برنامج بلدنا بالمصرى
تقديم ريم ماجد
على قناة OTV
يوتيوب كاملة
شارك الخبر مع اصدقائك على الفيس بوك و تويتر و جوجل +1
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاثنين 21 نوفمبر 2011 يوتيوب كاملة
جدع يا باشا .. كلت عين الواد
يسعد مساكم وحلقة جديدة من بلدنا بالمصري.. هنبدأها بعينة بينة بالمفتشر صوت وصورة يسدوا عين الشمس عن الطريقة اللي بيخطفوا بيها نور العيون وكإنهم في رحلة خلوية بيصطادوا عصافير والجدع هو اللي ينشن ونشانه يصيب.. "جدع يا باشا"
الصورة بتتكلم .. على عينك يا تاجر
فيه سؤال بقة بيطرح نفسه.. مين اللي صور الفيديو دة، وإزاي كان بيتحرك في وسطهم وهم بيتحركوا قدامه بالسلاسة ديه ومش واخدين خوانة؟!!! الحقيقة إنه مش مهم هو مين.. ويمكن يكون واحد منهم أو واحد عليهم وعامل منهم.. مش هو دة المهم.. المهم إن دة معناه _واللي لازم كبارات البلد ديه يفهموه_ إن ماعادش فيه حاجة هتستخبى مادام كل مواطن قادر على إنه يكون مراسل على الجبهة.. السيطرة على الإعلام الرسمي والضغط المباشر وغير المباشر على الإعلام الخاص والاستهداف الجسدي والمعنوي للصحفيينن كل ديه وسايل يمكن تعطل شوية وصول الخبر ويمكن تشوش عليه ويمكن تحد من مجال انتشاره لكن عمرها ما هتكفي على الخبر مجور والبركة في الصحافة الشعبية إلا لو ناويين يعينوا لكل مواطن باشا جدع شغلته يجيب حباب عينيه... عشان كدة من هنا ورايح في بلدنا بالمصري، هناخد كل يوم جولة "على عينك يا تاجر" في الصحافة الشعبية بالصوت والصورة والقلم.. وتسلم الآيادي.
النقابة تستنكر الاعتداء على الصحفيين .. تاني
قبل ما نبدأ آخر اخبار بلدنا، وبما إن كبارات البلد لسة مش فاهمين إن الخبر ماعادتش ممكن ينكفي عليه ماجور، فبالتالي استهداف الصحفيين والمصورين الصحفيين والإعلاميين جسدياً ومعنوياً مازال مستمر.. وبناءاً عليه نقابة الصحفيين أصدرت النهاردة بيانها التاني في أقل من 48 ساعة احتجاجاً على استهداف الصحفيين بعد الاعتداء امبارح بس على عدد كبير من الصحفيين أثناء تغطية الأحداث في المحافظات المختلفة منهم خمسة في اسكندرية لوحدها من الأخبار والشروق والتحرير ووكالة انباء الشرق الأوسط.. البيان نصه كالآتي
أون تي في تقيم ٣ دعاوى قضائية ضد ريهام نعمان
أما الاستهداف المعنوي.. فقناة أون تي في كانت واحدة من ضحاياها خلال اليومين اللي فاتوا.. بدأ يوم السبت بمداخلة من مواطنة شريفة على شاشة التلفزيون الرسمي، وربما تكون استمرت امبارح أو لأ_احنا هنتحلى بحسن النية على أي حال_ من خلال مداخلة في بلدنا بالمصري من اللواء/ عبد الرحيم صدقي، لواء طيار متقاعد.. نتيجة لسوء تفاهم لا داعي لذكر تفاصيله اللي مازالت عليها بعض علامات الاستفهام والتعجب، فريق الإعداد اتصل بيه على إنه اللواء/ صدقي صبحي قائد الجيش التالت الميداني، اللي اتضح لنا واحنا على الهوا إنه مش اللواء/ صدقي صبحي واحنا اكدنا على دة اكتر من مرة في سياق حلقة امبارح، وبعد ما كادت تصريحاته تؤدي لبلبلة ما بعدها بلبلة في السويس لولا إننا تداركنا الموقف باسرع ما يمكن.. لكن تفضل علامة من ضمن علامات الاستفهام إن اللوا عبد الرحيم صدقي لما تم تعريفه على إنه اللوا/ صدقي صبحي قائد الجيش التالت الميداني، أول حاجة أكد عليها في مداخلته وبالحرف الواحد: " إنه مش بيتكلم بالصفة ديه"_وديه كانت أول كلمة اثارت شكوكنا، لكن الأغرب والأعجب واللي مالوش تفسير عندنا إنه ما نفاش الإسم ولا نفى حتى نفى كونه هذا الشخص اللي تم تعريفه بوضوح شديد واكتفى بإنه مش هيتكلم بالصفة ديه؟!!! أما الاستهداف المعنوي المباشر والفج فكان يوم السبت.. وإليكم التفاصيل عشان نفتكر اللي حصل بالظبط ثم التطورات.
احنا احتفظنا بحقنا في اتخاذ الإجراءات القانونية وهو دة اللي حصل النهاردة بالظبط: تقدمنا ببلاغ للنائب من رئيس القناة البرت شفيق ومن قناة أون تي في ضد المدعوة ريهام نعمان.. البلاغ رقم 10782 لسنة 2011 بنتهمها بالسب والقذف والتشهير.. وحالياً بنستعد لرفع 3 دعاوى قضائية ضدها بنفس الاتهامات واحدة من مدير المحطة وواحدة من مدير شؤون العاملين وائل محسن وواحدة من قناة اون تي في.
التحرير في ثالث أيام الاعتصام .. ٢١ نوفمبر
نروح بقة لآخر أخبار بلدنا وهنبدأها بالتأكيد من ميدان التحرير بعد يوم بليلة تانيين من الاعتداءات المستمرة والكر والفر والمزيد من الضحايا ما بين شهداء ومصابين.
حقيقة عدد شهداء أحداث التحرير فين ؟
لحد دلوقتي الحصيلة النهائية للضحايا سواء من الشهدا أو من المصابين ماهياش دقيقة أو بمعنى أصح مافيش رقم واحد متفق عليه من جميع الأطراف خاصة فيما يخص عدد الشهدا.. وزارة الصحة بتتكلم عن 22 ومصادر طبية في مشرحة زينهم أكدت لبوابة الأهرام وجود 33 جثة في المشرحة.. والنيابة بتقول إن بعض الجثث الموجودة في المشرحة مالهاش أي علاقة بالمتظاهرين.. الحقيقة فين بالظبط الله أعلم بس احنا هنحاول نوصل لما تيسر منها بس بعد التقرير دة من قدام مشرحة زينهم النهاردة مع أهالي الشهدا.
بلدنا: حمدين صباحي ومطالب اعتصام التحرير
بعد الفاصل: حوار بصريح العبارة عن أحوال بلدنا وإزاي ممكن نعدل المايلة مع الأستاذ/ حمدين صباحي المرشح المحتمل لرئاسة الجمهورية
من يوم الثورة ما قامت ولحد النهاردة واحنا متفقين على احنا راقضينه واللي احنا مش عايزينه واللي احنا قادرين نقف ضده إيد واحدة مهما كان التمن.. لكن نيجي عند اللي احنا عايزينه ويتوه مننا من إيد لإيد ويبدأ كل واحد يغني على ليلاه وآخرتها نخرج كلنا إيد ورا وإيد قدام.. لكن ماحدش بيتعلم ببلاش هل احنا اتعلمنا الدرس وممكن ننجح في الامتحان المرة ديه ولا هنتلدغ تاني من نفس الجحر.
وهنستعين على السؤال دة بشرحه اللي يطول بالأستاذ حمدين صباحي: المرشح المحتمل لرئاسة الجمهورية
ليست هناك تعليقات:
إرسال تعليق