برنامج بلدنا بالمصرى تقديم ريم ماجد على قناة OTV حلقة الخميس 8/9/2011 يوتيوب كاملة
بالمفتشر: عصام شوقي - شهادة حق
هنطول عليكوا هم كلمتين ورد غطاهم.. احنا من صباحية ربنا من ساعة ما فتحنا عينينا على شهادة حق في وسط الزور واحنا مش عارفين نتصرف إزاي ونعمل إيه ولا إيه للراجل الكمل الشهم الجدع أبو كاب ودبورة على حق، مش أونطة ومنظرة وخايلة كدابة وغصب واقتدار وأخرتها شهادة زور!!! طب نعمل إيه؟!!! نبعت له تحية وتعظيم سلام؟!!! اكيد مش مستنيهم!!! طب نتشكر له ونحلف له ميت يمين إن جميله هيفضل على راسنا من فوق ليوم الدين؟!!! طب ما هو أكيد عارف ومتأكد إنه لا شكر على واجب.. ثم إنها ماكانتش بجميلة لما شهد شهادة حق لوجه الله والوطن ودم الشهدا اللي ما هانش عليه يروح هدر!!! طب نتصرف ازاي مع الراجل الكمل دة أبو ضمير مصحصح ددبان لا بيفتري ولا بيخاف ولا بيختشي ورزقه على الله؟!!! قامت تاهت ولقيناها.. يمكن هو مش مستني حاجة أبداً غيرش هي بس دعوة حلوة بالمفتشر كدة وبعلو الصوت، يجعلها من حده ومن نصيبه ومن نصيبنا.. ويا سلام بقة على الدعوة الحلوة ديه وهي طالعة كدة من قلب الأمهات لباب السما: " روح يا سيادة المقدم.. روح يا عصام يا ابن البلد، ربنا يحميك ويفتحها في وشك ويعلي مراتبك ويثبت خطاويك ويديك على قد نيتك ويكفينا ويكفيك شر ولاد الذين ويكتر لنا يا رب من أمثالك اللي ربنا لسة مقدرهم يفتحوا لنا طاقة نور في عز الضلمة ويبصموا لنا بالعشرة إن الدنيا لسة بخير وإن مصر لسة عمار وإنشالله يا رب دايماً عامر بحسك إنت واللي زيك.... قولوا آمين!
أكيد أنا أقصد بالمفتشر كدة، المقدم عصام شوقي، الظابط في قطاع المجندين في الأمن المركزي، والشاهد التامن في قضية قتل الثوار، وأول شاهد يشهد يمسك بإيديه ولسانه وضميره في شهادته اللي ادلى بيها في تحقيقات النيابة وأول شاهد يشهد شهادة فيها إدانة واضحة وضوح الشمس لحبيب العادلي وأعوانه. فمش غريبة أبداً إنه يكون أول ظابط شرطة من بعد الثورة، يتحول في لمح البصر لبطل شعبي على صفحات فيس بوك وتويتر.. وآدي العينة: على فيس بوك فيه لحد دلوقتي حوالي 60 صفحة وجروب شايلين اسم "كلنا المقدم عصام شوقي" .
بس المقدم عصام شوقي ماكانش الشاهد الوحيد النهاردة، وما كانش الشاهد الوحيد اللي شهادته أدانت وزير الداخلية السابق وأعوانه، كان فيه كمان الشاهد التاسع، اللوا حسين فرج، مساعد وزير الداخلية لقوات الأمن، اللي أهالي الشهدا هتفوا بحياته.. اللوا حسين فرج اتكلم عن تفاصيل خطة اسمها الخطة (100) لقتل المتظاهرين، واتكلم عن عربيات الأمن المركزي اللي دهست المتظاهرين يوم 28 وغيرها من المفاجآت اللي هنتكلم عنها بالتفصيل مع الأستاذ/ أمير سالم
بلدنا بالمصري: جلسة محاكمة مبارك وشركاه -- 8 سبتمبر 2011
جلسة محاكمة مبارك ونجليه وحبيب العادلي و6 من كبار مساعديه - الخميس 8 سبتمبر 2011
بلدنا: إخطار طنطاوي وعنان وعمر سليمان ومحمود وجدي
فيما يخص نفس القضية، النائب العام المستشار عبدالمجيد محمود أخطر رسمياً المشير حسين طنطاوي، القائد العام ورئيس المجلس الأعلى للقوات المسلحة، والفريق سامي عنان، رئيس الأركان، واللواء عمر سليمان نائب رئيس الجمهورية السابق، واللواء محمود وجدي وزير الداخلية السابق، واللواء منصور العيسوي وزير الداخلية، للحضور لمحكمة الجنايات في التواريخ المحددة لجلسة كل واحد فيهم ابتداءاً من يوم الحد اللي جاي ولحد يوم الخميس.. وكلها زي ما احنا عارفين هتكون جلسات سرية ومحظور النشر عنها..والنائب العام أخطر فعلاً رسمياً وزير الإعلام بقرار حظر النشر بأي طريقة من طرق النشر في وسائل الإعلام المسموعة والمرئية المحلية والأجنبية.
بلدنا: تأجيل محاكمة المتظاهرين أمام أكاديمية الشرطة
النهاردة كانت المحاكمة العاجلة لل22 متظاهر اللي تم القبض عليهم يوم الاتنين اللي فات في الاشتباكات اللي حصلت قدام أكاديمية الشرطة، خلال محاكمة المتهمين بقتل الثوار.. محكمة جنح القاهرة، أجلت الجلسة ليوم 15 سبتمبر مع استمرار إخلاء سبيلهم، بناءاً على طلب محامين الدفاع عنهم للإطلاع علي التحقيقات وأوراق الدعوى.. وطالبوا مبدئياً ببراءة المتهمين لكيدية الإتهام وتلفيقه بالإضافة لعدم معقولية الواقعة _على حد تعبيرهم أثناء المرافعة_ في نفس الوقت اللي كان بيتظاهر فيه قدام المحكمة عدد كبير من المتظاهرين من حركة شباب 6 إبريل وغيرها من الحركات والقوى السياسية للتضامن مع المتهمين.
بلدنا بالمصري: براءة أسامة الشيخ من إهدار المال العام
لسة في المحاكم، بس المرة ديه في محكمة محكمة جنايات شمال القاهرة اللي حكمت النهاردة ببراءة المهندس اسامة الشيخ رئيس اتحاد الاذاعة والتلفزيون السابق من تهمة اهدار المال العام. التفاصيل اكتر فى التقرير اللى جاي.
ميدان التحرير خالي الشرطة والجيش في جمعة تصحيح المسار
في حلقة امبارح من بلدنا بالمصري، وبسبب كتر الكلام والتخويف من الأيادي الخفية ومن العناصر المندسة ومن محاولات توريط الشعب في صدام مع الجيش ومع الشرطة، أهبنا وبنهيب مرة تانية بالمتظاهرين إنهم يحرسوا ويخلوا عينيهم في وسط راسهم وما يتجرجروش لأي نوع من أنواع العنف مهما كان ومهما حصل.. ويتبتوا بإيديهم وسنانهم في روح الميدان وجدعنة ناس الميدان.. ديه حاجة.. الحاجة التانية إننا بنهيب برده بالمتظاهرين، المرواح في ساعة محددة يكون فيه اتفاق عليها والكل يلتزم بيها واعتقد إن كل القوى السياسية المشاركة بكرة متفقة فعلاً على كدة وهنتأكد من دة بعد شوية صغيرين.. بس امبارح كمان كنا أهبنا بالمجلس الأعلى للقوات المسلحة ووزارة الداخلية إخلاء الصينية من بكرة الصبح على الأقل لحد ما المتظاهرين ياخدوا بعضهم ويسيبوا الميدان.. قالنهاردة، وبعد اقل من 24 ساعة، وزارة الداخلية أصدرت بيان نصه كالآتي: "إيماناً بحق التظاهر السلمى وحرية التعبير عن الرأى بإعتباره أحد مكتسبات ثورة 25 يناير .. وفى إطار الدعوة التى وجهتها بعض القوى والتيارات والإئتلافات بالتظاهر السلمى يوم 9/9 فإن وزارة الداخلية تؤكد على ما يلى:-
1- سيتم إخلاء ميدان التحرير من قوات الشرطة إعتباراً من منتصف ليل اليوم الخميس الموافق 8/9 وحتى منتصف ليل الجمعة الموافق 9/9/2011..
2- وتهيب وزارة الداخلية بكافة القوى المشاركة وشباب الثورة الشرفاء عدم السماح بدخول أو إندساس أى عناصر تحاول إستغلال هذه التجمعات السلمية المشروعة للقيام بأية عمليات أو محاولات للخروج عن القانون أو إحداث فوضى أو شغب أو إعتداءات على أية ممتلكات عامة أو خاصة أو تعطيل حركة المرور ومصالح المواطنين.
3- أن أجهزة وزارة الداخلية تمارس مسئوليتها فى حماية المنشآت والمواقع الشرطية بإعتبارها ملكاً للشعب، وستقوم بالتصدى بكل حسم لكل محاولات التعدى عليها.
4- أن أمن مصر مسئولية كل المصريين الشرفاء وتهيب وزارة الداخلية بكافة المشاركين الإلتزام بالقانون والحفاظ على المظهر الحضارى لمصرنا العزيزة وثورتها الغالية.
دة فيما يخص موقف وزارة الداخلية من التواجد في ميدان التحرير، أما فيما يخص موقف المجلس الأعلى للقوات المسلحة فعبر عنه امبارح في رسالته رقم 74 واللي كل فهم منها إنه مش هيكون فيه تواجد كمان لقوات الجيش أو الشرطة العسكرية في الميدان.
بلدنا بالمصري: ائتلاف روكسي يدعم المجلس العسكري
احنا عارفين من امبارح إن فيه حوالي 13 حركة وائتلاف وحزب أعلنوا عن عدم مشاركتهم في المليونية مع تضامنهم مع عدد من مطالبها، تحديداً وقف المحاكمات العسكرية للمدنيين واستقلال القضاء.. فكدة ما يفضلش غير موقف "ائتلاف مصر فوق الجميع" الشهير بائتلاف "روكسى".. الائتلاف وزع النهاردة حاجة بتاعة 20 ألف منشور لتأييد ودعم المجلس العسكرى والمطالبة بسيادة الشرعية والقانون.. المنشورات اتوزعت في فى ميادين التحرير ورمسيس وروكسى في القاهرة وفي اكتر من منطقة في اسكندرية.. المنشور فيه حوالي 10 نقط أهمها: السيطرة على حالة الفوضى والانفلات الأخلاقى والمطالبة بمحاسبة كل من يثبت تورطه سواء بالتصريح أو التلميح فى مهاجمة المجلس الأعلى للقوات المسلحة وقادته، والتحريض على أعمال الفوضى ومهاجمة المنشآت سواء العسكرية أو العامة أو الخاصة. "فضح"_ حسب تعبير المنشور_ جميع وسائل الإعلام سواء الفضائية أو المقروءة ومقدمين البرامج ورؤساء التحرير المشتركين فى مخطط إشعال نار الفتن. المنشور بيحذر كمان من خطورة الدعوات المتتالية للتظاهر، وقال بالحرف: "نحن نرى أسماء ما أنزل الله بها من سلطان تارة لمطالب شخصية وتارة أمام سفارات الدول، وكأن مصر أصبحت لا شاغل لها إلا هذه التظاهرات التى أصبحت تشكل عبءا على الاقتصاد وسوق العمل والاستثمارات الخارجية". وبالتالي: "نهيب بالأغلبية الصامتة من الشعب المصرى الاشتراك بإبداء الرأى والاندماج بالحراك السياسى المحترم، ليعلم القلة التى أصبحت تعكر الأمن والسلم أنها ليست معبرة عن 90 مليون مصرى".. أما فيما يخص المحاكمات العسكرية، فالمنشور بيجدد دعم الائتلاف لاستمرارها بل وتغليظ عقوباتها ضد البلطجة والفوضى، وبيطالب الشعب المصرى بمساندة المجلس العسكرى ضد القوى الهادفة لخلق نوع من الصدام مع الجيش والمجلس الأعلى للقوات المسلحة والشرطة"... نجدد مبادرتنا مرة تانية
بلدنا بالمصري: ترتيبات جمعة تصحيح المسار -- أ. جورج إسحق
ترتيبات جمعة تصحيح المسار مع أ. جورج إسحق الناشط الحقوقي وعضو الجمعية الوطنية للتغيير
بلدنا : حشد العاملين بوزارة الزراعة لـ عيد الفلاح
منشور بوزارة الزراعة بالغربية عن حشد العاملين وتوفير أوتوبيسات لهم لحضور احتفال عيد الفلاح باستاد القاهرة
بلدنا : غلق باب الترشيح لانتخابات نقابة المحامين
غير مليونية بكرة، ومش بعيد عن ميدان التحرير، تعالوا نوصل لحد نقابة المحامين نجس نبض الأجواء هناك بعد ما اتقفل النهاردة باب الترشيح لانتخابات مجلس النقابة والنقيب
بلدنا : قانون تقسيم الدوائر في منتدى رفاعة الطهطاوي
قانون تقسيم الدواير الجديد لسة مثار جدل واسع خاصة في أوساط المنظمات الحقوقية وبالذات المهتمة بعمليات التحول الديمقراطي، ومن ضمنها منتدى رفاعة الطهطاوي لدراسات الديمقراطية وحقوق الإنسان ومنظمة عالم واحد للتنمية.
بلدنا بالمصري: الإصلاح الأمني في ضوء المتغيرات
امبارح نظم مركز القاهرة لدراسات حقوق الإنسان ندوة حول الإصلاح الأمنى فى ضوء المتغيرات الأمنية الجديدة ايه اللي حصل في التقرير فى اللى جاى .
بلدنا بالمصري: عودة البابا شنودة من رحلة علاجية
وقبل الفاصل خلونا نطمن على صحة البابا شنوده، بعد رجوعه النهاردة الصبح من رحلة علاج لمدة اسبوعين تقريباً.
بلدنا بالمصري: تهديدات للشاهد التاسع ل. حسن عبدالحميد
ل. حسن عبدالحميد الشاهد التاسع في جلسة محاكمة مبارك وتعرضه لتهديدات بعد شهادة اليوم في بلدنا بالمصري هاتفياً
بلدنا بالمصري: مفاجآت في خامس جلسات محاكمة مبارك
تفاصيل الجلسة الخامسة من محاكمة مبارك وشركاه بعد الفاصل مع الأستاذ/ امير سالم
بلدنا بالمصري: حرية الإعلام بعد الثورة .. لقدام ولا لورا
من ساعة ما صدرت امبارح فجأة ومن غير لا احم ولا دستور، القرارات "الرادعة" لمواجهة البلطجة والانفلات الأمني وفيه حالة كدة ما بين الخضة والقلق لنكون بنرجع عقارب الساعة لورا، وجايين النهاردة نخلق من الشبه أربعين صورة طبق الأصل من "امبارح" اللي دفعنا تمن غالي أوي عشان نخلص منه.. الخضة والقلق دول في محلهم ولا مبالغ فيهم وكل الحكاية إن القرارات ديه شر لابد منه مؤقتاً على ما تفرج وشوية وهيروحوا لحالهم ويا شر ما دخلك شر؟!!! هنستعين على إجابة السؤال دة اللي ما اعتقدش إنها هينة أبداً بضيوفنا النهاردة:
الدكتور صفوت العالم استاذ الاعلام بكلية الاعلام جامعة القاهرة
اشرف بدر نائب رئيس تحرير جريدة الأهرام المسائي
خالد علي مدير المركز المصري للحقوق الاقتصادية والاجتماعية
أهالي المحروسة: جمعة تصحيح المسار .. الرأي والرأي الآخر
آراء أهالي المحروسة في نزول جمعة تصحيح المسار
أم أيمن
مينا لمعى - مهندس كمبيوتر
أم علي
د. أحمد عرابي
ليست هناك تعليقات:
إرسال تعليق