نشاهد اليوم
برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى الاثنين 3/6/2013 ONTV حلقة يوتيوب كاملة
ريم ماجد: ثم تسأل حضرتك البحر بيضحك ليه؟
يسعد مساكم وحلقة جديدة من بلدنا بالمصري.. كل اللي فيها كوم واجتماع السيد رئيس الجمهورية بكبارات القوى والاحزاب السياسية النهاردة على حس ازمة سد النهضة كوم تاني خالص.. صحيح ريقنا نشف نطالب بالشفافية، بس ماكانش القصد والله ولا ليكوا علينا حلفان اننا نبقى بنشف ونرف على الاخر اوي كدة، لدرجة الجرسة والجلاجل.. ولا لدرجة ان المناقشات تبقى بالمفتشر اوي كدة وعلى الهواء مباشرةً وعلى عينك يا تاجر وشوبش يا حبايب، والحاضر يعلم الغايب اننا بنخطط ونتكتك حاجة ياما هنا وياما هناك، اشي تدخل في الشأن الداخلي لدولة ذات سيادة.. على "تظبيط" القبائل هناك وكله بيتظبط.. على تحريض دول الجوار.. على التلويح بالدخول في عركة مع امريكا واسرائيل مش عارفين باي امارة.. على التهديد بفتح الحدود مع غزة ومافيش مانع من عمليات ارهابية في اسرائيل.. ويا سلام بقة لو استخدمنا منتخبنا القومي تبقى تاهت ولقيناها.. على خطط عسكرية مخابراتية علمية معملية فذة واللي ما يشتري يتفرج علينا ويعمل بعد كدة ما بداله وعلى كيف كيفه وماحدش فينا يقدر يقول له تلت التلاتة كام.... بس اللي قالها كلمة حكمة والف رحمة ونور تنزل عليه.. عمنا جلال عامر.. قالك: ثم تسأل حضرتك البحر بيضحك ليه؟! طبعاً بيضحك علينا... اللهم انا لا نسألك رد القضاء ولكننا نسألك اللطف فيه
بلدنا بالمصري: اللي محضروش اجتماع الرئاسة - سد النهضة
دة عن اللقاء واللي حضروه.. اما اللي ما حضروش فكل واحد حجته معاه..
بلدنا بالمصري: تقرير اللجنة الثلاثية فسر الماء بعد الجهد بالماء
استنينا بفارغ الصبر تقرير اللجنة الثلاثة وبعدين استنينا بفارغ الصبر اي حد يبل ريقنا باي كلمة عن اهم نتايجه.. لحد ما اعلنت الرياسة النهاردة في اجتماعها مع الكبارات على عينك يا تاجر، عن ملخص للتقرير.. هل التقرير اللي استنته حكومتنا الرشيدة بفارغ الصبر اضاف اي اضافة جديدة ولا حيالله فسر الماء بعد الجهد بالمية
د. محمد أبو الغار: تراجعي عن حضور الإجتماع كان بطلب أعضاء وقيادات بالحزب
ومعنا عبر الهاتف د. محمد أبو الغار رئيس الحزب المصري الديمقراطي الإجتماعي: موافقتي الأولية على حضور الإجتماع كانت بدافع وطني. تراجعي عن حضور الإجتماع كان بطلب أعضاء وقيادات بالحزب. إذاعة الإجتماع على الهواء أكدت أنه غير جدي
د. عمار على حسن: إذاعة الإجتماع على الهواء غاية الخطورة
ومعنا عبر الهاتف د. عمار على حسن الباحث السياسي: حضور القوى السياسية المؤيدة والمعارضة كان ضرورة. إفتقاد الثقة والمصداقية في النظام كان سبباً في عزوف البعض عن حضوور الإجتماع. إذاعة الإجتماع على الهواء غاية الخطورة. جني مكاسب داخلية من وراء إذاعة الإجتماع على الهواء أنانية. يجب أن يكون هناك خيارات متاحة أمام صناع القرار من أجل المناورة مع إثيوبيا
حسام مؤنس: عدم حضور صباحي الإجتماع لعدم وجود معلومات عن تقرير اللجنة الثلاثية
ومعنا عبر الهاتف حسام مؤنس المتحدث باسم التيار الشعبي: عدم حضور صباحي الإجتماع لعدم وجود معلومات عن تقرير اللجنة الثلاثية. نحن مستعدون لأي دعوة جادة أو مبادرة وطنية لحل الأزمة
ريم ماجد: أيش جاب مرسي العياط لعمر بن الخطاب
قبل ما نكمل اخر اخبار بلدنا، معلومة كدة عالماشي، الرياسة وتحديداً الحرس الجمهوري، بيغير بوابات القصر.. البوابات الجديدة اعلى بييجي متر ونص من البوابات القديمة وسمكها ٧٠ سم بحالهم.. وكله من باب الاحتياط والاستحراس من تمرد اهالي المحروسة يوم ٣٠ يونية وسبحان مغير الاحوال من صدر مفتوح في ميدان التحرير فشر عنتر زمانه في زمانه من سنة واحدة، لاسوار بتتعلى وبروج مشيدة بعد سنة واحدة... وشتان الفرق ما بين عمر بن الخطاب وبين اللي ادعوا انه حفيده قال.... عمر بن الخطاب اللي عدل فأمن فنام في الطل مطمن لا اسوار ولا حراس ولا عربيات مصفحة ولا بحزنون.. وايش جاب لجاب؟!!!!!
بلدنا بالمصري: سجنوا دومة والتهمة إهانة الرئيس .. ومين المذنب؟
نهايته.. ولو بنتكلم عن العدل، مش عارفة ايه ريحة العدل في ان عدد المعتقلين يوصل لاكتر من ٣٤٠٠ من يوم الدكتور محمد مرسي ما حلف يمين تلاتة لحد النهاردة.. النهاردة وبعد اخر اخبار بلدنا هيكون معانا صوت وصورة ولحم ودم عينة بينة من شباب البلد ديه اللي داقوا مرارة سجون النهضة وقلبوا علينا وعلى بلدنا مواجع زوار الفجر من جديد... اما احمد دومة فدة كمان حكايته حكاية..
رامي غانم: الشرطة منعت معظم محاميي دومة من حضور جلسة النقط بالحكم
ومعنا عبر الهاتف رامي غانم: فوجئنا بتغيير مكان إنعقاد جلسة الحكم على دومة دون إبلاغ المحامين. الشرطة منعت معظم محاميي دومة من حضور جلسة النقط بالحكم
بلدنا بالمصري: أخو سعد الحسيني اعتدى على أعضاء تمرد
تمرد عمرها ما تكدب خبر ولا تفوت فرصة.. ما كدبتش خبر النهاردة وجمعت توقيعات لسحب الثقة من رئيس الجمهورية، اثناء جلسة النطق بالحكم على احمد دومة... بس الاعتداءات على اعضاء حملة تمرد كمان ما بتكدبش خير ولا بتفوت فرصة.. اخرها، الكلام عن عضو مختفي والله اعلم بسبب اختفاءه واذا كان مخطوف ولا ماله.. لكن اللي زاد وغطى النهاردة كمان لو صح هو
اللي اتعرض له اعضاء حركة تمرد في المحلة على ايد شقيق المهندس سعد الحسيني محافظ كفر الشيخ..
ريم ماجد: خيار وفقوس .. الكهرباء والمية مبتتقطعش عن بيت مرسي العياط
بجملة الكلام عن العدل، اللي بنتنشق بس على ريحته.. لما يعم الظلم يبقى عدل ولما تعم الضلمة يبقى عدل برده.. لكن ان الكهربا تبقى بتتقطع عن كل بيت في مصر بلا استثناء وبالساعات وتيجي عند بيت رئيس الجمهورية وما تستجريش تتقطع يبقى ظلم ويبقى خيار وفقوس.. بس الحكاية مش على قد ان قطع النور ما بيهوبش ناحية بيت الريس، ومش على قد الخيار والفقوس اللي احنا شبعنا منه خالص وماعدناش طايقينه، لكن اللي زاد وغطى ان فيه ٤ مواطنين مصريين، محجوزين دلوقتي بامر من نيابة القاهرة الجديدة.. المواطنين الاربعة دول جيران الدكتور مرسي في التجمع.. ساكنين على بعد كام متر من بيته، بس في بيوتهم المية والنور بيتقطعوا.. وبيقولوا ان في بيت الدكتور مرسي لا المية ولا الكهربا بتتقطع.. المواطنين الاربعة دول متهمين بقطع الطريق قدام بيته.. لكن هم في اقوالهم قدام النيابة بياكدوا انهم لا قطعوا طريق ولا دياوله كل الحكاية انهم استخدموا حقهم كمواطنين في التظاهر قدام بيت الريس عشان يوصلوا لة رسالة حس بالمواطن اللي زيك..... ايه رايكوا في ريحة العدل؟!!! مهفهفة.. مش كدة؟!!!!
اللى خلقنا يتكفل بينا .. ولاد بلدنا في بلدنا بالمصري
بلدنا بالمصري: وقفة ضد مذبحة القضاء أمام دار القضاء العالي
قضاة مصر لسة واقفين وقفتهم في مواجهة اللي بيوصفوه بمذبحة القضاء والاعتداء السافر على استقلال القضاء والمتمثلين في اصرار مجلس الشورى على مناقشة قانون السلطة القضائية.. اعتصامهم في ناديهم مستمر من يوم الجمعة ووقفتهم النهاردة كانت قدام دار القضاء العالي.. بس الحقيقة انها ماكانتش وقفة للقضاة لوحدهم
بلدنا بالمصري: لما نور النهضة يغطي على الكهربا في مستشفيات السويس
خلونا بقة نخطف رجلنا لحد السويس، نشوف عينة من معاناة المستشفيات لما نور النهضة بيغطي على الكهربا
عبدالرحمن العربي: الضابط صفع شقيقتي على وجهها أثناء إقتحام الشقة
قاسم أشرف: تم إتهامي بعدة تهم لا يستطيع شخص القيام بها في يوم واحد
إسلام الفولي: نحن في دولة تحكم من خلال مكتب وليس دولة قانون
صلاح الدين علي: اقتادوا والدي فجراً إلى المنزل قبل إقتحامه لكي أخرج لهم
شباب البلاك بلوك ضحايا زوار الفجر في بلدنا بالمصري
٣٤٦٠ معتقل على الاقل في سجون النهضة من ساعة ما رئيس الجمهورية حلف اليمين الدستورية بالتلاتة ولحد النهاردة، حسب ارقام جبهة الدفاع عن متظاهري مصر وحملة "حقي يا دولة".. معظمهم تم القبض عليهم في عز مظاهرات او اعتصامات او اشتباكات مع الامن، كدة عشوائي وكل شين كان.. منهم ستات وبنات وشباب طبعاً بعدد شعر راسنا دة غير الاطفال واصحاب الاعاقات الذهنية.... معظمهم محبوس احتياطي على ذمة قضايا باتهامات ما يعلم بيها الا ربنا.. معظمهم محبوس في اماكن احتجاز لو قانونية فهي غالباً غير ادمية.. التعذيب في السجون وفي اقسام الشرطة لسة على حاله والامارات على قفا من يشيل، من ضمنهم على سبيل المثال لا الحصر شهادة اخر تقرير صادر عن منظمة العفو الدولية عن حالة حقوق الانسان في مصر..... كل دة كوم... وزوار الفجر اللي رجعوا لعادتهم القديمة كوم تاني.. اول الضحايا اللي خدنا بيهم علم والله اعلم اذا كانوا اخرهم ولا ما خفي كان اعظم.. كانوا الشباب السبعة اللي اتاخدوا من سرايرهم من وسط اهاليهم وش الفجر بتهمة الانتماء للبلاك بلوك، يوم ١٩ ابريل اللي فات ومن ساعتها وعينيهم ماشافت النور الا يادوب من ٢٤ ساعة بعد اخلاء سبيلهم على ذمة القضية.. رسايلهم من جوة الزنازين على قد ما كانت توجع القلب على قد ما الشمس كانت طالعة من بين سطورها وبتبصم بالعشرة على ان عمر السجن ما غير ولا هيغير فكرة وان عمر القهر ما اخر ولا هيقدر يأخر بكرة.. رسايلهم اللي كانت بتوصلنا حبر على ورق من جوة السجن، النهاردة صوت وصورة ولحم ودم وبعلم الوصول وعلى لسانهم هم بما انهم منورين حينا النهاردة
ليست هناك تعليقات:
إرسال تعليق