نشاهد اليوم
برنامج من جديد
و الذى يذاع على قناة ONTV
تقديم شريهان أبوحسن
شارك الخبر مع اصدقائك على الفيس بوك و تويتر و جوجل +1 من اعلى الصفحة
مع تمنياتى بمشاهدة ممتعة
و لنبداء
برنامج من جديد تقديم شريهان ابو حسن و حلقة الاحد 18 نوفمبر 2012 من قناة ONTV يوتيوب كاملة
من جديد: 15 يوم على ذمة التحقيق لعامل المزلقان
من ناحية تانية النيابة العامة تجري تحقيقاتها في الحادثة وكشفت التحقيقات النهاردة ان الأتوبيس اللي كان بيحمل اطفال المدرسة كان محمل بــ67 طفل في حيثن انه مخصص لحمل 29 راكب فقط ... كمان النيابة العامة باشرت التحقيق مع محمد رشاد الميتنى وزير النقل السابق ومصطفى قناوى رئيس هيئة سكك حديد مصر السابق واللي تقدموا باستقالتهم بعد الحادث وامرت بحبس عامل المزلقان وملاحظ البلوك 15 يوم على ذمة القضية ... تفاصيل تانية عن التحقيقات والوضع عامل ايه ده اللي حنعرفه من الاستاذ هيثم البدري مراسل أون تي في في أسيوط .
من جديد: سماع أقوال وزير النقل بشأن منظومة سكك الحديد
اما التحقيقات مع الوزير فتناولت سماع أقوال وزير النقل بشأن إجراءات تطوير المنظومة داخل هيئة السكك الحديدية، والآلية التى يتم التشغيل بها والنظام المتبع لتشغيل القطارات .. معانا الأستاذ عمر حسانين مساعد رئيس تحرير المصري اليوم .
من جديد: الذكرى الأولى لأحداث محمد محمود
حادث قطار أسيوط ارتبط في موعده بالذكرى الأولى لأحداث محمد محمود واللي بكرة هو اول يوم على مرور عام كامل على هذه الأحداث الدموية اللي اسفرت عن موت العشرات من المتظاهرين وإصابة المئات واللي طبعا كانت أحد أهم الأسباب في اقالة حكومة الدكتور عصام شرف رئيس الوزراء الأسبق.
من جديد: أطفال ماتوا .. ده كمان النظام السابق؟
وفي نفس الوقت ماكانوش فاكرين انه حيتم المتاجرة بموتهم بين السياسيين، اللي بقت أسهل حاجة يقولوها ان كل اللي احنا فيه ده بسبب النظام القديم.. اللي بقى الشماعة اللي بيتعلق عليها كل فشل.. وبقت في نفس الوقت هي المخرج لكل مسئول مش عاوز يتحمل المسئولية.. ولا عاوز يواجه شعبه.. واللي يشوفه وهو في المعارضة ..يلاقيه بيقدم سلوك تاني خالص وهو في الحكم.. والاكتر من كدة ان نفس المبررات هيه هيه .. وكأننا شعب نساااي .. والأكتر من كدة ان اللي حصل ده شوفناه في الأفلام ولا حد مننا اتحرك ولا اتعلم..
من جديد: القوى المدنية تعلن إنسحابها من التأسيسية
الجمعية التأسيسة .. خلاص نقدر نقول ان وفاتها أعلنت بانسحاب القوى المدنية كلها وكمان الكنيسة وده اللي كنا قلناه لحضراتكوا يوم الخميس اللي فات .. والنهاردة أعلن عدد كبير من ممثلي القوى والأحزاب المدنية وعدد ايضا من الشخصيات .. انسحابهم من الجمعية التأسيسية لوضع الدستور .. وأكدوا ان انسحابهم من الجمعية التأسيسية بشكل نهائي لا رجعة فيه .
من جديد: دماء الأطفال على قطبان القطار
السلام والتحية على حضراتكو واهلا بيكو معانا ... مصر حزينة .. مصر غضبانة .. مصر مقهورة على ولادها الـ53.. ولادها الـ53 اللي ماكنوش أبدا فاكرين انهم وهما رايحين المدرسة انهم رايحين ومش راجعين.. كتير مننا أكيد ..ما قدرشي يمسك نفسه وهوه بيشوف أطفال صغيارين اكبرهم في رابعة او خامسة ابتدائي.. بيروحوا هدر .. مش قادرة اتصور شعور ام من الامهات وهي كانت بتلبس ولادها وهما رايحين والمدرسة ومش حتشوفهم مرة تانية.. زي برضوة اللي كان بيحصل من سنة لما كانت الامهات ولادها نازلين محمد محمود ومش راجعين تاني.. زي برضوة ولاد رايحين ماتش كورة وما يرجعوش .. احنا خلاص اتعودنا على الكوارث لدرجة ان المسئول لما يطلع يطلع يقول احنا صرفنا تعويض 5 آلاف جنيه .. لكل متوفي.. خليهمك.. اصل حضرتك ما جربتش ان ابنك يموت ..وحد يقولك خد 5 آلاف جنيه تعويض.. يعني الكارثة ديه ما كلفتشي الدولة تعويضات غير حوالي 250 ألف جنيه كانت بتدفعهم تعويض .. للسايح اللي كان القرش بيعضه في البحر الاحمر.. يعني 50 طفل من ولادنا بتمن سايح اجنبي حصله حاجة على ارضنا برضوة، الواحد للأسف مهما قال من كلام عن الاهالي اللي ربنا يصبرهم .. مش حيقدر يتكلم عنهم او يوصف شعورهم أو يحس بيهم لما فجأة.. يفقدوا 4 من عيالهم.
من جديد: تشكيل مجموعة عمل لإعادة صياغة الدستور
بعد المؤتمر عقدت هذه القوى اجتماعا داخل حزب الوفد وانتهوا إلى تشكيل مجموعة عمل لإعادة صياغة الدستور وتضم هذه المجموعة اعضاء اللجنة الإستشارية اللي كانت انسحبت ايضا من الجمعية التأسيسية بالإضافة إلى الدكتور جابر نصار وعمرو حمزاوي ووحيد عبد المجيد ويحيي الجمل وقرروا تشكيل جبهة انقاذ وطني وقرارات أخرى هنعرفها من الأستاذ معتز صلاح الدين المستشار الإعلامي لرئيس حزب الوفد .
من جديد: دعوة للمظاهرات بمناسبة ذكرى أحداث محمد محمود
في ظل الذكرى السنوية لشهداء محمد محمود كان دعا عدد من النشطاء إلى مظاهرات يوم 19 نوفمبر ، لكن الداخلية أصدرت بيان قال أنه قد تلاحظ خلال الآونة الأخيرة وجود العديد من الدعوات على شبكة التواصل الإجتماعى "فيس بوك" للتجمع يوم 19 الجارى وبعضها يحرض للتعدى على المنشآت الشرطية بمناسبة مرور عام على أحداث شارع محمد محمود والتى مازالت وقائعها منظوره أمام القضاء.
البيان أكد أنه تم إتخاذ كافة الإجراءات والتدابير اللازمة لتحديد المحرضين ومنع الإعتداء أو إقتحام المنشآت ومواجهة ذلك بكل حسم وقوة وفقا لأحكام القانون.
وحملت الداخلية الداعين لتلك التظاهرات التى تتسم بعدم السلمية مسئولية ما قد يحدث من تداعيات تحركاتهم .. معانا الأستاذ وائل قنديل الكاتب الصحفي
من جديد: الغرياني يمهل على المنسحبين من التأسيسية
في المقابل بقى ... ورغم كل هذه الإنسحابات فالجمعية التأسيسية استمرت في عملها ووافقت النهاردة على اختيار المهندس محمد الصاوى عضو الجمعية كمتحدث اعلامي بدلا من الدكتور وحيد عبد المجيد واللي هو واحد من اللي اعلنوا انسحابهم ... كمان المستشار حسام الغرياني رئيس الجمعية التأسيسية أكد أنه لا يرى أي مبرر لإنسحاب القوى المدنية وغيرها من الأعضاء زي ممثلي الكنيسة وقال انه لم يحجر أحد على رأيهم وأنه كان بيتمنى أن يتحدث أحد منهم ويقول مبررات انساحبهم واخيرا قال انه بيديهم فرصة يومين لعودتهم وإن لم يعودوا سوف يستأنوا عملهم ولم ننشغل ..
من جديد: القضاء يحسم قضية جامعة النيل
النهاردة محكمة القضاء الإداري حسمت أزمة ملف جامعة النيل مع مدينة زويل العلمية وأصدرت حكم اكدت فيه على أحقية جامعة النيل في مبنى من المباني اللي تم تخصيصها لمدينة زويل ... وفي المقابل أكدت على عدم أحقيتها في الحصول على باقي المباني والأراضي واللي بتقدر مساحتها بــ127 فدان ...
من جديد: تجليس البابا تواضروس الثاني بالكاتدرائية
النهاردة كان تنصيب البابا تواضروس الثاني بابا الإسكندرية وبطريرك الكرازة المرقسية بمقر الكاتدرائية بالعباسية ... حضر طقوس التنصيب عدد كبير من كبار مسئولي الدولة والشخصيات العامة وؤاساء الأحزاب على رأسهم الدكتور هشام قنديل رئيس مجلس الوزراء والدكتور محمد البرادعي وحمدين صباحي وعمرو موسى وغيرهم ..في حين تغيب الدكتور محمد مرسي رئيس الجمهورية عن حضور طقوس التنصيب اللي تم فيها كل المظاهر الاحتفالية بسبب شهداء منفلوط.
من جديد: من المسئول عن حادث قطار أسيوط
من جديد اهلا بحضراتكو .. حالة من الحزن والغضب بتسيطر على المصريين الساعات اللى فاتت بعد سماع خبر اصطدام قطار باتوبيس أطفال في اسيوط ووفاة أكتر من 50 تلميذ .. الناس بقت موجوعة ومبقتش عارفه تليقها منين ولا منين .. كل يوم مأساة بتحصل .. كل يوم بتصحى على وجع .. ومش عارفين اخرتها ايه؟
مش عارفين امتى المواطن الغلبان يعيش وهو مطمن انه هيعيش .. امتى يعيش بكرامة يعيش مرتاح البال، يعيش مطمن على نفسه وعلى ولاده .. ؟
يمكن من متابعتنا لأفضل التعليقات على مواقع التواصل الاجتماعي واللي بتلخص الحالة، هي صورة لام مصرية الحزن والدموع ملية وشها ، وبتقول : ابني .. راح المظاهرات رجع في كفن .. راح يحمي الحدود رجع في كفن .. راح ماتش كورة رجع في كفن .. راح المدرسة رجع في كفن ... !!
ربنا يصبر اهالي الصحايا ويعينهم على الوجيعة اللى ادمت قلوبنا كلنا .. لكن قبل من ندعي ان ربنا يصبرهم ، لازم نعرف مين هو المسؤل عن الكوارث دي ، مين اللى لازم يتحاسب ، وهل اقالة الوزير كافية ، وهل الرئيس نفسه يُسأل عن اللي بيحصل ده، سواء سياسيا او جنائيا؟ .. وهل الرئيس والحكومة وكل المسؤلين انشغلوا خلاص بالقضايا السياسية ونسيوا المواطن الغلبان واحتياجاته؟
احنا النهاردة هنناقش مع ضيوفنا الكرام ابعاد كارثة منفلوط ، وايه الأسلوب الامثل في التعامل معها لضمان عدم تكرارها .. بنرحب بضيوفنا الكرام المهندس صبري عامر عضو الهيئة العليا لحزب الحرية والعدالة ورئيس لجنة النقل والمواصلات بالبرلمان المنحل، واللواء رفعت عبد الحميد الخبير الأمني .. اهلا بيكم في من جديد
ليس على الحساب كبير
ليس على الحساب كبير .. حوادث القطارات في مصر .. هل هناك أمل للحل.
ليست هناك تعليقات:
إرسال تعليق