أسبوع على شهداء ماسبيرو .. ربنا يقدرنا نجيب حقهم
يسعد مساكم وحلقة جديدة من بلدنا بالمصري، حلقة الحد 16-10-2011، الموافق تمام اليوم السابع على استشهاد ضحايا ماسبيرو، ألف رحمة ونور عليهم.. ربنا يغفر لهم ويصبر أهاليهم ويقدرنا نجيب حقهم مرتين تلاتة: مرة لما نقدم الجاني للعدالة وياخد جزاءه بالحق وبالعدل وبالقانون.. ومرة كمان لما ييجي اليوم ويبقى حد الله ما بيننا وما بين أي خصم إلا "القانون" حكم وسيف على رقاب الكل من الكبير للصغير مافيش حد أحسن من حد ومافيش حد على راسه ريشة وحد على راسه بطحة.. ومرة كمان لما نعيش ونجيب بإيدينا اليوم اللي نشوف فيه مصر زي ما حلمنا بيها وزي ما كل شهيد دفع تمنها حياته!!!!... أما بالنسبة للي لسة عايش مننا وربنا لسة كاتب له عمر فربنا يكفيه كذا شر... شر اليوم اللي تضيع فيه حقوقنا وحقوق اللي راحوا واحنا واقفين نتفرج، مغلوبين على أمرنا ومصدقين إن ما باليد حيلة.. أو شر ياللا نفسي ويا روح ما بعدك روح... والأمر من كل دة، شر إنه ييجي علينا يوم على آخر الزمن، وما يبقاش عندنا ريحة الدم ولا الإنسانية، ونقبل على نفسنا وعلى ضمايرنا لوم الضحية وتبرير العنف وقتل النفس بغير حق!!!!
بلدنا بالمصري: قضايا الدولة لم تصدر بيان المريناب
نقول بقة يا هادي يا رب بآخر أخبار بلدنا.. ومن ضمن الأخبار، خبرانتشر على إنه بيان رسمي من هيئة قضايا الدولة حوالين حوالين، اللي اتوصف بإنه "مبنى الماريناب المتنازع عليه في أسوان".. مضمون اللي تم اعتباره بيان من هيئة قضايا الدولة، أولاً صدر عن المستشار حسين عبده خليل نائب رئيس هيئة قضايا الدولة ورئيس فرع الهيئة في أسوان، اللي أكد إن ''التراخيص والموافقات الصادرة لإحلال مبني كنيسة، اسمها كنيسة رئيس الملائكة في منطقة اسمها خور الزق في إدفوا تم استغلالها، بمساعدة بعض الموظفين في الوحدة المحلية بمركز ادفو'' في إنشاء كنيسة جديدة في المريناب على أنقاض منزل قديم للمواطن معوض يوسف معوض، المحصور في مستندات الجمعية الزراعية كسكن وليس ككنيسة، وإنه صادر له إيصالات وأوراق لتركيب عداد كهربا وميه باسم المواطن، دليل علي مخالفة الموافقات والتراخيص الصادرة من الجهات الإدارية المختصة''.... وإن الرأي القانوني اللي صدر وقتها لرئيس هيئة قضايا الدولة في أسوان كان علي عمل إحلال كلي للكنيسة وهدمها وإصدار تراخيص الهدم على أساس أن ذلك لمبني كنيسة قديمة سيتم إحلالها وتجديدها بكنيسة جديدة في ذات الموقع وليس بالموافقة علي بناء كنيسة جديدة في موقع مغاير تماماً لموقع الكنيسة القديمة بخور الزق"... دة باختصار مضمون اللي صدر امبارحن وعلى أي حال، جهات التحقيق هي المسؤولة عن اثبات المخالفات أو اثبات صحة الموافقات، وفي كل الحالات حتى لو فيه مخالفات دة مش مبرر للأهالي إنهم يزيلوها بإيديهم وما كان عليهم إلا اتخاذ الاجراءات القانونية وانتظار نتايجها وبعدين إزالة المخالفات برده بالطرق القانونية مش بالدراع.. بس مش هي ديه القضية دلوقتي، القضية إنه على ما يبدو إن اللي صدر دة، مش بيان رسمي من هيئة قضايا الدولة، اللي نفت إنها تكون اصدرت بيان بالخصوص دة وأكدت إن الهيئة مالهاش أي اختصاص في التحقيق في أحداث الماريناب ولا من سلطتها التصريح ببناء أو هدم الكنيسة".. يبقى السؤال: اللي صرح بيه المستشار/ حسين عبده خليل نائب رئيس فرع الهيئة في أسوان، صرح بيه بأي صفة ليه اتفهم على إنه بيان من هيئة قضايا الدولة
بلدنا: بيت العيلة يرفض قانون دور العبادة الموحد
بقى لنا اكتر من اربعين سنة، كل ما تحصل واقعة أو حادثة أو أزمة أو جريمة وتتصنف على إنها طائفية، ونيجي ندور على حلول، تطلع كلمة السر: "قانون لتجريم التمييز وأولهم التمييز الديني وقانون لدور العبادة الموحد".. وبقى لنا أربعين سنة والكلمتين دول ما هم إلا كلمتين لزوم المسكنات وفض المجالس وكان الله بالسر عليم لحد ما تحصل مأساة جديدة، وآخرتها "ماسبيرو".. وزي ما يكون كدة كان لازم التمن يبقى من لحم الحي عشان الكلمتين يتحولوا أخيراً لقوانين والأهم إنهم يتفعلوا إنشاءالله.. تجريم التمييز وهو صدر امبارح والحمد لله بمرسوم بقانون بتعديل بعض مواد قانون العقوبات وهنتكلم عنه بتفصيل اكتر في فقرتنا الأخيرة.. أما قانون دور العبادة الموحد، فكان في انتظار الملاحظات الأخيرة للأزهر والكنيسة قبل ما يوافق عليه مجلس الوزرا ويصدر بمرسوم بقانون من المجلس العسكري.. لكن على ما يبدو إن الأزهر والكنيسة اتفقوا النهاردة في اجتماع "بيت العائلة المصرية"، رفضوا إصدار قانون موحد لدور العبادة وكانت وصيتهم إصدار قانون موازٍ لبناء الكنائس بمشاركة كل الطوائف المسيحية، مع استمرار العمل بقانون المساجد الحالي الصادر عام 2001..
بلدنا: حكومة شرف تبحث الأوضاع الأمنية
النهاردة عقد مجلس الوزرا اجتماع، مصغر برئاسة الدكتور عصام شرف، لبحث الأوضاع الامنية في البلاد. حضر الاجتماع بجانب رئيس الوزراء، واللواء مراد موافى مدير المخابرات العامة، كل من الدكتور على السلمى، نائب رئيس الوزراء للتنمية السياسية والتحول الديمقراطى، والمستشار عبد العزيز الجندى، وزير العدل، واللواء منصور عيسوى، وزير الداخلية، وفايزة أبو النجا وزيرة التعاون الدولى والتخطيط، وأسامة هيكل، وزير الإعلام، ومنير فخرى عبد النور، وزير السياحة، والدكتور عماد أبو غازى وزير الثقافة، وممثلين القوات المسلحة.
ونهاية الاجتماع صدر بيان مقتضب عن مجلس الوزرا نصه كالاتي:
بلدنا بالمصري: تقييم تغطية التلفزيون لأحداث ماسبيرو
وزير الإعلام أسامة هيكل، وبعد ما جدد رفضه امبارح اتهام التليفزيون المصرى بالتحريض واعتبرها اتهامات تريد إسقاط الإعلام المصري، وبعد ما وصف التغطية بإنها كانت شفاففة وجيدة للغاية وإن كان بها بعض الأخطاء، اجتمع النهاردة برؤساء قطاعات الإذاعة والتليفزيون والأخبار والمتخصصة، لمناقشة تقرير اللجنة الفنية اللي تشكلها الوزير من خبراء مستقلين من خارج اتحاد الإذاعة والتليفزيون، لتقييم التغطية الرسمية لأحداث، واكد لوكالة أنباء الشرق الأوسط بعد الاجتماعن إنه تم تحويل التقرير لرئيس اتحاد الإذاعة والتليفزيون لمتابعة واتخاذ الإجراءات اللازمة. أما النتايج اللي توصل ليها التقرير فهنعرفها من: محاسن السنوسي الصحفية في المصري اليوم
بلدنا: أخبار علي خالد بعد إجراء الجراحة
احنا عندنا النهاردة أخبار عن علي خالد المصور اللي أصيب بطلق ناري استقرت فيه الرصاصة في فكه في أحداث ماسبير
بلدنا: في اليوم الخامس للترشيح للبرلمان
تعالو بقة نطل طلة على أجواء اليوم الخامس من فتح باب الترشيح لانتخابات مجلس الشعب والشور، وبالذات فى لجنة محافظة القاهرة، وخصوصاً بعد قرار مد فتح باب الترشيح لحد يوم 22 اكتوبر بدل 18
بلدنا بالمصري: مفيش اكتساح في انتخابات الأطباء
انتخابات نقابة الأطباء يوم الجمعة، كانت تجربة اتوصفت بإنها تجربة ناجحة بكل المقاييس باللي ليها واللي عليها وعلى الرغم من عدد لا بأس بيه من الشكاوي سواء من سوء التنظيم في بعض اللجان لحد اللي البعض وصفها بتجاوزات ومخالفات.. لكن يفضل اللغز مش في النتيجة بقد ما في قراءتها.. معظم التقارير والتحليلات الصحفية بتتكلم بالبنط العريض عن اكتساح الاخوان المسلمين لانتخابات نقابة الأطباء وبالذات النقابات الفرعية.. في حين إن فيه أصوات تانية بتأكد إن الكلام عن اكتساح لتيار بعينه كلام غير صحيح أو على الأقل غير دقيق.
بلدنا بالمصري: رفض طعن أيمن نور في قضية توكيلات الغد
آن أوان جولتنا بين المحاكم والقضايا وهنبدأها من محكمة النقض، اللي رفضت النهاردة طعن الدكتور أيمن نور وتأييد الحكم الصادر من محكمة الجنايات بإدانته فى قضية تزوير توكيلات حزب الغد
بلدنا بالمصري: تأجيل جلسة قضية أرض البياضية
محكمة القاهرة الجديدة كانت بتنظر النهاردة في عدد كبير من القضايا، اولهم قضية أرض البياضية، المتهم فيها ضمن آخرين، الدكاترة عاطف عبيد ويوسف والى ورجل الأعمال حسين سالم
بلدنا بالمصري: جلسة اليوم في قتل مظاهري الدرب الأحمر
نفس المحكمة كانت بتواصل النهاردة النظر في قضية قتل المتظاهرين قدام قسم شرطة الدرب الأحمر اللي راح فيها 5 مواطنين واصابة 7 تانيين،أيام 28 و29 يناير.
بلدنا بالمصري: البرادعي لم يتلق دعوة لتشكيل حكومة
تعالوا بقة نوصل لحد مقر الحملة الانتخابية للدكتور محمد البرادعى، نحضر جزء من المؤتمر الصحفي اللي حط فيه النهاردة شوية نقط فوق شوية حروف، ومن ضمنها إنه ما تلقاش أي دعوات لتشكيل حكومة انتقالية.
بلدنا: إضراب المصرية للاتصالات للإفراج عن زملائهم
أعلن العاملون بالشركة المصرية للاتصالات الدخول فى إضراب عن العمل لحين إخلاء سبيل 5 من زملائهم تم القبض عليهم والتحقيق معهم بتهمة محاولة قتل محمد عبد الرحيم الرئيس التنفيذى للشركة، مؤكدين أن هذا الاتهام غير صحيح وأن العمال كانوا يتحدثون بشكل حضارى مع رئيسهم، ولم يتعرضوا له بأى سوء أو تهديد
وأكد العمال تمسكهم بمطالبهم بعزل مجلس الإدارة والتحقيق مع قياداته فيما ينسب لهم من فساد وتهم بإهدار المال العام وعدم صرف مستحقات العاملين من أرباح سنوية، بالإضافة لاتخاذ المجلس قرارات اعتبرها العمال مخلة بالصالح العام وآخرها إصدار منشور اليوم بإجازة إجبارية يوم الخميس لجميع العاملين بفرع سنترال الأوبرا
بلدنا بالمصري: اعتصام طلبة أكاديمية أخبار اليوم
فيه حاجة بتحصل في اكاديمة أخبار اليوم، بقى لها أسبوع واحنا مش داريانين نظراً لكل اللي احنا كنا فيه الأسبوع اللي فات.. الحكاية بدأت بوقفات احتجاجية للطلبة وانتها باعتصام مفتوح من امبارح لحين استقالة رئيس الاكاديمية الدكتور احمد زكى بدر، آخر وزير للتربية والتعليم قبل الثورة
بلدنا بالمصري: لفة في عواصم سبت الغضب العالمي
وقبل الفاصل، تعالوا نلف لفة في عواصم العالم والمدن الكبيرة بمناسبة سبت الغضب العالمي أو بدايات الثورة العالمية الأولى زي ما بيحلى للبعض يسميها، وعايزة اقولكوا إن حتى في أوروبا والدول المتقدمة المتظاهرين ما سلموش من عنف فض المظاهرات لكن ماحدش اندهس لسة.
بلدنا: د. أحمد عاطف عاد إلى منزله
بعد اختفاء حوالي خمسة إيام من غير لا حس ولا خبر، وبعد وقفة احتجاجية النهاردة قدام مكتب النائب العام للمطالبة بظهوره وتفسير أسباب اختفائه، اللي اتقال فيها تخمينات وأقاويل مالهاش عدد، ظهر أخيراً الدكتور أحمد عاطف منسق إضراب الأطباء، وروح بيتهم سليم معافى، لكن رافض حتى الآن الإدلاء بأي تصريحات عن أسباب اختفاءه أو كان فين طول المدة ديه والدنيا مقلوبة عليه!!!
استشارات قانونية وحقوقية وانتخابية - أ. حافظ أبو سعدة
عندنا كم من التساؤلات والاستشارات القانونية والانتخابية والحقوقية في عز اللي احنا فيه دة هنستعين عليها بالأستاذ/ حافظ أبو سعدة: رئيس المنظمة المصرية لحقوق الإنسان وعضو المجلس القومي لحقوق الإنسان
بلدنا بالمصري: أسباب انهيار التحالفات الانتخابية
هنحاول نفهم ليه حبل التحالفات الحزبية عمال ينفرط تحالف ورا التاني وحزب ورا التاني، وليه دة بيحصل في عز ما باب الترشح مفتوح والوقت بيجري.. والأهم من كدة: طب وآخرتها وامتى هيرسوا ويرسونا على بر، احنا كمواطنين بدرجة ناخب، لسة مش عارفين راسنا من رجلينا..
دة باختصار شديد حال التحالف الديمقراطي من أجل مصر وحال الكتلة المصرية، في عز ما الوقت بيجري وباب الترشيح مفتوح من وسع.. إيه اللي بعتر الشمل بالشكل دة وإيه البدايل المطروحة واحنا من موقعنا هذا كناخبين نفهم من كدة إيه؟! دة اللي هنناقشه مع ضيوفنا النهاردة:
د/ إيهاب الخراط: عضو الهيئة العليا للحزب المصري الديمقراطي الاجتماعي-
- الدكتور/ محمد البلتاجي: أمين حزب الحرية والعدالة في القاهرة
- الكاتب الصحفي/ محمود مسلم: مدير تحرير المصري اليوم
ليست هناك تعليقات:
إرسال تعليق