برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاحد 11 ديسمبر 2011 يوتيوب كاملة
بالمفتشر: المباهج الأرضية الكافرة والعياذ بالله
يسعد مساكم وحلقة جديدة من بلدنا بالمصري.. هنبدأها بسؤال ما حرمش لسة واحنا في عز انتخابات المفروض إنها بحكم تعريفها وزي ما الكتاب بيقول: مظهر من مظاهر الديمقراطية.. وعشان احنا شعب يعز البهجة قد عينيه وبيدور عليها بمنكاش قمنا سمناها من عندنا: "عرس ديمقراطي" والجري للمتاعيس اللي مالهمش في الطيب نصيب!!! يقوم نفس العرس دة بالهيصة بالزمبليطة الموصوفة ب"الديمقراطية" دون سواها، يبقى من باب زيادة الخير خيرين بالنسبة لحزب النور السلفي اللي حقق نتايج مذهلة وطلع التاني بين زملاته على الأقل لحد دلوقتي، وألف مبروك وعقبال ما يدوب الكراسي تحت القبة في عرق العافية والبركة برده في الديمقراطية.. أما وإن الديمقراطية تطلع بعد كل دة من المباهج الأرضية الكافرة والعياذ بالله.. يبقى السؤال اللي ما حرمش لسة: طب بأمارة إيه ماشيين في سكتها؟!!!
لا تعليق غيرش بس: "يا مثبت العقل والدين يا رب العالمين"
بلدنا: الوضع القانوني للمجند اللي انضم للمتظاهرين
نبدأ بقة حلقتنا بآخر اخبار بلدنا وهنختمها بطلة على مجموعة من المرشحين تعتبر عينة بينة للتيارات المختلفة اللي بتتنافس في هذا "العرس الديمقراطي" اللي هتبدأ مرحلته التانية يوم الأربع اللي جاي وعلينا خير..
بس قبل آخر أخبار بلدنا النهاردة، ولإننا في بلدنا بالمصري قررنا نتابع القصة ديه أول بأول لحد ما تظهر الحقيقة، فاسمحوا لنا في البداية، نطمن على الوضع القانوني للمجند إبراهيم فتحي عدلي السيد، بعد ما اتقدمت اللجنة القومية للدفاع عن شهداء الثورة ومركز هشام مبارك ولجنة الحريات بنقابة المحامين ببلاغ للنائب العام.لحمايته كأحد أهم شهود الإثبات علي الجرايم اللي تم ارتكابها ضد المتظاهرين والمعتصمين في موقعة محمد محمود
بلدنا: أحمد صالح .. أحدث شهداء محمد محمود
موقعة محمد محمود قدمت امبارح شهيد جديد، أحمد صالح، الوردة اللي ما لحقتش تفتح واتقطفت بعد يا دوب 21 سنة برصاصة حية في الرقبة ومنها للعمود الفقري قبل ما يقضي في مستشفى القصر العيني حوالي 20 يوم أقرب للموت من الحياة وقبل ما ربنا يختاره جنبه حي يرزق. وأمانة عليكوا تقروا مقال الأستاذة/ نجلاء بدير النهاردة في جريدة التحرير "جنة ولا نار"..
بلدنا: زيارة وزير الصحة لمصابي محمد محمود
الأصل في موقعة محمد محمود اللي قدمت لحد دلوقتي_حسب البيانات الرسمية_ 45 شهيد واكتر من الف مصاب أغلبهم اتخطف نور عينيه، كان فض اعتصام مصابي الثورة بالقوة، ولولا كدة ما كانت استقالت حكومة الدكتور شرف ولا حكومة الدكتور الجنزوري كانت شافت النور بعينيها.. فيمكن عشان كدة يكون جميل المصابين في رقبة حكومة الدكتور الجنزوري وإنشالله تكون هتعمل اللي تقدر عليه عشان ترد الجميل دة، اللي هو الحقيقة في رقبة بلدنا كلها.
بلدنا - الجنزوري: وضع الاقتصاد المصري خطير
الأمن والاقتصاد كان ليهم النهاردة نصيب الأسد في المؤتمر الصحفي لرئيس الوزرا، الدكتور كمال الجنزوري اللي اكد إن "الاقتصاد المصري وضعه خطير وإننا مش ممكن نتقدم من غير أمن".. معروفة والناس اللي قلبها على البلد ديه بقى لها عشر شهور بتهاتي فيها لما ريقها نشف.
بلدنا: الانتهاء من ملف الأمن الداخلي هذا الأسبوع
الدكتور كمال الجنزورين صرح في المؤتمر الصحفي إن وزارة الداخلية هتنتهي من ملف الأمن الداخلي ولجانه على يوم 15 ديسمبر، بعد لقاءه مع وزير الداخلية، اللوا محمد إبراهيم يوسف في حضور حوالي 1000 ظابط من مديريات الأمن المختلفة على مستوى الجمهورية، للمرة تانية في أقل من أسبوع في إطار تشجيع الظباط على الرجوع للشارع والحفاظ على أمن المجتمع، حسب بوابة الأهرام.
بلدنا: وقفة اتحاد النقابات المستقلة أمام القوى العاملة
غير العمال اللي انضموا لاعتصام مجلس الوزرا، اتحاد النقابات المستقلة نظم النهاردة وقفة احتجاجية قدام مقر وزارة القوى العاملة للمطالبة بإقرار قانون الحريات النقابية وعودة الشركات المخصخصة وتطهير المؤسسات.
بلدنا: الجنزوري يقابل المعتصمين رفضاً لحكومته
تصريحات رئيس الوزرا ووزير الداخلية فيما يخص اعتصام مجلس الوزرا، تعتبر مطمئنة بما إنها بتأكد على إنه مافيش أي نية لفض الاعتصام بالقوة، لكن في النهاية بتأكد ضمناً وصراحة إن فض الاعتصام هيحصل وهيحصل عن قريب، لكن بالحوار على ما يبدو، خاصة بعد تصريح الدكتور كمال الجنزوري اللي قال فيه إن " الاعتصام ممكن ينفض في ربع ساعة لكن هو فضل لقاء المعتصمين والحوار معاهم"، التصريح دة كان ادلى بيه رئيس الوزرا بعد رفض عدد من المعتصمين الدعوة لمقابلته يوم الجمعة، لكن على ما يبدو إن المساعي للحوار نجحت النهاردة وقابل فعلاً مجموعة من الشباب المعتصمين في مقر وزارة التخطيط.
بلدنا: استمرار اعتصام مجلس الوزراء رفضاً للجنزوري
لكن حتى الآن ولحين إشعار آخر يبقى الوضع على ما هو عليه في شارع مجلس الشعب قدام مجلس الوزرا.
بلدنا: عمال مطاحن مصر العليا يواصلون إضرابهم
أما العاملين في شركة مطاحن مصر العليا في سوهاج وقنا والاقصر واسوان فمضربين عن العمل النهاردة لليوم الرابع علي التوالي، احتجاجا على تجاهل المسئولين لمطالبهم المالية والمطالبة باقالة مجلس ادارة الشركة القابضة للصناعات الغذائية.
القضاء يلزم الداخلية بإخراج علاء عبد الفتاح للتصويت
في خطوة من شأنها تمكين جميع المحبوسين احتياطيا من الإدلاء بأصواتهم في الانتخابات البرلمانية، مكنت محكمة القضاء الإداري برئاسة المستشار "عبد السلام النجار" - نائب رئيس مجلس الدولة - مساء أمس الناشط "علاء عبد الفتاح" - المحبوس احتياطيا - على ذمة قضية أحداث ماسبيرو بالتصويت في انتخابات المرحلة الثانية لمجلس الشعب.
بلدنا: حكم بالاستبدال وبطلان استبعاد قوائم الأحزاب
المحكمة الإدارية العليا حكمت النهاردة ببطلان القرارات الصادرة من لجان فحص طلبات الترشيح باستبعاد قوائم الأحزاب التى تقدم إليها، ثم يتضح أنها تضم بعض المرشحين غير المستوفين لشرط أو أكثر من شروط الترشيح لعضوية مجلس الشعب، وحكمت المحكمة أنه فى هذه الحالات لا يجوز استبعاد القائمة كلها بل يتعين على الحزب القيام بترشيح آخر بدلا من المرشح غير المستوفى للشروط ولا يجوز للجنة الإنتخابات أن تمتنع عن إجراء عملية الاستبدال هذه طالما تمت فى الميعاد المقرر (قبل موعد إجراء الانتخابات بخمسة عشر يوما)
بلدنا: سياسات وزارة النقل في حكومة الجنزوري
خلونا ناخد فكرة عن سياسات وزارة النقل المتوقعة من حكومة الدكتور الجنزوري.
بلدنا بالمصري: مئوية الأديب العظيم نجيب محفوظ
ومسك الختام قبل الفاصل، الاحتفال بمئوية العظيم نجيب محفوظ.
بلدنا: حق اللي زي علاء عبدالفتاح في التصويت
المحكمة حكمت بحق علاء عبد الفتاح المحبوس احتياطي على ذمة التحقيقات في قضية ماسبيرو بالتصويت في الانتخابات ما دام لم تثبت إدانته وبالتالي فهو برئ ومن حقه يكون له صوت، الدور والباقي على التنفيذ
لأول مرة في مصر يطالب متهم محبوس احتياطي بحقه في التصويت فتحكم المحكمة لصالحه وإلزام وزارة الداخلية بتمكينه من ممارسة حقه. الحكم دة بيفتح باب على عدد كبير من الأسئلة هنلاقي إجابتها عند:
عزيزة الطويل: المحامية بالمركز المصرى للحقوق الاقتصادية والاجتماعية
بلدنا: شباب الثورة في المرحلة الثانية من الانتخابات
كلها يومين والمرحلة التانية من الانتخابات تفتح أبوابها.. انتخابات كان العشم فيها_ويمكن مازال_ إنها تجيب لنا برلمان يليق بمقام الثورة ويحافظ عليها وياخد بإيدها ويخطي لقدام.. وكل دة مرهون في الأول وفي الآخر مش باللي هنختاره لكن الأهم هنختاره ليه وعلى أساس.. وعشان نجاوب على السؤال دة قبل ما نوصل للصندوق لازم نكون على بينة من أمرنا.. صحيح إنه في الانتخابات ديه وعلى عكس ما كان مفروض، كلنا اتاخدنا على مشمنا مرشحين وناخبين وحتى القائمين على إدارة العملية الانتخابية، وماكانش عندنا وقت كفاية نعرف بعض كويس، لكن دة ما يمنعش إننا نحاول نعمل اللي نقدر عليه كل واحد في مكانه حتى ولو ليلة الامتحانات.. واحنا اللي نقدر عليه النهاردة ليلة يومين الصمت الانتخابي اللي هيبدأوا من بكرة هو إننا نحاول على قد ما نقدر نتعرف على نماذج من المرشحين تعتبر عينات بينات للتيارات المختلفة اللي هننتخب منها من يمثلنا.. فاسمحوا لي ارحب بضيوفنا:
- مي الشلقامي: مرشحة الحزب الكتلة المصرية فردي فئات في الدائرة الرابعة في الجيزة
- اسلام لطفي: مرشح تحالف الثورة مستمرة عن نفس الدايرة
- حازم طه: مرشح قايمة حزب الوسط في الدايرة الأولى في بني سويف
- خالد الأزهري: مرشح حزب الحرية والعدالة فردي عمال في دائرة الهرم والعمرانية
ليست هناك تعليقات:
إرسال تعليق