اهم الفقرات:
بالمفتشر: صوتك صدقة جارية - الدين والانتخابات
معركة جناحي العدالة - القضاة والمحامين
محاولات احتواء أزمة القضاة والمحامين
تأجيل محاكمة المخلوع وأعوانه ل ٢٨ ديسمبر
حقيقة مقتل عصام عطا ومعتز سليمان
دور المجلس العسكري في مناظرات الدوحة
عماد عبدالحليم أحد مصابي ماسبيرو
دور الدين في المجتمع المصري
برنامج حزب التجمع في الانتخابات
بالمفتشر: صوتك صدقة جارية - الدين والانتخابات
يسعد مساكم وحلقة جديدة من بلدنا بالمصري.. هنبدأها بكلمتين بالمفتشر عن بشاير الدعايات الانتخابية لحسن ديه بقت حاجة تلخبط.. دلوقتي من ضمن قواعد وضوابط عملية الدعاية الانتخابية اللي تسد عين الشمس "أولاً الامتناع عن استخدام أي شعارات أو رموز أو القيام بأي دعاية انتخابية ذات طابع ديني.. وثانياً:عدم استخدام دور العبادة والمدارس والجامعات وغيرها من مؤسسات التعليم في الدعاية الانتخابية".. طب لما اتنين من مرشحين حزب الحرية والعدالة واحد على فايمة الشعب والتاني على قايمة الشورى في شبرا، يزوروا مسجد الخازندارة _زي ما قرينا كدة النهاردة في المصري اليوم" ويلموا حواليهم المصلين بعد الصلاة برابطة المعلم وهاتك يا أخد ورد حوالين الحزب واللي ناوي عليه للدايرة وأهالي الدايرة والناحية وأهالي الناحية والقطر المصري كله لو ربنا كرمه وفاز في الانتخابات!!! يبقى دة معناته إيه؟!!!! ولما نخطف رجلنا لحد قرية الصنافين في الشرقية فنبص نلاقي قافلة طبية مجانية بشنة ورنة منظمها حزب الحرية والعدالة،_ولحد هنا وكتر ألف خيره وربنا يجعل بيوت المحسنين عمار_ لكن لما تبقى المدارس والمعاهد الأزهرية هي اللي عمار!!! يبقى دة معناته إيه؟!!! ويمكن برده حد يقول في عقل باله طب ما يمكن ديه لا هي دعاية انتخابية ولا يحزنون والحكاية كلها لوجه الله الكريم... وارد برده.. بس في الحالة ديه يبقى إيه لزمة يافتة الحزب الطويلة العريضة على باب المعهد الأزهري خاصة وإن اللي عايز يعمل الخير لله بيعمله من سكات ولا من شاف ولا من دري!!! طب ولما حزب النور يعمل مؤتمر ل7 من المرشحين بتوعه في بني سويف، فيطلع الشيخ من الشيوخ ويقولها كدة بالمفتشر وبالفم المليان_حسب ما قرينا في الشروق النهاردة_: " التصويت لمرشحي حزب النور صدقة جارية يصلك ثوابها لمئات السنين وعدم التصويت لهم سيئة جارية يصلك ذنبها لمئات السنين"!!! يبقى دة معناته إيه؟!!!
بلدنا بالمصري: عركة جناحي العدالة - القضاة والمحامين
لكن كل الكلام عن الانتخابات كوم والكلام عنها في عز أزمة اتحولت للأسف الشديد _ومش عارفة ألاقيلها وصف تاني_ غير إنها اتحولت ل"عركة" بين جناحين العدالة من القضاة والمحامين، خاصة بعد اللي حصل يوم الجمعة أثناء انعقاد الجمعية العمومية الطارئة لنادي القضاة في دار القضاء العالي وبعدها وصلت لحد ضرب النار في الهوا واتهامات متبادلة مين اللي ضرب نار ومين اللي ابتدى ومين اللي احتجز مين ومين اللي مد إيده على مين ومين اللي عور مين ومين اللي انهزم ومين اللي انتصر في اللي سموها معركة "قانون السلطة القضائية" وحاجة يعني تجيب الغم.. والحقيقة إن ديه فعلاً لو معركة يبقى الكل فيها خسران والكل فيها مغلوب وما حدش عارف إيه أخرتها.. فما كان من القضاة أو على الأقل عدد مش قليل منهم، إلا إنهم _ ودة على عهدة عدد من المواقع الصحفية_ بدأوا يقدموا اعتذارات عن الإشراف على الانتخابات البرلمانية اللي جاية نتيجة للغياب الملحوظ لتأمين القضاة _على الأقل من وجهة نظرهم_ من أول قفل المحاكم بالجنازير لحد احتجازهم في دار القضاء العالي من غير أي تدخل من أي شرطة إن كانت لا مدنية ولا عسكرية على حد تعبيرهم وهم بيبرروا ضرب النار في الهوا لتفريق المتظاهرين والمحامين اللي احتجزوهم يوم الجمعة، في نفس الوقت اللي فيه عدد من المتظاهرين في ميدان التحرير يوم الجمعة أكدوا إن كان فيه عدد من المحامين بيوزعوا منشورات بيأكدوا فيها على استعدادهم للإشراف على الانتخابات في حالة اعتذار القضاة.. هو إيه اللي بيحصل بالظبط؟!!!
بلدنا بالمصري: محاولات احتواء أزمة القضاة والمحامين
من ناحية تانية، مجلس الوزرا بيحاول من ناحيته احتواء الأزمة باجتماع تم النهاردة ما بين الدكتور عصام شرف رئيس مجلس الوزراء والمستشار حسام الغرياني رئيس مجلس القضاء الأعلى والمستشار أحمد الزند رئيس نادي القضاة في حضور وزراء العدل والداخلية ونائب رئيس الوزرا للتنمية السياسية والتحول الديمقراطي. والمفروض إنه فيه بكرة الصبح اجتماع مماثل مع مجموعة من المحامين من ضمنهم عدد من المرشحين على منصب النقيب.
بلدنا: تأجيل محاكمة المخلوع وأعوانه ل ٢٨ ديسمبر
لكن كل دة ما يمنعش إن فيه كتير من المحاكم ومن القضاة ومن المحامين مازالوا بيمارسوا عملهم، من ضمنهم محكمة جنايات القاهرة، اللي قررت النهاردة برئاسة المستشار أحمد رفعت وفي جلسة ما كملتش تلات دقايق، تأجيل محاكمة الرئيس المخلوع ووزير داخليته وأعوانه الستة فى قضية قتل الثوار لجلسة 28 ديسمبر. (تقرير)
من ناحية تانية، الدايرة 52 مدني في محكمة استئناف القاهرة هي الدايرة اللي كانت هتنظر في طلب رد المحكمة إلا إن رئيس الدايرة المستشار مصطفي حسن عبدالرحمن، تنحى عن نظر الدعوى "للاستشعار الحرج"، وقدم الملف لرئيس محكمة استئناف القاهرة لتحديد دايرة تانية لنظر القضية.. فقرر المستشار عبد المعز إبراهيم، رئيس محكمة الاستئناف، تحديد جلسة 3 نوفمبر اللي جاي لنظر القضية قدام الدايرة 62 تجاري
بلدنا بالمصري: حقيقة مقتل عصام عطا ومعتز سليمان
يوم الخميس بالليل نزل علينا خبرين قلبوا المواجع كلها.. خبر معتز سليمان وخبر عصام عطا _الله يرحمهم ويصبر أهاليهم ويقدر الجميع على الوصول للحقيقة!!!! ومن يوم الخميس لحد النهاردة_ وفيما عدا قرار نيابة حوادث جنوب الجيزة امبارح بحبس النقيب هانى محمد يسرى، والملازم أول خالد ممدوح، الظباط في إدارة شرطة النجدة في أكتوبر، 4 أيام على ذمة التحقيقات بتهمة القتل العمد والشروع فى القتل، فى واقعة قتل معتز سليمان_ واحنا في حواديت وحكايات وتحقيقات وتقارير وشهادات، تبدو متضاربة وعكس بعضها ولسة ما حدش فاهم حاجة بالتحديد في قضية عصام عطا.
بلدنا بالمصري: دور المجلس العسكري في مناظرات الدوحة
طب هنسيب السياسة إلى حداَ ما ونروح نعرف إيه حكاية الدوحة مناظرات الدوحة لدعم حرية التعبير للى بداءت من 2004 من السنة اللى فاتت بتحصل عندنا هنا فى مصر. وبقالها سنتين
بلدنا: موبينيل .. المركز الأول من حيث معايير الحوكمة
قبل الفاصل خلونا نعرف قائمة أهم الشركات المصرية الى حصلت على المراكز الأولى من حيت الإلتزام بمعايير الحوكمة
بلدنا بالمصري: عماد عبدالحليم أحد مصابي ماسبيرو
التلات الرصاصات اللي حيلتنا من أحداث ماسبيرو لسة محلك سر، واحدة ما نعرفش عنها حاجة مصاب بيها مينا نصحي المصاب والمعتقل في نفس الوقت والمتكلبش في السرير في مستشفى كوبري القبة على حد علمنا.. والرصاصتين التانيين واحدة في مكتب مدير مستشفى النزهة وديه اللي تم استخراجها من فك على خالد.. والتانية في مكتب مدير المستشفى القبطي واللي تم استخراجها من جسم عماد عبد الحليم، اللي حالته اتحسنت كتير والحمد لله وقدر يتكلم معانا النهاردة لما رحنا نزوره في المستشفى.
بلدنا بالمصري: دور الدين في المجتمع المصري
عن دور الدين في المجتمع المصري واحنا على دخلة الانتخابات
- المفكر السياسي الدكتور/ احمد كمال ابو المجد
اللي هنستعين بيه في قراءة وتحليل نتايج استطلاع الرأي اللي أعلن عنها مؤخراً مركز المعلومات ودعم اتخاذ القرار. الاستطلاع تم إجراؤه في شهر يونيو اللي فات عن "دور الدين في المجتمع المصري"، على عينة من 1074 مواطن مصري فوق 18 سنة
بلدنا بالمصري: برنامج حزب التجمع في الانتخابات
حزب التجمع بشعاره الشهير: "الخبز للفقراء/ الحرية للشعب/ العمل للمتعطلين" يعتبر الممثل الأبرز لليسار المصري من بين الأحزاب اليسارية على مدار ال35 سنة اللي فاتوا وبالتحديد من سنة 1976.. لكن كونه حامل لقب ممثل اليسار المصري فبيتحمل العبء الأكبر من المسؤوليات سواء عن الانجازات اللي قدمها اليسار المصري أو عن الاخفاقات والأزمات اللي عانى منها علة مدار ال35 سنة اللي فاتوا ولحتى النهاردة.. وبالتأكيد دة هيكون جزء من مناقشتنا عن حزب التجمع وبرنامجه الانتخابي مع ضيوفنا:
- الأستاذ/ سيد عبد العال الامين العام لحزب التجمع
- الأستاذة/ ماجدة عبد البديع مرشحة الحزب في إحدى دواير الشرقية
ليست هناك تعليقات:
إرسال تعليق