بالمفتشر: يا حسرة القلب على اللي راحوا هدر
يسعد مساكم وحلقة جديدة من بلدنا بالمصري، هنبدأها من هنا ورايح وقبل أي حاجة بالمفتشر كدة وبصريح العبارة.. دلوقتي وقال على رأي المثل قال يا باني في غير ملكك يا مربي في غير ولدك.. أما بقة لو باني في ملكك ومن حر مالك يبقى عز الطلب وهنيالك وربنا يزيد ويبارك.. بس الكلام دة لو باني مثلاً مدرسة طويلة عريضة يرمح فيها التلامذة ويتربوا ويتعلموا أحسن رباية وأحسن علام.. أو مثلاً لو باني مستشفى شرحة وبرحة ترد روح العليل من غير ما يتبهدل ولا يتمرمط ولا يدفع دم قلبه ويخرج منها يا مولاي كما خلقتني وبرده بعافية.. ويا سلم بقة لو باني مصنع يلف مكنه ويدور يشغل الإيدين البطالة ويبقى زيادة الخير خيرين.. وحتى لو باني حتة كتاب على قد ما أوسم ولا حتة مستوصف على قد الحال ولا حتة مشغل على قده وأهيه نواية تسند الزير.. كل دة عال العال والآشية معدن!!! أما بقة لما تيجى على آخر الزمن وتبني في ملكك وعلى أرضك وفي عقر دارك وعلى النيل وبإيديك وسنانك ومن لحم الحي ومن دم قلبك، سد عالي طول بعرض بارتفاع، يكتم على أنفاسك ويطلع روحك ويفور دم أهلك وناسك، و يطير برج من عقلهم ويكسر بخاطرهم ويطاطي راسهم بعد ما رفعوها فوق وبعد ما مشيوا على الحيطان وطاروا في الهوا شاشي من غير جناحات.. يبقى بالمفتشر كدة وبالفم المليان: يا فرحة ويا شماتة الأعادي فينا.. وبصراحة والحق يتقال: يا بختهم بينا.. هيلاقوا زينا فين؟!! دة احنا لقطة!!! وبالمفتشر كدة وبالفم المليان: يا حسرة القلب على اللي راحوا هدر ومالهمش دية ويا عيب الشوم حتى لو زوقتوا الجدار بعلم بلدنا وعملتوا منه برقع يداري وشه الوحش اللي يقطع الخميرة من البيت!!!
بلدنا بالمصري: الخناقات سيد ثالث جلسات محاكمة مبارك
بالمفتشر برده هنقول يا هادي يا رب وهنبدأ آخر أخبار بلدنا بتالت مرة يدخل فيها الرئيس المخلوع وولاده قفص الاتهام مع وزير أمنه وأعوانه في قتل الثوار.. الخناقات كانت سيدة الموقف سواء برة قاعة المحكمة أو جواها والأمر طبعاً وكالعادة ما يسلمش من مصابين ولا من معتقلين.. أما سير الجلسة نفسه فدة شرحه يطول وهيبقى لنا عنه كلام كتير لسة
بلدنا بالمصري: إصابة د. عمرو مرسي وإتهامه بالبلطجة
زي ما شوفنا وسمعنا كدة في التقرير إن في عدد من المصابين وصلوا عددهم لتسعة طبقا لوزارة الصحة، لكن لإنه أحياناً ما ينوب المخلص إلا تقطيع هدومه، فدة اللي حصل للدكتور/ عمرو مرسي وزيادة شويتين عن تقطيع الهدوم.. الدكتور عمرو طبيب بشري كان موجود قدام أكاديمية الشرطة اثناء الاشتباكات إياها.. وكل ذنبه إنه كان بيقوم بواجبه كطبيب في إسعاف واحد من المصابين، طلع بالصدفة والد شهيد.. فما نابه إلا القبض عليه وتحويله للنيابة بتهمة البلطجة هو وواحد وعشرين شخص تانيين!!!
بلدنا: محاكمة المتهمين بقتل ثوار إمبابة وكرداسة
النهاردة محاكمة المتهمين بقتل الثوار ما كانتش بس على قد الرئيس المخلوع ووزير الداخلية وأعوانه، الظباط المتهمين بنفس التهمة في كرداسة وامبابة كانوا النهاردة قدام محكمة جنايات شمال الجيزة.
بلدنا بالمصري: إزالة غموض محاكمات المدنيين عسكرياً
زي ما حضراتكوا يمكن متابعين وزي ما كنا بنتكلم امبارح على إن رفض المحاكمات العسكرية للمدنيين واخد حده اليومين دول وكل مادى بتزيد حدته والتصميم عليه بوسائل وأشكال مختلفة.. وبناءاً عليه، كان فيه النهاردة مؤتمر صحفي للواء/ عادل المرسي، رئيس هيئة القضاء العسكري، الهدف منه على حد تعبيره هو شخصياً " إزالة أي لبس أو غموض بيحيط بمسألة محاكمة المدنيين أمام القضاء العسكري، بما يضمن صالح الوطن في حماية مصالحه العليا، وصالح المتقاضيين في عدم إلحاق الظلم بهم، وكفالة حقهم في إحترام حقوق الإنسان اللي كفلتها المواثيق الدولية والتشريعات الداخلية".. اللوا عادل المرسي طالب صراحة بالحد من اللي وصفها ب"ظاهرة" تصدي غير المختصين لمسائل يجب ترك السبيل فيها للمتخصصين، وبالذات المسائل القانونية اللي يجب أن يتصدى لها رجالها.والمقصود هنا "جماعة المدافعين عن حقوق الإنسان" اللي اللوا عادل المرسي أكد إن "صيحاتهم بدأت تعلى في الفترة الأخيرة ضد المحاكمات المدنية للعسكريين".. وشرح باستفاضة وبأسانيد قانونية إن القضاء العسكري: قضاء طبيعي ومستقل ولا يتبع السلطة التنفيذية وبيوفر للمتهمين كافة الضمانات والحقوق من أول العلانية لحد حضور المحامين وإمكانية الطعن على الحكم وغيرها من الضمانات.. وأكد في نفس الوقت إن المحاكمات العسكرية للمدنيين هتتوقف بمجرد إلغاء حالة الطوارئ ودة حسب نص المادة السادسة من الإعلان الدستوري اللي صدر في 30 مارس و اللي بتنص على انه تسرى احكام هذا القانون على الجرائم المنصوص عليها فى البابين الاول والثانى من الكتاب الثانى لقانون العقوبات وما يرتبط بها من وجرائم التى تحال الى القضاء العسكرى بقرار من رئيس الجمهورية . ولرئيس الجمهورية متى اعلنت حالة الطوارى ان يحيل الى القضاء العسكرى اى من الجرائم التى يعاقب عليها قانون العقوبات او اى قانون اخر .. على أي حال دة المختصر لأهم النقاط اللي أكد عليها النهاردة اللوا عادل المرسي في المؤتمر الصحفي.. بس احنا بكرة إنشاءالله هنتكلم عنها وعن المحاكمات العسكرية للمدنين عموماً سواء من وجهة النظر القانونية أو الحقوقية.. لكن من أهم نتايج المؤتمر الصحفي النهاردة إننا أخيراً بقى عندنا أرقام واحصائيات رسمية عن عدد القضايا وأنواعها وعدد المتهمين والأحكام اللي صدرت ضدهم من القضاء العسكري من أيام الثورة ولحد النهاردة.
بلدنا بالمصري: المشاركين والرافضين جمعة تصحيح المسار
بخصوص الجمعة اللي جاية "9 سبتمبر".. مبدئياً هي "جمعة تصحيح المسار" حسب ما سمتها القوى والجهات اللي دعت ليها ومن ضمنها الجمعية الوطنية للتغيير وائتلاف شباب الثورة ومجموعة ثورة الغضب التانية والجبهة الحرة للتغيير السلمي.. لكن لحد دلوقتي لسة خريطة المشاركة من عدمها مش واضحة أوي.. فيه عدد من الأحزاب السياسية سواء القديمة أو الجديدة أكدت على المشاركة، مش من ضمنها حزب الوفد ولا حزب الحرية والعدالة التابع لجماعة الإخوان المسلمين، على أساس إن معظم اهداف الثورة اتحققت وان القوى اللي دعت للمليونية أو اللي أعلنت مشاركتها مش متفقة لسة لا على اهداف ولا على مطالب محددة، وإنه المفروض ندي فرصة للقائمين على البلد لتنفيذ سياساتهم..
أما ائتلاف شباب روكسي، فأعلن في بيان النهاردة عن رفضة المشاركة يوم الجمعة وسماها ب"المغرضة" وحذر من التعرض للمنشات العامة للدولة أوالمنشات العسكرية أوي محاولة لافتعال صدام مع القوات المسلحة ورجال الشرطة حتى يتم الوصول للدولة المدنية.. وطالب الشعب بمواجهة الدعوات اللي وصفها ب" المناهضة للشرعية" واكد انه لو حصلت أى اعمال شغب فى مظاهرة يوم الجمعة الائتلاف هيعمل مظاهرة الجمعة اللي بعدها في ميدان روكسى وهيسميها "جمعة الغضب".. وختام البيان: "اذا عدتم عدنا"
بلدنا بالمصري: أزمة البنزين في الصعيد
لحد دلوقتي ما محدش عارف إيه السبب بالظبط ورا ازمة البنزين وخصوصاً في الصعيد .. احنا رحنا لحد هناك، لعل وعسى نرجع بإجابة شافية. (تقرير ازمة البنزين)
تأجيل جلسة محاكمة مبارك إلى السابع من سبتمبر
تأجيل جلسة ماكمة مبارك ونجليه ورجل الأعمال الهارب والعدالي وكبار مساعديه إلى جلسة السابع من سبتمبر
بلدنا: استعدادات وزارة التربية والتعليم للدراسة
كل سنة وانتوا طيبين كلها كام يوم ويرجعوا التلامذة للجد من تاني، و وبغض النظر عن _غضب المعلمين ومطالبهم_ وزارة التربية والتعليم واقفة على رجل استعداداً للسنة الدراسية الجديدة.
د. حازم الببلاوي: خطوات عاجلة لتقليل الفجوة بين الأجور
اقترحت الحكومة اليوم، الاثنين، أن يكون وضع الحد الأقصى للأجور مرتبطاً بمعادلة تأخذ فى الحسبان متوسطات معدلات التضخم فى الظروف المستقرة، ومراعاة معدلات تزايد الخبرات وتزايد المسئوليات خلال العمر الوظيفى للموظف الذى يصل إلى 38 سنة.
وأكد الدكتور حازم الببلاوى، نائب رئيس الوزراء للشئون الاقتصادية، وزير المالية، خلال الاجتماع الوزارى الذى بحث معالجة التفاوت فى المرتبات والدخول فى الحكومة، أن ذلك يحقق معادلة تنطوى على أن الحد الأقصى يزيد بواقع 30 مثل عن الحد الأدنى، بمراعاة متوسط زيادة سنوى 10% طوال العمر الوظيفى.
وأقرت اللجنة التوصيات الواردة فى التقرير التفصيلى المقدم من "الببلاوى"، وبدء العمل على اتخاذ خطوات عاجلة لتقليل الفجوة بين المرتبات والدخول للعاملين بالأجهزة الحكومية، فى إطار مسار عاجل يبدأ تنفيذه من أول يناير 2012، وتكليف الجهاز المركزى للتنظيم والإدارة خلال الفترة من الآن وحتى بداية التنفيذ بوضع الضوابط والقواعد اللازمة فى هذا الشأن والتى ترتكز على مبدأين أساسين هما، الشفافية والإفصاح عما يحصل عليه العاملون بالحكومة من دخول، وإيجاد علاقة بين الحدين الأدنى والأقصى للدخول فى الحكومة
بلدنا بالمصري: أحداث ثالث جلسات محاكمة مبارك
يوم حافل شهدته أكاديمية الشرطة مقر محاكمة الرئيس المخلوع مبارك ونجليه ورجل الأعمال الهارب حسين سالم ووزير الداخلية الأسبق حبيب العادلي وستة من كبار كساعديه حيث كان اليوم ثالث جلسات المحاكمة .. وشهدت الأكاديمية أحداثاً حافلة سواء خارجها باشتباكات أنصار المخلوع مع أسر الشهداء والمصابين والمتضامنين معهم أو داخلها بين الموكلين بالدفاع عن المخلوع والمتهمين وبين الموكلين من أسر شهداء ومصابي الثورة .. أ. أمير سالم المحامي يرصد وقائع اليوم في بلدنا بالمصري مع ريم ماجد
بلدنا بالمصري: أصل وفصل أزمة المعتمرين المصريين
صحيح إن أزمة المعتمرين المصريين في مطار جدة بدأت تتحل بالتدريج لكن دة ما يمنعش إن لسة ما حدش فاهم أصلها وفصلها ومين السبب ومين المسؤول.. والأهم من كدة إيه ومين اللي هيرد اعتبار المصريين ويصون كرامتهم؟!!! ديه الأسئلة الأهم اللي هنحاول نلاقيلها إجابات مع ضيوفنا النهاردة:
- ناصر ترك نائب رئيس غرفة شركات السياحة ورئيس لجنة السياحة الدينية
- خالد صلاح الدين: مساعد رئيس تحرير جريدة الجمهورية والمتخصص في السياحة والطيران
- سيد محروس: احد المعتمرين ومقدم بلاغ للنائب العام للتحقيق في الازمة
بلدنا بالمصري: الربيع العربي والسوري رايحين على فين؟
الربيع العربي في تونس أو في مصر أو في ليبيا أو في اليمن زيه زي الربيع السوري لا يمكن يكون إلا للمواطنة والوطن.. وإذا كان الربيع في تونس وفي مصر خطى أول خطوة على الطريق لكن لسة قدامه سكة سفر ومشوار طويل، أما الربيع السوري زيه زي الربيع في اليمن وفي البحرين فقدامهم مفترق طرق ما بين: الربيع بألوانه أو الشتا ببرده القارص.. كل دة مجرد جزء بسيط من آراء ضيفنا النهاردة: رئيس تحرير الطبعة العربية من جريدة لوموند ديبلوماتيك ورئيس منتدى الاقتصاديين العرب، الكاتب الصحفي السوري: الدكتور/ سمير العيطة.. اللي هنشوف بعيونه الربيع العربي عموماً والربيع السوري خصوصاً رايحين على فين؟!!!
ليست هناك تعليقات:
إرسال تعليق