بلدنا بالمصري: راديو مصر ومركز أخبار مصر
يسعد مساكم وحلقة جديدة من بلدنا بالمصري مش عارفين نبدأها منين ولا منين.. بس خلوني ابدأها بحاجة ليها العجب قد تبدو هايفة ومالهاش معنى في عز اللي احنا فيه، ويمكن يكون لها ألف معنى.. بلدنا بالمصري وأون تي في عموماً كانوا النهاردة في اكتر من موقع واكتر من مكان، ومافيش حتة رحناها ما ماكانتش فيها شكوى مرة من الإعلام واللي بيعملوا الإعلام والاتهامات نزلت ترف تقريباً على كل إعلامي أو مراسل أو أي حد معدي شايل كاميرا أو ميكروفون من أول الكذب والافترا والتضليل لحد السكوت عن الحقيقة مروراً بالجبن وما خفي كان أعظم.. أنا كنت ضمن الفريق اللي كان متواجد عند المستشفى القبطي في انتظار قرار بخروج جنازة عدد من الشهدا للصلاة عليهم ودفنهم أو تشريحهم قبل التصريح بدفنهم ودة موضوع شرحه يطول هنتكلم فيه بالتفصيل.. المستشفى القبطي للي مش عارف موجود في شارع رمسيس في منطقة الضاهر.. أنا سبت الفريق ومشيت حوالي الساعة تلاتة وربع، الساعة تلاتة ونص كنت في شارع الجلاء وكان فيه موجز الأنباء على راديو مصر، ومن ضمن الأخبار خبر عن "آلاف الأقباط يتظاهرون في شارع رمسيس احتجاجاً" على أحداث ماسبيرو، في حين إن أنا كنت لسة في شارع رمسيس لا كان فيه آلاف ولا كان في مظاهرات ولا يحزنون.. لكن زيادة في التوكيد اتصلت بمراسلنا محمد الحداد عند المستشفى اتأكد من الخبر فأكد لي إن مافيش أي مظاهرات في شارع رمسيس.. في نشرة أخبار الساعة أربعة على راديو مصر ما كانش فيه لا حس ولا خبر عن مظاهرات شارع رمسيس اللي أعلن عنها موجز تلاتة ونص.. لكن موجز أربعة ونص رجع تاني وذاع نفس الخبر عن آلاف الأقباط اللي بيتظاهروا في شارع رمسيس ولتاني مرةيأكد لي محمد الحداد إن افيش أي مظاهرات في شارع رمسيس وإن الوضع زي ما سبته بالظبط، مئات من المصريين _اللي مستحيل نفرزهم من بعض إن كانوا مسيحيين ولا مسلمين_ متجمعين في الشارع الجانبي قدام باب المستشفى زي ما قلت في الأول في انتظار خروج الجنازة أو قرار بتشريح الجثث.. وبالمناسبة الخبر دة، خبر وجود شهدا في المستشفيات_ مش بس في المستشفى القبطي__هتتشيع جنازتهم أو هيتم تشريح جثثهم راديومصر ماجابلوش أي سيرة لا في موجز ولا في نشرة.. هنتكلم احنا عنهم بالتفصيل.. بس بعد ما نبدأ آخر أخبار بلدنا بنفس ترتيب "راديو مصر" اللي هو و"أخبار مصر" بيمثلوا وجهان لعملة واحدة هي الإعلام الرسمي_ودة بالمناسبة الشعار الرسمي اللي بيتكرر طول الوقت: راديو مصر ومركز أخبار مصر: وجهان لعملة واحدة، ودة كمان موضوع شرحه يطول هنتكلم عنه في فقرتنا اللي جاية، بعد آخر أخبار بلدنا بالترتيب الآتي:
بلدنا: المجلس العسكري يعزي شهداء ومصابي أحداث ماسبيرو
المجلس الأعلى للقوات المسلحة وبعد اجتماع طارئ برئاسة القائد العام رئيس المجلس المشير حسين طنطاوى لبحث تداعيات أحداث ماسبيرو والتي أسفرت عن مقتل 24 شخص وإصابة نحو 272 آخرين، حسب البيان الرسمي:أعرب المجلس الاعلى للقوات المسلحة عن خالص تعازيه لأسر ضحايا أحداث ماسبيرو مع تنمياته بشفاء المصابين.. وكلف المجلس العسكري مجلس الوزراء بتشكيل لجنة تقصي حقائق في احداث ماسبيرو، مع اتخاذ كافة الاجراءات القانونية الرادعة حول من يثبت تورطه في الاحداث.. وأكد المجلس حرصه على عدم التجاوب مع محاولات الوقيعة بين القوات المسلحة والشعب.
بلدنا: اجتماع طارئ لمجلس الوزراء عقب أحداث ماسبيرو
أما مجلس الوزراء فبدأ جلسته الطارئة لمناقشة تداعيات الأحداث المؤسفة التى شهدتها منطقة ماسبيرو برئاسة الدكتور عصام شرف رئيس الوزراء بالوقوف دقيقة حداد على أرواح الضحايا من الجيش والأقباط.. بعد ما زار رئيس الوزرا منطقة ماسبيرو امبارح بالليل وقرأ بيانه للأمة.
بلدنا بالمصري: بيان المجمع المقدس عقب أحداث ماسبيرو
أما المجمع المقدس للكنيسة الأورثوذوكسية برئاسة البابا شنودة، فأصدر بعد اجتماعه النهاردة الصبح البيان التالي أعرب فيه عن إن الكنيسة روعت لما حدث بالأمس ...
بلدنا: بيان بيت العيلة المصرية عقب أحداث ماسبيرو
أما فضيلة الإمام الأكبر شيخ الأزهر الدكتور أحمد الطيب، فأكد إن أحداث ماسبيرو امبارح لم تكن أحداث طائفية فلا يوجد فى مصر أى فتنة طائفية، وأن شعب مصر بمسلميه ومسيحيه يمثلون وحدة الوطن الواحد. تأكيدات شيخ الأزهر صرح بيها أثناء الاجتماع الطارئ اللي دعا ليه النهاردة أعضاء مبادرة "بيت العيلة المصرية" اللي بيضم رجال دين إسلامي ومسيحي وعدد من الشخصيات العامة المصرية، واللي غاب عنه ممثلين الكنيسة الأورثوذكسية نتيجة لانشغالهم في اجتماع المجمع المقدس والصلاة على الشهدا.. وفي ختام الاجتماع صدر عن المبادرة بيان تلاه شيخ الأزهر في مؤتمر صحفي.
بلدنا: بيان الطائفة الإنجيلية بخصوص أحداث ماسبيرو
بلدنا: المستشفى القبطي والكاتدرائية وشهداء ماسبيرو
نرجع بقة لشارع رمسيس اللي ماكانش فيه النهاردة اي مظاهرات لكن في شارع جانبي متفرع منه ما بين المستشفى القبطي والجامع اللي قدامها كان فيه مشاهد تانية كتيرة وفي آخره قبل العباسية كان فيه قداس على روح أربعة من الشهدا بحضور عدد كبير من المواطنين المصريين.
بلدنا بالمصري: رأي الشارع في أحداث ماسبيرو
وقبل الفاصل، تعالوا بقة ننزل الشارع نسمع رأي المواطنين، خاصة بعد ما طلب منهم التلفزيون الرسمي النزول للشارع لحماية الجيش من الأعيرة النارية التي يطلقها المتظاهرون الأقباط.
بلدنا بالمصري: اجتماع ساقية الصاوي بشأن أحداث ماسبيرو
النهاردة في ساقية الصاوي تم الاجتماع اللي دعت ليه امبارح بالليل مجموعة من الشخصيات العامة وحضر عدد لا بأس بيه من الممثلين عن الأحزاب والقوى السياسية المختلفة ومرشحين الرئاسة والشخصيات العامة.. لكن يمكن ما خرجش بالصورة اللي اتمناها الداعين ليه
بلدنا بالمصري: أحداث ماسبيرو .. موديانا على فين
اللي حصل امبارح دة، على الأرض وسياسياً وإعلامياً، اسمه إيه ومودينا على فين؟!!! .. كل اللي هنحاول نعمله من هنا ولحد آخر الحلقة إننا هنحاول على قد ما نقدر نسمي الحاجات بأسماءها من غير لف ولا دوران وهنستعين بضيوفنا:
الاستاذ جورج اسحاق عضو المجلس القومي لحقوق الانسان
الاستاذ نجاد البرعي رئيس جماعة تنمية الديمقراطية
الناشط كمال زاخر
الخبير الاعلامي ياسر عبدالعزيز
ليست هناك تعليقات:
إرسال تعليق