف والكرامة.. الاعتصام صح ولا غلط.. قانوني ولا مش قانوني.. ليه لزمة ولا مالوش لزمة.. لعبوا كورة ولا ما لعبوش مش هي ديه القضية دلوقتي: القضية إن فيه دم سال وفيه عرض اتهتك وفيه شرف اتمرمط بيه الأرض وفيه كرامة اتبعترت واتهانت.. أياً كان السبب في الأول: "طز" وباقولها تاني بعلو صوتي: "طز" مش مهم.. المهم إننا نفضل بني آدمين ويفضل ضميرنا صاحي، حتى لو سكتنا وما اتحركناش وفضلنا قاعدين على الكنبة، لكن على الأقل قاعدين بآدميتنا وضميرنا لسة ما متش بفعل فاعل عمداً ومع سبق الإصرار.
ريم ماجد: بنتنا .. عرضك عرضنا وشرفك شرفنا
دلوقتي البنت اللى بـ 100 راجل دى اللى اتسحلت واتعرت. إحنا قعدنا نفكر كتير نذيع الصورة دى ولا مانذيعهاش نذيع الفيديو ولا مانذيعوش. والجدل ده داير إمبارح على مدى أخلاقية إن إحنا كوسائل إعلام وكجرائد وكناشطين على المواقع التواصل الاجتماعي. فى الأخر إحنا قررنا إننا نذيع. وانا عايزة أوصلها رسالة .. يابنت مصر ياجدعة شرفك شرفنا وكرامتك من كرامتنا ولو عايزة تعرفى إحنا شوفناكى إزاى.. إحنا شوفناكى كده ..
بلدنا بالمصري: آدي شهادة عبودي يا سيد جنزوري
وبمناسبة لعب الكورة.. لا كان فيه كورة ولا يحزنون، على الأقل حسب رواية المواطن اللي اتخرشم واتعدم العافية بحجة انه نط من فوق السور جيب الكورة.. خلونا نسمع شهادة عبودي من على سريره في المستشفى.
بلدنا بالمصري: شهادة رئيس المجمع العلمي وتبرئة الثوار
أنا هارجع تاني معلش لحماية الممتلكات العامة وحريق المجمع العلمي.. وفيه شهادة لشاهد من أهلها_من أهل المجمع العلمي_ الدكتور/ عبد الرحمن الشرنوبي رئيس المجمع، قالها النهاردة الصبح في صباح أون في مداخلة مع الزملاء الأعزاء: إيمان عز الدين ويوسف الحسيني.. خلونا نسمعها تاني بوداننا.
بلدنا بالمصري: فين بتوع كاميليا والإسلام هو الحل
وزي ما اتفقنا في الأول احنا بنفكر بصوت عالي.. فمن ضمن الحاجات اللي شاغلة بالنا مثلاً ومش فاهمنها خالص: الناس اللي نزلت في الشوارع في مظاهرات حاشدة عشان خاطر كاميليا وعبير واخواتهم، مش شايفين إن هتك عرض البنات وسحلهم وضرب الأمهات والستات الكبار في السن، ما يستاهلش اي فعل احتجاجي من أي نوع؟!!! طب والملايين اللي نزلت في الشوارع من النجمة ووقفت في طوابير طويلة عريضة وادت صوتها لتيار الاسلام السياسي على قناعة منهم بإنه هو الحل، مش شايفين ان استشهاد شيخ ازهري جليل معروف بعلمه ورجاحة عقله واعتداله ومواقفه المشرفة، ما يستاهلش النزول في الشارع ولو لحضور الجنازة وتقديم واجب العزا؟!!! صحيح الشيخ الجليل كانت جنازته مهيبة لكن ديه مجرد علامات استفهام وتعجب في نفس الوقت؟!!
بلدنا: ٢٥ يناير .. ذكرى ثورتنا ولا أربعين شهدائنا
بس سبحان الله، الشيخ عماد عفت واللي استشهدوا معاه يوم الجمعة: الشهيد علاء عبد الهادي (الطبيب) والشهيد احمد منصور (خريج الاعلام) والشهيد محمد عبد الله (المهندس) وغيرهم من شهداء يوم الجمعة بحسبة بسيطة يوم 25 يناير اللي جاي يوافق الأربعين بتاعهم.. يا ترى بقة يوم 25 يناير 2012 هيبقى: عيد الثورة الأولى ولا الذكرى السنوية الأولى لثورة عملناها ودفعنا تمنها وعلى ما عدت السنة ماعادش حيليتنا غير إننا نترحم عليها وعلى الشهدا اللي دفعوا حياتهم فيها واحنا سبناها وسبناهم يروحوا هدر؟!!! الله أعلم.. بس لو الإجابة نمرة اتنين لا مفر منها: يا رب ما اعيش واشوف اليوم دة!!!
بلدنا: القومي لحقوق الإنسان وأحداث مجلس الوزراء
أنا طولت عليكم زي ما استسمحتكم في الأول وعارفة إن كلامنا ماكانش خفيف عليكم أبداً، سامحونا أو اكرهونا.. اعتبرونا منكم وعليكم او اعتبرونا من أعداء الوطن المحرضين.. صدقونا انتم أحرار واحنا مش مهمين، احنا ايش نكون؟!!! لكن بغض النظر عننا: حاولوا تفتحوا عينيكوا واتحكموا ضميركم.
احنا النهاردة وعلى غير العادة، ما عندناش آخر اخبار بلدنا.. أخبار بلدنا في كل حتة في الدنيا وسيرتنا بقت على كل لسان والحمد لله فمالهاش عازة عندنا النهاردة.. فيما عدا أخبار ليها علاقة باللي احنا فيه واللي احنا بنحاول نعمله النهاردة
بلدنا: من دمنا .. ١٠ شهداء و٤٩٠ مصاب
حسب البيانات الرسمية، عندنا لحد دلوقتي 10 شهداء واكتر من 490 مصاب، عدد منهم بيتعالج حالياً في المجمع الطبي للقوات المسلحة في كوبري القبة، فاجئهم النهاردة المشير حسين طنطاوي القائد العام رئيس المجلس الاعلي للقوات المسلحة بزيارة لتفقد عددهم سواء من المدنيين أو من أفراد القوات المسلحة والاطئمنان علي حالتهم الصحية والتأكد من الخدمة الطبية المتكاملة المقدمة لهم. وأصدر أوامره بتوفير كافة سبل الرعاية الطبية وإجراء التحاليل والاشعة التشخيصية والجراحات اللازمة لجميع المصابين علي نفقة القوات المسلحة واستمرار متابعة حالتهم الصحية لحين تماثلهم للشفاء. وأكد لهم أن القوات المسلحة ستقدم كافة الاجراءات الطبية والعلاجية لهم بإعتبارها جزء لا يتجزء من شعب مصر العظيم ، وانها ستظل دائما على الوفاء بمهمتها في الدفاع عن الوطن وحماية انجازات شعبه في هذه المرحلة الدقيقة من تاريخ مصر.
بلدنا بالمصري: الاشتباكات مستمرة في الشيخ ريحان
احنا لما بنقول الأعداد وبنأكد انها حسب البيانات الرسمية وبنقول حوالي وحتى الآن، دة لإن المصابين اللي في المستشفيات الميدانية صعب احصاءهم احصاء دقيق دة غير إن فيه مصابين لا بيروحوا المستشفيات الميدانية ولا المستشفيات الرسمية ولا أي مستشفيات أبداً وما بنعرفش عنهم حاجة.. وحتى الآن، لإن لحد دلوقتي الاشتباكات لسة مستمرة ومتجددة، في شارع القصر العيني وشارع الشيخ ريحان وفي محيط وزارة الداخلية وحسب مصادر أمنية، الاشتباكات اللي في محيط وزارة الداخلية ادت لإصابة 55 عسكري و 3 ظباط من الأمن المركزي، لكن ما ذكرش أي بيان عن عدد الاصابات من طرف المتظاهرين.
بلدنا بالمصري: محاولة وقف الاشتباكات باءت بالفشل
في عز ما الاشتباكات مستمرة، كان فيه محاولة من عدد من أعضاء البرلمان الجداد والنشطاء والشخصيات العامة وعدد من شيوخ الأزهر، لوقف الاشتباكات الا انها فشلت ورفض المتظاهرين الاستجابة ليهم، وكان فيه محاولة تانية منهم للتفاوض مع قيادات الجيش والشرطة خلف الاسلاك الشائكة والجدار العازل
عمرو حمزاوي وتفاصيل ما حدث فى القصر العيني اليوم
عمر حمزاوى النائب فى البرلمان :ومن ضمن المجموعه الى كانت تتفاوض مع المتظاهرين
لم اتعرض لأى اعتدءات من المتظاهرين كنا نحاول ان نتفاوض فى اهمية وقف نزيف الدماء حدوث مشادات بين الشرطه والمجموعه اللتى كانت تتفاوض معهم. لم تكن الاغلبية موافقة على وقف نزيف الدماء
بلدنا: موقف المجلس الاستشاري من أحداث القصر العيني
أحداث مجلس الوزرا هي أول اختبار للمجلس الاستشاري.. امتحان ماهواش هين، قاسي جداً وفي منتهى الصعوبة.. ويمكن يحتمل اكتر من اجابة ومعيار الصح والغلط يمكن يكون ملتبس ومثير للجدل.. كل الأسئلة حوالين المجلس الاستشاري ودوره في الأزمة هنطرحها على الدكتور/ محمد نور فرحات: الامين العام للمجلس الاستشاري
بلدنا بالمصري: المجمع العلمي .. تاريخه ومصيره
الناس اللي كانت ماشية في الشارع امبارح ساعة حريق المجمع العلمي كانت بتسأل هو إيه المبنى اللي بيتحرق دة؟!!! لحد ما اكتشفنا إن اللي اتحرق جزء مهم من تاريخنا ومن عقلنا واحنا مش داريانين، وآن الأوان نعرف بس بعد فوات الآوان.
الدكتور عبد الحليم نور الدين عميد كلية الاثار السابق وعضو المجمع العلمي
الدكتور خالد عزب مستشار مكتبة الاسكندرية
بلدنا: وفاة احمد محي حسين في الحجز واعتصام المحامين
مالك عدلى المحامى الحقوقى: الشهيد احمد محي حسين توفي بسبب الكثير من الاصابات من القوات المسلحة إجبار المتظاهرين على اكل النجيلة بسبب عدم قولهم بنحبك يا مشير كل ما يحدث من الجيش خارج عن القانون وغير ملائم.
بلدنا: أم الثوار خديجة ووالد الشهيد احمد منصور
مافيش صوت هيعلى على أصواتهم وحتى صوتي مش هتسمعوه الا لشديد الأوي.. أما هاعرفهم وهاعزيهم وهاسمع منهم
- الأستاذ/ محمد منصور: والد الشهيد احمد منصور
- ماما خديجة
بلدنا: سيناريوهات الخروج من المشهد الحالي
الكاتب الصحفي أ. سعد هجرس وأحداث مجلس الوزراء .. سيناريوهات الخروج من المأزق الحالي في بلدنا بالمصري
ليست هناك تعليقات:
إرسال تعليق