برنامج بلدنا بالمصرى تقديم ريم ماجد على قناة OTV حلقة الاربعاء 28/9/2011 يوتيوب كاملة
بالمفتشر: قول للغول انت أصلاً من الفلول
يسعد مساكم وحلقة جديدة من بلدنا بالمصري هنبدأها بحدوتة كدة على الماشي ويمكن تكون ذات مغزى ونلاقي لنا صاحب يسمعنا.. كان يا مكان كان فيه زمان تحت قبة سي السيد قراره - الله يجازيه بقة مترح ما راح- كان فيه نايب من نواب الحزب الوطني اللي انحل والمركب اللي تودي.. وكان ساعتها بشنة ورنة ويا أرض اتهدي ما عليكي قدي.. من ييجي يومين كدة، شد الرحال من الصعيد الجواني لما حد المحروسة، عشان يقضي مصلحة.. ومع إنه من كبارات الناحية حداهم وعين من أعيان "نجع حمادي"، إلا إن المصلحة وما فيها إنه جاي يتحصل من اتحاد عمال مصر الشقيانين التعبانين، على شهادة بختم النسر تخلع عليه صفة "عامل" لجل ما يترشح على حسها لمجلس الشعب اللي جاي وعلينا خير "أو" علينا واحد _حسب الظروف بقة!!! المهم.. سيادة النايب الكبارة اللي لسة ليه شوق في كرسي تحت القبة بصفته "عامل"، على جيته ومن بخته كان فيه عمال كتير ياما جايين يجروا ورا حقوقهم بالمشوار.. وكلهم مكربسين فوق بعض في أوضة الدكتور رئيس اللجنة المؤقتة اللي بتدير الاتحاد.. قام سيادة النايب السابق والمحتمل، ما استحملش الخوتة ووجع الدماغ والخايلة الكدابة ديه، وخاف يتلم الحابل على النابل وورقه يضيع في وسط ورق العمال --دة هو اللي قال كدة والله في المحضر.. ما هي اصل الحدوتة خلصت في القسم_ المهم إنه من خوفه على ورقه اللي جاي بيه بين جلده وحزامه راح زاعق في العمال بعلو الصوت وقال لهم بالمفتشر كدة وبالفم المليان: "اطلعوا برة يا ولاد".. فما كان من "الولاد" إلا إنهم هتفوا راخرين بالمفتشر وبالفم المليان وبعلو الصوت: "روح يا فلان قول للغول انت أصلاً من الفلول"!!! فما كان من سيادة النايب إلا إنه شتم الولاد والله أعلم.. بس هو بذات نفسه قال بعضمة لسانه في المحضر إنه لما سمع كلمة الفلول ديه، جت على كرامته بالأوي وأعصابه فلتت، وراح قايل بالحرف في المحضر برده " فأنا اللي يشتمني أشتم أبوه"!!! النهاية.. الولاد سمعوا الكلام وخادوها من قاصرها وراحو سايبين المترح باللي فيه، لكن راسهم وألف سيف ما هو خارج الساعة ديه، وفضلوا واقفين كدهوه على الباب ددبان ييجي 3 ساعات.. لحد ما جه الشاويش والبوليس وهيلا بيلا على قسم الأزبكية والصلح خير!!! وتوتة توتة خلصت الحدوتة على قد كدة المرة ديه، لكن الدور والباقي بقة على اللي مستنينا ومستني "الولاد وولاد الولاد" تحت القبة وربنا يجعل المخبي لطيف!!!... بس إلا صحيح اللي يخاف مصلحته من مصالح العمال في عقر دار اتحاد العمال واحنا لسة على البر تبقى صفته إيه تحت القبة؟!!! عامل ولا فلول؟!!! علماً بإن "فلول" ديه وصف لا هي سب ولا هي قذف!!! والله أعلم!!!
بلدنا بالمصري: طنطاوي يأمر بالتحقيق في واقعة التعذيب
نروح بقة لآخر أخبار بلدنا، وآخر خبر النهاردة إن إن المشير حسين طنطاوي رئيس المجلس الاعلى للقوات المسلحة،أمر هيئة القضاء العسكري بفتح تحقيق فوري في وقائع الفيديو اللي انتشر النهاردة على عدد من مواقع الانترنت والتواصل الاجتماعي، واللي بيظهر فيه عدد من أفراد الجيش والشرطة اثناء تعذيبهم لعدد من المواطنين بعد توقيفهم ومعاهم سلاح، وأمر باتخاذ كل الاجراءات القانونية ضد المنسوبة ليهم الواقعة ديه في حالة ثبوتها، على أساس إن الفيديو اللي اتنشر يعتبر بلاغ رسمي.. ودعا البيان "اي شخص عنده معلومات بخصوص وقائع تقع تحت طائلة القانون إنه يبادر بتقديمها فورا لهيئة القضاء العسكري"، مع التأكيد على إن "المؤسسة العسكرية لا يمكن تسمح بأي تجاوز او تعد على اي انسان حتى لو كان متهم".. وانتهى البيان كالآتي: "المجلس الاعلي للقوات المسلحة يهيب بالمواطنين عدم الانسياق وراء الاشاعات التي تهدف للوقيعة بين الجيش والشعب".
بلدنا: البراءة للمتهمين في أحداث شارع عبدالعزيز
النهاردة المحكمة العسكرية، أصدرت النهاردة حكم من الأحكام القليلة بالبراءة.. الحكم صادر لصالح 12 مواطن كانوا متهمين فى أحداث شارع عبد العزيز، وكانت النيابة العسكرية موجهالهم اتهامات ما بين استعمال القوة والعنف مع عناصر الشرطة المدنية والتلويح بالقوة وترويع المواطنين والاتلاف العمدى لأموال ثابتة ومنقولة وحيازة وإحراز أسلحة بيضاء وإحداث جروح وتعدى بالضرب، فحكمت عليهم المحكمة بعشر سنين سجن يوم 25 مايو اللي فات.. فقدموا طعن على الحكم واتقبل وتمت إعادة محاكمتهم قدام دائرة جديدة، اللي حكمت النهاردة ببراءتهم لعدم وجود دليل على إدانتهم، بعد أربع شهور في السحن الحربي. (كفارة)
بلدنا بالمصري: 7 سنوات لـ الفقي و 5 سنوات لـ الشيخ
نروح لمحكمة جنايات القاهرة في التجمع الخامس، المحكمة حكمت النهاردة بالسجن المشدد 7 سنين و5 سنين على أنس الفقى وزير الإعلام السابق وعزله من وظيفته، والمهندس أسامة الشيخ رئيس اتحاد الإذاعة والتلفزيون السابق.. تفاصيل القضية والنطق بالحكم في التقرير اللى جاى
بلدنا بالمصري: تأجيل قضية قتل الثوار بالبحيرة
لسة في المحاكم، بس المرة ديه في محكمة دمنهور، المحكمة قررت النهاردة تأجيل قضية قتل الثوار في البحيرة يوم جمعة الغضب 28 يناير، لجلسة 27 أكتوبر والمتهم فيها مدير أمن البحيرة السابق، اللواء مجدي أبو قمر و8 ظباط وأمناء شرطة
بلدنا بالمصري: تظاهر أمناء الشرطة أمام قسم حلوان
النهاردة كان فيه تجمهر عند قسم شرطة حلوان، جوة وبرة القسم لحوالي 250 من أفراد وأمناء الشرطة، ومنعوا مأمور القسم ورئيس المباحث من الخروج، اعتراضًا على لمدير أمن القاهرة اللوا محسن مراد بتشغيلهم مرة تانية لمدة 12 ساعة يوميً بالمخالفة لقرار وزير الداخلية اللي بينص على إن ساعات العمل ما تزيدش عن 8 ساعات في اليوم. وحسب بوابة الأهرام الأمنا والأفراد طالبوا بإقالة مدير الأمن القاهرة، لمخالفته لقرار وزير الداخلية لكن كمان لإنه عاقب 25 من أفراد وأمناء شرطة، ونقلهم من قسم شرطة البساتين للأقسام تانية، لإنهم قدموا شكوى ضده امبارح لوزير الداخلية. والمنشور برده على بوابة الأهرام بيأكد على عهدة ائتلاف أفراد الشرطة، إن اللوا محمود على، نائب مدير أمن القاهرة، هدد المضربين بالحرف بإن "لو محدش فيكم اشتغل.. هاجيب مكانكم وأديكم بالجزمة".. فما كان من الأفراد والأمناء المتجمهرين، إلا إنهم بدأوا ينسقوا مع بقية الأقسام في المحافظات لعمل إضراب عام على مستوى الجمهورية. وفعلاً، بعد وقت قصير كان فيه إضراب في 7 أقسام على الأقل في القاهرة: حلوان ومايو والتبين والمطرية والساحل والمعادي.
بلدنا بالمصري: عمال النقل العام مستمرون في إضرابهم
امبارح كنا بنضرب أخماس في أسداس ومش عارفين إذا كانوا العاملين في هيئة النقل العام علقوا إضرابهم فعلاً بعد اجتماعهم العاصف امبارح مع وزير القوى العاملة ومحافظ القاهرة ورئيسة الهيئة ولا لأ، خاصة إن النقابة المستقلة كانت أعلنت عن رفضها حضور الاجتماع بشرط الوزير اللي هو "فض الإضراب قبل التفاوض.. وقلنا إن النهاردة هيبان.. وفعلاً ثبتت الرؤية، العاملين استمروا في إضرابهم.. التصرف اللي اعتبرته الحكومة مخالفة للبند الأول من الاتفاق اللي تم امبارح في الاجتماع وهو تعليق الإضراب فورًا وعودة العاملين بالهيئة لاستئناف عملهم فى كافة قطاعات وجراجات الهيئة.. فكانت النتيجة بيان شديد اللهجة من وزارة القوى العاملة اعتبرت فيه إن المخالفة ديه بيترتب عليها نقض الاتفاق والرجوع للتفاوض مرة تانية مع الأخذ في الاعتبار المبالغ المهدرة على الهيئة بسبب الإضراب وقيمتها مليون جنيه يوميًا. بالإضافة لوقف دراسة اللائحة المالية الجديدة لحين عودة العاملين لعملهم، وانتظام سير خطوط النقل العام جميعًا، بالإضافة إلى وقف اللجان المشتركة لبحث باقى مطالب العاملين، والتى تضمنها بيان الأمس إلى حين تحديد موعد آخر للتفاوض.
بلدنا بالمصري: وقفة احتجاجية لتطهير جامعة المنيا
اللي حصل امبارح في جامعة عين شمس، حصل النهاردة تقريباً صورة طبق الأصل منه في جامعة المنيا.. عدد من أعضاء هيئة التدريس والموظفين نظموا وقفة احتجاجية للمطالبة بتطهير الجامعة وإسقاط مجلس الجامعة وكل من كان بينتمي للجنة السياسات في الحزب الوطني المنحل وعدد من العمداء والوكلاء ورؤساء الأقسام اللي كانوا بيتعاونوا مع جهاز امن الدولة، على حد وصفهم وهددوا بالتصعيد في اليوم الأول من السنة الدراسية بمشاركة الطلاب. ومن اكتر الحاجات اللي عبر الأساتذة عن خيبة أملهم فيها إنهم كانوا مستنيين من المجلس العسكري إصدار مرسوم باقالة كل القيادات وهي ديه النتيجة مش بس في جامعة عين شمس وفي جامعة المنيا لكن في كل الجامعات وكل الكليات اللي فيها قيادات متمسكة بأماكنها ورافضة الاستقالة.
بلدنا بالمصري: الإخوان يرفضون الإعلان الدستوري الجديد
جماعة الإخوان المسلمين أصدرت بيان النهاردة حوالين اللي سمته "لإعلان الدستوري الأخير وقوانين الانتخابات والجدول الزمني للانتخابات"، واللي شاف فيهم البيان عدم احترام لإرادة الشعب.. البيان بيتكلم تحديداً عن الإعلان الدستوري اللي صدر سرا _حسب تعبير البيان_ يوم 25/9/2011م ولم يعلن إلا امبارح وبيضم خمس مراسيم بقوانين تتعلق بقوانين انتخابات مجلسي الشعب والشورى، مع الزعم بأن هذا الإعلان الدستوري تم بموافقة قيادات الأحزاب السياسية وهو قول غير صحيح. وبيتكلم عن مزيد من العيوب في تعديلات قوانين مجلس الشعب والشورى.. وبيطالب ب3مطالب محددة.
بلدنا بالمصري: 6 أبريل ومشروع الدايرة البيضاء
أما حركة 6 إبريل فأعلنت النهاردة في مؤتمر صحفى عن موقفها من قوانين الانتخابات الأخيرة عن موقفها من جمعة 30 سبتمبر.. وأعلنوا عن مشروع جديد اسمه "مشروع الدايراة البيضاء والدايراة السوداء".. إيه الحكاية ديه بالظبط فى التقرير اللى جاى
بلدنا بالمصري: مبادرة سيب وأنا أسيب
ائتلاف شباب الثورة، أعلن هو النهاردة كمان مش عن مشروع بقة لكن عن مباردة على مايبدو إنها لا بأس بيها أبداً خاصةً وإنهم سموها "سيب وأنا سيب".
بلدنا: حزب التحالف الشعبي الإشتراكي يتقدم بأوراقه
اليسار المصري خطى النهاردة أول خطوة ناحية تأسيس أحزاب جديدة بشكل رسمي.. الخطوة خطاها حزب التحالف الشعبي الاشتراكي اللي اتقدم أخيراً بأوراق تأسيسه للجنة الأحزاب.
15 مكالمة
بلدنا بالمصري: النوبيين .. حلم العودة شكله قرب
تعالوا بقة نشارك النوبيين جزء من فرحتهم بحلم العودة اللي شكله كدة قرب يتحقق والبركة في الثورة.
بلدنا بالمصري: الذكرى 41 لوفاة عبدالناصر
ذكرى وفاة جمال عبد الناصر.
بلدنا بالمصري: العلاقات المصرية الأمريكية بعد الثورة
احنا انتهزنا فرصة وجود وفد من الكونجرس الأمريكي اليومين دول في بلدنا، وما يحدث على هامش الزيارة عشان نطل طلة على العلاقات المصرية الأمريكية بعد الثورة بعيون أمريكية، وعيون تانية برده أمريكية بس الأصل المصري. فاسمحوا لي ارحب بـ:
- كيث أليسون: عضو الكونجرس الأمريكي والنائب الديمقراطي عن ولاية مينيسوتا
- الدكتور/ احمد غانم: المدير التنفيذي لمؤسسة "حلمنا واحد"
- الأستاذ/ أحمد بدير: رئيس مؤسسة "أصوات متحدة"
ليست هناك تعليقات:
إرسال تعليق