بلدنا بالمصري: حركة تنقلات - تطهير الداخلية منتصف يوليو
والظاهر كدة إن وزير الداخلية قرر النهاردة يقول للناس اللي مسربعة: "حلمكوا شوية والصبر جميل" بما إنه أعلن النهاردة عن إصدار حركة تنقلات الشرطة السنة ديه في نص الشهر دة، وأكد إنها هتكون أكبر حركة في تاريخ وزارة الداخلية، وهتتم على مرحلة واحدة وهتشمل قيادات الوزارة وكل الظباط.. وقال بالحرف الواحد أن الحركة هتمثل تطهير لوزارة الداخلية بشكل كامل، وهتشمل إقصاء مئات اللواءات وتصعيد الرتب المتوسطة بدالهم.. وأكد إنه خد في اعتباره كل المقترحات اللي طرحها عليه شباب الثورة تقوية جهاز الشرطة من جديد وكسب ثقة المواطن وما له من انعكاسات إيجابية على الأمن والاستقرار في البلاد.
بلدنا: طائرة تسبب حالة ذعر لسكان القاهرة الكبرى
النهاردة حصلت حالة الذعر اللي حصلت لسكان القاهرة والجيزة والقليوبية، بسبب صوت انفجار مدوي اتسمع في كل المناطق ديه، وبدأت البلاغات ترف على بوليس النجدة.. الناس بتبلغ عن أصوات انفجار تقريباً في كل حتة في القاهرة الكبرى.. وبدأت المواقع الاخبارية تنشر الخبر، وخير اللهم اجعله خير وربنا يجعل المخبي لطيف ويجيب العواقب سليمة وهكذا... وهكذا خاصة إن التصريحات الأولى للمصادر الأمنية كانت بتاكد إن المصدر غير معروف، وإن قوات الشرطة في حالة استنفار وكثفت انتشار دورياتها لتحديد المصدر.. وفضلنا على دة الحال لحد ما صرحت المصادر الأمنية، إن الحكاية كلها إن في طيارة مصرية اخترقت حاجز الصوت.
بلدنا بالمصري: انهيار كوبري بالمعادي ووفاة مواطنين
بلدنا بالمصري: استنفار في السويس إستعداداً جمعة 8 يوليو
زي ما توقع الجميع سواء من رجال القانون أو من المحررين القضائيين اللي سمعناهم في اليومين اللي فاتوا، محكمة جنايات السويس رفضت النهاردة طعن النائب العام على قرار اخلاء سبيل الضباط المتهمين بقتل الثوار في السويس، وأيدت قرار إخلاء السبيل.
بلدنا بالمصري: وزارة الصحة مستعدة لجمعة 8 يوليو
على ذكر يوم الجمعة، وزارة الصحة أعلنت النهاردة بما معنه يعني إنها واقفة على رجل، ومستعدة بكامل طاقتها سواء بعربيات الإسعاف (حوالي اربعين عربية و وتلات عربيات عيادات جراحية) بس فى ميدان التحرير.. زائد رفع درجة الاستعداد القصوى فى كل مستشفيات القاهرة واقسام الطؤارى..
بلدنا بالمصري: مشاركة الإخوان المسلمون في جمعة 8 يوليو
جماعة الإخوان المسلمين، بعد ما كانت أعلنت يوم السبت اللي فات رفضها المشاركة في مليونية الجمعة 8 يوليو.. رجعت النهاردة وأعلنت في بيان ليها إنها هتشارك في المليونية وهي مقتنعة تماماً بضرورة المشاركة وأهميتها.. إيه اللي غير الأحوال؟!!!
ينضملنا الدكتور عمرو الشوبكي الباحث والمحلل السياسي
بلدنا: مؤتمر حزب المصريين الأحرار بعد تأسيسه رسمياً
تعالوا نحضر أول مؤتمر لحزب المصريين الاحرار، بعد موافقة لجنة شؤون الاحزاب على تأسيسه
بلدنا بالمصري: مولد سيدنا الحسين لأول مرة بعد الثورة
خلونا نحتفل بمولد سيدنا الحسين لأول مرة بعد الثورة
بلدنا بالمصري: خريطة طريق لإدارة المرحلة الانتقالية
كلها كام يوم ويعدي على نجاح الثورة يا دوب في إسقاط رأس النظام، خمس شهور بالتمام والكمال، ولسة لحد النهاردة مش قادرين نشوف قدامنا وحتى لو شايفين فشايفين طشاش.. إيه اللي مخلينا شيش بيش كدة.. دة سؤال لازم نجاوب عليه قبل ما نجاوب على سؤال إيه العمل حيث إنه وجب بقة إننا نلاقي صرفة نخطي بيها لقدام، لكن على نضافة وعلى بينة من أمرنا مش هليهلي كدة وبالبركة!!! حزب مصر الحرية أصدر بيان النهاردة بالمعنى دة، دعا فيه لمليونية "آمنة" يوم الجمعة 8 يوليو، يكون مطلبها الرئيسي "الشعب يريد خريطة طريق" وعلى نضافة.. إزاي بقة دة اللي هنستعين عليه بـ د. عمرو حمزاوي أستاذ العلوم السياسية بجامعة القاهرة
بلدنا بالمصري: مبادرة الشعب يحمي ثورته
الثورات بيصنعها الحالمون وبيموت فيها الشجعان وللأسف إنه ساعات كتير بيستفيد منها الجبناء.. طب دلوقتي الحالمون عملوا اللي عليهم وزيادة والشجعان شهداء عند ربهم يرزقون، فالدور والباقي على اللي انكتب له عمر جديد سواء من الحالمين اللي صنعوا الثورة وشاركوا فيها أو حتى ما شاركوش لكن الثورة ردت فيهم الروح فانكتب لهم عمر جديد، دول هم اللي الدور والباقي عليهم يحموا ثورتهم.. إزاي؟!!! السؤال دة بالذات ليه بدل الألف حلال حاجة كدة بتاعة 80 85 مليون.. والنهاردة معانا عينة.
الفنان/ عمرو واكد والأستاذ/ رامى غانم: الأعضاء في اللجنة التنسيقية بالجبهة القومية للعدالة والديمقراطية ومبادرة "الشعب يحمي ثورته
بلدنا بالمصري: قنبلة نجمة داوود - المؤامرة الثلاثية
سؤال طرحته جريدة الجمهورية النهاردة.. السؤال بيقول: قنبلة نجمة داوود.. مع طاقم الفضائية "ليه"؟!!!_صحيح ليه؟!!!_ دة المانشيت الرئيسي وبعديه على طول مانشيتين معتبرين.. واحد بيقول: "مدير أمن القاهرة: بلاغ الثوار يكشف مؤامرة ثلاثية للوقيعة بين الشعب والشرطة" والتاني: سائق أون تي في يروي التفاصيل ويفضح الأسرار.. أما نص الخبر فكاتالي: " كشف اللواء محسن مراد مساعد أول وزير الداخلية لأمن القاهرة للجمهورية عن أخطر مخطط يتعرض له جهاز الشرطة من خلال بلاغ تقدم به أربعة من شباب الثوار بميدان التحرير _امبارح في بيان الداخلية اللي اتوزع على الجرايد ونشرته أش أ كانوا يا دوب تلاتة على ما وصلوا النهاردة للجمهورية زادوا واحد وربنا يزيد ويبارك_...
" أكد اللواء محسن مراد أنه يتقدم بخالص الشكر لهؤلاء الثوار الذين استطاعوا كشف هذا المخطط الخطير ......... وجود مؤامرة مكتملة الأركان تشارك فيها بعض الفضائيات والصحف للإساءة للشرطة ويجب ألا نغفل أقوال السائق بأن طاقم القناة صعد قبل التصوير إلي مقر حزب الغد!!! (طيب كل الكلام دة احنا ردينا عليه في بيان امبارح وموجود عند كل وسائل الإعلام فمش هنعيد ونزيد فيه تاني.. الجديد النهاردة هو اقحام اليوم السابع وحزب الغد كـ "أطراف ضالعة في اللي سموه المؤامرة الثلاثية وأخطر مخطط تتعرض له الشرطة المصرية)!!! حزب الغد أصدر بيان النهاردة بيدين التصريحات اللي وصفها بأنها غير مسئولة والتي جاءت علي لسان السيد اللواء محسن مراد مساعد أول وزير الداخلية لأمن القاهرة والتي نشرت في جريدة الجمهورية.
ودعا الحزب اللواء محسن مراد إلى أن يتحري الدقة فيما يقول لأن سبب تواجد الطاقم الأعلامي فى هذا اليوم بمقر الحزب هو استضافة الحزب لفاعليات اللقاء الثالث للتحالف الديمقراطي من اجل مصر والذي يضم ممثلين عن 26 حزب سياسي مصري للتنسيق فيما بينهم لخوض الانتخابات البرلمانية القادمة وبناء علية تم عقد مؤتمر صحفي في تمام الساعة الثانية لإعلان اخر نتائج هذا الاجتماع.
وطالب حزب الغد إعتذاراً رسميا من وزارة الداخلية عما بدر من مسئوليهم في تلك الواقعة التي تنوه عن رغبه فى تشوية سمعة وإسم الحزب.
أما بقة بالنسبة للناس اللي بتستعجب وبتسأل: لازمتها إيه السربعة على إعادة هيكلة الداخلية وتطهيرها.. فلا تعليق
ليست هناك تعليقات:
إرسال تعليق