بلدنا بالمصري: القذافي .. اللهم لا شماتة
ولإننا شعب أصيل وإبن أصول ومش من طبعنا نشمت في الموت فلازم نبدأها ب"اللهم لا شماتة"، لكن في نفس الوقت لا يمكن ننكر على أهالي ليبيا الكرام الجدعان فرحتهم ولا نقدر نمنع نفسنا من إننا نفرح لفرحهم، وخصوصاً إنهم دفعوا التمن غالي بالروح والدم اللي حلفوا ما يروح هدر!!! لكن لازم كمان نقول "اللهم لا حسد".. أصل كلام في سركوا ولو إنه يمكن مش خافي على حد، إنه من صباحية ربنا ومن ساعة ما عرفنا الخبر يقين_صحيح إن فيه كتير من أهالي المحروسة كان بودهم يبقى عقبال عند أهالي ليبيا زينا، ويشوفوه بعينيهم جوة القفص على ضهره أو على رجليه بس بيتحاكم وبياخد جزاءه في الدنيا إنشاءالله، أما في الآخرة فحسابه عند رب كريم لكن كمان منتقم جبار_ لكن في نفس الوقت فيه برده كتير من أهالي المحروسة كان بودهم يبقى عقبال عندنا زيهم ونخلص من وجع القلب والدماغ.. ومن مفرقين الجماعات وحرامية الفرح ونشالين الثورة.. وزي ما يكونوا كدة بيتحسروا على إن ثورتنا كانت بيضة وزي فل أو زي اللي حاسسين إن "السلمية" ديه وقفت علينا بخسارة لا سمح الله!!! لكن والله أبداً، ما هيحصل ولا يكون طول ما لثورتنا شعب يحميها ويحافظ برده عليها بيضة وزي الفل مهما حصل ومهما كان التمن غالي بالروح والدم.. المهم إنهم ما يروحوش هدر مهما طال الزمن!!
وبمناسبة الروح والدم اللي مش لازم يروحوا هدر، اللي من حضراتكوا ما قراش مقال المدون علاء عبد الفتاح النهاردة في الشروق، أمانة عليكوا يقراه وانتوا الكسبانين.. المقال اسمه: " مع الشهداء ذلك أفضل جداً"!!!
قبل ما نروح لآخر أخبار بلدنا، خلونا نعرف تفاصيل اكتر عن آخر خبر في الدنيا، واللهم ما لا شماتة ولا حسد!!
بلدنا: الحكومة تبحث المشاركة في إعمار ليبيا
من ناحية تانية، ومن قبل ما يتم حتى الإعلان عن مقتل القذافي، الحكومةالمصرية كانت بدأت تاخد خطوات لبحث امطانية المشاركة في إعمار ليبيا، والنهاردة اتاخد قرار فعلاً بسفر وفد مصري لليبيا قبل 30 اكتوبر يضم عدد من الوزرا المعنيين وعدد من رجال الأعمال للاتفاق مع المجلس الوطني الانتقالي على المشاريع المتوقع تنفيذها في مرحلة إعادة الإعمار.
بلدنا: حبس الناشط علي الحلبي عضو ٦ أبريل
وآخر خبر إن النيابة العسكرية، قررت حبس الناشط على الحلبي، عضو حركة شباب 6 إبريل أسبوع على ذمة التحقيقات_ بتهمة الشخبطة على الحيطان_ على حد تعبير عدد كبير من النشطا والمواطنين المتضامنين معاه.. لكن التهمة الرسمية الموجهة ليه هي: إتلاف منشآت عامة وحكومية.. والحكاية وما فيها إن الشرطة العسكرية قبضت على علي الحلبي امبارح وهو بيرسم جرافيتي على حيطة في الشارع للتوعية بعدم انتخاب أعضاء الحزب الوطني المنحل وفلوله، في إطار حملة "الدايرة السودا والدايرة البيضا"، اللي أطلقتها حركة 6 إبريل.. والسؤال هنا وقبل أي حاجة، هو مش فيه قرار من المجلس الأعلى للقوات المسلحة بوقف إحالة المدنيين للقضاء العسكري إلا في حالات معينة، وعلى حد ما فهمنا إنها حالات الاعتداء على أفراد أو منشآات أو معدات للقوات المسلحة؟!!!
بلدنا بالمصري: استشهاد النقيب عمر سعد عبدالشافي
لإن مع الشهداء ذلك أفضل جداً، ولإن الشهادة ما بتفرقش ما بين إنسان والتاني لا بحكم دينه ولا بحكم أصله وفصله ولا بحكم وظيفته.. ولإن فيه وظايف أصحابها بيخرجوا كل يوم من بيوتهم وشايلين أرواحهم على كفهم، النهاردة الفجر استشهد النقيب عمر سعد عبد الشافى صبره، من قطاع الأمن المركزى في مديرية أمن سوهاج، أثناء تنفيذ حملة أمنية في قرية الوحيلية.. وهيتم تشييعه في جنازة عسكرية بكرة بعد صلاة الجمعة في محافظة القليوبية.. لكن قوات الأمن تمكنت من القبض على عدد من المتهمين.
بلدنا بالمصري: علاء وجمال متهمان بغسيل الأموال
المستشار عاصم الجوهرى، رئيس جهاز الكسب غير المشروع، أكد النهاردة في مؤتمر صحفي ولتاني مرة إنه أيوة السلطات القضائية السويسرية بتحقق في قضية انضمام علاء وجمال مبارك بتهمة تشكيل عصابي لغسيل الأموال وإنها سبقت وحققت معاهم في نفس الاتهام في 2005.. وإن الإعلان عن ودائع ليهم في بنوك سويسرا ما فيهوش أي انتهام لسرية التحقيقات وبحكم القانون.
بلدنا: تقارير تقصي حقائق تمويل المجتمع المدني
مع إن الكل طالب اكتر من مرة بإنه بكفايانا إطلاق اتهامات على المشاع م غير تحديد ومن غير أدلة معلنة، عشان تعبنا من ضرب الأخماس في الأسداس والشك في صوابع إيدينا، إلا إنه للمرة اللي ما عدناش عارفين الكام، تخرج علينا تصريحات منسوبة لمصادر قضائية_ترفض الإعلان عن نفسها_ تأكد إن فيه منظمات مجتمع مدني ونشطاء _وبرده ترفض الكشف عنهم بحجة إنها أسرار التحقيقات التي لا يجوز الإفشاء عنها_ إن المنظات والنشطاء اللي ما يتسموا دول تلقوا كلهم كدة على بعض من بعد الثورة 23 مليون دولار من مصادر وجهات خارجية معظمها عربية_برده مجهلة ومش معروف لها أصل من فصل_!!! وكل دة على عهدة تقارير اللجنة اللي شكلها وزير العدل لتقصي الحقائق حوالين تلقي عدد من منظمات المجتمع المدني تمويل من الخارج!!!
بلدنا: إجراءات المحامين لمواجهة قانون السلطة القضائية
في نفس الوقت تقريباً، كانوا المرشحين على منصب نقيب المحامين، بيعلنوا في مؤتمر صحفى فى مقر النقابة عن الخطوات والإجراءات اللي جاية في مواجهة قالنون السلطة القضائية.
بلدنا: احتجاجات المحامين على قانون السلطة القضائية
احتجاجات المحامين على قانون السلطة القضائية لسة على أشدها من أسوان لإسكندرية ولسة الأمر ما يسلمش من قفل المحاكم بالحبال والجنازير ومنع القضاة من دخول المحاكم وممارسة عملهم.. اللي حصل النهاردة في مجمع محاكم شبرا الخيمة، مجرد عينة.
بلدنا بالمصري: استقالة لجنة حزب الوفد ببني سويف
الظاهر كدة والله أعلم إن فلول الحزب الوطني، لا راحمين ولا سايبين رحمة ربنا تنزل.. وكل ما تحالف ينهار ولا حزب ينسحب ولا الاستقالات الحزبية تنزل ترف، بقى كلمة السر في معظم الحالات "فتش عن الفلول".. اللي حصل النهاردة في لجنة حزب الوفد في بني سويف، اللي استقالت عن بكرة أبيها مجرد عينة وغالباً بينة.
بلدنا بالمصري: انهيار التحالفات واخد حده
أما سلسلة انهيار التحالفات فما زالت واخدة حدها.. النهاردة في حزبين واحد من أكبر أحزاب التحالف الديمقراطي وواحد من أكبر أحزاب الكتلة وهم الكرامة والجبهة، انسحبوا الاتنين من تحالفاتهم.. إيه الأسباب وإيه البدائل وماعادتش فاضل غير يومين على قفل باب الترشيح دة
بلدنا: أهالي المحروسة .. شهود على الوحدة الوطنية
أهالي المحروسة اللي مخطيين عتبتنا خطوة عزيزة النهاردة، عشرة عمر طويلة واصحاب الروح بالروح من ييجي 70 سنة في عين العدو وربنا يديهم الصحة وطولة العمر على الحلوة والمرة، زي ما كانوا طول عمرهم من ساعة ما كانوا بيدرسوا سوى في كلية الحقوق جامعة القاهرة، في الأربعينات ولحد ما بقوا النهاردة شهود على عصور عشناها وعصور تانية ما عشناهاش، هيشهدوا عليها كلها النهاردة بكتير من الحب وكتير من الأمل، لكن الأمر ما يسلمش كمان من الألم اللي يارب ما يوصل لحد المرارة.
الضيوف
- د. سعد الفيشاوي
- د. حسين زكي الابراشي
أساتذة القانون وأصحاب المناصب الرفيعة في عدد من المؤسسات المصرية والعربية والدولية وعشرة العمر
ليست هناك تعليقات:
إرسال تعليق