نشاهد اليوم
برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الاحد 23 ديسمبر 2012 يوتيوب كاملة
بلدنا بالمصري: عدنا .. ألا هو طب وبعدين؟
يسعد مساكم وحلقة جديدة من بلدنا بالمصري بعد غيبة طويلة ، والغايب كانت حجته اني كنت بعافية شوية والحمد لله فما تاخذوناش.. اثناء الغيبة جد في الامور امور كتير : من اول النائب العام اللي استقال ورجع عدل عن استقالته لحد استقالة نائب رئيس الجمهورية مروراً طبعاً بنتايج المرحلة الاولى من الاستفتاء واجراء المرحلة التانية بكل الظروف والملابسات المحيطة بالمرحلتين سواء على المستوى السياسي او على الارض والامر ما يسلمش من كتير من مظاهر العنف المسلح في الشارع اللي طلع لنا في المقدر جديد على اخر الزمن ولا يجوز ابداً غير انه يكون عرض زايل عن قريب جداً لانه لو اتحول لعاهة مستديمة في جبين بلدنا هيجيب اجلنا جميعاً ومالناش دية... بس كل اللي فاتنا واحنا غايبين كوم وذكرى الشيخ عماد عفت وعلاء عبد الهادي واحمد منصور وكاريكا وكل شهداء مجلس الوزرا كوم تاني خالص.. كله كوم وحق ست البنات اللي مرمطوا بكرامتها وبعرضها ومعاها كرامة وعرض البلد ديه كوم تاني خالص.. كله كوم والايدين اللي اتمدت على ماما خديجة وعلى هند نافع وسناء يوسف واية كمال وعلى غيرهم من بناتنا وامهاتنا كوم تاني خالص.. ومافيش حاجة كانت عزة علي وانا طريحة الفراش قد اننا بغيابنا ماكناش قادرين نحيي الذكرى يوم بيوم ولحظة بلحظة.. وبالتالي وتكفيراً عن ذنب الغياب في اللحظة ديه، ذكرى احداث مجلس الوزرا هيكون لها نصيب كبير من حلقتنا النهاردة بعد اخر اخبار بلدنا اللي هنكتفي باهمها ، عشان يكون فيه براح للذكرى ونعيش ونفتكر اللي عمره ما هيتنسي.. اما فقرتنا الاخيرة فجزء منها هيكون بالتاكيد قراءة لكن سريعة في المؤشرات المتاحة لحد دلوقتي عن نتايج المرخلة التانية من الاستفتاء ودلالاتها بالمقارنة بنتايج المرحلة الاولى وعلاقتها بالظروف والملابسات اللي تم فيها الاستقتاء عموماً.. لكن كل دة للاجابة على السؤال الاهم، الا وهو طب وبعدين؟! الدستور اللي اصبح على وشك الاقرار بعد قولة نعم اياً كانت نسبتها او نسبة اللي شاركوا اصلاً، هياخدنا ويروح على فين سواء اللي قالوا نعم او اللي قالوا لاة حيث اننا كلنا في الاول وفي الاخر في مركب واحدة.. بس واحنا بنجاوب على السؤال دة مع ضيوفنا، هنرجع للشيخ ياسر برهامي نائب رئيس الدعوة السلفية.. وتحديداً لكلمته اللي قالها من شهر فات حوالين مسودة الدستور قدام ملتقى كان عنوانه ملتقى العلماء والدعاة ، وما اتسربتش او يعني ما انكشفش مستورها الا امبارح بس لاسباب ربنا بس الاعلم بيها على الاقل لحد دلوقتي.. كلمة شرحها يطول خاصة انها ما خلتش كلام لا عن الازهر ولا عن شخ الازهر ولا عن المحكمة الدستورية.. ولا عن المواطنة والحقوق والحريات واللي مستنينا بحكم الدستور وربنا يجيب العواقب سليمة.. وبالتاكيد هيكون معانا رد الازهر على المنسوب اليه على لسان الشيخ ياسر برهامي..
بلدنا بالمصري: نعم .. نتيجة الاستفتاء الشبه رسمية
بس لحد ما ييجي اوان الفقرة هنروح سريعاً لاخر اخبار بلدنا وهنبداها بالمؤشرات اللي تكاد تكون نهائية لنتيجة الاستفتاء في المرحلتين.. لحد دلوقتي اعلنت اللجان العامة نتايجها في ٢٥ محافظة من اصل ٢٧، باستثناء القاهرة والجيزة..
وبلغ اجمالي عدد الأصوات المؤيدة للدستور في 25 محافظة -- باستثناء القاهرة والجيزة -- 8 ملايين و482 ألفًا و853 صوتًا أي بنسبة 67,8%، وبلغ عدد الأصوات الرافضة لمشروع الدستور 4 ملايين و22 ألفًا و 700 صوت اي بنسبة 32,2 %.
وبالتاكيد مش محتاجين نقول ان النتايج ديه لا هي نهائية ولا هي رسمية، ومازالت في عداد المؤشرات لحد ما اللجنة العليا المشرفة على الانتخابات تعلن النتيجة النهائية الرسمية.. واللجنة لسة بتتلقى النتايج لسة المفروض هتنظر في الطعون ولسة ما حددتش معاد معين لاعلان النتيجة
بلدنا: حقوقيون يطالبون بمنع اعتماد نتائج الاستفتاء
لكن من ناحية تانية، ١٢ منظمة حقوقية من اللي شاركوا في مراقبة الاستفتاء، طالبوا النهاردة اللجنة العليا بمنع اعتماد النتائج وإلغاء ما يترتب عليها مع العمل على دراسة كل الأسباب التي حالت دون إجراء استفتاء نزيه.
بلدنا بالمصري: الصندوق هرب .. هم يضحك وهم يبكي
على ذكر الانتهاكات، خلونا نشوف عينة من الهم اللي يبكي ويضحك
بلدنا: جبهة الإنقاذ مستمرة في نضالها لإسقاط الدستور
اما جبهة الانقاذ الوطني فاكدت النهاردة في مؤتمر صحفي انها مستمرة في اللي وصفته بالنضال الجماعي والسلمي وبالطرق المشروعة لاسقاط هذا الدستور
بلدنا بالمصري: المساس بحرية الإعلام على جثتنا
الظاهر كدة والله اعلم، ولو ان يعني كل المؤشرات والمقدمات بتؤدي لنتيجة واحدة مافيش غيرها وهي ان حرية الراي والتعبير في بلدنا رايحة في خبر كان وان الاعلاميين والصحفيين والمبدعين واللي يتشدد لهم مستنياهم ايام ما تفرقش كتير عن قرن الخروب وكله بالقانون وبالدستور.. وهتشوفوا دة يسد عين الشمس في كلام الشيخ ياسر برهامي.. بس كل دة جايز وممكن بس في حالة واحدة بس: على جثتنا
بلدنا بالمصري: أزمة استقلال القضاء والقرارات ونفيها
جانب من أزمة استقلال القضاء والقرارات ونفيها في التقرير اللي جاي
بلدنا بالمصري: استقلال القضاء ضمانة الوطن والمواطن
اما الوقفة الاهم او يعني اللي ما تقلش اهمية عن وقفة الصحفيين والاعلاميين هي وقفة اعضاء النيابة العامة اللي قرروا النهاردة تعليق العمل جزئياً لحين استقالة النائب العام واصدروا بيان تحت عنوان "استقلال القضاء ضمانة الوطن والمواطن"
بلدنا: الرئاسة تكذب - لا للمحاكمات العسكرية للمدنيين
مجموعة لا للمحاكمات العسكرية للمدنيين اصدرت بيان النهاردة عنوانه الرئاسة تكذب..
الطنبولي:المنظمات الحقوقية ليست واصية على اللجنة
على ذكر الانتهاكات، معنا على الهاتف
المستشار/ محمد الطنبولي - عضو الأمانة العليا المشرفة
تحت حكم العسكر .. عام على أحداث مجلس الوزراء
لكن دلوقتي ان الاوان نعيش ونفتكر اللي صار واللي كان والتمن الغالي اللي اتدفع في احداث مجلس الوزرا من سنة فاتت
بلدنا بالمصري: برهامي والدستور .. سكة نعم هتاخدنا لفين
اما وان الدستور اصبح في عداد الامر الواقع.. فوجب السؤال طب وبعدين؟! اللي قالوا نعم واللي قالوا لاة في النهاية في مركب واحد يا تغرق لا قدر الله يا ترسي على بر، وفي الحالتين هي مركب واحدة ومصير واحد.. دفة الدستور بالنتيجة ديه بظروفها وملابساتها ممكن تاخدنا على فين؟! دة السؤال الاول.. اما السؤال التاني ودة اللي هنركز عليه وماهواش بعيد ابداً عن السؤال الاول بالعكس دة في صلب الموضوع، يخص كلام الشخ ياسر برهامي الشهر اللي فات قدام ملتقى للعلماء والدعاة، بدا فيه وكانه بيدافع عن مسودة الدستور وعن موقف التيار السلفي داخل الجمعية التاسيسية وبيعدد الانجازات وبيدرا الشبهات على حد تعبيره.. وزي ما قلنا الكلمة ديه مع انها من شهر بالظبط الا انها ما اتسربتش الا امبارح بس والله اعلم ليه.. والسؤال هو: هل الدستور اللي اتقال عليه نعم دة: اتكتب فعلاً بالطريقة ديه والشخصيات اللي اتكلم عنهاىالشيخ برهامي زي شيخ الازهر وزي الدكتور سليم العوا، لعبت فعلاً الادوار ديه ولو صحت: ليه عملوا كدة؟! وبعد كل دة، هل فعلاً دفة الدستور اللي اتقال عليه نعم دة هتاخد مركبنا في السكة اللي رسمها الشيخ برهامي ولا فيه احتمالات لاي سكك تانية؟! كل ديه اسئلة هنطرحها على
ضيوفنا النهاردة:
د. عمار علي حسن: الباحث السياسي والمتخصص في شؤون الجماعات الاسلامية
د. عبد الله النجار: استاذ القانون والشريعة في جامعة الازهر
د. فتحي فكري: استاذ القانون الدستوري
د. أحمد عبد ربه: استاذ العلوم السياسية بجامعة القاهرة
لما الشهداء يكتبوا دستورهم .. في بلدنا بالمصري
ليست هناك تعليقات:
إرسال تعليق