برنامج بلدنا بالمصرى تقديم ريم ماجد على قناة OTV حلقة الاربعاء 21/9/2011 يوتيوب كاملة
بالمفتشر: أمن الدولة لسه صاحي وصوابعه بتلعب
يسعد مساكم وحلقة جديدة من بلدنا بالمصري، هنبدأها بكلمتين ورد غطاهم عن اللي ما يتسمى "أمن الدولة" وسنينه وإيامه.. الإسم " أمن الدولة" والفعل أمنا الغولة وعينها حمرا.. وما عندهاش ياما ارحميني ولا في حد عندها له ديه.. يروح فطيس، يروح هدر، يروح في شربة مية يروح في ستين داهية، فداها هي واللي مشغلينها واللي يتشددلها: غاليين أوي وأي حد تاني برخص التراب!!! لأ وإيه.. رامية ودنها في كل حتة وتحت عتبة كل باب، ويا حبذا كمان لو تحت المخدة.. وحطة مناخيرها في كل حاجة ومعششة في كل مكان صحرا إن كان أو بستان.. وطبعاً عارفة العفريت مخبي ابنه فين؟!!! وبصريح العبارة كدة: "ما ظنيش أبداً إن فيه أي حد مننا دخلت عليه قولة إنها خلاص راحت عليها ولا عادت تقدر تهش ولا تنش.. ولا قولة إنها كانت زي شمشون الجبار في زمانه، قوتها في اسمها، فلما سميناهها"الأمن الوطني" وعاشت الأسامي، يبقى احنا كدة وبعون لله كسرنا سمها واتقينا شرها ونحط بقة في بطننا بطيخة صيفي وكان الله بالسر العليم!!! بس اللي زاد وغطى بقة في الكام اليوم اللي فاتوا دول إن الظاهر كدة ويسد عين الشمس، إن الزمار لسة عايش ولسة صوابعه بتلعب زي زمان هو بعينه وجبايره ويخلق من الشبه أربعين كل واحد منهم بسبعة ارواح!!! قصر الكلام بالمفتشر كدة وبالفم المليان: "الشعب يريد أن يعرف إيه النظام"؟!!! حد يرسينا وينوبه ثواب فينا: هو احنا خلعناه ولا احنا طلعنا من حفرة فوقعنا في دحديييرراااة ولا حدش سمى علينا؟!!!
بلدنا بالمصري: رد وزارة التعليم على كتب مبارك
لحد بقة ما حد يرد علينا، نروح لآخر أخبار بلدنا.. بس قبل آخر الأخبار متابعة سريعة لموضوع كتب المدرسة إياها.. خاصة وإننا أخيراً جالنا رد رسمي من وزارة التربية والتعليم من الدكتور/ رضا مسعد شخصياً، المسؤول عن قطاع التعليم في وزارة التربية والتعليم.
بلدنا بالمصري: حالة الطوارئ سارية حتى مايو 2012
أما بقة عن آخر خبر النهاردة، فهو إن حالة الطوارئ سارية لحد نهاية شهر مايوم 2012 وعلينا خير وبحكم الدستور. والعهدة على البيان الرسمي اللي صدر النهاردة من اللوا عادل المرسي رئيس هيئة القضاء العسكري. البيان بيرد على تصريحات المستشار/ طارق البشرى، رئيس لجنة التعديلات الدستورية اللي أكد فيها إن حالة الطوارئ انتهت من يوم الاثنين بانتهاء مدة الست الشهور اللي بدأت في 19 مارس واللي بتنص عليها الفقرة الأخيرة من المادة 59 من الإعلان الدستوري، اللي بتقول بالنص: " في جميع الأحوال لا يجوز إعلان حالة الطوارئ إلا مدة محددة لا تتجاوز الستة أشهر ولا يجوز تمديدها إلا باستفتاء الشعب وموافقته عليها، وبالتالي فالمجلس العسكري لا يملك سلطة مد حالة الطوارئ، حسب برده تصريحات المستشار طارق البشري.. لكن هيئة القضاء العسكري ليها رأي تاني بيقول إنه أصلاً: " لم يصدر قرارا بإعلان أو تمديد حالة الطوارئ، لإن حالة الطوارئ معلنة بالقرار الجمهوري رقم 560 لسنة 1981، وتم تمديدها بمقتضى القرار الجمهوري رقم 126 لسنة 2010، اللي نص فى المادة الأولى منه على تمديد حالة الطوارئ لمدة سنتين اعتبارا من أول يونيه 2010 لحد 31/5/2012. وإنه بموافقة مجلس الشعب عليه في ساعتها اكتسب قوة القانون.. وإن كل اللي قررته القوانين واللوائح من أحكام قبل صدور الإعلان الدستورى الصادر في مارس يبقى صحيحاً ونافذاً. وبالتالي اللي اتخذه المجلس العسكري من اجراءات بمقتضى قرار رئيس المجلس الأعلى للقوات المسلحة رقم 193 لسنة 2011 هو مجرد تعديل لبعض أحكام قرار رئيس الجمهورية رقم 126 لسنة 2011، واللي تناول تعديل نص المادة الثانية من القرار اللي بتحدد الحالات اللي بتطبق عليها الأحكام المترتبة على إعلان حالة الطوارئ خلال مدة سريانها بدون ما يمس مسألة إعلان حالة الطوارئ أو تمديدها.. لكن البيان بيأكد كمان على إن المجلس العسكري بيسعى لإنهاءها عندما تسمح الظروف.
بلدنا بالمصري: القضاء الإداري تعيد 3 شركات للقطاع العام
محكمة القضاء الإدارى، حكمت النهاردة ببطلان عقود خصخصة وبيع شركات "طنطا للكتان" و"المراجل البخارية" و"غزل شبين"، وإعادتهم للقطاع العام مرة تانية بنفس الحالة اللي كانوا عليها قبل التعاقد من غير ديون ومن غير رهونات _يعني خالصين مخلصين_مع حفظ كل حقوق العمال واعتبار الحكم في حد ذاته بلاغ للنائب العام للتحقيق فى وقائع فساد بيع الشركات ديه.
بلدنا بالمصري: إضراب شامل لعمال النقل العام
على قد ما حكم محكمة القضاء الإداري فرح قلوب ناس كتير وأولهم العمال حتى اللي مش بيشتغلوا في الشركات ديه، لكن الحكم ادالهم أمل إن اللي جاي احسن وبكرة ييجي الدور عليهم.. على قد ما لسة فيه عمال تانيين حالهم محلك سر أو على الأقل هم شايفين كدة.. من ضمنهم مثلاً عمال هيئة النقل العام.. لحد امبارح بالليل ما كناش قادرين نشوف الصورة بالظبط هم مضربين ولا مش مضربين؟ ومين اللي اضرب ومين اللي اضربش وخدوا قرار بالغاء الإضراب ولا لأ.. فخدناها من قاصرها النهاردة ورحنا لحد عندهم خاصة بعد ما جالنا بيان من النقابة المستقلة بيعلن الإضراب الشامل عن العمل والدخول في اعتصام مفتوح قدام الجراجات لحد ما يتم تنفيذ مطالبهم.
بلدنا بالمصري: إضراب عمال مصانع السكر مستمر
حال عمال مصانع السكر من أرمنت للحوامدية ما اختلفش كتير عن امبارح.. لسة الإضراب عن العمل والاعتصام مستمرين في اكتر من مصنع.. وبعد ما كانت المطالب ليها علاقة بتحسين أحوالهم المهنية والمالية، ارتفع امبارح سقف المطالب زي ما تابعنا ووصل لحد المطالبة بإقالة رئيس مجلس إدارة الشركة المهندس حسن كامل.. وأنا مش متأكدة إن العمال سمعوا بمداخلة المهندس حسن معانا امبارح في آخر الحلقة ولا لأ.. صحيح هو ما اعتذرش للعمال عن تصريحاته اللي اعتبروها تخوين واتهامات بالعمالة، لكن قال بوضوح إنه هو نفسه واحد من العاملين في الشركة وإنه لا يمكن أبداً يتهمهم بالاتهامات ديه.
بلدنا: مجلس الوزراء يرفض إستقالة د. محمد عبدالفتاح
مجلس الوزرا، رفض النهاردة الاستقالة اللي اتقدم بيها امبارح، الدكتور/ محمد عبد الفتاح من منصبه كأمين عام للمجلس الأعلى للآثار، بسبب اعتصامات واضرابات الأثريين ورفضه تولي منصب بدون صلاحيات على حسب اللي ورد في نص استقالته.. والمفروض إن فيه اجتماع يوم الحد في مجلس الوزرا مع الدكتور محمد عبد الفتاح، اللي هنعرف موقفه منه هو شخصياً.
بلدنا: تأجيل قضية قتلة الثوار بالجيزة لـ 18 أكتوبر
النهاردة كان فيه جلسة جديدة من جلسات محاكمة الظباط المتهمين بقتل الثوار في الجيزة، الجلسة ما كملتش 5 دقايق تقريباً والمحكمة أجلت القضية لجلسة 18 اكتوبر لسماع بقية الشهود وتجهيز الاجهزة الفنية لعرض السى ديهات اللي تم تصويرها.
بلدنا بالمصري: أمن السويس يتصدى لهجوم على قسم الجناين
مديرية أمن السويس أعلنت النهاردة في بيان رسمي إن قواتها تمكنت من التصدي لهجوم اللي وصفتهم ب"البلطجية" علي قسم الجناين، واللي اتسبب في إصابة 4 أفراد من الأمن أمن المركزي، واحتراق سيارتين واحدة عربية شرطة والتانية ملاكي قبل هروب الجناة.. قوات الأمن حسب البيان استخدمت القنابل المسيلة للدموع لصد الهجوم..
بلدنا بالمصري: افتتاح قسم كرداسة .. بدأ بهيصة وقلب بغم
بمناسبة حرق الأقسام، النهاردة كان فيه هيصة جامدة بمناسبة الاحتفال بافتتاح قسم شرطة كرادسةاللي كان من ضمن الأقسام اللي اتحرقت أيام الثورة.. الموضوع بدأ بهيصة وشكله قلب بغم.. خلونا نشوف الهيصة الأول ولما نرجع نبقى نشوف إيه الحكاية بالظبط.
بلدنا بالمصري: الحكومة تدرس إضراب المعلمين
نيجي بقة لإضراب المعلمين.. النهاردة كان فيه اجتماع بين الدكتور عصام شرف، رئيس مجلس الوزرا والدكتور أحمد جمال الدين موسى، وزير التربية والتعليم لبحث آخر تطورات الإضراب والوسايل الممكنة لحل الأزمة.. الكلام دة كان قبل اجتماع مجلس الوزرا، اللي اتناقش فيه الموضوع بالإضافة لموضوعات تانية.. وبعد الاجتماع ظهر الآتي على الصفحة الرسمية لمجلس الوزرا على فيس بوك: " حول بداية العام الدراسي الجديد، يؤكد مجلس الوزراء على: عدم قبول توقف بعض المعلمين عن تأدية واجباتهم التدريسية، لأنه يتعارض مع مهمتهم/ التوجيه لدي وزارة المالية والجهاز المركزي للتنظيم والإدارة والمحافظات للإسراع في تطبيق موافقة مجلس الوزراء علي ما عرضه وزير التعليم بشأن تثبيت المعلمين المؤقتين الذين تنطبق عليهم شروط التثبيت/ الموافقة علي خطة وزارة التعليم لسرعة إنهاء الترقيات المعطلة للمعلمين.
بلدنا بالمصري: إنهاء خصومة ثأرية بين عائلتين بقنا
الاجهزة الامنية في قنا بالتنسيق مع لجنة المصالحات العرفية قدرت تحط حد لخصومه ثارية بين عيلتين بقى لها اكتر من سبع سنين.
بلدنا: شباب الثورة وحزب الوعي يعلنان برنامجيهما
تعالوا نروح لحد نقابة الصحفيين، النهاردة كان فيه مؤتمر صحفى لإئتلاف شباب الثورة و حزب الوعى للإعلان عن برامجهم السياسية فى الانتخابات اللي جاية.
بلدنا بالمصري: وقفة للصحفيين على سلم النقابة
لسة في نقابة الصحفيين، بس المرة ديه على السلالم، في وقفة احتجاجية لمجموعة من الصحفيين.. ليه؟! في التقرير اللي جاي.
بلدنا: ائتلاف دعم السياحة وموقف الإخوان منها
ائتلاف دعم السياحة، على ما يبدو إنه من أول المتضررين من التصريحات اللي صدرت من عدد من قيادات جماعة الاخوان المسلمين عن موقفهم من السياحة في حالة لو حكموا مصر.. فما كان من الائتلاف إلا إنه عمل مؤتمر صحفي للرد عليها.
بلدنا بالمصري: مفاجآت الفريق أحمد شفيق الخميس
على عهدة جريدة الجمهورية، الفريق أحمد شفيق رئيس الوزرا السابق هيعقد لقاء مفتوح يوم الجمعة اللي جاية في نادي اليخت في اسكندرية، وإن اللقاء دة هيكون فيه "العديد من المفاجآات" على حد تعبير الجمهورية.. ومش بعيد يكون من ضمنها، إعلان الفريق أحمد شفيق ترشحه لمنصب رئيس الجمهورية.
بلدنا بالمصري: القائمة النسبية بين القبول والرفض
صحيح إنه لسة فيه جدل حوالين الأحسن ننتخب بالقايمة النسبية فقط لا غير ولا نعمل تشكيلة ما بين القايمة والفردي، لكن دة ما يمنعش إنه تقريباً فيه شبه اجماع على إن نظام القايمة بنسبة 100% نفعه أكتر بكتير من ضرره والعكس بالعكس بالنسبة للنظام الفردي أو حتى المختلط؟! إيه الفرق وإيه الضرر وإيه المنافع؟! وإيه العقبة الدستورية اللي واقفة في طريق القايمة وهل ممكن نعديها ولا ناخدها من قاصرها ونرضى بقليلنا؟! دة اللي هنحاول نلاقيله إجابة عند ضيوفنا النهاردة:
الدكتور/ ثروت بدوي: الفقيه الدستوري
الدكتور/ حسام عيسى: أستاذ القانون بجامعة عين شمس
الدكتور/ محمد نور فرحات: أستاذ القانون بجامعة الزقازيق
بلدنا بالمصري: الكاتب الكبير د. أحمد خالد توفيق
من ما وراء الطبيعة لحد يوتوبيا: عندنا رحلة طويلة مع الكاتب الدكتور أحمد خالد توفيق كاتب الشباب ورائد أدب الرعب فى الوطن العربى
ليست هناك تعليقات:
إرسال تعليق