برنامج بلدنا بالمصرى تقديم ريم ماجد على قناة OTV حلقة الاثنين 25/7/2011 يوتيوب كاملة
بلدنا بالمصري: دينا عبدالرحمن من أجدع بنات بلدنا
يسعد مساكم وحلقة جديدة من بلدنا بالمصري.. يصح نبدأها باعتذار واجب عن غيابنا امبارح ودة ماكانش وقته أبداً في خضم كل الأحداث اللي نازلة ترف علينا كل ساعة والتانية وربنا يجيب العواقب سليمة إنشاءالله.. وزي ما قلت لحضراتكوا فبل كدة إحنا لا يمكن نغيب عنكوا إلا لشديد الأوي.. والشديد الأوي المرة ديه إني أنا بجد وماليكوا على حلفان كنت بعافية حبتين تلاتة _ولسة شوية_ بس ماكانش ينفع خالص أغيب النهاردة كمان وإلا كان ضرب الأخماس في الأسداس هيبتدي _دة إن ماكانش ابتدى فعلاً من امبارح_ وحتى اللي صدق امبارح إني فعلاً تعبانة، كان مستحيل هيصدق النهاردة حتى لو حلفنا على مية البحر تجمد.. والكل كان هيفتكر إن الحكاية فيها إنه.. وهي لا فيها إنه ولا أي حاجة والحمد لله!!!
من اكتر الحاجات اللي كانت مزعلاني في إني ما كنتش موجودة على الهوا امبارح، إن أنا كان عندي كلمتين نفسي أقولهم للزميلة العزيزة جداً، دينا عبد الرحمن.. بس الحمدلله ملحوقة.. فبغض النظر عن القرار اللي هتاخده دينا بكامل إرادتها فيما يخص مشوارها وبغض النظر عن البر اللي هترسى عليه في الآخر، فمن واجبنا ومن حقها إننا نقول لها بعلو الصوت أولاً: إنها واحدة من أجدع بنات بلدنا_مش من امبارح ولا النهاردة لكن من يوم ما طلت علينا كإعلامية شاطرة ومالية إيدها من نفسها ومن إمكانياتها ومن أدواتها المهنية.. عارفة هي بتعمل إيه.. مسؤولة.. عمرها ما تخالف ضميرها لا المهني ولا الإنساني.. قريبة من القلب وبنت بلد.. وقبل كل دة وبعده: تقول الحق ولو على رقبتها ورزقها على الله... صحيح يا دينا احنا ما نعرفش بعض معرفة شخصية وما اتقابلناش غير يمكن مرتين تلاتة وكانوا على قد السلامات والتحيات، بس لازم تكوني عارفة إننا فخورين بيكي وباللي يزيك وربنا يكتر من أمثالك في خصوصاً في إعلامنا وفي بلدنا عموماً
بلدنا بالمصري: الشعب يريد الكل إيد واحدة
قبل ما نبدأ آخر أخبار بلدنا، عندنا بس كلمتين.. دلوقتي احنا وغيرنا ريقنا نشف من كتر المهاتية والتأكيد على إننا كلنا ولاد بلدنا.. وإن مافيش حد أحسن من حد.. وإن ما حدش من حقه يقرر إنه بيحب البلد ديه وبيخاف عليها اكتر من التاني.. وإن مافيش حد من حقه يقرر إن هو لوحده اللي عارف مصلحة البلد ديه فين وما عداه إما خاين أو عميل أو مخه طاقق أو ملعوب في دماغه وهو مش داريان... لكن الحقيقة إن اللي حصل من يوم الجمعة اللي فاتت ولحد امبارح: من أول السويس واسكندرية لحد العباسية 1 و2 مروراً بخطب التكفير ورسايل التخوين، حاجة مش بس توجع القلب وتطير العقل، لكن كمان تخوف.. ولا يمكن ربنا هيآمن خوفنا ولا هياخد بإيدنا إلا لو احنا أصلاً "إيد واحدة" زي ما كان بينضرب بينا المثل قبل ما نرجع تاني للتخوين والتكفير على آخر الزمن وبعد ما كنا افتكرنا إنهم خلاص عفى عليهم الزمن وارتحنا منهم، أتاريهم لسة لابدين في الدرة.. واذا كنا زمان ما كناش حملهم قيراط فالنهاردة احنا مش حملهم 24... احنا مش حملهم خالص.. فيا احنا يا هم بقة في البلد ديه.. (ولما باقول يا احنا يا هم_عشان الأيام ديه كل واحد واقف للتاني على الواحدة_ أنا باقصد يا احنا يا التكفير والتخوين والبعترة في البلد ديه.. يا نلم الشمل يا ناخدها كدة من قاصرها ونقول على نفسنا يا رحمن يا رحيم)... بس احنا إنشاءالله قدها وقدود وشدة وهتزول زي ما زالت قبلها شدايد ياما.. وربناهيكون عند حسن ظننا بيه وعمره ما هيخزلنا ابداً ولا هيضع تعبنا هدر، بس احنا نسعى وهو هيسعى معانا.. عشان كدة من هنا ورايح بلدنا بالمصري هيرفع شعار تاني كتف بكتف مع شعار "الشعب يريد البناء على نضافة".. "الشعب يريد الكل إيد واحدة" من غير لا تخوين ولا تكفير ولا بعزأة.. ما هو أصل ربنا عرفوه بالعقل: لا نضافة ولا بنى ولا خطوة واحدة لقدام إلا لو اتلم الشمل ورجعنا تاني ايد واحدة.. وخير البر عاجله فالنهاردة بعد آخر أخبار بلدنا هيكون لنا كلام كتير في الموضوع دة..
بلدنا بالمصري: مسيرة أهالي العباسية لـ ميدان التحرير
لكن رغم المحنة ومر الكاس اللي احنا شاربين منه اليومين دول.. لكن دايماً مع العسر يسر ومع الضيق فرج.. ومع الغم فيه حاجات برده تشرح القلب وتطمن البال وتدي أمل في بكرة.. عشان كدة احنا هنبدأ آخر أخبار بلدنا بالخطوة العزيزة اللي خطاها عدد كبير من أهالي العباسية النهاردة لحد ميدان التحرير واللي استقبلهم الميدان استقبال الحبيب لحبيبه وكان ناقص يشيلوهم على كتافهم ويهتفوا..
معانا على التليفون الاستاذ جويد أبو هشيمه -- من الشباب المعتصمين بالتحرير
بلدنا بالمصري: لقاء وزير الصحة مصابي أحداث العباسية
أما المصابين من المتظاهرين وغيرهم من شباب الثورة اللي شاركوا في مظاهرة العباسية،كان ليهم لقاء النهاردة مع وزير الصحة و السكان، الدكتور عمرو حلمي، اللي طلب يسمع منهم شهادتهم بنفسه.
معانا الاستاذ محمد عادل المتحدث الاعلامي باسم حركة 6 ابريل
بلدنا بالمصري: شهادات وموقف 18 حزب من أحداث العباسية
عقد 18 حزب وحركة سياسية بحزب التيار المصري مؤتمراً صصحفياً أعلنوا فيه عن موقفهم من الاعتداء على المتظاهرين في مسيرة العباسية السبت 23 يوليو
بلدنا بالمصري: عصام شرف يعقد اجتماع لإدارة الأزمات
في عز بقة المعمعة اللي احنا فيها ديه، الدكتور/ عصام شرف رئيس الوزرا الظاهر كدة إنه شاف إنه ما بدهاش وعمل اجتماع طارئ سماه "اجتماع لإدارة الأزمات" حضره نواب رئيس الوزرا ووزراء الاعلام والعدل والداخلية لمناقشة الازمات اللى بتمر بيها مصر حالياً وتداعيتها.. وممكن يكون الاجتماع انتهى بتشكيل لجنة دايمة لإدارة الأزمات.. التفاصيل كلها هنعرفها من:
السفير محمد حجازي المتحدث الاعلامي باسم مجلس الوزراء
بلدنا بالمصري: ضم قضية العادلي ومساعديه لقضية مبارك
من آخر أخبار بلدنا النهاردة، اللي قومت الدنيا ولسة ما قعدتهاش، قرار المستشار عادل عبد السلام جمعة بضم محاكمة حبيب العادلي والستة الكبار لمحاكمة الرئيس السابق حسني مبارك في 3 أغسطس بتهمة قتل الثوار.. وعنها وقامت الدنيا وما قعدتش في ميدان التحرير وبقية ميادين التحرير في المحافظات وخصوصاً بين أهالي الشهدا اللي قادت فيهم النار من أول جديد_ولو إنها عمرها ما بردت_... لكن الجديد النهاردة في الجلسة ديه بالذات، إننا أخيراً ولأول مرة شفنا بعينينا وعلى الهواء مباشرة، السيد اللواء حبيب العادلي وزير الداخلية المتهم بقتل الثوار، في القفص بالبدلة الزرقا. (تقرير العادلي)
بلدنا بالمصري: منع كاميرات القنوات من بث المحاكمات
صحيح إننا والحمد لله عشنا وشفنا حبيب العادلي في القفص بعينينا، بعد ما كان الفار بدأ يعمل عمايله فينا وكنا بدأنا نشك إنه بيدخل القفص أصلاً.. وديه بالتأكيد خطوة لقدام ما حدش يقدر يقول حاجة عنها.. بس كل اللقطات اللي حضراتكوا شفتوها من جوة قاعة المحكمة أثناء الجلسة، كلها منقولة عن التلفزيون الرسمي، في حين إن كاميرات كل القنوات الخاصة اللي زي حالاتنا كدة اتمنعت من الدخول، رغم تصاريح الدخول اللي كانت معانا، بحجة إن " بث جلسات المحاكمة هو كمان حصري على التلفزيون المصري" (أو بمعنى أصح التلفزيون الرسمي لإن القنوات الخاصة كمان مصرية لا هي من المريخ ولا من آخر الدنيا).. نهايته.. ماشي حتى لو البث المباشر للجلسات على الهوا حصري على التلفزيون الرسمي.. إيه علاقة دة بالتصوير ودخول الكاميرات؟!!! دة سؤال محتاجين لإجابة عليه
بلدنا: محاكمة مبارك والعادلي في القاهرة أو شرم الشيخ؟
الظاهر بقة كمان إن ضم القضيتين على بعض هيعمل شوية قلبان بخصوص الترتيبات للمحاكمة ومكانها.. يعني هيجيبوا الرئيس المخلوع لحد القاهرة ولا هينقلوا السبعة الكبار شرم الشيخ ولا إيه العمل بالظبط وإيه مدى قانونية الإجراءات ديه من حيث الأصل؟!!! دة اللي هنحاول نعرفه من:
عمر حسانين رئيس قسم الحوادث بجريدة المصري اليوم
بلدنا - وزير السياحة: المحاكمة في شرم الشيخ كارثة
وزير السياحة منير فخري عبدالنور وتعليقه على ما يتردد عن عقد محاكمة العادلي ومساعديه والرئيس المخلوع مبارك في شرم الشيخ بعد ضم القضيتين .. في بلدنا بالمصري
بلدنا بالمصري: إضراب السائقين وتعطل حركة القطارات
النهاردة، حركة القطارات في مصر كلها وقفت محلك سر بسبب إضراب السواقين عن العمل.. ليه دة كله، دة اللي هنعرفه من:
المهندس هاني حجاب رئيس هيئة السكة الحديد
بلدنا بالمصري: محمود بلبع رئيساً لكهرباء مصر
أما مظاهرات العاملين في شركات الكهربا اللي بدأت من يناير اللي فات للمطالبة بإقالة الدكتور محمد عوض من رئاسة الشركة القابضة لكهرباء مصر، أدت النهاردة وبعد اكتر من 6 شهور إلى إن وزير الكهربا، محمود يونس وافق النهاردة على استقالة الدكتور محمد عوض اللي قدمها اكتر من مرة، وعين بداله المهندس محمود بلبع الرئيس السلبق لشركة إنتاج شرق الدلتا.
معانا محمود بلبع رئيس الشركة القابضة لكهرباء مصر الجديد
بلدنا بالمصري: سفراء جوجل في جامعات الشرق الأوسط
إيه حكاية سفراء جوجل في الجامعات في الشرق الأوسط وشمال أفريقيا
شهادة عمرو غربية عن اختطافه في أحداث العباسية
هو احنا جرى لنا إيه؟!!! حسدنا نفسنا ولا اتحسدنا؟!!! ولا الحكاية فيها إنة؟!!! إيه اللي خللى النغمة النشاز اشي تخوين على تكفير يعلى صوتها كدة ويدوشنا وكإننا ما عدناش سامعين غيرها، مع إننا من أول يوم في الثورة ولحد وقت مش بعيد كنا بنعزف على وتر واحد وبدندن دندنة مالهاش مثيل في الدنيا كلها؟!!! ليه رجعنا ننشز وإيه آخرتها مع النشاز وإزاي نرجع تاني ندندن سوى على وتر بلدنا اللي مافيش زيها.. دة اللي هنحاول ناخد وندي فيه مع ضيوفنا:
- الشيخ/ عبد الرحمن الدسوقي: عضو ائتلاف النهوض بالأزهر الشريف (من معتصمين التحرير)
- الأستاذ/ سمير العركي: الكاتب والباحث والقيادي في الجماعة الاسلامية
- عمرو غربية: المدون والناشط
- الأستاذ/ عماد الدين حسين: مدير تحرير الشروق
بلدنا بالمصري: حرمة الدم المصري - لا للتخوين لا للتكفير
بلدنا بالمصري: المصريين بالخارج هيصوتوا ولا لا
نفسنا نرسى على بر: المصريين اللي عايشين برة مصر هيصوتوا في الانتخابات اللي جاية ولا لأ؟! والانتخابات اللي جاية ديه عايدة على الانتخابات البرلمانية ولا الرئاسية؟ وهيصوتوا فين: هنا ولا في بلادهم؟! وهيصوتوا إزاي؟! وامتى هيتاخد القرار دة ومين اللي هياخده وبناءاً على إيه؟!!! الأسئلة ديه ياما طرحناها في بلدنا بالمصري على المسؤولين والمتخصصين ورجال القانون ولسة ما طلعناش بعقاد نافع.. حتى قانون مجلس الشعب الجديد صدر من غير ما يشفى غليلنا ولما اتمعظم يا دوب نص على حق المصريين في الخارج في التصويت.. ودمتم.. ورمى الكورة في ملعب اللجنة العليا المشرفة على الانتخابات... فاحنا هنرجع نسأل نفس الأسئلة ديه مرة كمان، بس المرة ديه على أصحاب الشأن يمكن هم يكون عندهم الحل بما إن الحاجة أم الاختراع.. (ولو إن يعني الحكاية فعلاً ما هياش اختراع)!!!
الضيوف
- الأستاذ/ محمد ريان: نائب رئيس الاتحاد العام للمصريين في الخارج
- الأستاذة/ نسرين خالد: من المصريين المقيمين في بريطانيا
ليست هناك تعليقات:
إرسال تعليق