بلدنا بالمصري: حركة الداخلية بكره مش يوم 15
آخر خبر بقة من مصادر موثوق منها_ ولو إننا مش من هواة الصيغة ديه_ لكن احياناً بنضطر نستخدمها، في الشديد الأوي ولما بنكون ماليين إيدينا على الآخر من مصادرنا.. فحسب المصادر الموثوق منها: أولاً: حركة الشرطة هتطلع بكرة ومش هتستنى ليوم 15.. إنها هتكون أقرب لإعادة الهيكلة منها لحركة تنقلات عادية.. وأول بشايرها، تغيير رئيس جهاز الأمن الوطني وتعيين اللوا مجدي عبد الغفار، مساعد لوزير الداخلية لجهاز الأمن الوطني. ديه كل المعلومات المتوفرة عندنا لحد دلوقتي، وقال يا خبر بفلوس بكرة يبقى ببلاش.. بس دة ما يمنعش إن فقرتنا اللي جاية بعد أخبار بلدنا، مش هيبقى لها سيرة غير سيرة مبادرة جديدة، مش عايزة من الدنيا غير "شرطة لشعب مصر" يستاهلها وتستاهله وتكون من مقامه.
بلدنا بالمصري: رسالة لكل الجدعان في كل ميدان في مصر
"هالله هالله على الجد والجد هالله هالله عليه"... من يوم الثورة ديه ما قامت وهي بيضة وزي الفل وصاغ سليم وما حدش يقدر يقول عليها تلت التلاتة كام... بالعكس.. دول بيضربوا بيها المثل في الدنيا كلها... ومن يوم ما قامت واحنا عارفين إن "الجدع جدع والجبان جبان"... بس الجدع اللي في الميدان، الجدع الأصلي يعني اللي بجد وبحق وحقيقي_ مش الجدع المضروب إياه_ عارف إن الشعب والشعب إيد واحدة.. وإنه لولا الشعب ما كانت الثورة قامت لها قومة ولا شدت حيلها ولا وقفت على رجليها.. وبالتالي من غير الشعب ما فيش ثورة ولا يحزنون.. وإذا الجدعان اللي في الميدان خسروا الجدعان اللي في البيوت، الثورة هتجيب ورا وهتتنكس وهتروح في خبر كان ألف بعد الشر عليها... فلما يتقفل المجمع_مثلاً_ مين اللي حاله بيقف ومصالحه بتتعطل ويتهيأله إن الثورة هي السبب وما حدش يقدر يلوم عليه؟!!! مش الشعب برده ولا ديه تهيأات؟!!! لما تتنتور طراطيش كلام ما حدش عارف أصله من فصله عن خط المترو اللي هيتقطع والمترو اللي هيقف؟!!! مين اللي هيتضرر ويشيل من الأرض ويحط على دماغ الثورة؟!!! مش الشعب برده ولا ديه كمان تهيأات؟!!! أما بقة المصيبة التقيلة بالأوي: " قال الملاحة تقف في قناة السويس".. مين دول اللي خطر على بالهم يوقفوا قناة السويس؟!!! الجدعان اللي في الميادين؟!!! لا يمكن!!! قناة السويس ديه صحيح إنها ممر دولي لكن في الأول وفي الآخر ديه بتاعتنا احنا، ملكنا... حد يخرب في ملكه.. حد يعمل زي الدبة اللي قتلت صاحبها؟!!! قناة السويس ديه تاني مصدر للدخل القومي بعد السياحة، وحيث إن السياحة لسة بعافية حبتين، فاحنا ما حيليتناش غير اللي جاي لنا من قناة السويس.. نقطع رزقنا بإيدينا يعني؟!!! بالذمة دة كلام؟!!! ويا ريتها هتيجي على قد كدة... يعني ندى بإيدينا لكل من هب ودب مسمار جحا اللي يدقه في أرضنا بحجة إننا مش عارفين نحمي قناة السويس؟!!! يا خي دة بعدهم، دة احنا نحميها برموش عينينا قبل ما حد يهوب ناحيتها من جوة قبل برة!!! والغريبة إنه لحد دلوقتي ما حدش عارف إيه ولا مين مصدر الكلام الفارغ دة اللي يودي في داهية واحنا مش ناقصين؟!!!... قصر الكلام: رسالة لكل الجدعان في كل ميدان في مصر: اوعوا رجليكوا تيجي في الخية!!! فيه خية منصوبة لكم وماحدش عارف مين ولا مين اللي نصبها وبينصبها.. صحصحوا كدة وخلوا عقلكوا في راسكوا واوعوا رجليكوا تيجي في الخية، لا هنروح كلنا بلاش، والثورة والتمن الغالي اللي ادفع فيها هيروحوا هدر... والله لا يقدر ولا يكون!!! اللهم بلغت، اللهم فاشهد!!!
بلدنا بالمصري: قبول استقالة يحيى الجمل
حسب الصفحة الرسمية لمجلس الوزرا على فيس بوك، إن الدكتور يحيى الجمل، نائب رئيس الوزرا استقال، وإن الدكتور عصام شرف رئيس مجلس الوزرا، قبل الاستقالة.. لكن لسة مافيش أي معلومة إذا كان المجلس العسكري وافق على قبول الاستقالة ولا زي المرة اللي فاتت!!!
بلدنا بالمصري: مؤتمر صحفي للمجلس العسكري - 20110712
بعد البيان اللي أصدره المجلس العسكري النهاردة وشفناه وسمعناه كلنا بصوت اللوا محسن الفنجري، المجلس عقد مؤتمر صحفي للتعليق على مستجدات الأمور في بلدنا.. خلاصة القول في المؤتمر دة اللي هنعرف تفاصيله في التقرير اللي جاي إن: " المجلس بيحترم حق التظاهر السلمي بدون الإضرار بالبلاد وإن المجلس مش هيسمح لمجموعة من المعتصمين بالاضرار بمصالح الغالبية العظمى من الشعب وهيتم استخدام كل الوسائل المتاحة لانهاء الاعتصام بعيداً عن العنف وابتداءاً من الحوار"!!!
بلدنا بالمصري: رد فعل الميدان على بيان المجلس العسكري
خلونا بقة نسمع بيان المجلس العسكري اللي صدر النهاردة مرة تانية، بعد كدة هننزل الشارع نجس نبض الناس وردود أفعالهم عليه .. ردود أفعال الشارع اللي قدرنا نرصدها كانت ما بين مستبشر خير بالبيان وما بين رافض لنبرته اللي وصفها بإنها كانت تهديدية لحد كبير
بلدنا بالمصري: وثيقة مبادئ حاكمة لإعداد دستور جديد
من ضمن النقط الأساسية في بيان المجلس العسكري، النقطة الخاصة بإعداد ثيقة مبادئ "حاكمة"_ على حد تعبير البيان_ لاختيار الجمعية التأسيسية لإعداد دستور جديد وإصدارها في إعلان دستوري بعد اتفاق القوى والأحزاب السياسية عليها. الوثيقة ديه جاهزة وموجودة، وتم اعدادها في إطار مناقشات مؤتمر الوفاق القومي، ومش ناقص بس غير عرضها للمناقشة المجتمعية وبعدين على المجلس العسكري قبل ما تصدر في إعلان دستوري.. الوثيقة عنوانها "إعلان المبادئ الأساسية لمصر الثورة ".. احنا قدرنا نحصل على نسخة منها من الدكتورة منى ذو الفقار المحامية ومحررة الوثيقة.. حسب مقدمة الوثيقة، هي عبارة عن مجموعة من المبادئ الحاكمة اللي بتعلو على نصوص الدستور نفسه وبتضمن إستقرار دولة القانون المدنية والنظام الديمقراطى والحقوق والحريات الأساسية للمصريين بعد الثورة. وبالتالي لا يجوز تعديلها أو إهدارها أو المساس بمضمونها أو جوهرها بأى طريقة إن كانت.. الوثيقة مكونة من تلات أبواب رئيسية، كل باب مكون من اكتر من نقطة بتفصل العنوان الرئيسي لكل باب.. الأول: المبادئ الحاكمة والتاني: الحقوق والحريات الأساسية.. والتالت: الضمانات الدستورية للمبادئ والحقوق والحريات الأساسية.. والباب الأخير دة بينص أولاً على إن ا لمبادئ والحقوق والحريات الأساسية الواردة فى الوثيقة غير قابلة للإلغاء أو التنازل أو التعديل أو التقييد. وبينص كمان على المعايير اللي بناءاً عليها هيتم اختيار أعضاء الجمعية التأسيسية اللي هتحط الدستور.. وأهمها: إنهم ما يكونوش من أعضاء مجلس الشعب أو مجلس الشورى_ودة انجاز في حد ذاته_ وإن خبراتهم تكون متنوعة ما بين المجالات المختلفة، والأهم من كدة إنهم يكونوا ممثلين وبالعدل لكل أطياف الشعب المصري. وفى جميع الأحوال، تلتزم هذه الجمعية التأسيسية في أدائها لمهمتها، بالمبادئ والحقوق والحريات الأساسية الواردة في هذه الوثيقة. واحب ابشر حضراتكوا مؤقتاً إن الوثيقة ديه لو كان مكتوب لها تشوف النور فعلاً يبقى فيه أمل كبير أوي إننا نرسى على بر وسط إنشاءالله يرضي جميع الأطراف، سواء اللي عايزين الدستور أولاً، أو اللي متمسكين بالانتخابات أولاً، والاتنين همهم مصر أولاً وهو دة المهم... احنا قريب جداً هنناقش الوثيقة بالتفصيل ونعرف خط سيرها من أول ما بدأ الإعداد ليها وإيه المراحل اللي تعدي بيها لحد ما تصدر في إعلان دستوري وتكون ملزمة للجمعية التأسيسية حسب ما فهمنا بوضوح من الوثيقة.
بلدنا: محاكمات قتلة المتظاهرين ورموز الفساد علنية
بالنسبة لكلمة الدكتور/ عصام شرف، فكان من ضمن المناشدات اللي وجهها امبارح من خلالها، كانت مناشدة مجلس القضاء الأعلى لتفعيل مبدأ العلانية في محاكمات رموز النظام السابق وقتلة الثوار.. النهاردة اجتمع المجلس فعلاً برئاسة المستشار حسام الغرياني، لمناقشة التماس رئيس الوزرا، وبعدها صدر بيان عن المجلس بيوصي أولاً بنقل المحاكمات لأماكن تسمح بحضور عدد مناسب من الجمهور، بشرط عدم الإخلال بسيطرة المحكمة على الموجودين، وبث المحاكمات رموز النظام السابق في قضايا الفساد وقتل المتظاهرين من خلال شاشات برة المحاكم.. دة فيما يخص العلانية، فيما يخص تفريغ الدواير، المجلس قرر تفريغ الدوائر المختصة بقضايا قتل الثوار وجرائم الفساد، بحيث يتم النظرفيها فى أيام متتالية لحد ما يتم حجزها للحكم، ومناشدة رؤساء الدواير بإن يكون النطق بالحكم مصحوب بأسبابه وحيثياته. والقرار الأخير اللي أعلن عنه مجلس القضاء الأعلى في البيان هومنع القضاة وأعضاء النيابة العامة من الإدلاء بأي تصريحات لوسائل الإعلام عن أوضاع القضايا والمحاكم، ومنعهم من الظهور العلنى فى وسائل الإعلام واعتبار مخالفة القاضى للقرار دة مخالفة لواجبات وظيفته القضائية وحسن أدائها.
بلدنا بالمصري: تعليق بلطجية في ميدان التحرير عرايا
الدعوة النهاردة كانت لأول مليونية من بعد التنحي في غير أيام الجمعة.. وهنبدأ لفتنا من ميدان التحرير، بس قبل ما ننزل الميدان، عايزة اقولكوا إن الجدعان اللي هناك ادوا للبلطجية درس جديد لانج هنشوفه بعينينا
بلدنا بالمصري: السويس في اعتصام الثلاثاء 12 يوليو
وجب بقة نلف لفة بين ميادين التحرير في مصر، حيث إن الدعوة النهاردة كانت لأول مليونية من بعد التنحي في غير أيام الجمعة
بلدنا بالمصري: الصعيد في اعتصام الثلاثاء 12 يوليو
وجب بقة نلف لفة بين ميادين التحرير في مصر، حيث إن الدعوة النهاردة كانت لأول مليونية من بعد التنحي في غير أيام الجمعة
بلدنا بالمصري: الإسكندرية في اعتصام الثلاثاء 12 يوليو
وجب بقة نلف لفة بين ميادين التحرير في مصر، حيث إن الدعوة النهاردة كانت لأول مليونية من بعد التنحي في غير أيام الجمعة
بلدنا بالمصرى : مليونية الثلاثاء 12 يوليو فى ميادين مصر
وجب بقة نلف لفة بين ميادين التحرير في مصر، حيث إن الدعوة النهاردة كانت لأول مليونية من بعد التنحي في غير أيام الجمعة
بلدنا بالمصري: شرطة بلدنا .. مبادرة لتطهير جهاز الشرطة
شرطة بلدنا .. مبادرة مواطنون ومنظمات حقوقية لإعادة هيكلة وإصلاح جهاز الشرطة .. في بلدنا بالمصري
غادة شهبندر عضو مجلس إدارة المنظمة المصرية لحقوق الإنسان
د. عمرو الشلقاني أستاذ القانون
محمد محفوظ ضابط شرطة سابق
أحمد سيف المحامي
ليست هناك تعليقات:
إرسال تعليق