بلدنا بالمصري: ما لم يسمعه المجلس العسكري
يسعد مساكم وحلقة جديدة من بلدنا بالمصري.. وقبل ما نبدأها، هأمنكوا بس أمانة تقروا الجملة الاعتراضية للدكتور علاء الأسواني، المكتوبة في آخر صفحة في المصري اليوم النهاردة.. ممكن تتفقوا معاها أو تختلفوا.. تتفقوا مع أجزاء منها وتختلفوا مع أجزاء تانية بس في كل الحالات هي "جملة اعتراضية" مهم نقراها، خاصة وإنها على عكس الجمل الاعتراضية في قواعد النحو الصارمة، الجملة ديه لها اكتر من محل من الإعراب.
يحيا العدل .. تمكين المصريين بالخارج من التصويت
نقول بقة يا هادي يا رب بآخر أخبار بلدنا.. وآخر خبر بالنسبة لنا يمكن يكون أحلى خبر من فترة طويلة، وممكن نشاور عليه بقلب جامد ونقول بالفم المليان "آدي اللي خدناه من الثورة".. الخبر الحلو اللي يرد الروح إن محكمة القضاء الإداري قالت كلمتها النهاردة واضحة وصريحة ب"تمكين المصريين في الخارج من التصويت في انتخابات مجلس الشعب والشورى اللي جاية وإلزام الحكومة بإنشاء مقار انتخابية في السفارات" ويحيا العدل
بلدنا بالمصري: تأجيل رد اعتبار د. طارق الزمر
من أهم القرارات اللي أصدرتها النهاردة برده محكمة القضاء الإداري واللي يمكن هتفتح باب جدل واسع في الفترة اللي جاية: قرار تأجيل الفصل في الدعوى المقامة من الدكتور طارق الزمر القيادي في الجماعة الإسلامية ووكيل مؤسسي حزب "البناء والتنمية"، ضد المجلس العسكري ووزير العدل اللي بيطالب فيها برد اعتباره وبالتالي بتمكينه من حقه الدستوري في التصويت والمشاركة في العملية السياسية.. مش التأجيل في حد ذاته اللي هيفتح باب الجدل، لكن التأجيل لجلسة 29 نوفمبر اللي جاي، ودة معناه بوضوح استمرار منع ممارسة الدكتور طارق الزمر للعمل السياسيي لحد بعد بداية انتخابات مجلس الشعب على الأقل، اللي هتبدأ المفروض يوم 28 نوفمبر.
بلدنا بالمصري: حجز بطلان عقد مدينتي للحكم
لسة برده في محكمة القضاء الإداري، لكن بعيداً عن الانتخابات، المحكمة حجزت النهاردة قضية بطلان عقد مدينتى الجديد للنطق بالحكم فيها يوم 22 نوفمبر اللي جاي
بلدنا: أولى جلسات محاكمة المغربي في تخصيص الأراضي
من محكمة القضاء الإداري، لمحكمة جنايات القاهرة.. النهاردة كانت أول جلسة من جلسات محاكمة أحمد المغربى وزير الاسكان السابق وعدد من المتهمين، بتهمة تخصيص والحصول الأراضي الدولة بدون وجه حق
بلدنا بالمصري: الإفراج عن علي الحلبي عضو ٦ أبريل
بعد 7 إيام في السجن الحربي، النيابة العسكرية أفرجت النهاردة عن الناشط وعضو حركة 6 إبريل، بعد ما دفع 1800 جنيه قيمة التلفيات اللي اتسبب فيها بالشخبطة اللي شخبطها على سور جمعية الوفاء الأمل وهو بيرسم جرافيتي ضمن حملة الدايرة السودا والدايرة البيضا للتوعية بعدم انتخاب الفلول، قبل الشرطة العسكرية ما تقبض عليه.
بلدنا بالمصري: وفد الأزهر الشريف يعزي البابا شنودة
وفد الأزهر الشريف اللي كان بيعزي النهاردة البابا شنودة في شهداء ماسبيرو، في مقر الكاتدرائية في العباسية اتمنى من ربنا إنها تكون آخر أحزان الوطن.
بلدنا: بيان الداخلية واعتصام أفراد وأمناء الشرطة
أمناء وأفراد الشرطة اللي بدأوا احتجاجاتهم امبارح بوقفات قدام مديريات الأمن على مستوى الجمهورية، للمطالبة بإقالة وزير الداخلية وتطهير الوزارة من اللي وصفوهم بأعوان العادلي وبتحسين احوالهم الوظيفية، مازالوا في أماكنهم النهاردة معتصمين سواء قدام وزارة الداخلية او قدام مديريات الأمن المختلفة أو في مطار القاهرة ومصممين على الاستمرار في الاعتصام لحين ما تتم الاستجابة لمطالبهم.. أما وزارة الداخلية فجاءنا منها البيان التالي:
بلدنا: قوائم المرشحين للتحالفات الحزبية الرئيسية
لكن مبدئياً ولحد ما ييجي وقت الفقرة، خلونا ناخد فكرة عن قوايم المرشحين للتحالفات الحزبية الرئيسية اللي اعلنوا عنها النهاردة بعد يوم واحد من قفل باب الترشيح وهنبدأ بالكتلة المصرية.
بلدنا: نحمل الخير لشعب مصر .. شعار الحرية والعدالة
أما المؤتمر الصحفي للتحالف الديمقراطي من أجل مصر، فكان في مقر حزب الحرية والعدالة اللي تبنى شعار "نحمل الخير لشعب مصر" بدل "الإسلام هو الحل"
بلدنا بالمصري: اعتصام سوري أمام الجامعة العربية
وقبل الفاصل، فيه مشوار واجب لحد جامعة الدول العربية نقف جنب إخواننا السوريين المعتصمين بقى لهم 10 إيام ونشد على إيديهم ونقول لهم اثبتوا وشدوا الحيل وعقبالكوا زينا وأحسن مننا كمان.
بلدنا: المدنيون في مستشفى الشرطة يواصلون التظاهر
أما بالنسبة للموظفين المدنيين في مستشفى الشرطة، فوضعهم النهاردة صورة طبق الأصل من امبارح.
بلدنا بالمصري: إنهيار جزء من رصيف كوبري الجامعة
النهاردة فى خبر بإن فى جزء من رصيف كوبري الجامعة إنهار لكن بدون أى خسائر فى لاأرواح
ودى صور من الإنهيار
بلدنا بالمصري: ضمانات نزاهة الانتخابات القادمة عملياً
بيتهيألي مافيش حد مصر_ إلا يعني لو كان عنده غرض كدة ولا كدة لا سمح الله_ ما بيحلمش بأول انتخابات حرة ونزيهة في حياته.. لكن مافيش انتخابات حرة ونزيهة من غير ضمانات أساسية، لو انتفت الضمانات ديه أو اتقيدت أو اتعرضت لأي نوع من أمواع اللف والدوران أو ماكنتش كافية أو حتى أطرافها ما كانوش مستعدين كفاية، راحت النزاهة في خبر كان وعليه ومنه العوض.. نظرياً الضمانات المرة ديه حاضرة ومتوفرة، أما عملياً فدة السؤال اللي هنطرحه على ضيوفنا النهاردة
المستشار/ أحمد الفقي: رئيس محكمة استئناف القاهرة
أ. وائل قنديل: مدير تحرير جريدة الشروق
الاستاذ شريف الهلالي: رئيس المؤسسة العربية لدعم المجتمع المدني وحقوق الإنسان
بلدنا بالمصري: برنامج حزب العدل في الانتخابات القادمة
"العدل هو الأمل": دة شعار حزب العدل، اللي بيعرف نفسه في بيانه التأسيسي كالآتي: نحن مؤسسو حزب العدل، مصريون، من جميع طوائف الشعب، نؤمن بأن مصر دولة تسود فيها العدالة والحرية و الكرامة، تنهض بأبنائها الأوفياء مع ضمان العيش في مجتمع يهتم بصحتهم و ينمي قدراتهم بما يمكنهم من تحقيق ذاتهم و ضمان حياة كريمة لهم و لأسرهم. مؤمنون بالمنهجية والتخصصية والعمل الجماعي، نقبل الاختلاف ونؤمن بأن الوطن مسؤولية الجميع لتستعيد مصر دورها الحضاري. تشكلت لدينا رؤية لنهضة هذا الوطن، تؤسس لتيار رئيسي مصري متجاوز للقوالب الأيديولوجية الجامدة.
مقومات هذا التيار الرئيسي ورؤية حزب العدل لتحقيق أهدافه هو دة بالظبط اللي هنركز عليه
أحمد شكري ومصطفى كامل: اتنين من وكلاء مؤسسين حزب العدل
ليست هناك تعليقات:
إرسال تعليق