برنامج صباح ON حلقة الاربعاء 5/10/2011 من قناة ONTV كاملة يوتيوب
وفاة ثلاثة توائم رفضت المستشفى الأشهر استقبالهم
المستشفى الأشهر في مصر الآن .. طبعا أكيد مفيش حد لحق ينسى أزمة إصابة 30 مريض فشل كلوي بفيروس سي في مستشفى كفر الزيات العام.. الأزمة الجديدة برضه في نفس المستشفى لكن بشكل أكثر بشاعة وعدم إنسانية .. إمبارح استمعت نيابة كفر الزيات بالغربية، إلى أقوال محمد سليمان والد الأطفال التوائم الأربعة بقرية بنوفر التابعة للمركز، والذين رفض مستشفى كفر الزيات استقبالهم بالحضانات الموجودة به بسبب إضراب الأطباء، ما أدى إلى وفاة ثلاثة منهم نتيجة نقص الأكسجين وعدم وضعهم على جهاز التنفس الصناعي
والد الأطفال تقدم ببلاغ ضد مدير المستشفى الدكتور محمد رمضان قاعود ورئيس قسم الأطفال بالمستشفى ورئيسة قسم التمريض اتهمهم فيه بالتسبب فى وفاة ثلاثة من أطفاله التوائم، رغم توجهه لمدير المستشفى أكثر من مرة لإدخال الأطفال قسم الحضانات بسبب ولادتهم فى الشهر الثامن.
مأساة إنسانية في عيادة الدم بمستشفى الدمرداش
نروح لخبر تاني من مستشفى تانية بس خطير فعلا . أحد الأطباء أرسل لينا شكوى عن وجود مأساة انسانية في عياده الدم في مستشفى الدمرداش لمرضي الثلاسيميا اللي هو فقر الدم بس مرحلة متقدمة وهو مرض بيحتاج لنقل دم للمصابين بيه ؛ الدكتور قال لنا في التليفون إن الأزمة هي عدم توافر كميات الدم المطلوبة للمرضى في العيادة للاسبوع الثالث على التوالي و إن اكتر من 80% من مرضى العياده بيمشوا من غير ما ياخدوا دم نظرا لعدم توافره
المصيبة إن أغلب المصابين بالمرض ده من الاطفال و بيمشوا من غير ما ياخدوا دم ونسبه الهيمجلوبين عندهم وصلت إلى 4 و 5 وتم تأجيل منحهم الدم للاسبوع القادم وربنا يعلم حيكملوا للاسبوع الجاي ده ولا لأ .. احنا مش هنسأل فين وزير الصحة ولا فين المسئولين احنا من خلال البرنامج بندعو الناس اللي قادرة تتبرع بالدم تشارك في التبرع لصالح الأطفال والمرضى دول يسألوا في المستشفى ويعرفوا ممكن يعملوا إيه لصالح الناس دي ويعملوه لوجه الله.
دروس خصوصية لإبتدائي غصب واقتدار
وزارة التربية والتعليم .. فاكرينها بتاعة الأزمات اللي ما بتخلصش والوزير اللي زعلان من البرنامج عشان بننتقد أدائه ومستشارينه اللي كلموا طوب الأرض عشان انتقدنا الوزير في حلقة سابقة يشتكوا مننا .. المهم يا معالي الوزير احنا بننقلك النهاردة شكوى مواطنين عاديين على قد حالهم يادوب معاهم اللي ياكلوا بيه النهاردة وبكرة رزقهم على الله .. الشكوى بتقول ايه يا يوسف..
الناس أو أولياء الأمور يا معالي الوزير بيشتكوا من إن مدارس وزارة التربية والتعليم بتفرض على طلاب سنة أولى إبتدائي إنهم يا إما يدفعوا 90 جنيه تمن درس خصوصي او 70 جنيه في المجموعة وده في مدرسة ابتدائي في فيصل أما أولياء الأمور في إمبابة فبيشتكوا من تعدد الخيارات يا وزير التعليم .. الخيار الأول 100 جنيه درس في البيت الخيار التاني 80 جنيه مجموعة في المدرس .. الخيار الثالث ابنك يسقط .
واضح إن الأزمة مش في منطقة معينة ولا شكوى من مدرسة واحدة .. في تزايد رهيب في الفساد في التعليم وكأن الثورة ما قامتش .. الناس دي بجد غلابة جدا .. احنا مش بنتهمك بحاجة .. احنا بجد عاوزين نشوف ايه اللي بيحصل هل دي اتاوة عشان العيال تتعلم؟
خبوا السكر خبوا الزيت لما بعنا عفش البيت
فاكرين هتاف " غلوا السكر غلوا الزيت لما بعنا عفش البيت" أيام المخلوع .. الهتاف ده وقته فعلا بس مش غلوا السكر والزيت وبتاع لا الهتاف أنهم أخفوا السكر وهربوا الزيت والناس مش لاقياه في التموين .. القصة إن الناس اللي معاهم بطاقات تموينية عشان ياخدوا السلع المدعومة راحوا عشان ياخدوا حاجة كل شهر ما لقيوش سكر ولا زيت بس لقيوا الرز اللي كان ناقص الشهر اللي فات..
ماهو تقريبا شهر كده وشهر كده والطبيخ الشهر الجاي لما الناس تكون جمعت كل التموين.. وقال ايه عاوزين يعيدوا توزيع الدعم على مستحقيه يا خوفي من توزيع الدعم دي يروح لمصانع الأسمنت تاني .. ربنا يهدي
صباح ON: صحافة الأربعاء ٥ أكتوبر ٢٠١١
أهلا بيكم لسه مكملين معاكم صباح أون .. الجرايد مترقبة ومتحفزة بتنقل كل حاجة بتحصل أو أحيانا ما بتحصلش واحنا دورنا إننا نحلل الأخبار دي ونشوفها بعيون ضيفنا والنهاردة ضيفنا الأستاذ أكرم القصاص مدير تحرير جريدة اليوم السابع..
صباح ON: ثورة سوريا وتشكيل المجلس الوطني
سوريا .. بشار الأسد يحارب شعبه ومجلس وطني انتقالي ربما يكون في يده خلاص الشعب المطحون بآلة النظام العسكرية..
حلقات درامية تم اعدادها بعناية فائقة لتحصل على اوسكار فى العنف والقتل والدموية الشديدة.. مسلسل ميدانى قوامه رصاص حى ودبابات تقصف كما لوكانت تقصف بيوت الاعداء وليس شعبا اعزل .. والمحصلة 2700 قتيل من بينهم 100 طفل فى6 اشهر..
الوضع في سوريا كالآتي .. كر وفر ومعارك دامية .. النظام حول الجيش السورى الى الات صماء تقتل وتتلذذ بالدم البرىء المسفوك على الارض .. لاتفرق بين رجل وامراة طفل وكهل الكل يتساوى امام القمع والبطش .. عزلة فرضها النظام على الجيش موهما اياه بانه يكافح جماعات مسلحة وليس اخوة واشقاء فى الوطن .. ضعف دولي وعجز داخلي لكن استطاعت المعارضة أخيرا ان تشكل مجلسا وطنيا يفترض انه يمثل الثورة السورية بكل تياراتها وتوجهاتها لاسقاط الأسد وإخراجه من عرينه المشبع بالدماء .. معنا لفتح النقاش حول سوريا عبدالقهار رامكو، الكاتب السياسي السوري والسيد وهيب أيوب، المحلل السياسي السوري
سوريا ذراع مصر اليمنى وقلبها النابض في عصر عبدالناصر لها حق على كل مصري وأملنا أن ينتهي حمام الدم وأن ينعم السوريون بالحرية
صباح ON: غضب الجامعات يتواصل .. أين الحكومة
" الفلول بره بره.. جامعتنا هتفضل حرة " بهذا الهتاف خرج طلاب جامعات مصر بعد مرور خمسة أيام على استقبال الطلاب في عدد كبير من الجامعات مع بدء العام الدراسى الجديد ؛ وسط إضرابات انضم إليها جانب كبير من أعضاء هيئات التدريس . ٦ جامعات شهدت أول أمس الاثنين مظاهرات غاضبة وإضرابا عن العمل للمطالبة بإقالة القيادات القديمة وتطهير الجامعات ممن وصفهم المتظاهرون بـفلول الحزب الوطنى ؛ كما طالب المضربون بإقالة القيادات الجامعية و إقالة رؤساء الجامعات وعمداء الكليات من مناصبهم..
فى جامعة أسيوط توقفت الدراسة لليوم الثالث على التوالى بسبب إضراب المئات من أعضاء هيئة التدريس والعاملين بالجامعة عن العمل مطالبين بإقالة الدكتور مصطفى كمال، رئيس الجامعة. وفى بنى سويف، تظاهر نحو ٢٠٠ من العمال والإداريين أمام مبنى إدارة الجامعة، وطالبوا بمنحهم حق التصويت فى انتخابات عمداء الكليات ورؤساء الأقسام. وفي كل الجامعات نفس الأوضاع
غضب الجامعات يتواصل ... والمسئولين في حكومة الثورة لا يعطون الأمر إهتماما ... معنا اليوم لإستكمال صفحات ملف إضراب الجامعات الدكتورة حنان حافظ ، منسق حركة استقلال جامعة عين شمس.
ليست هناك تعليقات:
إرسال تعليق