بلدنا بالمصري: الثوار يفتحون مجمع التحرير وسط احتفال
زي ما بدأنا امبارح برسالة لكل الجدعان في كل في ميدان في مصر واترجيناهم يصحصحوا ويفتحوا وما يخلوش رجليهم تيجي في الخية فيخسروا الجدعان اللي في الشوارع والبيوت.. النهاردة من حقهم علينا نبتدي بتعظيم سلام وبالذات للجدعان اللي في ميدان التحرير اللي فتحوا المجمع من النجمة "بأمر الثورة" وبتشريفة معتبرة كمان.
بلدنا بالمصري: مشاورات تعديل حكومة د. عصام شرف
الدكتور عصام شرف رئيس الوزرا بدأ من امبارح مشاواراته ومداولاته حوالين التغيير أو التعديل الوزاري اللي أعلن في بيانه التاني إنه هيكون خلال أسبوع من تاريخ البيان، يعني المفروض في خلال 3 4 إيام من النهاردة.. وأعلن دة على صفحته الشخصية على فيس بوك.. ولحد دلوقتي جاله عليها حوالي ألف و200 تعليق ويمكن اكتر شوية ما بين الدعاء ليه بالتوفيق والتعاطف معاه من باب "الله يكون في عونك ويقويك" وما بين مطالبته بالاستقالة والرجوع للتحرير من باب "احنا لسة بنحبك فما تخليناش نكرهك"_دة على حد تعبير واحد من التعليقات".. فيه كتير من التعليقات بتقترح الوزرا اللي لازم يمشوا وتعليقات تانية بترشح أسماء بعينها وهكذا.. لكن التعليق اللي وقفنا عنده وفيه ما قل ودل واحدة جابت من الآخر وقالت له بصريح العبارة: "هي الحكاية مش محتاجة مشاورات سياسيه محتاجه |إراده قويه وإختيار مخلصين من الشباب.. فبلاش تصدمنا تاني معدناش مستحملين ...... إلحقنا لو بتحبنا قبل ما تموتنا من الغيظ".
بلدنا بالمصري: مصدر يصرح بتأجيل الانتخابات لنوفمبر
لتاني يوم على التوالي، هنعتمد للشديد الأوي على تصريحات مصدر موثوق فيه رفض ذكر اسمه.. بس المرة ديه مصدر عسكري وصرح مش لينا احنا لكن لوكالة رويترز، إنه بعد ما دعت مجموعة من التيارات السياسية لتأجيل الانتخابات البرلمانية، "فقد" تترحل الانتخابات لحد شهر نوفمبر بدل سبتمبر.. وفي سبتمبر يبدأ فتح باب الترشيح فنبقى كسبنا شهرين كمان. ديه كل المعلومات اللي ذكرها المصدر العسكري.
بلدنا بالمصري: بيان التحالف الديموقراطي من أجل مصر
التحالف الديمقراطي من أجل مصر أعلن في اجتماعه النهاردة في مقر حزب الحرية والعدالة - بعد ما أكد على ثقته في المجلس العسكري - إن استكمال مسار الثورة وتحقيق أهدافها ومطالبها هو حجر الأساس لبناء النظام السياسي الجديد
بلدنا بالمصري: اشتباكات في ميدان الأربعين ليلة أمس
بس نطمن على الأحوال في السويس اللي قضت ليلة عصيبة بعد ما كانوا في أمانة الله كافيين خيرهم شرهم، قامت الدنيا فجأة وبدون أي سابق انذار.
بلدنا بالمصري: تأجيل لقاء المشير طنطاوي بمرشحي الرئاسة
الظاهر كدة والله أعلم إن النهاردة كان المفروض يكون فيه لقاء للمشير حسين طنطاوي رئيس المجلس الأعلى للقوات المسلحة مع عدد من مرشحين الرياسة، لكن على ما يبدو كمان إنه اتأجل. التفاصيل هنعرفها من: أيمن نور المرشح المحتمل لرئاسة الجمهورية
بلدنا بالمصري: الحكومة الإسبانية وتسليم حسين سالم لمصر
السفير الأسبانى فى القاهرة، كان في مؤتمر النهاردة في المعهد الديمقراطى المصرى.. وبدأ كلامه بإنه بشرنا بإن الحكومة الأسبانية بتتعاون مع مصر بشكل جدى لتسيلم رجل الأعمال المصرى حسين سالم.. وختمها بإن الحكومة الأسبانية ما تقدرش تجبر لا القضاء ولا النائب العام الأسبانى على تسليمه أولاً لإن القضاء الأسبانى مستقل تماماً عن الحكومة هناك_وعقبال عندنا_ وثانياً: إن حسين سالم مواطن أسبانى ويحمل الجنسية الأسبانية. شفتوا الهنا اللي احنا فيه؟!!!
بلدنا بالمصري: قراءة في حركة تنقلات وزارة الداخلية
آخر وأهم خبر بقة من أخبار بلدنا واللي احنا أعلننا عنه امبارح على عهدة "مصادرنا الموثوق منها" هو إنه حركة الداخلية ظهرت وبانت وطالت 4 آلاف ظابط برتب مختلفة من أول إنهاء الخدمة لحد الترقية.. ولأول مرة في تاريخ وزارة الداخلية يتم انهاء خدمة 505 برتبة لوا في حركة واحدة.. دة غير 82 برتبة عميد و82 تانيين برتبة عقيد، من ضمنهم مساعدين للوزير ومديرين أمن.. أما بالنسبة لل54 ظابط _كبار وصغيرين_ فبس تم نقلهم لقطاعات بعيدة عن الجماهير زي قطاعات تدريب المجندين.. ولما اتسأل وزير الداخلية عن الحدوتة ديه اللي باخت وبقت ملتوتة رد وقال إن القانون لا يسمح بإنهاء خدمتهم بدون ثبوت الاتهامات عليهم.. مع إن ماحدش أبداً طالب بإنهاء خدمتهم، كل المطلوب كان يا إما وقفهم عن العمل يا إما يديهم أجازة مفتوحة لحد ما المحكمة تحكم.. والله خدوا براءة على العين والراس.. ماخدوش براءة أهم هينفذوا الحكم أياً كان.. وعلى حد علمنا إن القانون بيسمح بقة بكدة بنص المادة 53 من القانون 109 لسنة 71 الخاص بهيئة الشرطة!!! فخلونا نشوف المؤتمر الصحفي بالتفصيل ولما نرجع هيكون كلام كتير مش بس عن الموضوع دة لكن كمان عن الحركة وعن علاقتها بالتطهير.
بلدنا بالمصري: المستشفى الميداني .. من حواديت الثورة
نخطف رجلنا لحد ميدان التحرير نشوف ونسمع حدوتة المستشفى الميداني اللي بيضربوا بيه المثل
بلدنا بالمصري: وثيقة المبادئ الحاكمة لإعداد الدستور
وثيقة المبادئ الحاكمة لإعداد الدستور الجديد .. في بلدنا بالمصري يستضيف
د. منى ذو الفقار عضو المجلس القومي لحقوق الإنسان
د. حسن سند أستاذ القانون بجامعة المنيا وعضو لجنة الحقوق والحريات العامة
أ. سمير مرقص عضو المجلس القومي لحقوق الإنسان
ليست هناك تعليقات:
إرسال تعليق