نشاهد اليوم
برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى الاحد 10 فبراير 2013 على قناة ONTV حلقة يوتيوب كاملة
ريم ماجد: هنركز مع الحاجات اللي بتتدبر في الدِرة
يسعد مساكم وحلقة جديدة من بلدنا بالمصري.. هنحاول فيها وفي حلقات الاسبوع دة من بلدنا بالمصري، اننا نعمل حاجتين.. الاولى واللي ليها الاولوية عندنا هي اننا هنفضل نجري ورا المصابين والمعتقلين والمفقودين والمعذبين في الارض، لحد ما يبان لهم صاحب او على الاقل نضمن ان صوتهم واصل وقضيتهم على عينك يا تاجر وان حقهم ان شاء الله مش هيضيع ان عاجلاً او اجلاً.. والحاجة التانية اننا هنحاول قدر المستطاع واحنا بنتابع الامور اللي بيجد فيها جديد اننا كمان نحلق على اللي وقع مننا في عز المعمعة، وخصوصاً الموضوعات والقضايا اللي ممكن تعدي في وسط الزحمة واحنا باصين على العصفورة او واحنا ملهيين في الدم اللي سايح ومتشحططين ومتلطمين في المشارح والمستشفيات والاقسام والسجون.. موضوعات من عينة احكام تصدر ممكن يكون بصدورها فيه شبهة افلات من العقاب لجناة حقيقييين في مجازر شيبتنا، زي الحكم اللي صدر مؤخراً بادانة اتنين اقباط بالسجن تلات سنين بتهمة سرقة سلاح مملوك للقوات المسلحة، وكان الله بالسر عليم.. وكان الجريمة الاساسية كانت سرقة سلاح مش دهس ٢٧ شهيد بالدبابات على كورنيش النيل وقدام العالم كله.. او موضوعات من عينة تشريعات وقوانين بتدبر في الدرة، ومسافة ما نغمض ونفتح نلاقيها صدرت ولما نيجي نسال عن الحوار المجتمعي يحلفوا على مية البحر تجمد انه حصل بس احنا اللي ماخدناش بالنا عشان كنا ملهيين ومش فاضيين، من عينة قانون الجمعيات مثلاً اللي اجمعت الاراء الحقوقية منها على الاقل انه كارثة وانه الاسوأ على الاطلاق وانه اسوأ كمان اللهم احفظنا من القانون اللي قبله اللي الناس ريقها تشف تطالب بتغييره، فهنلاقي نفسنا طالعين من حفرة عشان نقع في دحديرة.. دة غير قانون التظاهر وقانون توسيع دايرة الاشتباه، والقانون اللي من برة هالله هالله ضد التحرش، ومن جوة ضد العنف ويعلم الله بقة اي عنف وايه تعريفه ومين اللي هيروح في الرجلين بالقانون دة وهكذا.. او موضوع من عينة الموضوع اللي هنناقشه النهاردة في فقرتنا الاخيرة وهو موضوع التصالح مع رموز النظام السابق في قضايا المال والاعمال، اللي كان طالع لنا في المقدر من بعد الثورة لكن اليومين دول واخد حده على الاخر وداخل في حيز التنفيذ بعزم ما اداه ربنا.. فالسؤال هيكون كالاتي: الصلح دة خير ولا شر لابد منه ولا لا منه ولا كفاية شره.. وهنستعين على اجابته بعد اخر اخبار بلدنا بضيوفنا: الدكتور هاني سري الدين والدكتور عبد الخالق فاروق والاستاذ وائل جمال.. والتلاتة محسوبين على الثورة باشكال مختلفة وعندهم اجابات مختلفة لنفس السؤال وكل واحد فيهم حجته معاه.
بلدنا بالمصري: جرائم الداخلية ضد مظاهرات الغربية
اما اخر اخبار بلدنا فمش عارفين نبداها منين ولا منين.. هنبداها من محافظة الغربية،اللي كانت الاسخن ان جاز التعبير في احداث الجمعة الاخيرة، جمعة رد الكرامة وتداعياتها لحد النهاردة، سواء من حيث اعداد المصابين او المعتقلين.. اللي منهم طفل على فكرة عنده اا سنة.. دة غير طبعاً الفيديو العظيم بتاع الظابط الهمام اللي بيضرب حي ومعاه مدنيين بسنج ومطاوي.. واللي قيادات الداخلية تعترف بيه على الهوا في الفضائيات وتعتذر عنه وتاكد على فتح تحقيق فيه وبعين ترجع تنفي في بياناتها الرسمية.. المهم، الظاهر انها لسة مش هتيجي على قد كدة..
أحمد مصيلحي - بلدنا بالمصري: 130 طفلاً معتقلين حتى الآن
معانا على الهاتف أحمد مصيلحي - المستشار القانوني للائتلاف المصري لحقوق الإنسان حيث قال: الأطفال كانوا معتقلين في طرة والجبل الأحمر حتى 6 فبراير وأطفال تحت 18 سنة محتجزين حتى الآن في طرة وقسم الخليفة و130 طفلاً معتقلين حتى الآن.
بلدنا بالمصري: الجندي على قصر النيل .. أبلغ من أي كلام
تعالوا بقة قبل ما نكمل اخر اخبار بلدنا، نوصل لحد كوبري قصر النيل.. عشان بس اللي بيقولوا ان الاعلام والنشطا والناس اللي بتشدد لمحمد الجندي وحق محمد الجندي واللي زيه، بيتكلموا كتير.. طب وقفة تابين محمد الجندي النهاردة كانت صامتة من غير ولا كلمة.. وكانت ابلغ كتير من اي كلام مهما كتر.
بلدنا بالمصري: قتل الجندي وكلامهم اللي مبيخلصش
هنروح بقة للشهيد محمد الجندي وكتر الكلام اللي اشبه بالخيبة القوية حوالين اسباب وفاته.. محمد الجندي اتعذب لحد الموت ولا خبطته عربية وشتان الفرق ما بين الاتنين..
إمام: هناك نية مبيتة للقبض على الأطفال .. وهناك مفقودين
معانا على الهاتف المحامي عمرو إمام بمركز هشام مبارك الذي قال: لا يوجد حصر رسمي للمعتقلين .. وهناك العديد من المفقودين وهناك نية مبيتة للقبض على الأطفال خلال الأحداث الأخيرة ونتلقى بلاغات حتى الأن عن أطفال مفقودين.
بلدنا بالمصري: الإعلام محطوط عليه بالجامد النهاردة
النهاردة من اكتر الايام اللي الاعلام اللي زي حالاتنا، محطوط عليه بالجامد بلغة اليومين دول من كل ناحية.. بعد تصريحات ممثل الداخلية قدام مجلس الشورى والمتحدث باسم النيابة في المؤتمر الصحفي، عن الاعلام وعمايل الاعلام وانه السبب فكل اللي احنا فيه.. نلاقي وزير الاعلام وعلى هامش مؤتمر لتوقيع بروتوكول بين وزارة التعليم ووزارة الاعلام، وبعد ما يسجل مع قناة ٢٥، يقف يقول لبقية الصحفيين والاعلاميين هم بيسالوا عن الخير وانتوا بتسالوا عن الشر.. وبعدين نلاقي لجنة الدفاع والامن القومي في مجلس الشورى بتتطالب بفرض رقابة مسبقة على ضيوف الفضائيات.. غير خصم ١٥ يوم من مرتب الزميلة هبة عز العرب في القناة التالتة عشان ازي وازاي ترد على قيادي اخواني وتقاطعه في الكلام.. غير اخلاء سبيل الزميلة دينا عبد الفتاح بكفالة ٥الاف جنيه في اتهامها بالترويج لمجموعة بلاك بلوك عشان ازاي وازاي تستضيف مجموعة منهم.. عايزين اكتر من كدة؟!!!!
استعداد الرئيس لطرح مبادرة حزب النور على جلسة الحوار
من ناحية تانية خالص، نفت رئاسة الجمهورية النهاردة موافقتها على شروط جبهة الانقاذ فيما يخص الحوار الوطني.. وبعد حوالي ست ساعات من الاجتماع بقيادات حزب النور امبارح اعلنت الرياسة استعداد الرئيس لطرح مبادرة حزب النور على جلسة الحوار اللي جاية.
اقتراح لوضع ميثاق شرف إعلامي لتقنين عمل الفضائيات
معانا على التليفون النائب سعد عمارة وكيل لجنة الأمن القومي بمجلس الشورى الذي قال: أحد الأعضاء طلب من القنوات الفضائية التدقيق في صفة ضيوف البرامج وهناك اقتراح من وزارة الاستثمار لوضع ميثاق شرف إعلامي لتقنين عمل القنوات الفضائية وهنال قنوات خاصة تحرض على العنف مثل قناة التحرير و اتحاد الإذاعة و التليفزيون لديه جهاز خاص يراقب محتوى القنوات الخاصة.
دينا عبد الفتاح: رفضت دفع كفالة حماية لحقوق الإعلاميين
احنا معانا على التليفون الإعلامية دينا عبد الفتاح وقالت: طلبنا انتداب قاضي تحقيق بدلا من النيابة. ورفضت دفع الكفالة حماية لحقوق الصحفيين والإعلاميين
التصالح مع النظام السابق خير ولا شر .. في بلدنا بالمصري
هو عادةً الصلح خير.. بس لما نبقى هنتصالح مع رموز نظام نزلنا نجري في الشوارع ومن ساعتها مش عارفين نروح بيوتنا عشان ما نسقطه وهو معصلج معانا، ساعة لابس لنا توب جديد ومربي دقنه وساعة كاشف وشه بشحمه ولحمه وعلى عينك يا تاجر.. يبقى وجب نسأل: في الحالة ديه كمان: الصلح خير برده؟! ولا شر لا بد منه ولا لا منه ولا كفاية شره؟!
هو سؤال ورد غطاه وان كان الرد شرحه يطول.. الصلح مع رموز نظام بقى لنا سنتين بنجري في الشوارع وبندفع من دم قلبنا ونور عينينا عشان يسقط ونرتاح منه ونبني على نضافة.. الصلح دة خير ولا شر لابد منه ولا لا منه ولا كفاية شره.. وبامارة ايه؟!!! دة السؤال اللي هنستعين عليه بضيوفنا النهاردة
د. هاني سري الدين: عضو حزب الدستور
د. عبد الخالق فاروق: مدير مركز النيل للدراسات الاقتصادية والاستراتيجية
الكاتب الصحفي: وائل جمال: المتخصص في الشؤون الاقتصادية
المستشار حسن ياسين: النائب العام المساعد او المتحدث باسم نيابة الاموال العامة
