برنامج بلدنا بالمصرى تقديم ريم ماجد على قناة OTV حلقة الاربعاء 14/9/2011 يوتيوب كاملة
بالمفتشر: علمانية وماستغفرش بعدها .. سبحان الله
يسعد مساكم وحلقة جديدة من بلدنا بالمصري هنبداها بكلمتين بالمفتشر كدة وعلى بلاطة، عن الخطوة العزيزة اللي خطاها لعتبة المحروسة، الراجل الطيب اردوجان.. يا اهلا وسهلا ومرحبتين واكرام الضيف واجب، وبلدنا تساع من الحبايب الف، وخصوصا يعني لما يكون راجل كمل وجدع وعمل لبلده وبرضا اهله، اللي يشد حيلهم ويرفع راسهم، وعقبال عندنا عن قريب ومنهم نستفيد... بس!!! ونقطة بقة ومن اول السطر، وفي صفحة جديدة لانج، نكتبها إحنا بايدينا ومن بنات أفكارنا، وكل واحد يبص في ورقته.. ويصح برده إن كل واحد يبص مع اللي جنبه مافيهاش حاجة: لكن من باب المشورة، من باب الأخد والعطا، مش من باب النقش لاسمح الله والنقل بالمسطرة صورة طبق الاصل، فشر التلميذ البليد او اللي حافظ يا عيني مش فاهم.. واكيد مش من باب ان كل اسمها إيه ديه، يا "عيب الشوم" بتتباهى بشعر بنت أختها!!! وخصوصا يعني ان بلدنا والحمد لله، على النيل أهيه بتغسل شعرها، والنهار اللي جالها المرة ديه "لقطة وملو هدومه" وقادر بعون الله يدفع مهرها وزيادة كمان.. وان ماقدرش، لاقدر الله، أهالي المحروسة رقبتهم سدادة من واحد ل80 مليون... قصر الكلام التحية للراجل الطيب على العين والراس وسلام مربع كمان.. مصر وتركيا ايد واحدة: عز الطلب وزيادة الخير خيرين.. نعاير نفسنا بنفسنا بالقطة اللي دبحها للأعادي واحنا يا دوب قاعدين جنب الحيطة أو من غلبنا بنبنيها ولما نتمعظم نتشعبط عليها: برده ماشي معذورين وكان الود ودنا نقف واقفة حلوة كدة بدل حسرة القلب على اللي راحوا هدر... كل دة جميل جمال مالوش مثال.. الدور والباقي بقة على أمور الدروشة، وبركاتك يا عم الحج، وشيللاه يا سيدنا ولا كإنه ولي من اولياء الله الصالحين، فبالمرة حلال عليه الخلافة وربنا يزيد ويبارك!!! لا معلش بقة ما تاخذونيش في ديه الكلمة: "يفتح الله"!!! لأ والاكادة الراجل يقول بعضمة لسانه: "مصر ام الدنيا"، نقوم احنا نفكره بالذي مضى ونقول له الخلافة: طب أهوه جابهالنا على بلاطة وقالك بالمفتشر وبالفم المليان: " لهو انتوا ما انتوش داريانين إن تركيا بجلالة قدرها "علمانية" (وما استغفرش بعدها سبحان الله)!!! غاية ما فيها إنه بصم بالعشرة إن: "تركيا ما فيهاش حد أحسن من حد وما تعرفش يعني إيه خيار ويعني إيه فقوس.. والبركة في العلمانية"!!! ازيكوا بجاااة؟!!! وعجبي!!!
بلدنا بالمصري: تأجيل محاكمة ألتراس الأهلي لـ 5 أكتوبر
لسة في المحاكم، بس المرة ديه في محكمة جنح مدينة نصر.. المحكمة أجلت نظر قضية احداث الشغب اللي حصلت في ماتش الأهلي وكيما أسوان المتهم فيها 13 من التراس الأهلي.. المحكمة أجلت ليوم 5 اكتوبر مع استمرار حبس المتهمين
بلدنا بالمصري: القبض على المعتدين على مأمور بولاق
النهاردة تم القبض على 5 من المتهمين بالاعتداء على مأمور قسم بولاق الدكرور العقيد محمود شاكر، يوم السبت اللي فات في الفجر عند نهاية كوبرى ثروت في اتجاه الجامعة، وتم تحديد هوية بقية "التشكيل العصابى"، على حد وصف الأجهزة الأمنية.. مين دول بقة دة اللي هنعرفه من:
بلدنا بالمصري: الثوار ملهمش دعوه بأحداث السفارة
لكن من ناحية تانية، الثوار والمتظاهرين اللي كانوا مشاركين في "جمعة تصحيح المسار" طلع ولا ليهم دعوة ولا ليهم أي علاقة باللي حصل لا عند الوزارة ولا عند السفارة ولا عند المديرية.. دة على عهدة تقرير لجنة تقصي الحقايق اللي شكلها المجلس القومي لحقوق الإنسان واللي أعلن عنها النهاردة في مؤتمر صحفي.
بلدنا بالمصري: أجواء جلسة شهادة ل. منصور العيسوي
النهاردة كانت تاني جلسة من الجلسات السرية في محاكمة الرئيس المخلوع وأعوانه بتهمة قتل المتظاهرين.. والدور النهاردة في الشهادة كان على اللوا/ منصور العيسوي وزير الداخلية.. شهادته خادتلها حوالي تلات ساعات ونص ما بين أسئلة المحكمة.. وبيقال إن المحكمة وجهت له حوالي"35" سؤال غير أسئلة دفاع المتهمين والمدعين بالحق المدني.. أجواء الجلسة من بعيد لبعيد هنعرفها من:
بلدنا بالمصري: موقف الإخوان المسلمون من قانون الطوارئ
بالنسبة لقانون الطوارئ، اللي صدر قرار مشترك من المجلس العسكري ومجلس الوزرا بتفعيل بنوده واضافة حالات جديدة للجرايم اللي تعاقب بيه أهمها: البلطجة ونشر الإشاعات الكاذبة.. النهاردة وزير الإعلام الدكتور/ أسامة هيكل، اتمنى إن الحالة اللي وصفها ب"الانفلات في الشارع تنتهي فى أقرب فرصة وما نضطرش نلجأ لحالة الطوارئ".. وأكد إنها في كل الحالات وضع مؤقت، ومقيد من الحكومة اللي أوصت النهاردة بتحويل القضايا الخاصة بالبلطجة لمحاكم أمن الدولة العليا طوارئ بدل المحاكم العسكرية.. (طب على الأقل المحاكم العسكرية فيها اجراء شبه الطعن أو النقض من بعيد، لكن محاكم أمن الدولة مش من حق المتهم إنه يطعن على الحكم وأمله الوحيد في عفو من الحاكم العسكري)
جماعة الإخوان كمان على ما يبدو مش موافقة أبداً على موضوع الطوارئ، أو على الأقل دة اللي فهمناه من تصريحات الأستاذ صبحي صالح في المؤتمر اللي كان عامله امبارح في اسكندرية لدرجة إنه قال بوضوح إنه خايف من سيناريو 54.
بلدنا بالمصري: اجتماع سبعة من مرشحي الرئاسة
مرشحين الرياسة، أو يعني على الأقل معظمهم، في منتهى الهمة والنشاط اليومين دول وخصوصاً في اليومين اللي فاتوا.. امبارح بالليل، كان فيه اجتماع لسبعة من مرشحين الرياسة بدعوة من وائل غنيم بهدف التشاور حوالين تحديات المرحلة والوسائل المتاحة لحماية الثورة.. المرشحين اللي اتوجهت لهم الدعوة وحضروا الاجتماع هم: الدكتور البرادعي، السيد عمرو موسى، الدكتور سليم العوا، الأستاذ حمدين صباحي، الدكتور حازم صلاح أبو اسماعيل والدكتور عبد المنعم أبو الفتوح والمستشار هشام البسطاويسي كان معاهم على التليفون من الكويت.. الاجتماع تم بدون الإعلان عنه وبقدر كبير من السرية حوالين اللي دار فيه.. كل اللي نعرفه إنه ركز في جزء كبير منه على مبادرة لجنة ال100 اللي اقترحها السيد عمرو موسى.. وما صدرش عن الاجتماع أي بيانات، فيه بيان واحد بس صدر عن حملة الدكتور عبد المنعم أبو الفتوح.
من ضمن الملحوظات الملفتة للانتباه إن الاجتماع دة تم في غياب عدد من المرشحين أهمهم: السفير عبد الله الأشعل، الفريق مجدي حتاتة، الإعلامية بثينة كامل، الأستاذ مجدي حسين والدكتور أيمن نور... بس الدكتور أيمن نور كان حاضر الاجتماع اللي جمع برده عدد من مرشحين الرياسة وعدد من الممثلين عن الاحزاب وائتلاف شباب الثورة.. الهدف من الاجتماع كان مناقشة عدد من المواضيع اللي ليها علاقة بالانتخابات البرلمانية اللي جاية وانتهى بالإعلان عن حملة لجمع توقيعات لرفض قانون " تقسيم الدوائر الانتخابية".. الاجتماع دة بتفاصيله هيكون من ضمن مواضيع تانية كتير هنتكلم فيها بعد الفاصل مع الدكتور/ أيمن نور: المرشح المحتمل للرئاسة ومن ضمنها: ليه ما حضرش الاجتماع اللي دعا ليه وائل غنيم وإيه اللي مخليه واثق ومتأكد أوي كدة إن رجالة العادلي وكبارات النظام السابق متورطين لشوشتهم في أحداث السفارة؟!!
بلدنا بالمصري: انتخابات نقابة المهن التعليمية
النهاردة بدأت انتخابات نقابة المهن التعليمية تقريباً في كل المحافظات على مستوى الجمهورية.. تعالوا نطل طلة على المعلمين وهم بيشاركوا لأول مرة في انتخابات نقابية من سنين طويلة هم نفسهم نسيوا عددها أو زهقوا من عدها.
بلدنا بالمصري: أخبار الفجالة على دخلة المدارس
وقبل الفاصل تعالوا نخطف رجلنا لحد الفجالة نشوف إيه الأخبار هناك على دخلة المدارس.
بلدنا بالمصري: مصر رايحة على فين - د. أيمن نور
مصر فين ورايحة على فين سؤال هندور على إجابته النهاردة من وجهة نظر د. أيمن نور: مؤسس حزب الغد الجديد والمرشح المحتمل للرئاسة
ليست هناك تعليقات:
إرسال تعليق