برنامج بلدنا بالمصرى تقديم ريم ماجد على قناة OTV حلقة الثلاثاء 27/9/2011 يوتيوب كاملة
بالمفتشر:البدلة المدنية..يا حسرة على التليفزيون المصري
وماليكوا علي حلفان لا كان على الخاطر ولا في النية نبدأها بكلمتين بالمفتشر كدة عن البدلة المدنية، لولاش الدنيا وقفت على رجل والقلوب طبت وبرج من العقول طار واللي فضل منها على حاله وهو من ساعتها بيضرب الأخماس في الأسداس ويا ريته بيوصل لنتيجة!!! القصد.. إن الأصل في كل الأحوال إن كل واحد حر يلبس اللي كيف كيفه ورجله تدب مترح ما يحب ولا ملامة.. تطلع بقة ليلة امبارح ولا من ألف ليلة وليلة مش فارقة كتير، لكن الرك بقة على "الدلالة" وما أدرانا ما الدلالة.. كله كوم والدلالة كوم تاني خالص .. لحد هنا وماشي الحال!!! طب بالذمة دة كلام؟!!! يا حسرة القلب على التلفزيون المصري اللي جه عليه اليوم على آخر الزمن وبقينا ندلل عليه_ربنا ينفخ في صورته وينتعه بالسلامة ويعلي مراتبه_ بس برده لحد هنا وماشي الحال.. لكن الرك بقة على اللي جاي!!! هو غالباً في الإضافة إفادة.. لكن كمان الشئ لما يضاف له شئ تاني لزوم شئ تالت في نفس يعقوب، ساعتها بقة ممكن يزيد عن حده فينقلب لضده زي ما حصل كدة!!! يا أستاذ جمال "زايدة" إلا المجلس العسكري بذات نفسه من ساعة ما قال يا هادي يا رب وهو بيقولها بالفم المليان وبعلو الصوت إنه مش رايدها ولا ناوي غير إنه "يسلم البلاد لسلطة مدنية منتخبة" والدليل أهوه !!! حدش بقة جاب سيرة البدلة من قريب ولا من بعيد؟!!! أما عجايب والله!!!
بلدنا بالمصري: مواعيد إنتخابات مجلسي الشعب والشورى
دة حتى آخر خبر النهاردة أهوه إن المجلس العسكرى حدد المواعيد النهائية لانتخابات مجلس الشعب والشورى.. مجلس الشعب هتبدأ يوم 28 نوفمبر اللي جاي على تلات مراحل، ومجلس الشورى من 29 يناير اللي جاي وبرده على تلات مراحل، وبحيث تكون أول جلسة من جلسات مجلس الشعب يوم 17 مارس اللي جاي، وأول جلسة لمجلس الشورى بعدها بأسبوع على طول يوم 24 من نفس الشهر.. وبالرغم من ردود أفعال القوي السياسية المختلفة واللي اجمعت تقريباً امبارح على رفض التعديلات الأخيرة لقوانين مجلس الشعب، وخاصة موضوع التلت فردي والتلتين قايمة، إلا إن فيه تصريحات النهاردة على لسان مصدر عسكري مسؤول ما ذكرش اسمه ولا منصبه لوكالة انباء الشرق الأوسط، بتأكد إن الانتخابات هتم على أساس نظام التلتين بالقوائم النسبية والتلت للفردى.
بلدنا بالمصري: بيان مشترك للدعوة لجمعة 30 سبتمبر
من ساعة ما تم الإعلان عن تمديد حالة الطوارئ، وبدأت تظهر دعوات متفرقة لمظاهرة يوم الجمعة 30 سبتمبر ضد الطوارئ والمحاكمات العسكرية.. وبعدين بدأت الدعوات ديه تزيد بشكل ملحوظ من ساعة ما تم الإعلان عن التعديلات الأخيرة لقوانين مجلس الشعب والشورى، والنهاردة ثبتت الرؤية واتضحت لحد كبير: فيه 13 حزب وحركة وائتلاف، لحد دلوقتي اكدوا موقفهم بالمشاركة في مظاهرة يوم الجمعة وأصدروا بيان مشترك بيدعو ليها في ميدان التحرير وفي كل الميادين الرئيسية في المحافظات.. والبيان بيحدد مطالب معينة أهمها: إلغاء حالة الطوارئ وقانون تجريم الإضرابات والاعتصامات/ إلغاء المحاكمات العسكرية للمدنيين/ وضع جدول زمنى واضح لتسليم السلطة لحكومة مدنية معبرة عن إرادة الثورة/ إلغاء قانون الانتخابات الحالى ووضع إجراءات تضمن منع فلول نظام مبارك من تزوير الانتخابات أو السيطرة على البرلمان/ وتلبية مطالب كل العمال والموظفين المضربين والمعتصمين.
بلدنا بالمصري: تأجيل رد محكمة قضية مبارك
النهاردة كانت أول جلسة من جلسات النظر في طلب رد المحكمة اللي اتقدم بيه عدد من المحامين عن المدعين بالحق المدني في قضية قتل الثوار المتهم فيها الرئيس المخلوع وأعوانه.. محكمة استئناف القاهرة قررت التأجي لجلسة 22 أكتوبر اللي جاي لضم محاضر الجلسات الخاصة بالقضية الأصلية.
بلدنا بالمصري: وفاة الجابري المتهم بموقعة الجمل
في قضية تانية من قضايا قتل الثوار وتحديداً موقعة الجمل، توفى النهاردة واحد من المتهمين الرئيسيين فيها وهو النائب السابق عن الحزب الوطني المنحل في الهرم والعمرانية، عبد الناصر الجابرى. الوفاة حصلت النهاردة الصبح في المركز الطبى العالمى، بعد ما اتعرض لأزمة صحية نتيجة لإصابته بمرض السرطان.
بلدنا بالمصري: استشهاد مساعد أول شرطة في سطو مسلح
النهاردة استشهد المساعد أول شرطة /سعد الله حسن أحمد، من قوة مركز شرطة المنصورة.. الشهيد كانت مهمته تأمين سيارة نقل تابعة لمصنع الزيوت والصابون الموجود على طريق المنصورة / السنبلاوين.. العربية كانت راجعة من بنك من البنوك في المنصورة وشايلة مبلغ 641 ألف جنيه، خاص بالمصنع.. وعلى بعد حوالي 150 متر من المصنع العربية اتعرضت لهجوم مسلح، حاول الشهيد يصده وتبادل معاهم اطلاق النار، لكن أصيب بطلقة في الصدر أدت لوفاته أثناء محاولات اسعافه.. والجناة استولوا على المبلغ قبل ما يهربوا وحالياً جاري البحث عنهم.
بلدنا بالمصري: تفجير خط الغاز للمرة السادسة
للمرة السادسة على الله، ينجح الملثمين المجهولين إياهم في تفجير خط الغاز إياه في العريش، وش الفجر ولا من شاف ولا من دري.. وسبحان الله في عز حالة الطوارئ والمحاكمات العسكرية، وبعد خمس مرات في عين العدو، لا مننا مسكناهم ولا عرفنا هم مين ولا بيعملوا كدة ليه.. ولا هم اختشوا ولا خافوا لا من طوارئ ولا من محاكمة عسكرية سبحان الله!!!
6 أبريل وائل غنيم و إسراء عبدالفتاح مرشحون لـ نوبل
أنباء عن احتمال ترشح حركة 6 أبريل و وائنل غنيم و إسرائء عبدالفتاح لنيل جائزة نوبل
بلدنا بالمصري: إضراب النقل العام رسي على إيه
زي ما توقع محافظ القاهرة في مداخلته معانا امبارح، النهاردة تم فعلاً الاجتماع اللي كان المفروض يحصل امبارح بين ممثلين عن العمال ووزير القوى العاملة ومحافظ القاهرة ورئيسة الهيئة.. اجتماع امبارح اتلغى لإن الوزير اشترط على العمال فض الإضراب كشرط أساسي للتفاوض.. إيه اللي اتغير النهاردة وإيه اللي حصل في الاجتماع في التقرير اللي جاي.
لكن دة ما يمنعش إنه لسة فيه تضارب في المواقف بين العمال وبعضهم حوالين تعليق الإضراب من عدمه ودة اللي هنحاول نستفسر عنه من
بلدنا بالمصري: ستة رؤساء جامعات متمسكون بكراسيهم
يوم السبت اللي جاي 1 اكتوبر هتبدأ في الجامعات السنة الدراسية الجديدة وعليكوا خير، وفيه رؤساء لعدد من الجامعات لسة متمسكين بمناصبهم ورافضين الاستقالة وهم بالتحديد ستة: الدكتور ماجد الديب رئيس جامعة عين شمس، الدكتورة هند حنفى جامعة الإسكندرية، والدكتورة هالة فؤاد جامعة طنطا، والدكتور مصطفى كمال جامعة أسيوط، والدكتور محمد سيد إبراهيم، رئيس جامعة سوهاج. دة غير عمداء عدد من الكليات اللي عندهم نفس الموقف وبالتالي بدأت الانتخابات على منصب العميد وهم لسة في أماكنهم.. والوضع دة على دة بيزود من احتمالات الإضراب عن العمل مع أول يوم في الدراسة اللي أعلن عنه عدد كبير من أضاء هيئات التدريس في الجامعات المختلفة لو استمر تمسك القيادات ديه بمناصبها.. وأول الغيث كان النهاردة في جامعة عين الشمس، عدد كبير من أعضاء هبئة التدريس سبقوا بوقفة احتجاجية قدام مكتب رئيس الجامعة.. لعل وعسى.
بلدنا: معرض العلوم والهندسة المصري -- الدورة الثالثة
النهاردة تم الإعلان عن إطلاق الدورة التالتة من مسابقة "معرض العلوم والهندسة المصرى" تحت رعاية وزارة التربية والتعليم ومنظمة اليونسكو وجمعية عصر العلم.. تفاصيل المسابقة في التقرير اللي جاي وبالتأكيد أزمة المعلمين كانت حاضرة هناك
بلدنا بالمصري: الصحافة العربية قبل وبعد الربيع العربي
إزي حال حرية الصحافة العربية قبل وبعد الربيع العربي بست شهور؟! دة السؤال اللي جاوب عليه النهاردة تقرير اتحاد الصحفيين العرب عن حرية الصحافة فى العالم العربى.
بلدنا بالمصري: المحمول 11 رقم الأسبوع القادم
وقبل الفاصل، فيه خبر يهم كل مواطن مصري معاه موبايل.. ابتداءاً من يوم الخميس 6 أكتوبر اللي جاي، أرقام الموبايلات اللي بتتكون من 10 أرقام هتبقى 11 رقم، في إطار خطة زيادة السعة الرقمية للمحمول اللي سبق وأعلن عنها الجهاز القومي لتنظيم الاتصالات. يعني مثلاً النمر اللي بتبدأ ب(010) هتبقى (0100) و(012) (0122) و(011) (0111).. أما ارقام الموجودة حالياً ومكونة من 11 رقم وتحديداً اللي بتبتدي ب(015) هيتم تغيير الرقم خمسة بصفر أو واحد أو اتنين حسب الشركة زي ما احنا شايفين كدة في الجدول.
بلدنا بالمصري: والله زمان مع د. يحيى الجمل
- د/ يحيى الجمل: أستاذ القانون في جامعة القاهرة والنائب السابق لرئيس مجلس الوزرا الحالي والسابق
ليست هناك تعليقات:
إرسال تعليق