بالمفتشر: هننول المراد ولا نأبنا هيطلع على شونة ؟
هنبدأها بكام بسؤال بالمفتشر كدة وهنستنى رد غطاهم حين ميسرة.. وأهوه كل شئ بأوان!!! أول هام: إلا هو على فين العزم كدة إنشالله؟!!! والبلد ديه رايحة على فين بعون الله والقلب داعي لها؟!!! وتاني هام: هو مين اللي سايق ومين الملاح ومين اللي في إيديه الدفة؟!!! واللي سايق دة، مين اللي بيشور عليه ومين اللي بيدله على السكة؟!!! واللي بيدله على السكة دة غرضه إيه.. وشايف قدامه ولا شايف بس تحت رجليه.. ولا باصص في المراية وياللا نفسي.. ولا عينيه متشعلقة فوق في العلالي وطالب العلا من غير سهر الليالي؟!!! واللي في إيديه الدفة رايد أي سكة فيهم: سكة السلامة من اقصر طريق وعلى خط مستقيم ويا دار ما دخلك شر؟!!! ولا سكة السلامة من أطول طريق بحفره بقة بمطباته بمتاهاته وربنا يجيب العواقب سليمة!!! ولا سكة اللي يروح ويرجع مكان ما كان _كفالله الشر_ وبحطة إيده وكإنه لا راح ولا جه ولا دفع دم قلبه في المشوار؟!!!... لكن كل الأسئلة ديه كوم والسؤال دة كوم تاني خالص: إلا رفاق المسيرة العسيرة فين من دة كله؟! وفينها صورة الحشد من أهالي المحروسة، اللي نزلوا في أيام من ذات الأيام، ايد واحدة وبعلو الصوت ينادوا على العيش وعلى الحرية وعلى العدالة وعلى الكرامة الإنسانية، ومن بعدهم ومن قبلهم "إسقاط النظام" أبو سبعة ارواح اللي ماشالله لسة واقف لنا على حيله ددبان وبالمرصاد وناقص يقول لنا بالمفتشر كدة وبالفم المليان: " نأبكوا هيطلع على شونة وابقوا قابلوني وعشمكم في الدنيا ديه ولا عشم إبليس في الجنة، ومترح ما تحطوا راسكوا هتحطوا رجليكوا وأنا وانتوا والزمن طويل،!!! نهايته: فينها الصورة ديه؟!!! فينها صورة الحشد من كل دة؟!!! هتنول المراد من رب العباد ولا هتطلع تاني من المولد بلا حمص؟! لسة فيها الروح ولسة فيها الرمق ولا هناخدها من قاصرها ونعلقها للذكرى على الحيطان ورايحين جايين نترحم عليها وعلى أيامها الحلوة؟!!! على كلٍ: رد الأسئلة ديه وغطاها ولا ليهم معنى ولا ليهم لزمة لو ماهماش برضا أهالي المحروسة وبخط إيدهم: اللي بيمضي واللي بيبصم!!!
طنطاوي يؤكد: لم يطلب منا إطلاق النار على المتظاهرين
آخر خبر النهاردة هو تصريحات المشير حسين طنطاوى رئيس المجلس الأعلى للقوات المسلحة أثناء افتتاحه للمرحلة التانية من مجمع إنتاج الكيماويات في الفيوم بحضور نائبة الفريق سامى عنان رئيس اركان حرب القوات المسلحة ورئيس الوزراء الدكتور عصام شرف وعدد من الوزرا. المشير أكد في بداية كلامه إن " مصر لم ولن تسقط ، وسنعبر بها الى مرحلة الاستقرار باذن الله.. ولن نقف أمام من يتكلم وينتقد ، فلا يوجد ما يوقفنا".. وأكد دور القوات المسلحة المنصوص عليه في الدستور بالدفاع عن ارض الوطن فى الخارج وتسخير امكانياتها فى الداخل وقت السلم من أجل التنمية، ولا تنتظر القوات المسلحة شكرا على ذلك فهو واجب"... وطالب المواطنين بالعمل والانتاج ودفع عجلة التنمية للامام ، بدل الاستماع للي سماهم المشير "هواة الكلام والحديث عن ارتداء ملابس جديدة او قديمة".. وبعدين سأل على سبيل الاستنكار: " يعني كانوا عايزني البس بدلة مقطعة"؟!!!... أما بالنسبة لشهادته قدام المحكمة في قضية قتل المتظاهرين، المشير أكد بالحرف الواحد إنها كانت "شهادة حق من رجل صادق مقاتل لاكتر من 40 سنة في سبيل الله ومصر.. وكرر " لم يطلب منا ان نضرب نار على الشعب ولاعمرنا ، هنضرب نار"!!!
بلدنا: ردود فعل توقيع الأحزاب بيان المجلس العسكري
تاني أهم خبر النهاردة، هو ردود الأفعال المختلفة والمتباينة اللي بدأت من امبارح بالليل من ساعة ما صدر بيان المجلس العسكري اللي وقع عليه ممثلين عن 15 حزب بعد اجتماعهم بأعضاء من المجلس العسكري وعلى رأسهم رئيس الأركان، الفريق سامي عنان، ومن ساعتها والدنيا واقفة على رجل، ما بين ردود فعل إيجابية وترحيب بالبنود التمانية على إنها استجابة محمودة من المجلس العسكري وبداية الطريق لسكة السلامة، وما بين ردود فعل رافضة رافض قاطع (سواء سياسية أو شعبية) على اعتبار إن البيان دة " التفاف على مطالب الناس ومطالب الثورة وتكريس لتمديد الفترة الانتقالية".. دة غير الأحزاب اللي انقسمت على نفسها نتيجة لتوقيع ممثلين عنها على البيان، وبدأت تظهر ردود أفعال من نوع بيانات تنفي موافقة الأحزاب ديه على نتايج الاجتماع وعلى التوقيع على البيان والتنصل من الشخص اللي وقع على البيان والتأكيد على إنه ما بيمثلش إلا نفسه، غير التهديدات بتجميد العضوية وباستقالات جماعية.. زي ما حصل مع حزب العدل، مثلاً اللي وقع بالنيابة عنه الدكتور مصطفى النجار، أحد الوكلاء المؤسسين قبل ما يعلن سحبه للتوقيع على البيان بناء على رغبة أعضاء الحزب، وأكد إنه ما وقعش على البيان إلا اعتقادا واجتهادا منه بما رآه لصالح الوطن"، على حد تعبيره على حسابه على تويتر اللي أكد فيه إن القرار النهائى متروك للجنة العليا للحزب وليها مطلق الحرية فى رفض البيان أو تعديله... كان فيه ردود أفعال تانية من نوع التهديد بسحب الثقة من رئيس الحزب، زي اللي حصل في حزب النور السلفى.. غير بيانات الرفض اللي صدرت من عدد من مرشحين الرياسة أولهم: الدكتور عبد المنعم ابو الفتوح، والشيخ حازم صلاح ابو اسماعيل وبيان حملة تأييد حمدين صباحي... وغيرها من ردود الأفعال اللي هنناقشها بالتفصيل في فقرتنا اللي جاية في محاولة للرد على سؤال: "مصر رايحة على فين من هنا"؟!!! لكن لحد ما ييجي وقتها احنا هنقرا البيان زي صدر بالحرف، للي من حضراتكوا لسة ما اطلعش عليه وعشان كمان نكون على بينة من أمرنا واحنا بنناقشه مع الأطراف المختلفة.
بلدنا بالمصري: مد خدمة اللواء رفعت القمصان
على ذكر الانتخابات بقة، من حوالي يومين، اترددت أخبار عن إن وزير الداخلية اللوا منصور العيسوي، قرر مد خدمة اللوا رفعت قمصان مساعد وزير الداخلية، ومدير الإدارة العامة للانتخابات في وزارة الداخلية، مع العلم إن وزير الداخلية كان أعلن أول ما تولى منصبه عن قرار بعدم المد لأي لوا بعد سن ال60 مهما كانت كفاءته.. ولما استفسرنا من المكتب الإعلامي في وزارة الداخلية عن صحة الخبر كان الرد كالآتي:
بلدنا بالمصري: مصر تبحث الإفراج عن الجاسوس الخارق
في اليومين اللي فاتوا، كتر الكلام عن الجاسوس إيلان جرابيل، وعن احتمال الإفراج عنه، خاصة بعد بعد الطلب اللي اتقدم بيه عضو الكونجرس الأمريكي جاري اكليمان للخارجية المصرية، للإفراج عنه، على أساس إنه مواطن أمريكي، ولإنه بيعاني من مرض وراثي خطير، في مقابل زيادة المعونة الأمريكية لمصر،مع ضمان المساهمة في إنجاح ثورة 25 يناير ومستقبل أفضل للشعب المصري. النهاردة وصلنا توضيح من مصادر أمنية مسؤولة نصه كالتالي بالحرف الواحد
بلدنا بالمصري: آخر تطورات إضراب المعلمين
آخر تطور فيما يخص أزمة المعلمين، إن د.عصام شرف، رئيس الوزرا، وافق بشكل رسمى على استبعاد مكافأة الامتحانات من إجمالى الحوافز، وبناءاً عليه مجلس الوزرا أصدر قراره امبارح، بزيادة إجمالى حوافز الأداء المقررة للمعلمين من 75% للمعلم المساعد إلى 125%، ومن 50% للمعلم إلى 75% ومن 25% للمعلم الأول إلى 50%.
مظاهرات الطلاب وإضراب أساتذة الجامعات لليوم الثاني
أما الجامعة، فالسنة الدراسية بدأت امبارح، وأعضاء هيئة التدريس وعدوا بالإضراب عن العمل لإقالة القيادات الجامعية المتمسكة بمناصبها كانوا عند وعدهم.. والطلبة اللي وعدوا بالتضامن معاهم كانوا عند وعدهم.. أما القيادات فكانت هي كمان عند رأيها، فيما عدا رئيس جامعة المنيا، اللي قدم استقالته امبارح.. ديه الاستقالة رقم ستة بعد استقالة رؤساء جامعات القاهرة وحلوان والفيوم وبورسعيد وجنوب الوادي، اما الباقي فيبقى الوضع على ما هو عليه.
بلدنا: مظاهرة بأوتوبيسات النقل العام أمام مجلس الوزراء
الحقيقة إن رصيف مجلس الوزرا، كان يساع النهاردة من المعتصمين والمضربين عن العمل ألف ويمكن اكتر.. غير الأطباء، العاملين في هيئة النقل العام كانوا معتصمين في مكانهم، وقطعوا الطريق هم كمان، بس المرة ديه بمظاهرة بأوتوبيسات النقل العام.
بلدنا: تظاهرة معلمي الأزهر أمام المشيخة ومطالبهم
أما معلمين الأزهر المتعاقدين، ففيه مجموعة منهم كانت قاطعة الطريق النهاردة قدام المشيخة، وما فتحوش الطريق إلا بعد حضور مندوب من المجلس العسكرى للتفاوض معهم، ووعده ليهم بالتفاوض بالنيابة عنهم مع شيخ الأزهر على مطالبهم، لكن بشرط فتح الطريق وقد كان.. تفاصيل اكتر هنعرفها من:
بلدنا بالمصري: مظاهرة الأطباء أمام مجلس الوزراء اليوم
نيجي بقة للأطباء اللي بقى لهم دلوقتي حوالي 15 يوم مضربين عن العمل، ولا حياة لمن تنادي، على الأقل من وجهة نظرهم.. فما كان منهم إلا إنهم وقفوا النهاردة وقفة احتجاجية جديدة قدام مجلس الوزرا، لعل وعسى يلاقولهم صاحب.
بلدنا: بدء محاكمة أمين أباظة في فساد وزارة الزراعة
النهاردة بدات محكمة جنايات الاسماعلية نظر قضية الفساد في وزارة الزراعة المتهم فيها، المهندس امين اباظة وزير الزراعة الاسبق وغيره من المتهمين. المحكمة اجلت نظر القضية لجلسة 2 نوفمبر اللى جاى.
بلدنا بالمصري: تأجيل محاكمة المتهمين في أحداث إمبابة
لسة في نفس المحكمة، محكمة جنايات أمن الدولة العليا طوارئ بالجيزة، أجلت محاكمة المتهمين فى قضية أحداث فتنة إمبابة لجلسة 2 نوفمبر اللي جاي.. تفاصيل الجلسة وأسباب التأجيل في التقرير اللي جاي.
بلدنا: أولى جلسات محاكمة الأردني المتهم بالتخابر
النهاردة محكمة جنايات أمن الدولة طوارئ، كانت بتنظر في أول جلسة من جلسات قضية التخابر المتهم فيها مهندس اتصالات أردنى الجنسية وظابط بالموساد الإسرائيلى. التفاصيل في التقرير اللي جاي.
بلدنا بالمصري: غداً .. محاكمة المتهمين في أحداث السفارة
الحقيقة إن محكمة أمن الدولة العليا طوارئ المفروض إن هي اللي هتنظر في أحداث يوم جمعة تصحيح المسار يوم 9/9 والشهيرة بأحداث السفارة.. لكن مش هي لوحدها، القضاء العسكري بينظر كمان في نفس القضية، وبكرة هينظر 3 جلسات مرة واحدة في القضية ديه.. يعني متهمين في نفس القضية بيتحاكموا قدام محكمة أمن الدولة العليا طوارئ، ومتهمين تانيين قدام المحاكم العسكرية.. يمكن الفيديو اللي جي اللي أعدته مجموعة لا لمحاكمات العسكرية، يقدر يفهمنا الحكاية ديه.
بلدنا بالمصري: محافظ السويس والتائبون من المسجلين خطر
زي ما وعدناكم يوم الخميس ووعدنا أهالي المحروسة من السوايسة، احنا كنا النهاردة شهود عيان على اجتماع محافظ السويس بمجموعة المسجلين خطر، اللي مادين إيديهم ومستنيين حد يستغلهم في الصح وربنا يقدم اللي فيه الخير.
بعد اتفاق المجلس العسكري ورؤساء أحزاب .. مصر على فين
السؤال اللي هنحاول نجاوب عليه مصر رايحة على فين بعد اتفاق المجلس العسكري مع ممثلين عدد من الأحزاب، واختلاف ما عداهم حوالين البنود التمانية اللي البعض شاف فيهم الشفا.. والبعض شاف فيهم قضا أخف من قضا.. والبعض شاف فيهم انتكاسة جديدة للثورة ومطالبها!!! على فين العزم بقة من هنا؟!!!
ليست هناك تعليقات:
إرسال تعليق