من جيل ثورة ٢٥ يناير لجيل أكتوبر عظيم
صدق اللي قال إن الواحد لما يسعد يجي له عيدين في ليلة واحدة.. واحنا النهاردة في بلدنا بالمصري وفي أون تي في كلها عندنا بدل العيد عيدين.. عيد صغير بما إن أون تي في بتتم النهاردة 3 سنين بالتمام والكمال... وعيد كبير.. عيد كبير أوي على بلدنا كلها.. والسنة ديه بالذات له طعم تاني واحنا بنحتفل بذكرى حرب أكتوبر اللي كتبت بالروح والدم صفحة جديدة وبخط جميل أولها عزيمة وإرادة وآخرها نصر وعزة وكرامة، والأجمل السنة ديه إننا بنحتفل بيها لأول مرة من سنين طويلة واحنا تاني رافعين راسنا فوق في العلالي وبنبصم بالعشرة إن هذا الشبل من ذاك الأسد!!!... صحيح احنا لسة ما كتبناش صفحتنا الجديدة لحد الآخر، لكن مؤكد إن الصفحة اللي بدأناها من أول السطر، برده بالروح والدم وقلنا يا هادي يا رب بالحرية والعدالة والكرامة الإنسانية، ربنا هيقدرنا ونختمها واحنا حاطين مصر في جملة المفيدة ما فيش أجمل منها..
أنا من يوم اشتغلت الشغلانة ديه من 16 سنة، وأنا كل سنة في اليوم دة أقاوم إني أجيب سيرة أبويا_ ربنا يديله طولة العمر_ اللي زي النهاردة من 38 سنة عدى عايم.. وكل سنة في اليوم دة، وغصب عني الاقيني بجيب سيرته في جملة مفيدة.. لكن السنة ديه بالذات_واعذروني أنا هاجيب سيرته عمداً ومع سبق الإصرار_!!! أبويا اللي عدى عايم واللي كان زيه زي كتير غيره في اليوم دة مستعدين يدفعوا عمرهم وعن طيب خاطر فدا حبة رمل واحدة من تراب البلد ديه، من يوم ما قامت الثورة _ومن خوفه على البلد ديه_ باقر وباعترف إنه لحد النهاردة مش سعيد أوي بيها ولا باللي عملوها ولا باللي شاركوا فيها ولا باللي حتى باركوها بما فيهم أنا وأمي وأختي.. ويمكن عدت علينا أيام كان غضبان علينا فيها!!! بس النهاردة كان لازم اعيد عليه زي كل سنة أول ما الساعة تدق اتنين بالدقيقة.. بس بعد ما عيدت عليه وبعد ما رد علي.. ما قدرتش اقاوم فكرة إني أشارككم اللي حصل.. من باب إني متأكدة مليون في المية إن حالتنا ديه ما هياش حالة شخصية ولا فردية ولا استثنائية وانها موجودة في بيوت كتير في بلدنا من يوم الثورة ما قامت ولحد النهاردة.. أنا بصراحة ما كلمتوش بس بعت له رسالة قلت له فيها: " من جيل الثورة لجيل أكتوبر العظيم: لولاكم ما كانت مصر حرة.. ولولاكم انتم ما كنا احنا على وش الدنيا.. احنا طالعين لكم.. وانتوا اللي ربيتونا ما نقبلش بمصر إلا حرة وأبية ومرفوعة الراس مهما كان التمن.. كل سنة وانتم طيبين وتسلموا لنا ونعيش ونتعلم منكوا ونعيش ونتباهى بيكو وتعيشوا وتفرحوا بينا ونعيش كلنا ونشوف اليوم اللي تبقى مصر فيه زي ما حلمتوا وبتحلموا وبنحلم بيها.. والمجد للشهدا في كل زمان"!!! بصراحة هو كلمني.. لكن بعت لي كمان الرد في رسالة: " كل سنة وانتي طيبة ومصر بخير وعافية وربنا ياخد بايدها لبر الأمان"!!! قولوا آمين!!! وربنا ما يحرمنا من بعض ولا يحرم مصر مننا حتى لو كل واحد فينا بيحبها وبيخاف عليها بطريقته!!
بلدنا بالمصري: مصر في صباح ٦ أكتوبر ١٩٧٣
معلش أنا طولت عليكوا، وآن الأوان نعيد بقة.. وهنبدأ بالعيد الكبير بالتأكيد.. ومن أجمل فيه السنة ديه إننا ماعدناش مضطرين ننسب الفضل لحد، لكن محتاجين ننسب الفضل لكل أصحابه اللي بجد وبحق حقيقي.. لما طلعت شمس اليوم دة في نهار رمضان من 38 سنة، ما حدش كان يعلم لسة ولا يخطر له على بال،ولا حتى أجهزة المخابرات الشداد العتاولة!!! إن على ما يضرب مدفع الإفطار، هنكون نفذنا ضربة جوية معتبرة (وما حدش نفذها لوحده)!!! وعدينا القناة.. ونازلين بخراطيم المية حتتك بتتك على خط بارليف.. وإنه على الساعة واحدة بعد نص الليل هيكون فيه 60.000 جندي مصري مخطيين خطوة عزيزة ومآنسين ومشرفين على الضفة الشرقية.. وهنكون وقعنا 27 طيارة للعدو ودمرنا 60 دبابة و15 موقع حصين على شرق القناة!!
بس قبل ما نوصل لساعة الصفر وقبل ما نوصل لحد الساعة ديه من 38 سنة كان إيه اللي بيحصل.. الأول خليونا نوصف لكوا _ على عهدة جرنال أخبار اليوم بتاع يوم السبت 6 اكتوبر 73_ اليوم دة كان إيه شكله والمصريين كان بيعملوا إيه!!! أولاً: الجو لطيف والفطار عالساعة خمسة ونص وخمسة بالظبط.. والأسبوع الخامس للدوري العام شغال، والزمالك كان متعادل مع الاتحاد صفر/صفر والأهلي فايز على المنيا 1/صفر.. والطيران والمحلة هيلعبوا الساعة تلاتة الضهر على ملعب الترسانة!!! وفي الفجر طار على الأرجنتين الوفد اللي بعته الرئيس السادات لتهنئة الرئيس بيرون بتوليه رئاسة الجمهورية.. وكيلو البطارخ أكلة الأغنيا وأصحاب المزاج وصل 14 جنيه// الدكتورة عائشة راتب افتتحت الموسم الثقافي لاتحاد الجمعيات بمناسبة شهر رمضان، بالاحتفال بمرور 50 سنة على وفاة سيد درويش!!! ومحمد عبد الوهاب كان تحت الملاحظة الطبية الدقيقة.. ومحمد الموجي مستني موافقة سعاد حسني على بطولة المسرحية اللي هتقدمها فرقته الجديدة في أول عروضها ونادية لطفي شقتها غرقت في شبر مية!!! ومسرحية جوليو ورومييت بطولة ثلاثي أضواء المسرح بتتعرض على مسرح الريحاني.. وأحمد عدوية بيغني ليلاتي في ميوزيكهول البيروكيه في شارع سليمان باشا!!! والكل كان مستني على أحر من الجمر فيلم " رجل الليل" إنتاج عالمي مشترك بالألوان الطبيعية، بطولة فريد شوقي وآمال ياسين!!! ومافيش في التلفزيون غير هم قناتين اتنين مافيش غيرهم: القناة الخامسة والقناة التاسعة.
بلدنا بالمصري: الصحف والتلفزيون والراديو ٦ أكتوبر ١٩٧٣
نيجي بقة للمانشيتات الجرنال بالبنط العريض: هنكتشف إن "إسرائيل هي اللي كانت بتفكر لسة في عملية عسكرية كبرى وهي اللي بتحشد قواتها على جميع الجبهات".. لكن الراديو والتلفزيون والإذاعات الجماهيرية في إسرائيل كانت واقعة في بركة هس من قبلها بليلة بمناسبة العيد الكبير عندهم (إنشالله كل سنة وهم في اللي كان مستنيهم في اليوم دة يا قادر يا كريم)!!! لكن وكالة الأنباء الفرنسية كانت شايفة إن " صمت أجهزة الإعلام الإسرائيلية قد يؤدي إلى خلق نوع من الاضطراب في حالة وقوع عمليات عسكرية!!! بس ساعتها وكالة الأنباء الفرنسية لا كانت تعلم ولا كان يخطر لها على بال، إن العمليات العسكرية ديه هتنزل ترف زي القضا المستعجل على دماغ إسرائيل.. وإن الساعة اتنين بالدقيقة هتضرب صفارات الإنذار.. والراديو اللي كان معيد هينطق ويطلع له حس.. وهيبدأ تجنيد قوات الاحتياط وهتبدأ حركة غريبة مريبة في الشوارع اللي كانت اسكت هس.. لما الإسرائيليين بقوا يضربوا الأخماس في الأسداس ويلفوا حوالين نفسهم بالمقلوب!!
دة بالنسبة للمانشيتات، خلونا بقة نطل طلة على برامج الراديو والتلفزيون اللي كانت منشورة في الجرنال قبل ما يشاء السميع العليم وتتبدل الأحوال ويبدأوا في إذاعة بيانات الحرب العشرة بالتمام والكمال.
بلدنا بالمصري: ONtv شافت النور من ٣ سنين
زي النهاردة من تلات سنين بالتمام والكمال، القناة ديه شافت النور ومن ساعتها وعينيها ما تشوف إلا النور!!! عديت عليها وعلينا وعليكوا ومعاكوا أيام كتير حلوة وأيام كتير صعبة ويمكن كمان مرة وساعات مرة علقم.. لكن كله بيهون عشان خاطر عيونكوا وعشان خاطر عيون المحروسة المعجبانية وربنا يقدرنا ونشيلها فوق راسنا وجوة نن عينينا ونوصل بيها لبر الأمان (على رأي أبويا)!!! احنا عمرنا ما احتفلنا بعيد ميلاد القناة من يوم ما فتحت، لكن السنة ديه كان لازم نحتفل لسبب بسيط، إن القناة ديه اتولدت من أول جديد على إيد الثورة واتكتب لها عمر جديد فما كانش ينفع يعدي عيد ميلادها السنة ديه كدة سكيتي.. يارب نكون كنا دايماً عند حسن ظنكوا وما تأخذوناش لو كنا في يوم قصرنا غصب عننا أو حتى غلطنا_اعتقد إن رصيدنا لديكم يسمح_ المهم إننا ما نكابرش ونعترف بالغلط والأهم من كدة إننا نتعلم منه عشان نفضل دايماً عند حسن ظنكوا وبعودة علينا وعليكوا وعلى أون تي في الأيام بخير.. بس ادعولها ربنا يخليها ويديها طولة العمر أو يكتب لها تاني عمر جديد!!!
بلدنا بالمصري: بيانات العبور الخمسة ٦ أكتوبر ١٩٧٣
بس لازم نبقى فاكرين إن البيانات الأولى اللي صدرت عن القيادة العامة للقوات المسلحة، وتحديداً من الأول للرابع_ ولإن الصورة كانت لسة مش واضحة ولسة ماكناش عارفين هنرسي على أي بر_ كانت بيانات بتمهد للناس إنه احتمال نكون مضطرين ندخل الحرب.. لحد ما يجلجل البيان الخامس ومعاه البشارة!!
يعني مثلاً البيان رقم واحد كان بيقول: " قام العدو الساعة الواحدة والنصف بعد ظهر اليوم بمهاجمة قواتنا بمنطقتي الزعفرانة والسخنة بواسطة تشكيلات من قواته الجوية
وتقوم قواتنا حالياً بالتصدي للقوات المغيرة" !!! والحقيقة إنه ماكانش فيه حاجة من ديه خالص!!! البيان دة اتذاع الساعة اتنين وربع بالدقيقة ودة كان معاد برنامج " مهرجان النجوم" على البرنامج العام، وعرض البرامج على القناة الخامسة في التلفزيون، والقناة التاسعة ماكانتش لسة فتحت!!!
البيانات رقم اتنين وتلاتة وأربعة كانت بتقول بما معناه وباختصار شديد إنه " رداً على العدوان الغادر، نفذت قواتنا مهاماً بنجاح وأصابت مواقع العدو إصابات مباشرة ومازال الاشتباك مستمراً!!! البيانات ديه اتذاعت الساعة اتنين ونص وخمسة والساعة التلاتة وتلاتة نص: مكان نشرة الأخبار وبرنامج " رمضان في طفولتي" و" ألف ليلة وليلة" على البرنامج العام!!! وعلى القناة الخامسة كان فيه حلقة أجنبية ونادي الشباب وفيلم " فتافيت السكر".. وبرده القناة التاسعة كانت لسة نايمة في العسل!
الساعة أربعة وست دقايق بالدقيقة، المفروض إن البرنامج العام كان يكون بيذيع نشرة الأخبار والقناة الخامسة عليها " برنامج للأطفال" والقناة التاسعة قدامها حوالي ساعتين وتدخل على الخط!!! قام ظهر وبان وعليه الأمان البيان رقم خمسة في عين العدو، واللي عليه العين والخاطر: " نجحت قواتنا في اقتحام قناة السويس في قطاعات عديدة واستولت على نقط العدو القوية بها ورفع علم مصر على الضفة الشرقية للقناة. كما قامت القوات المسلحة السورية باقتحام مواقع العدو في مواجهتها وحققت نجاحاً مماثلاً في قطاعات مختلفة
بلدنا بالمصري: احتفالات ميدان التحرير بذكرى نصر أكتوبر
خلونا بقة نرجع ليوم 6 اكتوبر 2011، والسنة ديه بالذات ما فيش أعز ولا أجمل من ميادين التحرير في بلدنا نعيد فيها "الجيش والشعب إيد واحدة".
بلدنا بالمصري: كلمة المشير طنطاوي في ذكرى نصر أكتوبر
قبل ما نكمل بقية الاحتفالات، خلونا نسمع جزء من كلمة المشير حسين طنطاوي رئيس المجلس الأعلى للقوات المسلحة اللي أكد فيها ضمن حاجات تانية كتير على إن "شعب مصر العظيم اللي رفض النكسة والهزيمة وحرر كل شبر من أرضه المقدسة، قادر على عبور هذه المرحلة الدقيقة والحاسمة من تاريخه الوطنى بالتفافه حول أهدافه القومية، والحفاظ على وحدتة الوطنية، وسعيه لتحقيق قيام الدولة المدنية الحديثه، على أسس ديمقراطية سليمة"..
بلدنا: احتفالات ذكرى نصر أكتوبر عند المنصة
هنرجع تاني للاحتفالات، لكن المرة ديه عند المنصة، الاحتفالات كانت ما بين السما والأرض.
بلدنا بالمصري: ONtvعيلة واحدة
أنا شخصياً مدينة للقناة ديه، بحاجات كتير.. القناة ديه ادتني في تلات سنين اللي ما قدرتش اعمله في 13 سنة قبلها.. والقناة ديه ما هياش بس شاشة وشوية كاميرات وميكروفونات ومكن.. القناة ديه لحم ودم وجيش جرار من البشر، أكترهم جنود مجهولة ما حدش يعرفهم ولا يعرف قد إيه شقيانين وقد إيه قلبهم على القناة ديه وقد إيه بيدوها من وقتهم ومن أعصابهم ومن صحتهم ومن حياتهم كلها كدة على بعضها من أصغر حد لأكبر حد فيها... الجماعة اللي زي حالاتي اللي قدام الكاميرا، احنا المحظوطين، لكن لولا اللي وراها ما كنا احنا ولا كانت اون تي في من حيث الأصل.. والعيد النهاردة عيدهم والود ودي أعيد عليهم واحد واحد وبالاسم والفعل واحب على راس كل واحد فيهم كمان.. لكن نظراً لكترهم _ماشالله وربنا يزيد يبارك_ ونظراً لضيق الوقت أنا هاعيد عليهم كلهم كفريق واحد وعيلة واحدة.. وهم اكتر ناس فاهمين دلوقتي "يعني إيه عيلة واحدة".. أنا بقى لي 16 سنة باشتغل الشغلانة ديه، واقدر ابصم بالعشرة وبقلب جامد، إن الروح اللي في المكان دة عمري ما قابلتها ولا عشتها إلا هنا..فكل سنة والكل هنا في واحد طيبين وبعودة علينا الأيام بخير ونعيش نشوف القناة ديه زي ما بنحلم بيها.. لكن دة ما يمنعش إن فيه ناس بعينها ما نقدرش النهاردة ما نسمعش صوتها ونعيد عليها لإنهم شالوا أو شالوا ولسة شايلين القناة ديه على كتافهم وبجد لولاهم كان مستحيل نكون موجودين النهاردة معاكوا.. وبعد ما نسمع صوتهم.. هنستنى نسمع صوتكوا انتوا لإننا من غيركوا تعبنا دة كله يروح هدر..
بلدنا بالمصري: أهالي المحروسة من أبطال أكتوبر
ذكريات النصر مع أبطال أكتوبر نسمعها على لسانهم بعد ثورة ٢٥ يناير في بلدنا بالمصري
ليست هناك تعليقات:
إرسال تعليق