نشاهد اليوم
برنامج من جديد
و الذى يذاع على قناة ONTV
تقديم شريهان أبوحسن
شارك الخبر مع اصدقائك على الفيس بوك و تويتر و جوجل +1 من اعلى الصفحة
مع تمنياتى بمشاهدة ممتعة
و لنبداء
برنامج من جديد حلقة الاثنين 10 ديسمبر 2012 تقديم شريهان ابو حسن من قناة ONTV يوتيوب كاملة
من جديد: مرسي يمنح الجيش الضبطية القضائية
السلام والتحية على حضراتكوا أهلا بيكو معانا بالتأكيد احنا في زمن المسخ لما تبقى دولة بحجم مصر تصدر فيها القرارات وتلغى خلال اقل من ساعتين.. والمبررات دايما جاهزة بالتأكيد محدش كان متصور من اللي انتخبوا الرئيس مرسي ان معظم قراراته حيرجع فيه، فيه ناس كتير حتبقى شايفة انه بيستجيب للمواطنين، لا معلش.. الناس لسه ما كانتشي قالت رأيها وهو طبعا معروف، حتى قبل القرار لكن القرار طلع برضوة .. واتلغى برضوة وكأن للدولة رئيسين وكأن فيه رئيس بيطلع قرارات ورئيس يلغي قرارات الرئيس، الغريب كمان في الموضوع هو بيان حزب الحرية والعدالة امبارح واللي بيقول: فوجئ حزب الحرية والعدالة بالأنباء التي تداولتها وسائل الإعلام عن قرارات للحكومة تضمنت رفع الضرائب علي بعض السلع والخدمات وكذلك بعض شرائح ضرائب الدخل والعقارات.
ويؤكد حزب الحرية والعدالة على موقفه الدائم لرفض أي سياسات اقتصادية تزيد الأعباء علي المواطنين محدودي الدخل لذا فإنه يطالب رئيس الحكومة بوقف هذه القرارات لحين عرضها علي مجلس النواب بعد تشكيله ،هو سؤال بسيط جدا هو مين اللي أصدر القرارات مش رئيس الحكومة اللي أصدرها لكن اللي أصدرها هو رئيس الجمهورية محمد مرسي العياط رئيس جمهورية مصر العربية مش رئيس الوزراء والغريب الحرية والعدالة حتى بيتاجر بالقرار الغلط ويقولك يطالب رئيس الحكومة .. عشان يجي الرئيس ويبقى استجاب لمطالب المصريين، هو رئيس الحكومة ماله .. اهوه حسب اللي منشور في الجريدة الرسمية ان اللي اصدر القرار هو رئيس الجمهورية
وفي الآخر الناس تيجي تقولك بالدستور العجلة .. تدور حتدور ازاي واحنا بنطلع قرارات غلط ونرجع فيها وفي الأخر البورصة هي اللي بتتحمل ونلاقي خساير بالمليارات عشان نرجع في القرارات تاني.. مصر مش كشك يستحمل اننا ناخد كل شوية قرار ونرجع تاني فيه قبل ما ناخد القرار يتدرس عشان لما يتاخد يبقى على الأقل موزون وفيه منطق ولا حتى انتوا مش محتاجين دراسة لان كدة ولا كدة عندكوا الناس بتوعكوا بيبرروا القرار وعكسه برضوة في نفس الوقت، وما بيبقوش مكسوفين انهم يتبنوا وجهة النظر اللي كانوا لسه ضدها، ويقبلوا القرارات اللي كانوا رافضينها زي اللي حصل من محمد مرسي المرشح لرئاسة الجمهورية لما سألوه عن قرار الضبطية القضائية لرجال القوات المسلحة، خلينا نشوف المرشح محمد مرسي قال ايه وقت ما كان مرشح وخلي في بالكو ان هذا المرشح هو رئيس جمهورية مصر العربية اللي برضوة قرر منح الضبطية القضائية لرجال القوات المسلحة.. يا ترى مرسي المرشح كان رأيه ايه في الضبطية القضائية لرجال القوات المسلحة
من جديد - ياسر علي: إلغاء القرارات إنحيازاً للفقراء
طبعا الرئيس اعترض على قرار الضبطية القضائية وهو الآن بيصدر قرار بيه، لكن زي ما قولت لحضراتكوا المبرر دايما جاهز، وهو ان القضاة هما اللي طلبوا تأمين عملية الاستفتاء، وكمان اتكلم عن القرارات الأخيرة الخاصة بالضرايب.
من جديد: تغريم الناخبين فى حالة عدم خروجهم للتصويت
طبعا الكل بيستعد دلوقتي والقوى السياسية بتبحث هل تقاطع ولا تشارك، هل نروح ونقول لا ولا ما نروحشي على عملية مرفوضة من الأساس، خصوصا وأن اللجنة العليا للانتخابات والمشرفة على الاستفتاء برئاسة المستشار سمير أبو المعاطى، قررت تطبيق المادة التى يتضمنها قانون انتخابات ومباشرة الحقوق السياسية، التى تنص على تغريم الناخبين فى حالة عدم خروجهم للتصويت، بغرامة قدرها 100 جنيه، وده للمشاركة فى الاستفتاء على الدستور الجديد، في الاستفتاء يوم السبت . .كمان قررت اللجنة العليا للانتخابات والمشرفة على الاستفتاء على الدستور، إلغاء الفقرة الثانية من المادة 32، بالقانون رقم 73 لسنة 56، واللى بتنص على أن يصوت الناخبون فى الاستفتاءات فى غير دوائرهم الانتخابية.
محمد زارع: لابد من سد الثغرات قبل الإستفتاء
خطوات الإستفتاء وقرار الإستفتاء في غير الدوائر القانونية .. معانا محمد زارع أو حافظ أبوسعد عضو المجلس القومي لحقوق الإنسان السابق
موافقة مشروطة لمجلس الدولة للإشراف على الاستفتاء
النهاردة نادي قضاة مجلس الدولة أعلن عن مشاركته في الإستفتاء على الدستور الجديد وربط مشاركته بتوافر عدد من الشروط أهمها تأمين القضاة أثناء عمليه الإستفتاء وانهاء حالة الأقتتال والصراع بين الشعب وفك الحصار والتظاهرات أمام المحكمة الدستورية العليا وتمكين قضاتهم من استئناف عملها ... زي ما حضراتكو عارفين ان نادي قضاة مجلس الدولة كان أعلن عن عدم قبل كدا ... ودا كان قبل إلغاء الإعلان الدستوري لكنه النهاردة تراجع واكد ان الإستفتاء أصبح امر واقعي وان المواطنين في حاجة القضاء للإشراف عليه.
المستشار عمر جيرة: الإشراف على الإستفتاء شرف كبير لنا
معانا المستشار عمر جيرة عضو مجلس إدارة نادي قضاة مجلس الدولة , ليوضح الأمر على ما تقرر من الموافقة على الإشراف على الإستفتاء .
الجمعيات العمومية لمحكمة شمال القاهرة ترفض الإستفتاء
من ناحية تانية الجمعيات العمومية لمحكمة شمال القاهرة الأبتدائية ومحكمة السويس ونادي قضاة بورسعيد أعلنوا عن رفضهم المشاركة في الإستفتاء واستمرار تعليق عملهم ..
من جديد: 6 إبريل تقرر التصويت بـ لا للدستور
من ضمن الناس اللي حسمت موقفها هي حركة 6 إبريل، اللي دعت جموع المصريين للاصطفاف ضد تمرير مسودة الدستور والتصويت بـ "لا" للدستور، وأكدت إنجى حمدى، عضو المكتب السياسى لحركة 6 إبريل، أن الهدف من الحملة الوصول لأكبر حشد رافض لهذا الدستور وتكوين رأى عام واعٍ للحيلولة دون تمريره.
من جديد: جبهة الإنقاذ الوطني ترفض بشكل كامل الإستفتاء
من ناحية تانية فجبهة الإنقاذ الوطني عقدت اجتماع بمقر حزب الوفد وأعلنت عن رفضها بشكل كامل الاستفتاء على الدستور يوم 15 ديسمبر ووصفت القرارات الصادرة عن رئيس الجمهورية والإعلان الدستوري الجديد بأنها تمثل تحايلاً والتفافاً على مطالب الجماهير، وأعلنت عن تنظيم 3 مسيرات كبرى غدا يقودها عدد من رموز الجبهة الدكتور محمد البرادعى والسيد حمدين صباحى والدكتور أحمد سعيد رئيس حزب المصريين الأحرار، تنطلق من عدد من ميادين القاهرة متجهة إلى قصر الاتحادية ..
من جديد: مؤتمر للإعلان عن خارطة مسيرات لا للدستور
من ناحية تانية النهاردة عقد عدد كبير من القوى والأحزاب السياسية والثورية مؤتمر صحفي للإعلان عن خارطة المسيرات المقرر ليها بكرة تحت شعار لا للغلاء والأستفتاء.
من جديد: القوى الإسلامية تنظم مسيرتين دعم للإستفتاء
على جانب آخر فبكرة بردوا القوى الإسلامية والقوى المؤيدة لقرارت الدكتور محمد مرسي رئيس الجمهورية والمؤيدة لإجراء الإستفتاء هتنظيم مسيرتين الأولى تنطلق من أمام مسجد رابعة العدوية والثانية من أمام مسجد آل رشدان بمدينة نصر بعنوان "نعم للشرعية"... وطبعا زي ما حصراتكو عارفين ان المكانين قريبيين جدا من محيط قصر الإتحادية واللي هتنظم فيه القوى المعارضة مسيرتها
من جديد: سرعة تراجع الرئيس عن قراراته
من جديد أهلا بحضراتكوا .. طبعاً الرجوع للحق فضيلة مفيش كلام.. بس ده لما يكون رجوع للحق فعلاً .. لكن المشكلة لما يكون لتحقيق مكاسب تانية.. إحنا أمام حزمة من القرارات الخاطئة تم الرجوع عنها ولغاية هنا الحمد لله .. البعض شايف إنه لسه فى قرارات تاني غلط لسه مارجعناش فيها للحق.. زى قرار تاجيل الاستفتاء لغاية ما يتم التوافق على مواد الدستور بشكل كامل.. لكن فى المقابل فى قرارات اتخدت غلط والرئيس مرسي مشكور رجع عنها زى مثلاً استبعاد النائب العام أول مرة ثم عودته .. وقرار عودة مجلس الشعب ثم التراجع وحله مرة تاني.. ثم قرار زيادة الضرائب اللى كان هيتسبب فى كوابث.. والرئيس رجع عنه بعد ساعات رغم أنه قرار تم تعليقه مش إلغاءه ولا حاجة.. وكمان قرار إصدار الإعلان الدستوري ثم العودة وإلغاءه وإصدار إعلان دستوري جديد .. يعنى الرئيس أصدر 4 قرارات رجع عنها ب5 قرارات.. المشكلة فين .. عند مين .. مين اللى بيشير للرئيس بالقرارات دى ويورطه وبعدين يضطر يرجع تانى .. كلام كتير محتجين حد يفك تلاصيمه عشان نقدر نستوعبه فى زحمة الأحداث وحالة الصخب اللي عايشنها دى ... معانا انهارده الاستاذ جمال فهمي سكرتير نقابة الصحفيين والاستاذ مصباح قطب المستشار الاقتصادي بجريدة المصري اليوم .. أهلاً وسهلاً بيكو
