برنامج بلدنا بالمصرى تقديم ريم ماجد على قناة OTV حلقة الخميس 29/9/2011 يوتيوبكاملة
بالمفتشر: إعلان دستوري سكيتي .. في السر
يسعد مساكم وحلقة جديدة من بلدنا بالمصري هنبدأها بسؤال لسة من غير رد غطاه، لكن بالمفتشر كدة وبصريح العبارة: " يعني إيه يبقى الإسم إعلان ويطلع كدة سكيتي ولا من شاف ولا من دري.. ومسافة ما نرفع راسنا نبص على العصفورة، إلا وعنها وهاتك يا طراطيش كلام ماحناش فاهمين أصلها من فصلها عن خير اللهم اجعله خير، قال "إعلان دستوري"، والمعرف ب"ال" العايدة على (الإعلان السري) بين قوسين!!! أما عجايب.. القوسين دول اتفتحوا امتى وفين؟!ومين اللي كان نايم في الدرة ومين اللي كان نايم على ودانه؟! والتعسيلة ديه آخرتها إيه؟!! يعني بصريح العبارة كدة: احنا صباحنا نادي ولا يا فتاح يا عليم يا رزق يا كريم.. اصطبحنا واصطبح الملك لله؟!!! وبالتالي وعشان نحاول نلاقي رد وغطا للأخماس في الأسداس والحيص بيص اللي احنا فيه دة، هنقول يا هادي يا رب ونحاول نفهم أصل وفصل "الإعلان الدستوري" اللي اتنشر يا دوب اتنشر في الجريدة الرسمية وكان الله بالسر عليم لحد ما وقفت الدنيا على رجل!!! الإعلان الدستوري اتنشر في العدد رقم 38 مكرر من الجريدة الرسمية، اللي هي "الوقائع المصرية"، يوم 25 سبتمبر ونصه كالآتي: المجلس الأعلى للقوات المسلحة بعد الإطلاع على الإعلان الدستورى الصادر فى 13 من فبراير سنة 2011 وعلى الإعلان الدستورى الصادر فى 30 من مارس 2011
يعدل نص المادة (38) من الإعلان الدستورى الصادر فى 30 من مارس سنة 2011 ليصبح
على النحو الآتى:
"ينظم القانون حق الترشيح لمجلسى الشعب والشورى وفقا لنظام انتخابى يجمع بين القوائم الحزبية المغلقة والنظام الفردى بنسبة الثلثين للأولى والثلث الباقى للثانى".
بلدنا بالمصري: رسالة المجلس العسكري رقم ٧٥
المجلس الأعلى للقوات المسلحة أصدر النهاردة رسالته رقم 75 للشعب المصري العظيم وشباب الثورة ونصها كلآتي:
بلدنا بالمصري: مطالب جمعة استعادة الثورة
بالنسبة بقة للقوى اللي دعت للمظاهرة، عددهم 30 زي ما احنا عارفين من امبارح ما بين أحزاب قديمة زي التجمع والناصري والجبهة وغد أيمن نور، وجديدة زي المصري الديمقراطي الاجتماعي ومصر الحرية والتحالف الشعبي الاشتراكي، غير الحركات والاائتلافات زي الجمعية الوطنية للتغيير، الجبهة القومية للعدالة والديمقراطية، ائتلاف شباب الثورة، وحركة شباب 6 إبريل واتحاد شباب الثورة.. أما صفحة "ثورة الغضب المصرية الثانية" على "فيسبوك" فأعلنت في بيان ليها النهاردة عن إنها هتتجه للاعتصام من بكرة، بدل من يوم 6 أكتوبر بعد أن كان رأي المنظمين عدم الاعتصام مراعاة لنبض الشارع وحتى لا يستخدم الاعتصام في الدعاية المضادة ضد الثوار. وحدد البيان 8 مطالب اعتبرها أساسية وغير قابلة للتفاوض، وطالب المجلس العسكري بتلبيتها قبل 6 أكتوبر.
بلدنا بالمصري: رأي الشارع في جمعة استعادة الثورة
طيب دة موقف القوى السياسية على اختلافها من جمعة "استرداد الثورة"، تعالوا بقة نجس نبض الناس في الشارع.
بلدنا بالمصري: مبادرة الشعب يحمي مجلسه
تفعيل قانون الغدر كمان من ضمن المطالب الرئيسية لجمعة بكرة الله أعلم إن كان هيتم الاستجابة ليها ولا لأ.. لكن بمناسبة جمعة استرداد الثورة، ظهرت مبادرة على فيس بوك، لحد دلوقتي هي فردية لكن مين عارف ولو بدأت من بكرة شوية بشوية تتحول لمبادرة شعبية اسمها: "الشعب يحمي مجلسه".
بلدنا بالمصري: قوى سياسية تدرس مقاطهة الانتخابات
زي ما هو واضح كدة من المواقف المختلفة للقوى السياسية سواء اللي هتشارك في مظاهرة بكرة أو حتى اللي مش هتشارك، إن فيه رفض قاطع لقوانين الانتخابات الأخيرة لدرجة إن بعض القوى بدأت تدرس إجراءات تصعيدية ممكن توصل لحد مقاطعة الانتخابات.
بلدنا بالمصري: دور المجتمع المدني في مراقبة الانتخابات
أما برنامج "شارك وراقب"، وبالرغم من كل الجدل اللي حاصل حوالين النظام الانتخابي، إلا إنه قرر ما يضيعش وقت وبدأ فعلاً من امبارح بمؤتمر عن دور منظمات المجتمع المدنى فى المشاركة فى عملية المراقبة على الانتخابات..
بلدنا بالمصري: التحقيقات في فيديو تعذيب المواطنين
آخر تطورات التحقيقات اللي بدأتها امبارح هيئة القضاء العسكري بأمر من المشير حسين طنطاوي، بخصوص الفيديو اللي انتشر امبارح على الانترنت وفيه عدد من ظباط الجيش والشرطة أثناء تعذيب عدد من المتهمين في قسم شرطة الكردى التابع لمدينة منية النصر في الدقهلية
بلدنا بالمصري: التحقيق في إهانة مريم عزمي
النائب العام المستشار عبد المجيد محمود، بدأ النهاردة التحقيق فى واقعة إهانة الطبيبة مريم عزمى في مستشفى الغردقة العام أيام 21 و22 من الشهر دة، بعد ما أهانها أحد وكلاء النيابة وحط الكلابشات في إيديها، لرفضها استجواب عدد من المرضى نظراً لظروفهم الصحية. في نفس الوقت نظم عدد من من الأطباء وقفة احتجاجية قدام مكتب النائب العام وهددوا بالدخول في اعتصام مفتوح في حالة عدم اتخاذ الإجراءات القانونية ضد وكيل النيابة.
بلدنا بالمصري: اقتحام مكتب الجزيرة مباشر مصر لثاني مرة
النهاردة وللمرة التانية، اقتحمت قوات الأمن المصرية مكتب قناة الجزيرة مباشر مصر، في مقرها الجديد، ولما اتصلنا بالمكتب الإعلامي في وزارة الداخلية نستفسر عن الأسباب كان الرد كالآتي: ان اتحاد الإذاعة والتليفزيون قدم بلاغ لمباحث المصنفات حول وجود جهاز live view وان الجهاز ده غير مصرح بوجوده وبعد تقنين الإجراءات واستئذان النيابة قامت قوة من الأجهزة الامنية بالدخول إلى المكان ومصادرة الجهاز واصطحاب المسئول لتحرير محضر ضده وعرضه على النيابة
بلدنا بالمصري: توبة مسجلين خطر السويس
مع أهالي المحروسة من السوايسة اللي شايلين لحد دلوقتي لقب: " بلطجي أو سوابق أو رد سجون أو مسجل خطر" لكن لحد هنا وبكفاياهم وما هماش ناويين يكملوا المشوار دة، لكن ناويين يبدأوا مشوار تاني خالص من أول جديد وعن طيب خاطر، أوله توبة وآخرته لقب "مواطن صالح
الصراحة والحق يتقال إن أهالي المحروسة من السوايسة ياما اثبتوا إنهم سباقين والتاريخ يشهد على كدة ويبصم لهم بالعشرة كمان.. والظاهر كدة والله أعلم إن التاريخ قريب أوي هيضرب بيهم المثل مين عارف؟!!! الحكاية وما فيها هم اللي هيحكوها بالتفصيل وبعضمة لسانهم
ليست هناك تعليقات:
إرسال تعليق