بلدنا بالمصري: 12 يوليو .. مليونية الإرادة والتصعيد
مليونية "الإرادة والتصعيد"، اللي اتفقت معظم القوى السياسية على تنظيمها بكرة، على اعتبار إن تنظيم مليونيات في غير أيام الجمعة يعتبر تصعيد في حد ذاته.. مع الوضع في الاعتبار إن المليونية هتبدأ من الساعة خمسة عشان الناس تروح أشغالها الصبح، بما إن العصيان المدني اللي أكدت القوى السياسية امبارح على حق الشعب في اللجوء ليه عند اللزوم، لسة ما بدأش وهيتم اللجوء ليه بعد ما يتم استنفاذ كل وسائل التصعيد الممكنة والمشروعة بالتأكيد...
بلدنا بالمصري: ميدان التحرير في رابع أيام الاعتصام
تعالو بقة نطل طلة على ميدان التحرير في رابع أيام الاعتصام
بلدنا بالمصري: أهالي شهداء الإسكندرية بين الدية والضغط
هنرجع تاني اسكندرية، لإن زي ما حضراتكوا عارفين إن اسكندرية من اكتر المحافظات اللي شغال فيها على أشده موال عرض الفلوس بالآلافات على أهالي الشهدا عشان يغيروا أقوالهم ويخلوا الاتهام على المشاع.. النهاردة الأستاذ/ خلف بيومى المحامي ورئيس مركز الشهاب لحقوق الإنسان وعضو لجنة هيئة الدفاع عن أسر شهداء الثورة، اتقدم بتلات بلاغات للمحامى العام ورئيس محكمة استئناف الإسكندرية.. الأول حوالين مدى مشروعية التصرف دة ومصدر الفلوسا اللي بتتعرض على أهالي الشهدا ومين اللي بيتدخل ما بين الداخلية وما بين أهالي الشهدا.. والتاني حوالين الوضع القانونى لواحد من الظباط المتهمين بقتل الثوار في اسكندرية ولحد دلوقتي هربان وما حدش عارف طريقه.. والتالت النتايج اللي هتترتب على تأجيل قضية قتل الثوار في اسكندرية لشهر أكتوبر وأولها إن الظباط المتهمين هيكون عندهم براح يمارسوا فيه ضغوطهم على الأهالي وعلى كيف كيفهم سواء بالجزرة أو بالعصايا.
بلدنا بالمصري: ما الهدف من شائعة وفاة مبارك
طوالي على شرم الشيخ، خاصة بعد اللي اتقال امبارح عن إن الرئيس المخلوع قلبه وقف مرتين.. ومش بس كدة دة فيه اشاعة تانية طلعت وش الفجر كدة عن وفاته.. لكن مدير مستشفى شرم الشيخ الدولي، الدكتور محمد فتح الله، أكد إن حالته مستقرة وإن الحكاية كلها شوية ضيق تنفس وراحوا لحالهم الحمد لله.. السؤال بس "مين اللي بيطلع الإشاعات ديه وغرضه إيه في التوقيت دة بالذات.. مين اللي عايز يلهي الناس في كلام فارغ مالوش أساس ولا راس من رجل"؟!!!
بلدنا بالمصري: حلاق الثورة .. من حواديت الميدان
من هنا ورايح وطول ما الميدان عامر بحس اللي فيه، ليكوا علينا كل يوم والتاني هنحكي لكوا حدوتة من حواديت الميدان.. والميدان ما يتوصاش ومافيهوش اكتر من الحواديت المصرية الأصلية الجدعة بنت البلد.. فتعالوا قبل الفاصل نخطف رجلنا تاني لحد الميدان نشوف إيه حدوتة "حلاق الثورة"
بلدنا بالمصري: توقعات التغيير الوزاري المرتقب
الكلام عن "تغيير وزاري وشيك" واخد حده من امبارح للنهاردة.. وفيه عدد لا بأس بيه أبداً من التقارير والمواقع الإخبارية بتتكلم عن الموضوع دة، لكن كالعادة على عهدة "مصادر مسؤولة أو مطلعة أو موثوق فيها" رافضة ذكر اسمها... لكن المعلومة _اللي احنا باتأكيد مش متأكدين منها_ لكن اتكررت تقريباً في كل الأخبار اللي اتنشرت عن الموضوع دة، هي إن التغيير هيطول 11 وزير على الأقل من "المحسوبين على النظام السابق".. لكن بغض النظر عن صحة المعلومة من عدمها، المهم هو إيه نوع التغيير اللي حنا محتاجينه فعلاً عشان يكون عندنا حكومة ثورة وانقاذ وطني بحق وحقيقي مش كدة وكدة ومش اسم على غير مسمى!!! دة اللي هنناقشه مع
الأستاذ/ عماد الدين حسين: مدير تحرير جريدة الشروق واللي هينضم لنا من ستوديو أون تي في في وسط البلد في ماسبيرو.
كلمة رئيس الوزراء د. عصام شرف - 11 يوليو 2011
بلدنا بالمصري: ردود الفعل على بيان عصام شرف - 11 يوليو 2011
تعقيب على بيان د. عصام شرف الثاني في أقل من 48 ساعة .. 11 يوليو 2011
بلدنا بالمصري: ملامح إعلان المبادئ الدستورية المرتقب
قراءة في ملامح بيان المبادئ الدستورية المرتقب .. في بلدنا بالمصري
المستشارأحمد الفضالي رئيس لجنة المجالس التشريعية بمؤتمر الوفاق القومي
د. حسام عيسى أستاذ القانون الدستوري
أ. ياسر الزيات -- الكاتب الصحفي
أ. جمال عبد الجواد مدير مركز الدراسات السياسية والاستراتجية بالأهرام
ليست هناك تعليقات:
إرسال تعليق