برنامج بلدنا بالمصرى تقديم ريم ماجد على قناة OTV حلقة الاحد 11/9/2011 يوتيوب كاملة
بالمفتشر: الحدوتة النوبة دي مفقوسة وملتوتة
يسعد مساكم وحلقة جديدة من بلدنا بالمصري بعد يومين الدنيا وقفت فيهم على رجل على الفاضي والمليان بلزمة ومن غير لزمة.. فهنبدأها بكلمتين ورد غطاهم وبالمفتشر كدة ورزقنا على الله.. بصريح العبارة كدة: الحكاية وما فيها النوبة ديه: مفقووووسة وحدوتة بايخة وملتوتة.. والحدق يفهم بقة!!! بس دة ما يمنعش اننا في حلقتنا النهاردة هنحاول نفهم حاجات كتير من اللي حصلت في اليومين اللي فاتوا، وبناءاً عليه هنسأل سؤال صعب حبتين: هو احنا كنا في إيه وصبحنا في إيه، وإزاي من هنا ومن دلوقتي نقدر ناخد البلد ديه لبر الأمان مروراً بسكة السلامة، اللي شكلنا كدة تهنا عنها باين ولا إيه؟!!! بس كل دة بعد ما نطل طلة على آخر أخبار بلدنا.. وهنبدأها من المحاكم حيث إنها النهاردة كانت كامل العدد..
بلدنا بالمصري: جلسة محاكمة مبارك وشركاه -- 11 سبتمبر
النهاردة كانت الجلسة السادسة من جلسات محاكمة مبارك وأعوانه بتهمة قتل الثوار.. وأول جلسة سرية ومحظور النشر فيها بأمر من يئة المحكمة، اللي كان المفروض إنها تستمع النهاردة لشهادة المشير حسين طنطاوي، القائد العام ورئيس المجلس الأعلى للقوات المسلحة.. وكم التضارب والتناقض في الأخبار حوالين حضور المشير للشهادة من عدمه، كان حاجة في منتهى الغرابة، لدرجة إن التلفزيون الرسمي ذاع خبر _وكإنه مؤكد_ عن حضور المشير لقاعة المحكمة، قبل ما يرجع بعدها بشوية ويعلن عن إن المستشار أحمد رفعت، طلب من النائب العام استدعاء المشير حسين طنطاوي والفريق سامي عنان رئيس الأركان للإدلاء بشهادتهم قدام المحكمة أيام 24 و25 سبتمبر، بعد ما اعتذروا عن الادلاء بالشهادة في الجلسات المقررة النهاردة وبكرة "نظراً للانشغال بالحالة الأمنية في البلاد".. الاعتذار ورد في خطاب رسمي من هيئة القضاء العسكري للمستشار أحمد رفعت.. واقترح الخطاب _ بهدف عدم تعطيل سير اجراءات الدعوي_ إن المحكمة توافق علي موافاتها بشهادة المشير حسين طنطاوي والفريق سامي عنان في الوقائع المطلوب شهادتهم فيها سواء من المحكمة أو النيابة العامة أو المتهمين ودفاعهم أو الدفاع عن المدعين بالحق المدني..
بلدنا بالمصري: المجلس العسكري يجتمع بكبار القضاء
قبل ما نكمل أخبار المحاكم والقضايا، اللي كل قضية منهم أهم من التانية، لازم بس نقول إن المشير حسين طنطاوى،اجتمع النهاردة، في حضور الفريق سامي عنان وأعضاء من المجلس الأعلى للقوات المسلحة، برؤساء الهيئات القضائية ورئيس وأعضاء اللجنة القضائية العليا للإشراف على الانتخابات.
بلدنا بالمصري: جلسة محاكمة المتهمين في موقعة الجمل
النهاردة كمان كانت أول جلسة من جلسات محاكمة المتهمين في موقعة الجمل الشهيرة، وعددهم 25 ما بين رموز من كبارات النظام السابق وفلوله وأعضاء في مجلس الشعب عن الحزب الوطني المنحل وغيرهم من أعضاء السلطات التشريعية والتنفيذية_ماشاء الله_ وظباط شرطة سابقين ويمكن حاليين كمان مش متأكدة.. بعد ما كانت بدأت المحاكمة منقولة على الهوا، رئيس المحكمة خد قرار بعدم إذاعتها عن طريق وسائل الإعلام المرئية والمسموعة من النهاردة ولحد جلسة النطق بالحكم.. احنا هنحاول في فقرتنا اللي جاية نعرف أكبر قدر ممكن من التفاصيل عن سير الجلسة، وهل قرار المحكمة دة معناه حظر نشر ولا بس حظر الإذاعة على الهوا.. بس على ما ييجي أوان الفقرة خلونا ناخد فكرة سريعة في التقرير اللي جاي. (تقرير موقعة الجمل)
بلدنا بالمصري: دعوى إقالة وزير الداخلية ل. العيسوي
لسة في المحاكم، بس المرة ديه في محكمة القضاء الإداري اللي كانت بتنظر النهاردة في اكتر من دعوى، من ضمنهم: دعوى إقالة وزير الداخلية منصور عيسوى بسبب موقعة"الجلابية"، اللي حصلت في ماتش الزمالك و الأفريقى التونسى، النهاردة كانت جلسة النطق بالحكم.. والدعوى التانية هي اللي كان أقامها عدد من اللي بيسموا نفسهم "مؤيدين مبارك" واللي بيطالبوا فيها بعودته كرئيس لمصر.. ودعوى تالتة ضد الدكتور عصام شرف، رئيس مجلس الوزراء، والدكتور محمد كامل عمرو، وزير الخارجية، بتطالب بصفة مستعجلة بوقف تنفيذ القرار السلبى الصادر بعدم سحب السفير المصرى من إسرائيل، لحين تقديم اعتذار رسمى من القيادة الإسرائيلية على استشهاد الجنود المصريين على الحدود.
بلدنا بالمصري: رحيل السفير الإسرائيلي
الحقيقة إنه بعد استشهاد الجنود على الحدود، استدعاء السفير المصري في إسرائيل ماكانش الطلب الوحيد، كان فيه مطلب تاني بطرد السفير الإسرائيلي في مصر.. وبغض النظر عن مدى عدم الاستجابة للمطلبين، السفير الإسرائيلي لم حاله ومحتاله وخد بعضه هو وأعضاء بعثته الدبلوماسية وفارقنا يوم الجمعة في انصاص الليالي على ملا وشه، بعد الأحداث الدامية اللي اشتهرت بأحداث "اقتحام السفارة الإسرائيلية" اللي راح ضحيتها تلاتة من المواطنين غير 1049 مصاب باصابات ما بين خفيفة وبالغة. واللي وصفها وزير الإعلام بإنها "عمل إجرامي لا يمكن السكوت عليه" ووصف مرتكبينه بإنهم لا يمكن يكونوا مواطنين شرفاء وأكد امبارح في البيان المشترك اللي صدر من المجلس العسكري ومجلس الوزرا، على اتخاذ عدد من الإجراءات لمواجهة الحالة اللي وصفها ب"الانفلات الأمني والأخلاقي".. القرارات ديه هنناقشها بالتفصيل في فقرتنا التانية، لكن من ضمنها كانت محاكمة المتهمين في الأحداث قدام محكمة أمن الدولة العليا طوارئ.. لحد قرارءة البيان دة، كان عدد المقبوض عليهم حوالي 19، لكن النهاردة الشرطة العسكرية قبضت على 92 تانيين. وكلهم النيابة العامة هي اللي هتتولى التحقيق معاهم قبل تحويلهم لمحكمة أمن الدولة العليا طوارئ..
بلدنا: عربية المطافي وأحداث السفارة الإسرائيلية
بالنسبة للمواطنين التلاتة اللي راحوا ضحية أحداث السفارة ومديرية الأمن، سبب الوفاة هو الإصابة بطلق ناري، دة حسب مصدر مسئول بمصلحة الطب الشرعي في تصريحات لوكالة أنباء الشرق الأوسط.. بس قبل ما نتأكد من حقيقة الموضوع دة، خصوصاً إن الأخبار عن أول حالة وفاة، كانت بتتكلم عن أزمة قلبية أصابت لوا شرطة سابق أثناء مروره بعربيته على كوبري الجامعة، نتيجة لتعرضه للغازات المسيلة للدموع اللي استخدمتها قوات الأمن في تفريق المتظاهرين.. قبل ما نشوف إيه الحكاية ديه، خلونا الأول نشوف ونسمع قصة غريبة جداً من قصص الاعتداء على مديرية الأمن.
بلدنا بالمصري: طلق ناري قتل ضحايا السفارة
بالنسبة للمواطنين التلاتة اللي راحوا ضحية أحداث السفارة ومديرية الأمن، سبب الوفاة هو الإصابة بطلق ناري، دة حسب مصدر مسئول بمصلحة الطب الشرعي في تصريحات لوكالة أنباء الشرق الأوسط معانا الاستاذ علي حسن نائب رئيس وكالة أنباء الشرق الاوسط
بلدنا بالمصري: 14 سبتمبر محاكمة 9 من ألتراس الأهلي
فيما يخص بقة أحداث ماتش الأهلي وكيما أسوان، نيابة ثان مدينة نصر قررت امبارح إحالة 9 من جمهور "الألتراس" الأهلاوى لمحاكمة عاجلة وتم تحديد جلسة يوم 14 سبتمبر لنظر أول جلسة قدام محكمة جنح مدينة نصر. ولإن من ضمن المقبوض عليهم فيه عدد من القصر حوالي سبعة، النيابة قررت إحالتهم لنيابة الطفل ووجهت لهم تهم التعدى على ضباط الشرطة والبلطجة وإتلاف الممتلكات العامة والخاصة وترويع الآمنين وتكدير الأمن العام. صحيح إن القضية كلها دلوقتي قدام النيابة والقضاء، لكن أحياناً وقدام استغاثات الأهالي خاصة أهالي القصر، ما بيكونش قدامنا غير إننا نكون مجرد وسيلة لتوصيل صوتهم.
بلدنا بالمصري: وقف بث الجزيرة مباشر من مصر
من ضمن الأحداث اللي حصلت النهاردة، وأثارت جدل واسع، واقعة قيام شرطة المصنفات الفنية بتفتيش مكتب الجزيرة مباشر مصر، ومصادرة أحد الأجهزة والقبض على أحد مهندسين البث واتخاذ قرار بوقف بث القناة من القاهرة، وحالياً الجزيرة مباشر لجأت لبث اضطراري من الدوحة.. تفاصيل اكتر هنعرفها من:
بلدنا بالمصري: انفراج أزمة المعتصمين النوبيين
على ما يبدو إن أزمة المعتصمين النوبيين قدام مبنى المحافظة في أسوان، اتحلت ولو جزئياً، والمعتصمين قرروا فض اعتصامهم، بعد اجتمالع الدكتور عصام شرف رئيس مجلس الوزرا مع عدد من القادة والممثلين لأهالي النوبة، واللي انتهى بقرار بالبدء فى دراسة مشروع شامل يضمن إعادة توطين أهالى النوبة فى مناطقهم القديمة على بحيرة ناصر جنوب السد العالى، بحيث يكون مشروع قومي لتعمير مناطق جنوب الوادى وبناء قرى النوبة القديمة. لإجتماع حضره عدد من الوزرا المعنيين وعدد من الشخصيات الحزبية والعامة، ووصلوا في النهاية للتوصية بإنشاء هيئة تنموية عليا تابعة لمجلس الوزرا وعضوية شخصيات نوبية، تضمن تحقيق التنمية المستدامة.
معانا المخرج أحمد عواض - الناشط
بلدنا بالمصري: مظاهرة المعلمين أمام مجلس الوزراء
بالرغم من القرارات الرادعة اللي صدرت آخر الأسبوع اللي فات بتفعيل قانون الإضرابات والاعتصامات، إلا إن اليومين دول وتحديداً من امبارح، الاعتصامات والإضرابات ما قلتش إن ما كانتش زادت، خاصة بعد اعتصام المهندسين والمعلمين وإضراب الأطباء وكلهم بدأوا امبارح، دة غير وقفة أساتذة الجامعات النهاردة قدام مجلس الوزرا وتهديدهم بالإضراب عن العمل في أول السنة الدراسية.. خلونا نبدأ بالمعلمين وباللي سموها هم نفسهم "ثورة التعليم"
بلدنا بالمصري: إنزال علم السفارة المصرية في سراييفو
وقبل الفاصل بقة، تعالوا نطل طلة على فيديو موقف الدنيا على رجل على تويتر وعلى فيس بوك.. بنفهم منه إن الجالية المصرية في سراييفو بتحتج على إن السفير المصري نزل العلم المصري من على السفارة المصرية.. طب تيجي إزاي يعني؟!!!
بلدنا: تعديل المجلس العسكرى بعض مواد قانون الطوارئ
بلدنا بالمصري: كواليس محاكمة المتهمين في موقعة الجمل
النهاردة كانت أول وآخر جلسة من جلسات محاكمة المتهمين في موقعة الجمل، اللي هنقدر نشوفها بعينينا قبل ما المحكمة تقرر حظر إذاعتها لحد ما ييجي أوان النطق بالحكم.. فاحنا هننتهز الفرصة ديه عشان نعرف اكبر قدر ممكن عن تفاصيل وعن كواليس الجلسة من ضيفنا أ. ياسر محمد: المحامي عن 50 من أهالي الشهدا والمصابين
بلدنا بالمصري: مين واخد مصر رايح بيها فين
احنا النهاردة وفي الفقرة ديه بالذات ما عندناش غير هو سؤال واحد مافيش غيره: بعد ما عدى سبع شهور على ثورة بيضة زي الفل كانوا بيضربوا بيها المثل في الدنيا كلها، وبعد اللي حصل في الكام يوم اللي فاتوا سواء في الشارع أو على مستوى "القرارات الرادعة" اللي معظمها بدأ يتنفذ فعلاً على الأرض.. السؤال هو: "احنا كنا فين وبقينا فين ومين واخد مصر ورايح بيها على فين.. والأهم من كدة إزاي ناخدها في سكة السلامة لبر الأمان؟!!! نقدر نعتبر الموقف المشترك للمجلس العسكري ومجلس الوزرا من كل الأحداث الأخيرة، زي ما سمعناه كدة على لسان وزير الإعلام هو الرد الرسمي على سؤالنا: مين واخد مصر على فين؟! وإزاي ناخدها لبر الأمان؟! والحقيقة إنه سؤال مش هين أبداً هنستعين على إجاباته المختلفة بضيوفنا النهاردة:
- د. على الغتيت: أستاذ القانون الدولي
- د. قدري سعيد: مدير وحدة الدراسات الأمنية في مركز الأهرام للدراسات السياسية والاستراتيجية
- الناشر الأستاذ/ هشام قاسم
بلدنا بالمصري: أساتذة الجامعة ناويين على إيه
بيتهيألي إننا ما عدناش محتاجين نوصف حال الجامعات المصرية ولا نرجع نقول من تاني إنه لا يسر عدو ولا حبيب لإنها بقت حاجة واضحة وضوح الشمس في عز الضهر.. ولا محتاجين نعيد ونزيد في إن "استقلال الجامعات ومن قبله تطهيرها" مطلب مش بس أساتذة الجامعة اللي ريقهم نشف يطالبوا بيه من قبل الثورة ومن بعدها، لكن كمان الطلبة وغيرهم من فئات المجتمع ومن الأهالي اللي عارفين ومتأكدين إنه من غير استقلال الجامعة لا فيه جامعة ولا فيه تعليم جامعي ولا فيه بحث علمي ولا يحزنون.. طب الجامعة كانت خلاص على وشك تنول المراد بوعد من رئيس الوزرا شخصياً بإقالة كل القيادات الجامعية أول أغسطس وانتخاب القيادات الجديدة بالآلية اللي تتفق عليها نوادي هيئات التدريس.. إيه اللي حصل وأساتذة الجامعة والطلبة ناويين على إيه بالظبط.. دة اللي هنحاول نعرفه من ضيوفنا:
- الدكتورة/ ثريا عبدالجواد: عضو حركة 9 مارس لاستقلال الجامعات
- الدكتور/ شريف حامد: المقررالعام لمؤتمر نوادى اعضاء هيئة التدريس بجامعات مصر
- عمرو ابراهيم: أمين اتحاد طلاب جامعة عين شمس وعضو المكتب التنفيذى لاتحاد طلاب مصر من ضمن الحركات المكونة لائتلاف الطلبة)
بلدنا بالمصري: ثاني أيام إضراب الأطباء
بالنسبة لإضراب الأطباء النهاردة كان اليوم التاني للإضراب اللي بدأ امبارح والمفروض يستمر ليوم التلات.. اللجنة التنسيقية للإضراب أكدت النهاردة إنه نجح بنسبة 80% في المحافظات وفشله في القاهرة والجيزة نتيجة للضغوط. (تقرير الأطباء)
معانا الدكتور عدلي العدوي مساعد أول الوزير للعلاج الطبي
ليست هناك تعليقات:
إرسال تعليق