مرة شعب عمل ثورة بدل ما يطلع قدام رجع ورا
يسعد مساكم.. حلقة النهاردة من بلدنا بالمصري هي أول حلقة من سلسلة من الحلقات هتكون الفقرة الأخيرة فيها دايماً من نصيب حزب من الأحزاب المرشحة لأول انتخابات بعد الثورة وبالتالي إذا نجحت المفروض إنه يكون من أدوارها الرئيسية استكمال مسيرة الثورة وتحقيق أهدافها مش العكس.. على الله بس بعد دة كله ما نلاقيش نفسنا شبه النكتة اللي كان بيحكيها النهاردة الحبيب لحبيبته _ في كاريكاتير عمرو سليم في الشروق_!!! الست غلطتت يا ولداه وطلبت منه في عز اللي احنا فيه دة يقول لها نكتة.. فالظاهر ما رضيش يكسر بخاطرها فقال لها والدمعة بتفر من عينه: " مرة شعب عمل ثورة بدل ما يطلع قدام رجع وراا"!!!
بلدنا بالمصري: آخر أيام الترشح للانتخابات البرلمانية
إنشاء الله يخيب ظن عمرو سليم وأنا متأكدة إنه هيكون من أسعد الناس لو دة حصل وآدينا بنعافر جميعاً والله الموفق والمستعان.. بس لحد دلوقتي الشئ المؤكد إننا على الأقل بنطلع لقدام في إجراءات العملية الانتخابية.. النهاردة انتهت فعلاً المرحلة الأولى بقفل باب الترشيح اللي اتمدت فترتها مرتين يمكن لأول مرة في تاريخ الانتخابات البرلمانية في مصر من سنة 52.. وبالمناسبة ديه هنحاول في فقرتنا اللي جاية بعد آخر أخبار بلدنا نطل طلة على المشهد واحنا في المرحلة ديه من العملية الانتخابية وهنحاول من خلاله نتخيل أو نتوقع بقية المشاهد اللي جاية.. لكن لحد ما ييجي وقتها تعالوا نطل طلة على المشهد على الأرض في آخر أيام تقديم طلبات الترشيح لأول انتخابات بعد الثورة.
بلدنا: مبادلة الجاسوس الإسرائيلي ب ٢٥ سجيناً مصرياً
نروح بقة لآخر أخبار بلدنا، ومن أهم وآخر الأخبار، الخبر اللي صدر من حوالي ساعة في بيان للمخابرات العامة المصرية اكدت فيه بالحرف الواحد وبدون المزيد من التفاصيل إنه: " تم الاتفاق بين الجانب المصري والأمريكي والاسرائيلي على تبادل المتهم ايلان جبريل المزدوج الجنسية الامريكية والاسرائيلية والمتهم بالتخابر لصالح دولة اسرائيل والتحريض على احراق منشآت حكومية وذلك مقابل 25 من السجناء المصريين الموجودين بسجون اسرائيل والمتهمين في قضايا سياسية ومن ضمنهم 3 أطفال وستتم الصفقة خلال 48 ساعة".
بلدنا بالمصري: لقاء المشير طنطاوي بالبابا شنودة
من آخر أخبار بلدنا كمان خبر عن لقاء_ما تمش الاعلان عنه مسبقاً_ جمع ولمدة ساعتين ما بين المشير محمد حسين طنطاوى القائد الاعلى للقوات المسلحة والبابا شنودة في حضور الفريق سامي عنان نائب رئيس المجلس الأعلى للقوات المسلحة واللواء مراد موافى، رئيس المخابرات العامة. واتفقوا مبدئياً في وجهات النظر فى أسلوب معالجة المواقف المختلفة على أن تكون مصلحة الوطن هى المصلحة العليا التى توضع فى الحسبان والاعتبار خلال المرحلة الحالية.
بلدنا بالمصري: لا صحة لإحالة مايكل نبيل للعباسية
وزارة الصحة نفت النهاردة على لسان المتحدث الرسمي باسم وزير الصحة، الدكتور محمد الشربيني إحالة مايكل نبيل لمستشفى الأمراض العقلية في العباسية. وأكد إن البيان الصادر عن إدارة الإعلام بالأمانة العامة للصحة النفسية مالوش أي أساس من الصحة.
الجمعيىة العمومية للمحامين ترفض قانون السلطة القضائية
الجمعية العمومية لنقابة المحامين، رفضت النهاردة بحضور اكتر من 7 الاف محامى مشروع قانون السلطة القضائية وطالبوا مجلس الوزرا والمجلس العسكرى بتاجيل البت فيه لحين انتخاب مجلس نقابة المحامين وتطهير القضاء من القضاة المتورطين في تزوير الانتخابات السابقة وانتخاب سلطة تشريعية تتولى مناقشة القانون وإقراره.
بلدنا بالمصري: تعليق عمل القضاة لأجل غير مسمى
في نفس اليوم اللي قرر فيه المحامين تعليق إضرابهم، قررت الجمعيات العمومية لعدد من المحاكم على مستوى الجمهورية الالتزام بتوصية نادي القضاة وتعليق عمل القضاة لأجل غير مسمى لحين قيام الدولة بدورها وتامين المحاكم وتوفير الحماية الكافية لرجال القضاء والنيابة العامة أثناء نظر القضايا. من ضمن المحاكم اللي قررت تعليق العمل: محكام جنوب القاهرة وجنوب الجيزة الابتدائية وقبلهم محاك كفر الشيخ وطنطا والزقازيق وآخرهم دمنهور
بلدنا بالمصري: بدء محاكمة زكريا عزمي بتهمة التربح
لكن زي ما فيه محاكم التزمت بتوصية نادي القضاة، فيه محاكم تانية التزمت بالاستمرار في ممارسة عملها بشكل طبيعي من ضمنها محكمة جنايات القاهرة، اللي وقف قدامها النهاردة ولأول مرة المتهم زكريا عزمى رئيس ديوان رئيس الجمهورية المخلوع بتهمة التربح.
بلدنا بالمصري: ثورة أهالي شهداء ثوار السيدة زينب
نفس المحكمة محكمة جنايات القاهرة استكملت النهاردة محاكمة المتهمين بقتل الثوار في السيدة زينب وقررت التأجيل لبعد بكرة في وسط هتافات الأهالي اللي اتحولت في لحظة ما لشبه عويل ومافيش على لسانهم غير المطالبة بإقالة الظباط المتهمين بقتل ولادهم أو على الأقل وقفهم عن العمل.
بلدنا: مظاهرات أمناء وأفراد الشرطة لتطهير الداخلية
لحد امبارح بالليل، كان ائتلاف أمناء الشرطة بيأكد إنه علق وقفاته الاحتجاجية اللي كان دعا ليها قدام مديريات الأمن على مستوى الجمهورية بعد استجابة الوزارة لنسبة كبيرة من مطالبهم أعلنت عنها الوزارة امبارح بشكل رسمي في مؤتمر صحفي، لكن كل دة كان امبارح.. أما النهاردة فصحينا الصبح على مظاهرات حاشدة لأمناء وأفراد الشرطة وظباط الصف قدام مديريات الأمن على مستوى الجمهورية ورافعين مطلب رئيسي هو "تطهير وزارة الداخلية من اللي وصفوهم بأعوان العادلي".
بلدنا بالمصري: ثورة المدنيين بمستشفى الشرطة بالعجوزة
النهاردة بصراحة الله يكون في عون وزارة الداخلية، مش عارفة هتلاقيها منين ولا منين.. النهاردة الموظفين المدنيين في مستشفى الشرطة في العجوزة خرجوا هم كمان في مظاهرة قدام المستشفى ورافعين مطلب وحيد وهو المساواة ما بين "المدنيين والعسكريين" وإلا هيسيبوا المستشفى باللي فيها للظباط على حد تعبيرهم.
بلدنا بالمصري: حبيب العادلي بيتعالج في مستشفى الشرطة
من ضمن المتظاهرين، فيه ممرضة أكدت إن حبيب العادلي وزير الداخلية السابق المسجون بتهمة غسيل أموال والمتاهم على ذمة قضية قتل الثوار، دخل المستشفى يوم الجمعة اللي فاتت وعمل عملية في عينه وتم تقديم التحيه ليه من معظم العاملين وإنه هو وعيلته لسة بيتعالجوا فى المستشفى أربعة وعشر ين قيراط في حين إن العاملين المدنيين في المستشفة مش من حقهم يتعالجوا في المستشفى اللي بيشتغلوا فيها!!! والسؤال بأمارة إيه وبأي صفة حبيب العادلي وعيلته لسة بيتعالجوا في مستشفى الشرطة؟! وبأمارة إيه حبيب العادلي بيتعالج اصلاً برة مستشفى السجن؟!!!
بلدنا بالمصري: الحل .. شرطة لشعب مصر
بعد كل اللي وزارة الداخلية فيه دة، يمكن يكون الحل في "شرطة لشعب مصر".
بلدنا: تقييم مرحلة الترشح للانتخابات البرلمانية
المشهد الحالي واحنا في اخطر مرحلة من مراحل التحول الديمقراطي اللي لازم نفضل فاكرين اننا دفعنا تمنه غالي ما ينفعش يروح هدر، هنطل عليه النهاردة بعيون ضيوفنا
- د. حسن نافعة: أستاذ السياسة بكلية الاقتصاد والعلوم السياسية
- علي حسن: نائب رئيس تحرير وكالة أنباء الشرق الأوسط
بلدنا بالمصري: تعريف ببرنامج حزب النور الانتخابي
حزب النور السلفي على موقعه الرسمي، اسمه "حزب النور" بدون وصف السلفي وشعاره: "معاً على طريق النور"..
أما سؤال من نحن؟! فالإجابة عليه كالآتي:
" نحن رجالٌ ونساء، شبابٌ وفتيات... تعاهدوا علي تجديد دماء أمتهم وبعث ريادتها، والقيام بواجب الإصلاح التدريجي تحت شعار "إِنْ أُرِيدُ إِلاَّ الإِصْلاَحَ مَا اسْتَطَعْتُ"، انطلاقاً من الفهم الشامل لمبادئ الإسلام دينا ودولة، وكلهم عزم علي بناء مصر الحديثة لتكون منارة للعالمين... حزب ٌ قد ضم عناصر شتى من المبدعين، كل ٌ في مجال تخصصه، من كافة طبقات وشرائح المجتمع المصري لتحقيق رفعة هذه البلاد وسعادة أبنائها، مع إبراز الوجه الحقيقي للشريعة الإسلامية وما تتضمنه من عدل ٍمطلق، والتزامٍ كامل برعاية حقوق جميع من يعيشون في ظلها"... دة تعريف مبدئي في مجمله ومحتاج كتير من الشرح والتفصيل، هيتولاهم ضيفنا النهاردة
د. يسري حماد: المتحدث الرسمي باسم حزب النور
ليست هناك تعليقات:
إرسال تعليق