برنامج صباح ON حلقة الاحد 25/9/2011 من قناة ONTV كاملة يوتيوب
القنصل المصري في إنجلترا يهدد أم ثكلى
عندنا فضيحة جديدة لوزارة الخارجية المتخاذلة من أيام مبارك في رد حقوق المصريين في الخارج .. الفضيحة دي تتمثل في مقتل دكتور مصري في إنجلترا يوم 24 أغسطس الماضي وحتى الآن والدته مش عارفة تستلم الجثة ولا عارفة تنزل بيه عشان تدفنه في مصر .. أهل الضحية المصري في لندن الدكتور كريم أسعد عايشين أيام صعبة ولما لجأوا للخارجية محدش عبرهم وهو ما دفع أسرة كريم في الإسكندرية إلى تنظيم وقفة إحتجاجية إعتراضاً على مقتل الدكتور كريم بإنجلترا.
الوقفة كانت إمبارح العشرات وشارك فيها العشرات من أهل الدكتور أمام كلية الطب بالإسكندرية وعبروا عن غضبهم من عدم قيام الخارجية المصرية بإسترداد جثمان المرحوم من إنجلترا.
فينك يا خارجية .. ثورة إيه وكلام فارغ إيه اللي مش قادرة تغير عقلية وزارة مسئولة عن ضفر أصغر عيل خارج حدود بلدنا .. اللي عمله القنصل المصري في إنجلترا فضيحة وكارثة ودم كريم في رقبته .. وبنقولها من هنا مش هنسكت على القضية دي .. واللي قال للست أم كريم لو كلمتي الإعلام مش هنرجعلك ابنك بنقوله هيرجع يا مسئول يا كبير يا محترم .. عاوز اي جدع في الخارجية يرد ولو عنده كلام غير اللي قالته أم كريم وأخته يرد علينا .. بس هتقول إيه والجثة في ثلاجة في لندن من شهر وانتوا ولا انتوا هنا .. الموضوع فتحناه ومش هنقفله غير لما كريم الله يرحمه يرجع ويندفن في مصر
صباح ON: صحافة الأحد 25 سبتمبر 2011
لسه مكملين حلقتنا معاكم النهاردة .. كل الجرايد مركزة على شهادة المشير طنطاوي أمام المحكمة وطبعا محدش عنده التفاصيل بسبب حظر النشر وبالطبع أخبار إضراب المعلمين مستمر في تصدر صفحات الصحف كل ده وموضوعات تانية كتير هنقراها ..
توابع تقديم طلب العضوية الكاملة لدولة فلسطين
هل تدور الارض ولو لمرة واحدة عكس الاتجاهات السياسية كافة فتقف بوصلة السياسة لاول مرة الى جانب الحق وتضع كل المصالح جانبا لصالح الشعب المظلوم الفلسطيني سابقا .. خطوة اتخذها ابو مازن متجها الى الامم المتحدة رغم كل التهديدات الامريكية ومماطلات اللجنة الرباعية.. ربما فتحت هذه الخطوة النار على أبومازن وشقت الصف الفلسطيني المشقوق أصلا.. لكنها خطوة كشفت زيف التصريحات الوردية للقيادة الأمريكية حول هذه القضية.
كل محبى الحق صفقوا تصفيقا حادا للخطاب الذى اعلن فيه ابو مازن ان فلسطين المحتلة المغلوبة على امرها ستطلب لاول مرة حقها بصوت عالى لكى يسمع كل من صٌمت اذانهم .. ولكن لا تزال لعبة السياسة تلعب دورا كبيرا فى تحويل مسار تلك الخطوة .. فالرباعية الدولية قررت جدولا زمنيا لاستئناف المفاوضات وحماس اعتبرتها خطوة غيرهادفة و بلا ثمار أو نتائج سياسية واقتصادية فهل يدفع الفلسطينيون ثمن سعيهم نحو الأمم المتحدة ؟ هذا ماسنعرفه من خلال ضيفنا في الأستديو السيد جميل المجدلاوي عضو المجلس التشريعي الفلسطيني وعضو جبهة التحرير الفلسطينية ولكن بعد مشاهدة التقرير التالى ..
لا يهم أن تعترف الأمم المتحدة بالدولة الفلسطينية ولن يغير ذلك شيئا سواء فيما يتعلق بالبلطجة الأمريكية والكذب الإسرائيلي
إستمرار إضراب المعلمين .. هل يطيح بوزير التعليم
إضراب المعلمين مستمر .. لأ وبيتصاعد .. الأسبوع اللي فات فتحنا الملف على مدار يومين مع أطرافها وحاولنا نوصل صوت المعلمين لمعالي الوزير لعل وعسى الأمور تتعدل والوزراة تلاقي حل يرضي المعلمين وحذرنا من تصاعد الأمور لو تجاهلت الحكومة مطالبهم .. لكن ولا الهوا .. كله في الطناش والقرارات اللي طلعت لا علاقة لها بما يطلبه المعلمون ..
الوزير ودن من طين والتانية من عجين .. لا حل الازمة ولا المعلمين راضيين يبدأوا الشغل .. وبالطبع الطلبة مشتتين لا عارفين يذاكروا ولا لاقيين حد يدلهم حصص .. الإضراب وصل لذروته إمبارح والمعلمين تظاهروا امام مجلس الوزراء .. الدكتور عصام شرف الله يعينه على ما بلاه عمل حاجة غريبة جدا برضه بعد ما رفض المدرسين يقابلوه لحين إقالة الوزير الحالي .. فكان رد فعله الاجتماع باتنين من وكلاء وزارة التربية والتعليم . هل ده معناه الإطاحة بجمال الدين موسى خلال ساعات .. هنعرف الدنيا رايحة على فين وتطورات الأوضاع من ضيفينا الأستاذ أيمن البيلي وكيل نقابة المعلمين المستقلة والمتحدث الرسمي . والأستاذ حسام محمد ،عضو المكتب التنفيذي لنقابة المعلمين المستقلة
حملة فوق الخط .. لانتشال المصريين من الفقر
خط الفقر .. فاكرين الخط ده اللي أيام النظام السابق ماكانش فيه حد تحته وبعد سقوطه اكتشفنا إن معظم المصريين تحت الخط المشئوم ده .. في الظروف اللي بتمر بيها البلد قد يكون خط الفقر خطا احمر يصعب تخطيه بسبب الازمات الاقتصادية التى تعصف بالعالم كله.
فى ظل القمع والانظمة الديكتاتورية التى كنا نعيش تحت حكمها تدهورت الأوضاع المادية للمصريين اكثر واكثر واصبح خط الفقر دائرة يدور اكثر من 10 ملايين مصرى ويمكن أكثر .. الناس دي ممكن ما يلاقوش قوتهم اليومى ومايعرفوش يدبروا وجبة واحدة .. السؤال هو إزاي ممكن فى ظل انظمة حرة تقوم على المساواة والعدالة الاجتماعية ان تساعد من هم تحت خط الفقر للعبور الى حياة أفضل وتمكينهم من مساعدة انفسهم وتلبية احتياجات اسرهم .. معنا اليوم دكتور محمد كامل المدير التنفيذى لحملة فوق الخط هنعرف منه إجابات للأسئلة دي
ليست هناك تعليقات:
إرسال تعليق