بلدنا بالمصري: مش زي ماحنا ومش هنرجع زي ما كنا
حلقة خاصة من بلدنا بالمصري مش هيبقى لنا سيرة فيها غير اللي صار واللي كان من امبارح ولحد النهاردة.. واللي ما يصرش حبيب دة بالتأكيد، أم العدو فمين قده النهارده يا سعده يا هناه وهنياله.. مؤقتاً بس لحد ما تروق وتحلالنا بإيدينا احنا، وساعتها بس مش هيكون له مكان في النسخة الأصلية من مصر، مصر بتاعتنا احنا.. مصر الحلوة، اللي كل ما نيجي نبنيها ونقول هيه يا رب خطوة لقدام، يجيبونا عشرة لورا.. حتى مش هاين عليهم نفضل محلك سر لأ لازم تقف المراكب السايرة والدنيا تقوم ما تقعدش... بس الحق مش عليهم.. أياً كانوا هم مين.. أو بمعنى اصح مين ولا مين.. العيب علينا احنا اللي سايبينهم يبرتعوا يمين وشمال ويبيعوا ويشتروا فينا بس بدل ما كان زمان على عينك يا تاجر بقى الأيام ديه من سكات ولا من شاف ولا من دري.. هو دة كل الفرق، لكن هم زي ما هم ومش هيتغيروا ولو مستنيينهم يتغيروا نبقى بنهزر.. لكن فيه فرق تاني وهو دة الأهم بكتير.. احنا مش زي ما احنا ومش هنرجع زي ما كنا.. ومصر اللي رجعناها بالروح والدم مش هنسمح ابداً انها تضيع او تتخطف مننا تاني... دة عشم ابليس في الجنة ويمكن عشمه في الجنة أهون!!!
بلدنا بالمصري: إيه اللي حصل في 28 يونيو
تعالوا بقة نستعين على الشقا بالله ونفتكر كدة ايه اللي حصل امبارح واحدة واحدة كدة بالصوت والصورة في التقرير
بلدنا بالمصري: قنابل أمريكاني جديدة في أحداث 28 يونيو
قنابل أمريكاني مسيلة للدموع جديدة انتاج مايو 2011 استخدمت في أحداث 28 يونيه .. يعني معانا فوس نشتري أسلحة مش بنقطع من لحمنا الحي
بلدنا بالمصري: أحداث ميدان التحرير ظهر اليوم 29 يونيو
طيب تعالوا بقة نروح لحد ميدان التحرير نشوف حاله كان ايه النهاردة بعد الضهر في التقرير التالي
بلدنا بالمصري: أكثر من ألف مصاب في أحداث 28 يونيه
آخر حصيلة لأعداد المصابين عدت الألف حسب تصريحات د. عبد الحميد أباظة مساعد وزير الصحة للاتصال السياسي.. لكن آخر رقم رسمي دقيق هنعرفه من د. عادل العدوى مساعد وزير الصحة للطب العلاجي
بلدنا بالمصري: بيان المجلس العسكري 65 .. أحداث 28 يونيو
أول ردود الأفعال الرسمية اللي صدرت بعد بيانين الداخلية اللي صدروا في عز الأحداث، كان رد فعل المجلس العسكري في رسالته رقم 65.
بلدنا بالمصري: تصريحات د. عصام شرف بعد أحداث 28 يونيو
رد الفعل الرسمي التاني فكان على لسان رئيس الوزرا د. عصام شرف، اللي اكد إنه فيه شئ منظم لنشر الفوضى فى البلاد.. ودعا شباب الثورة وغيرهم من أبناء الشعب المصرى للمحافظة على ثورتهم.. الكلام دة كان في مداخلة النهاردة
الصبح مع برنامج "صباح الخير يا مصر".. وأكد إنه لسة منتظر التحقيقات للوقوف على حقيقة الأوضاع، ومين المسئول وهتتم معاقبته.. اما فيما يخص اداء الشرطة، فأكد إنها امبارح كانت بتحمي الممتلكات العامة، وأنها لم ولن تستخدم العنف إلا إذا ما كان هناك عنف فى المقابل
بلدنا بالمصري: بيانات الأحزاب عقب أحداث 28 يونيو
ردود أفعال المجتمع المدني، فبيانات الشجب والتنديد كان عددها في اللمون النهاردة سواء من الأحزاب القديمة أو الجديدة في بلدنا بالمصري
بلدنا بالمصري: لجنة تقصي حقائق أحداث 28 يونيو
أما المجلس القومي لحقوق الإنسان فغير البيان اللي اصدره، لجنة تقصي الحقايق التابعة ليه زارت النهاردة ميدان التحرير والمستشفى الميداني وشافت بعينيها وسمعت بودانها حواديت وحكايات هنعرف اهمها من: أ. ناصر أمين عضو المجلس القومي لحقوق الانسان.
بلدنا بالمصري: أهالي الشهداء وشهود عيان - أحداث 28 يونيو
تامر سليمان .. شقيق الشهيد محمد سليمان من المدعوين إلى تكريم مسرح البالون
جلال فيصل .. ممن انتقلوا من ماسبيرو إلى مسرح البالون
علاء عبدالفتاح أحد شهود عيان أحداث ميدان التحرير والناشط السياسي والمدون والكاتب @alaa
جيهان إبراهيم @Gsquare86 الناشطة وأحد شهود عيان الأحداث
احنا لحد دلوقتي بنحاول نفهم ايه اللي حصل ومين اللي كان السبب.. ولحد دلوقتي ما حيليتناش غير الحكاوي والحواديت على لسان اصحابها واللي عاشوها وعلى عهدتهم.. وكلمة من هنا على كلمة من هناك على شوية فيديوهات على كام صورة، هنحاول على قد ما نقدر نلملم خيوط الحكاية والله المستعان على ما تفرج
والحقيقة تبان دة ان بانت.. بس عهد علينا لنفضل وراها والزمن طويل وانشاءالله ربنا مش هيطولها علينا وهتفضل بلدنا المحروسة من كل شر ومن كل ردي وهتفضل في عينينا وعلى راسنا من فوق لحد ما نعدي بيها لبر الأمان غصب عن عين اللي يكرهوها!!!
Reem Magued loves Salma elDaly's tweet
ريم ماجد تقرأ ما كتبته @salmaeldaly أقسم بالله العظيم أن أحافظ على ثورتي و أن أعمل على ألا يضيع حق الشهداء طالما قلبي ينبض، والله على ما أقول شهيد
بلدنا بالمصري: أبعاد أحداث 28 يونيو السياسية والأمنية
بعد الفاصل هنحاول على قد ما نقدر نفك طلاسم اللي بنشوفه وبنسمعه من امبارح لحد دلوقتي وربنا يلهمنا الصواب ,يقدرنا ويقدر ضيوفنا على فك الطلاسم ويقدرنا جميعاً نحافظ على بلدنا من ولاد الشوم واللوم اللي عايزينها والعة أو مخروبة أو مخسوف بيها الأرض.. لكن دة بعدهم!!!
ليست هناك تعليقات:
إرسال تعليق