بلدنا بالمصري: ما تيسر من جلسة موقعة الجمل
النهاردة الإعلاميين وكاميرات التصوير والصحفيين اتمنعوا من حضور جلسات المحاكمة سواء في موقعة الجمل أو قضية تصدير الغاز لإسرائيل المتهم فيها المهندس سامح فهمي وغيره من المسؤولين السابقين في وزارة البترول.. مع إن: قرار رئيس المحكمة في قضية موقعة الجمل، كان قراره امبارح واضح جداً بوقف إذاعة الجلسات على الهوا، لا هو قرار بسرية الجلسات ولا هو قرار بحظر النشر.. وفي قضية تصدير الغاز مافيش أصلاً أي قرارات من المحكمة_معلنة_ بخصوص التغطية الصحفية أو الإعلامية للجلسات!!! فيها إنة بقة ولا مافيهاش، احنا كنا هناك في الحالتين ورجعنا باللي ربنا قدرنا عليه..
بلدنا بالمصري: ما تيسر من جلسة تصدير الغاز
دة ما تيسر لينا من تغطية لتاني جلسة من جلسات موقعة الجمل تعالوا بقة نشوف قدرنا نرجع بإيه من قضية تصدير الغاز.
بلدنا بالمصري: إخلاء سبيل قصر أحداث ماتش الأهلي
النهاردة كان فيه جلسة قدام محكمة الطفل، لسبعة من القصر اللي تم القبض عليهم في أحداث ماتش الأهلي وكيما أسوان.. المحكمة حكمت بإخلاء سبيلهم لإنهم لم يتجاوزا السن القانوني وتأجيل محاكمتهم لجلسة 19 سبتمبر للإطلاع، مع إخلاء سبيل كل المتهمين في القضية. أما التسعة المتهمين في القضية من غير القصر فالمفروض إن أول جلسة للمحاكمتهم قدام محكمة جنح مدينة نصر، هتكون يوم الأربع اللي جاي، بعد بكرة.
بلدنا بالمصري: مؤتمر صحفي ل م. الزند لتوضيح الصورة
دلوقتي احنا عارفين إن يوم الجمعة اللي فاتت كان فيه اجتماع للجمعية العمومية لنادي القضاة، تم فيه عرض مشروع قانون السلطة القضائية اللي أعده النادي في مواجهة أو بالتوازي_أياً كان_ مع المشروع اللي أعدته لجنة المستشار أحمد مكي بتكليف من رئيس مجلس القضاء الأعلى المستشار حسام الغرياني.. وفي نفس الوقت كان فيه داير ما يدور نادي القضاة ودار القضاء العالي مسيرة اتحركت من ميدان التحرير للمطالبة باستقلال القضاء .. المهم.. اللي حصل في الاجتماع دة فضل من يومها مثار جدل، خاصة بعد ما أعلنت وسائل الإعلام الرسمية إن الجمعية العمومية وافقت بالإجماع على مشروع قانون نادي القضاة، في حين إن عدد كبير من القضاة اللي حضروا الاجتماع أكدوا إن ما فيش تصويت حصل أصلاً على مشروع القانون.. فغالباً المؤتمر الصحفي اللي عقده النهاردة، المستشار أحمد الزند، رئيس نادي قضاة مصر، كان بهدف توضيح الصورة.
بلدنا: لجنة تقصي حقائق أحداث السفارة الإسرائيلية
بيتهيألي إن مافيش اتنين في مصر ممكن يختلفوا على إن أحداث السفارة الإسرائيلية الأخيرة جت على الطبطاب لكل من عايز يجيب من الأرض ويحط على دماغ الثورة وأيامها واللي عملوها واللي يتشدد لهم ورجعنا تاني لموال التمويل الخارجي والآيادي الخفية ومخطط تقسيم مصر_والموال دة بالذات هنتكلم عنه بالتفصيل في فقرتنا اللي جاية_ المهم ولإننا محتاجين فعلاً نعرف حقيقة اللي حصل وغيه علاقته بالثورة، المجلس الوطنى اللي بيرأسه الدكتور/ ممدوح حمزة قرر تشكيل لجنة لتقصى الحقايق في أحداث يوم الجمعة كلها من أول وزارة الداخلية لحد مديرية أمن الجيزة مروراً طبعاً بالسفارة الإسرائيلية.
بلدنا بالمصري: مغامرة في العمارة اللي جنب السفارة
بمناسبة بقة أحداث السفارة، ما تيجوا نوصل لحد السفارة اللي جنب العمارة.. فريق بلدنا بالمصري عمل مغامرة لا بأس بيها أبداً.
بلدنا بالمصري: الإخوان و جمعة معاً ضد الثورة المضادة
جماعة الاخوان المسلمين فى اسكندرية، هي كمان عملت دعوة ليوم الجمعة اللي جاية. لكن دعوتها لمؤتمر "جماهيرى حاشد" بعد صلاة الجمعة قدام مسجد القائد ابراهيم.. عنوانه: "معاً ضد الثورة المضادة" للتأكيد على الرفض الشعبى للمواد فوق الدستورية، والمطالبة باجراء الانتخابات البرلمانية فى معادها المحدد وتسليم المجلس العسكرى السلطة لحكومة مدنية فى اقرب وقت.
بلدنا بالمصري: دعوة لـ جمعة لا للطوارئ
دلوقتي بما إن أحداث الوزارة والسفارة والمديرية محوا مطالب جمعة تصحيح المسار من الوجود، وزادوا وغطوا كمان بقرارات ليها علاقة بر الروح في قانون الطوارئ وتفعيله وتعديله_ويمكن تمديد العمل بيه واستمرار حالة الطوارئ لوقت أطول الله أعلم لسة مش باين_ فبالتالي، اتحاد شباب الثورة_ ما حرمش الظاهر_ دعا النهاردة جموع الشعب المصرى، للنزول يوم الجمعة اللي جاية.. وسماها الاتحاد في بيانه: "جمعة لا للطوارئ"
بلدنا: إستعدادات ائتلاف شباب الثورة يستعد للانتخابات
بالرغم من الجدل دة حوالين معاد الانتخابات وقوانينها ومين هيشارك ومين هيقاطع، الظاهر إن ائتلاف شباب الثورة بدأ يستعد عملياً للانتخابات، لدرجة إنه أعلن إنه هينافس فى الانتخابات على 150 مقعد على مستوى الجمهورية وأعلن عن قايمة مبدئية فيها أسماء عدد من أعضاءه عن المجموعات والأحزاب المختلفة اللي بيضمها الائتلاف من ضمنهم: ناصر عبد الحميد في المحلة.. خالد تليمة في أوسيم.. عمرو عز في إمبابة.. شادى الغزالى في مدينة نصر.. معاذ عبد الكريم في الدقى والمهندسين.. وزياد العليمى وباسم كامل وغيرهم
بلدنا بالمصري: استمرار الإضراب الجزئي للأطباء
الإضراب الجزئي للأطباء لسة مستمر، حسب البيان اللي صدر النهاردة عن اللجنة التنسيقية للإضراب، واللي أكد إن من بكرة هيكون فيه عجز كبير فى المستشفيات العامة والحكومية والمركزية وطلبوا من المرضى إنهم يروحوا مستشفيات الشرطة والجيش.
هل تستخدم أموال منظمات المجتمع المدني ضد مصر
دلوقتي احنا بقى لنا أيام وشهور في موال التمويل الخارجي اللي مالوش شغلة ولا مشغلة غير إنه يبعتر بملايين الدولارات على "منظمات المجتمع المدني" في بلدنا عشان يجيب عليها واطيها.. وكل يوم والتاني يطلع علينا مسؤول شكل بتصريح شكل عن القصة ديه من أول السفيرة الأمريكية اللي فاتت لحد وزير الداخلية ووزير العدل اليومين اللي فاتوا، مروراً طبعاً باللوا حسن الرويني قائد المنطقة المركزية.. وفي كل مرة نفضل نلف حوالين نفسنا يمين وشمال "بحثاً" عن مين اللي إيده نضيفة ومين اللي إيده طويلة.. حتى مرشحين الرياسة "المحتملين" اتحطوا هم كمان تحت مستوى الشبهات.. طب احنا دلوقتي عايزين نعرف من غير تلميحات ومن غير لف دوران مين اللي صرف ومين اللي مد إيده والفلوس ديه اتصرفت في إيه وإيه آخرتها؟!!! والحمد لله إن فيه لجنة تقصي حقائق شكلها وزير العدل بقرار من رئيس مجلس الوزا عشان تتقص في الموضوع دة.. إيه بقة المعلومات والأدلة المتوفرة وإيه هي الحقايق؟!! دة اللي احنا هنحاول نتقص فيه احنا كمان وهنستعين عليه بضيوفنا النهاردة:
- السفير/ عبد الله الأشعل: المرشح المحتمل للرئاسة ومساعد وزير الخارجية الأسبق
- صلاح سليمان: رئيس مؤسسة النقيب للتدريب ودعم الدمقراطية
- معتز الحديدى: الصحفى بجريدة الجمهورية وواحد من 3 صحفيين اتقدموا ببلاغات للمجلس العسكري بيتهموا فيها 18 منظمة وجمعية أهلية بالتعاون مع الخارج وتلقي أموال بالمخالفة للقانون
ليست هناك تعليقات:
إرسال تعليق