برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاربعاء 4 ابريل 2012 يوتيوب كاملة
خيرت الشاطر يتقدم بأوراق ترشحه غداً
يسعد مساكم وحلقة جديدة من بلدنا بالمصري، هيكون فيها "دستور لكل المصريين" هو سيد الموقف.. خاصة واننا هنتابع من هنا ولحد آخر الحلقة وأول باول نتايج الاجتماع التاني للجنة التاسيسية اللي بدا الساعة 6 في القاعة الفرعونية، والمفروض ان الموضوع الاول على جدول اعماله محاولة ايجاد حلول لأزمة اللجنة بعد رفض تشكيلها من قطاعات كبيرة وطبعا بعد القرار النهائي للاعضاء المنسحبين بالاستمرار على موقفهم ومقاطعة اعمال اللجنة... لكن حلقتنا هنبدأها وقبل اي حاجة بكام سؤال طارحين نفسهم بقوة على مرشح جماعة الاخوان المسلمين لرئاسة الجمهورية، ومحتاجين كمواطنين وكناخبين محتملين للمهندس خيرت الشاطر، رد واضح وشافي عليهم منه هو شخصيا بصفته المرشح المحتمل او من جماعة الاخوان المسلمين اللي اعلنت ترشيحه..
بس قبل الأسئلة، آخر خبر فيما يخص ترشح خيرت الشاطر، ودة حسب تاكيدات الدكتور محمد مرسي، رئيس حزب الحرية والعدالة، والمشرف على الحملة الانتخابية، انه هيتقدم بأوراق ترشحه بكرة الساعة واحدة الضهر ومن بينها خطاب الحزب بترشح الشاطر، بالإضافة لنماذج تأييد أكثر من 279 نائب في مجلس الشعب ومجلس الشورى.
سؤالين بخصوص كلام خديجة خيرت الشاطر
نروح بقة للكام سؤال.. أول سؤالين ليهم علاقة باللي كتبته خديجة خيرت الشاطر امبارح في محاولة للدعوة لنبذ اللي وصفته بالصراعات والتشكيك بين المرشحين الإسلاميين للوصول للخلافة الإسلامية على منهج النبوة.. وكتبت أنها اضطرت للخروج عن صمتها مش دفاعا عن والدها ولكن حزنا علي اللي سمته بالواقع الأليم. .خديجة الشاطر خرجت عن صمتها فقالت الاتي: "لقد أعدوا عدتهم لترشيح عمر سليمان أو من يشبهه و اشهد الله إن أبي الحبيب خيرت الشاطر حتى ليلة ترشيح الإخوان له "والذي ظل يعرض عليه لمدة عام وهو يرفضه" كان يبحث بديل وهو دعم حبيبنا الشيخ حازم رغم رفض البعض لفكرة طلب الإمارة، ورؤية البعض إن هذا المنصب يحتاج إلي خبرات إداريه واقتصاديه اكبر.. إلا انه ليلة قرار الإخوان كانت احد المحددات الهامة التي أثرت في قرارهم هو "إبلاغ الجهات المسئولة لهم انه سيتم رفض أوراقه لتأكدهم من ازدواجية جنسية والدته الغالية رحمة الله عليها"، وأيا كان هذا السبب حقيقيا أم ملفقا ممن يدير شئون البلاد فانه لا يليق أبدا أن يظن فريق إن إخوانهم هم الذين أثاروا هذه الفتنه"..
ومع تقديرنا الشديد لروح المحبة والتسامح والدعوة لتبذ الصراعات، الا ان هنا فيه سؤالين جوهريين: أولاً: منين ترشيح الاخوان لخيرت الشاطر "ظل يعرض عليه لمدة عام وهو يرفضه"، اذا من سنة فاتت كان لسة قرار الجماعة على الاقل المعلن انها مش هترشح حد من داخلها.. ومنين بيعرض عليه من سنة وهو بيرفض اذا من سنة فاتت هو نفسه كان بيقول بعضمة لسانه وعلى الملأ، ان الجماعة مش هيكون لها مرشح، ولو "ترشح خيرت الشاطر نفسه الجماعة لن تدعمه"؟!!! خديجة الشاطر هي اللي فاهمة غلط ولا احنا اللي فاهيمين غلط ولا هي كانت تعرف اللي احنا مش عارفينه بقى لنا سنة وبيتقال لنا عكسه... وليه كدة؟!!!
السؤال التاني: خديجة الشاطر بتقول انه "ليلة قرار الإخوان كانت احد المحددات الهامة التي أثرت في قرارهم هو "إبلاغ الجهات المسئولة لهم انه سيتم رفض أوراقه لتأكدهم من ازدواجية جنسية والدته الغالية رحمة الله عليها"بالاشارة للشيخ حازم ابو اسماعيل.. طيب: مين الجهات المسؤولة ديه وايه علاقة الجماعة بيها بالظبط عشان تخصها بالمعلومة من الكنترول دونا عن غيرها بما فيها الجهات المعنية زي اللجنة العليا للانتخابات مثلاً، ومع ان الجماعة مش المفروض انها طرف معني!!! ولا هي طرف معني بالنسبة للجهات المسؤولة اللي بلغتها واحنا مش داريانين؟! ولا داريانين اصلا مين الجهات المسؤولة ديه، وتطلع اي جهات مسؤولة فيهم؟!!!
إزاي خيرت الشاطر صوت في الانتخابات؟
دول السؤالين اللي يخصوا اقوال خديجة الشاطر.. أما السؤال التالت، فتاني ليه علاقة بالموقف القانوني للمهندس خيرت الشاطر من الترشح اللي مازال برده ملتبس.. دلوقتي من شروط الترشح ان اسم المرشح يكون مدرج في كشوف الناخبين.. وبحسبة بسيطة، مش المفروض ان اسم المهندس خيرت الشاطر يكون مدرج في كشوف الناخبين حيث انه ولحد ما صدر العفو او ايا كان مسمى اللي صدر لصالحه لازالة الموانع القانونية، كان محروم من ممارسة حقوقه السياسية بما فيها حق الانتخاب.. طيب آخر معاد لتسجيل الاسماء في كشوف الناخبين كان 9 مارس.. صحيح احنا مش عارفين بالظبط هو حصل على العفو امتى لكن حسب تصريحات محامي الجماعة، غالبا حصل عليه في النص التاني من مارس، وحسب المنشور النهاردة في جريدة الشروق انه حصل عليه ما بين 15 و19 مارس يعني بعد إغلاق القيد فى جداول الناخبين بـاسبوع، 10 أيام.. ودة معناه أن اسمه المفروض انه مش مدرج فى الجداول.. ودة في حد ذاته محتاج تفسير قانوني: هيرح نفسه ازاي وهو مش مدرج في كشوف الناخبين؟!!! لكن لما نكتشف انه مش بس اسم المهندس خيرت الشاطر كان مدرج في كشوف الناخبين _اللي المفروض انها تمت تنقيتها على الفرازة_ دة كمان صوت في الانتخابات البرلمانية مع انه في الوقت دة المفروض انه كان محروم من ممارسة حقوقه السياسية بما فيها حق الانتخاب؟!!! والدليل على انه صوت مش بس تصريحات من داخل الجماعة لكن كمان اهوه بفيديو من على موقع اسمه "التيوب الرسمي لجماعة الاخوان المسلمين"
ناصر أمين: حق التصويت مكفول للشاطر ولكن ليس حق الترشح
كثير من الأسئلة حول أن إزاي خيرت الشاطر صوت في الانتخابات؟ ... و للإجابة على هذا السؤال إحنا معانا أ/ ناصرأمين مدير مكتب العربي لإستقلال القضاء
أبو إسماعيل يطالب ببطلان ازدواج جنسية والدته
الجهات المسؤولة اللي بلغت جماعة الاخوان المسلمين_حسب كلام خديجة الشاطر_ ان والدة الشيخ حازم ابو اسماعيل مزدوجة، شكلها كدة والله اعلم هتطلع جهات مسؤولة ومطلعة والنتيجة اللي جابتها من الكنترول يمكن تطلع مظبوطة؟!!! ليه بقة؟!! لإن الشيخ ابو اسماعيل نفسه أقام النهاردة دعوى قضائية قدام مجلس الدولة بيطالب فيها بإصدار حكم قضائي بإلغاء قرار وزير الداخلية باعتبار والدته نوال عبد العزيز عبد العزيز نور مزدوجة الجنسية وسبق وان حملت الجنسية الأمريكية، وما يترتب على ذلك من أثار تفاصيل أكتر إحنا معانا أ/ سيد فتحي - مدير مركز الهلالي للحريات
سليم العوا: والدي ليس سورياً
أما الدكتور محمد سليم العوا، فنفى تماما كل ما يتردد عن ان والده كان بيحمل الجنسية السورية، وقال ان الحقيقة هتعلنها اللجنة المشرفة على الانتخابات في وقتها.. تصريحات الدكتور سليم العوا ادلى بيها النهاردة بعد خروجه من مقر لجنة الانتخابات بعد ما تقدم رسميا باوراق ترشحه اللي تضمنت 30 تأييد من نواب في البرلمان عن أحزاب "البناء والتنمية" و"النور" و"الوسط" بالاضافة لنواب مستقلين.. وبتقديم الدكتور سليم العوا اوراق ترشحه النهاردة، يكون عدد مرشحينا المحتملين لرئاسة الجمهورية وصل ل11 مرشح في عين العدو.
عمر سليمان هيترشح ولا مش هيترشح
بالنسبة للواء عمر سليمان، المؤكد انه لسة لحد دلوقتي لا اتقدم باوراق ترشيحه ولا اعلن حتى عن نيته انه يترشح او ما يترشحش.. والأخبار كلها متناقضة وغير مؤكدة وكلها على عهدة اما مصادر مطلعة او مصادر وثيقة الصلة.. امبارح الخبر غير المؤكد كان عن نصيحة من المجلس العسكري بتاجيل حسم موضوع ترشحه لحد النهاردة الصبح بالكتير لانه يمكن تحصل مفاجأة على مستوى المرشحين الاسلاميين.. والأخبار غير المؤكدة النهاردة يا اما عن انه تقريبا حسم امره بعدم الترشح نهائيا.. أو عن انه هيتقدم باوراقه يوم الحد اللي جاي والله اعلم!!!
شفيق يتقدم بأوراق ترشيحه خلال أيام
أما الفريق أحمد شفيق وبعد ما اعلن للزملاء الاعزاء في برنامج الحياة اليوم، ان الرئيس السابق حسني مبارك مازال مثله الأعلى حتى الان، ولكن في نقطة واحدة وهي الجمع بين الحزم والرفق"، وانه "لن يتبرأ من أي تصريح قديم له احترامًا لنفسه وللآخرين"، اصدر بيان النهاردة، اعلن فيهانه هيتقدم للجنة الانتخابات الرئاسية باوراق ترشيحه خلال الموعد القانوني، ومن ضمنهم ما بين 58 و60 الف توكيل.
ميحكموش .. حملة ضد فلول النظام
لكن بعيدا... أو يمكن قريبا جدا من الاتهامات المتبادلة ما بين الفريق أحمد شفيق والسيد عمرو موسى بالانتماء لنظام الرئيس المخلوع ووزاراته.. فيه مجموعة من الشباب، اطلقت حملة على فيس بوك عنوانها "ما يحكموش" لمواجهة المرشحين اللي وصفتهم الحملة بالمحسوبين على النظام السابق وعدم انتخابهم.. تفاصيل أكتر إحنا معانا أ/ إسلام ملده - المتحدث الإعلامي بأسم حملة ما يحكموش
عبد المجيد: الدستور يفقد الشرعية بغياب الأزهر والكنائس
هانرجع عشان نتابع أيه اللي حصل في الإجتماع الثاني للجنة تأسيسية الدستور لبحث أزمة المنسحبين وهانعرف التفاصيل من د/ وحيد عبد المجيد الخبير بمركز الأهرام الإستراتيجي
مسيرات الألتراس للقصاص للشهداء
موافقة الداخلية على إقامة مباراة الأهلي أفريقياً
جائنا البيان التالي من وزارة الداخلية أنه تمت موافقة الداخلية على إقامة مباراة الأهلي أفريقياً
: عمال المدابغ كاتمين في قلبهم وساكتين
صحيح ان الثورة كسرت حاجز الخوف.. وصحيح ان اللي ليه حق ضايع في البلد ديه اتعلم ازاي يطالب بيه وماعادش يسكت عنه.. لكن دة ما يمنعش ان لسة فيه في بلدنا اللي دايق المر وكاتم في قلبه وساكت.. الله اعلم لحد امتى.. عمال المدابغ مجرد عينة لأهالي المحروسة اللي لسة كاتمين في قلبهم وساكتين.
قصر ثقافة الإسماعيلية تحول لمقر محاكمة !
المستشار عادل عبد الحميد وزير العدل أصدر قرار بنقل مقر محاكمة المتهمين في مجزرة بورسعيد من أكاديمية الشرطة الي قصر ثقافة الإسماعيلية هل ده هاينفع على الأقل أمنياً... تفاصيل أكتر إحنا معانا أ/ مسعد أبو فجر الناشط السياسي
تكريم أهل ليبيا على راسنا من فوق
في الوقت اللي كانت فيه ليبيا وفي عز نظام القذافي، متحرمة على وسائل الاعلام العربية والدولية، اللهم الا قرر منها يجازف في سبيل نقل الحقايق مهما كان التمن، كان لينا شرف المجازفة ونقل الحقيقة وكان لفريق اون تي في واون تي في لايف السبق في التواجد على الارض.. ومع انه لا شكر ولا تكريم على واجب، الا ان التكريم النهاردة كان من نصيبنا واجمل ما فيه انه كان تكريم أهلي.
ساركوزي يقلد نجيب ساويرس وسام جوقة الشرف
أما وسام جوقة الشرف، واحد من ارفع الاوسمة الفرنسية فكان من نصيب رجل الاعمال المصري نجيب ساويرس تقديرا لجهوده في تعزيز العلاقات بين القاهرة وباريس.
في مهرجان وسط البلد للفنون المعاصرة
وقبل الفاصل هنوصل لحد وسط البلد نطل طلة على آخر فاعليات مهرجان وسط البلد الدولي للفنون المعاصرة.
الشعب يريد كتابة دستوره
الشعب يريد كتابة دستوره.. طب ازاي واحنا واصلين تقريبا لحارة سد.. وبدل ما نقعد نعيد ونزيد في أسباب الأزمة ومين اللي الحق عليه.. خلونا نفكر بصوت عالي في طرق للحل وللخروج من الحارة السد للجمعية التاسيسية أو في بدايل تانية ممكنة.. أو مستحيلة ونفكر برده بصوت عالي ازي نخليها ممكنة.. وهنفكر النهاردة بصوت عالي مع ضيوفنا:
د. احمد طه النقر: منسق الجمعية الوطنية للتغيير وعضو جبهة دستور لكل المصريين
محمد مسلم: أمين اتحاد الفلاحين في الغربية
حبيبة ماجد: طالبة في الجامعة الامريكية
