بلدنا بالمصري: ظهور د. شرف -- ائتلاف شباب الثورة يسانده
الدكتور عصام شرف رئيس مجلس الوزرا، ظهر النهاردة لأول مرة بعد الأزمة الصحية اللي أصيب بيها أول امبارح الليل، في الاحتفال بتخريج دفعات جديدة من طلبة الكلية الحربية، في حضور القلئد العام ورئيس المجلس الأعلى للقوات المسلحة، المشير حسين طنطاوي ورئيس الأركان، الفريق سامي عنان.. وغالباً، رئيس الوزرا خرج من الاحتفال دغري على مجلس الوزرا، وبدأ مشاوراته ومداولاته من جديد لاختيار بقية الوزرا في التشكيل الوزاري الجديد.. لسة ما صدرش عن مجلس الوزرا أي بيانات ولا حتى تصريحات رسمية عن بقية الأسماء المرشحة ومعاد حلف اليمين.. لكن الكلام اللي بيتردد بقوة أولاً عن احتمال ترشيح الدكتور أحمد جلال، رئيس المنتدى الاقتصادى للبحوث الاقتصادية، لمنصب وزير "الصناعة والتجارة".. وثانياً عن احتمال إنه يكون فيه اتجاه قوي لالغاء وزارة الاثار مرة تانية والاكتفاء بس بمجلس اعلى للاثار..
من ناحية تانية، ائتلاف شباب الثورة أصدر بيان النهاردة، صحيح إنه أكد فيه على إن الائتلاف مستمر في دعم الدكتور عصام شرف، وأعلن عن إنه هيدي فرصة للتعديل الوزاري الجديد.. لكن دة ما يمنعش إن البيان شدد على مطالب بعينها من أول: عملية تطهير كاملة لوزارات بعينها لحد تحديد اختصاصات الحكومة وصلاحياتها والحد الفاصل بينها وبين صلاحيات المجلس الأعلى للقوات المسلحة، مروراً بترشيح خمس أسماء بعينها، الائتلاف شايف إن وجودهم ضروري في التشكيل الوزاري الجديد انقاذ ما يمكن إنقاذه - على حد تعبير البيان.
مداخلة مع سالي توما عضو المكتب التنفيذي لعضو اتحاد شباب الثورة
بلدنا بالمصري: مرسوم قوانين مجلس الشعب والشورى
مجلس الشعب والشورى اللي صدر النهاردة من يا دوب ساعتين وأعلن عنه المجلس الأعلى للقوات المسلحة في مؤتمر صحفي تم كمان الإعلان فيه عن تأجيل الانتخابات التشريعية لحد بعد شهر سبتمبر ومن غير أي تواريخ محددة.. خلونا نحضر جزء من المؤتمر أولاً ولما نرجع هيكون لنا كلام كتير عن القانون اللي صدر بمرسوم من المجلس العسكري
بلدنا : محاكمة قتلة المتظاهرين في موقعة الجمل 20 أغسطس
الـ25 متهم في قضية قتل المتظاهرين في موقعة الجمل، هيتحاكموا أخيراً يوم 20 أغسطس قدام محكمة جنايات القاهرة وقدام دايرة المستشار عادل عبد السلام جمعة.
بلدنا بالمصري: هل ستكون جنازة مبارك عسكرية
دلوقتي فيه حاجة مش عارفين لسة ليه بدت لينا غريبة شوية.. من ساعة ما تم الإعلان من كام يوم عن إن الرئيس المخلوع دخل في غيبوبة تامة وقبل ما يتم نفي الخبر والتأكيد على إنه مجرد هبوط وإغماء.. وفيه سؤال بدأ عدد من وسائل الإعلام الزميلة تطرحه بالفم المليان: يعني طبعاً الأعمار بيد الله لكن إذا قضى الله أمراً كان مفعولا: جنازة الرئيس المخلوع هتبقى عسكرية ولا عائلية عادية زي أي مواطن مصري، خاصة لو دة حصل قبل ما تتم إدانته في أي قضية من القضايا المحبوس على ذمتها.. هل هيعامل على إنه القائد الأعلى السابق للقوات المسلحة ولا على إنه مواطن مصري متهم على ذمة قضايا وبرئ حتى تثبت إدانته اللي مش هتثبت لو حصل قبل ما تحكم المحكمة.. الموضوع دة بيطرح الحقيقة علامات استفهام كتير هناخدها كدة زي ما هي ونطرحها على الأستاذ/ جمال فهمي الكاتب الصحفي في صحيفة التحرير من استديو اون تي في في وسط القاهرة
بلدنا : خبراء وزارة العدل يطالبون باستقلال الهيئة
خبراء وزارة العدل بقى لهم ياما بيطالبوا بقانون جديد يضمن استقلال الهيئة عن وزارة العدل وبالتالي عن السلطة التنفيذية، ولسة وقفاتهم واعتصاماتهم معلمة على سلالم الوزارة.. خبراء وزارة العدل رجعوا النهاردة تاني يقفوا على سلالم الوزارة.. ليه؟! في التقرير اللي جاي. (تقرير خبراء وزارة العدل)
بلدنا بالمصري: حزب العدالة والتنمية في مقر حزب العدل
تعالوا بقة نوصل لحد مقر حزب العدل المولود بعد الثورة واللي استقبل النهاردة وفد من حزب العدالة والتنمية التركى.. إيه سر الزيارة وإيه اللي دار فيها في التقرير اللي جاي
تعالوا بقة نوصل لحد مقر حزب العدل المولود بعد الثورة واللي استقبل النهاردة وفد من حزب العدالة والتنمية التركى.. إيه سر الزيارة وإيه اللي دار فيها في التقرير اللي جاي
بلدنا بالمصري: ضياء رشوان يترشح لمنصب نقيب الصحفيين
النهاردة الزميل ضياء رشوان أعلن ترشحه لمنصب نقيب الصحفيين في الانتخابات المقبلة اللي حتجرى في 14 أكتوبر والتفاصيل حنعرفها منه هوه شخصيا .
بلدنا بالمصري: ورش عمل لتحسين أداء التمريض
كلية التمريض في الجامعة البريطانية ورش عمل بالتعاون مع وزارة الصحة لتحسين مهنة التمريض
بلدنا بالمصري: استعدادات القوات المسلحة لرمضان
تعالوا بقة نروح لحد مركز شباب الجزيرة، نشوف جزء من استعدادات القوات المسلحة لشهر رمضان.
بلدنا بالمصري: وثيقة الدستور المصري - م. تهاني الجبالي
إذا الدستور هو الوثيقة أو بمعنى أصح العقد اللي هنبصم عليه بالعشرة إن هي ديه ملامح بلدنا اللي بنحلم بيها واللي عايزين نعيش فيها واللي عايزين نسيبها لولادنا وولاد ولادنا من بعدنا، فاحنا مافيش قدامنا أي حل تاني غير إننا ناخد وندي مع بعض ومن دلوقتي ونفضل كدة نتفق ونختلف لحد ما نرسى على بر يرضينا ويحلالنا.. ومن ضمن السكك اللي يمكن ترسينا على البر دة، إننا نتفق على مبادئ أساسية للدستور لو اتشالت الدنيا واتحططت تفضل المبادئ ديه صاغ سليم ما حدش يقدر يهوب ناحيتها إلا لو الدستور كله سقط... بس أول شرط عشان تبقى آخرتها نور إننا نتفق لإن من غير الاتفاق لا فيه عقد ولا فيه دستور بحق وحقيقي ولا يحزنون... فاحنا قدامنا النهاردة وثيقة ما نقدرش نقول عليها جديدة لإنها خلاصة كل المجهود اللي اتبذل في الفترة اللي فاتت سواء بشكل جماعي أو بشكل فردي لحد ما خرجت الوثيقة ديه للنور.. "وثيقة إعلان مبادئ دستور مصر القادم" باللي ليها واللي عليها، هنناقشها مع المستشار تهاني الجبالي: نائب رئيس المحكمة الدستورية العليا، وعضو مجموعة العمل الوطنية للنهضة القانونية والدستورية اللي صاغت الوثيقة اللي تحت إيدينا النهاردة
بلدنا: كيف تستفيد اسرائيل من إضطراب الأوضاع داخل مصر
كيف تستفيد اسرائيل من إضطراب الأوضاع داخل مصر ؟؟ أ. عماد جاد و ل. عادل سليمان في بلدنا بالمصري
ليست هناك تعليقات:
إرسال تعليق