نشاهد اليوم
برنامج اون تيوب
ON Tube
و الذى يذاع على قناة ONTV
تقديم رامى رضوان
برنامج اون تيوب برنامج يقوم علي الصحافة الشعبية التي بدات في الانتشار حيث اصبحت بديلا هاما للاعلام الرسمي و يساعد علي انتشارها الشبكات الاجتماعية لذلك يهتم اون تيوب بعرض محتويات اللقطات التي يصورها المواطنون بأنفسهم كما يهتم البرنامج بمساعدة المواطنين الراغبين في توثيق لحظات بعينها و نشرها علي الانترنت بل و عرضها علي شاشة اون تي في لايف
شارك الخبر مع اصدقائك على الفيس بوك و تويتر و جوجل +1 من اعلى الصفحة
مع تمنياتى بمشاهدة ممتعة
و لنبداء
برنامج اون تيوب تقديم رامى رضوان و حلقة الاحد 9 سبتمبر 2012 من قناة ONTV يوتيوب كاملة
ONTube: مظاهرات الألتراس
اول فيديو النهاردة معانا من مصر .. وبالتحديد من محافظة الاسكندرية .. اللي مجموعة التراس الاهلوية او (ريد ديفلز) هناك .. اعلنت هيا كمان رفضها لاقامة الدوري العام للموسم الجديد 2012-2013 .
وتحت شعار واضح و هجومي من جانب الالتراس .. (بالذوق بالعافية مفيش دوري) .. خرج المئات بالأمس من أعضاء مجموعة التراس النادي الأهلي بالإسكندرية .. في مسيرة إنطلقت من أمام ميدان فيكتور عمانويل بسموحة .. وتوجهت إلي مقر مديرية أمن الإسكندرية .. احتجاجا علي عودة مسابقة الدوري العام.
في الفيديو اللي جاي و اللي صوره ابناء مجموعة اصوات المصريين .. هنشوف لقطات من الوقفة الاحتجاجية اللي ندد خلالها المشاركين بقرار وزير الشباب والرياضة بعودة الدوري العام والنشاط الكروي .. في الوقت اللي مازال فيه مصير حقوق شهداء مذبحة بور سعيد مجهول.
ONTube: مسيرة ألتراس الإسكندرية الراجلة
و بخصوص ازمة التراس أهلاوي مع مسابقة الدوري العام و إعتراضهم على استكماله.. النهاردة كلنا عارفين انه حيتلعب مباراة الاهلي و انبي في كاس السوبر .. و قررت مجموعات بشكل منفرد انها تروح لاستاد برج العرب .. للمطالبه بوقف مسابقة الدوري العام و النشاط الكروي .. لحين القصاص لدماء شهداء مجزرة بورسعيد.
الفيديو اللي جاي هو لمجموعة التراس اهلاوي في الاسكندرية ايضا .. و هم بيتجهوا الي استاد برج العرب ظهر اليوم سيرا على الأقدام لمسافة 60 كيلو تقريبا .. وده بعد رفض سائقي الميكرباصات نقلهم للإستاد. الفيديو ده تم تحميله علي مواقع التواصل الاجتماعية من وقت قليل.
ONTube: مكان مجزرة سوق سد اللوز
الي الشأن العربي .. و نبدأ من سوريا. قال نشطاء من المعارضة السورية فى مدينة حلب .. إن فيه غارة جوية على حى سكنى فى المدينة النهاردة .. سقط بسببها عشرات القتلى و المصابين .. بعد يوم من سيطرة مقاتلى المعارضة على ثكنات عسكرية فى المنطقة.
وأضاف النشطاء أن القصف الجوى دمر مبنى سكني فى حى هنانو.. وهو أحد الأحياء الواقعة تحت سيطرة المعارضة بشرق حلب. وتابعوا أن عدد القتلى لم يتضح حتي الان .. إلا أنه يجرى انتشال الجثث والمصابين من تحت الأنقاض.
الفيديو اللي جاي من مدينة حلب .. و بيظهر فيه انقاض سوق سد اللوز في حي الشعار .. اللي تم ايضا قصفه امس .. من قبل قوات الاسد .. ومات فيه 10 مواطنين و اصيب العشرات من اهالي الحي. و بيظهر في الفيديو قيام المواطنين بازالة الانقاض لمحاولة انقاذ من يمكن إنقاذهم.
ONTube: مشادات بالبحرين
و من سوريا نروح للبحرين ..اللي بعد ما حكمت المحكمة الكلية البحرينية بادانة العديد من رموز المعارضة .. و اتهامتهم بمحاولة قلب نظام الحكم و التخابر مع جهات اجنبية .. واخدوا بسببها احكام وصلت الي 15 سنة مشددة .. توالت الدعوات للخروج في مسيرات مناهضة لنظام الملك حمد بن عيسي ال خليفة .. يوم الجمعة الماضي.
الفيديو التالي عبار عن لقطات مجمعة للمسيرات اللي خرجت في المنامة .. يوم الجمعة الماضي. وبيظهر فيه ايضا قيام قوات الامن البحرينية بتفريق المسيرات بعنف.
و بسبب موقف الامن البحريني من هذه المسيرات و قيامهم بتفريقها .. حمل نائب الأمين العام لجمعية العمل الوطنى الديمقراطى المعارضة فى البحرين( رضا الموسوى) .. حمل الحكومة المسئولية عن اللي بيحصل من جرائم وترويع وأعمال خارجة على القانون .. تخللت المسيرات غير المرخصة اللى خرجت الجمعة الماضية.
وكانت وزارة الداخلية البحرينية اتهمت جمعية الوفاق الشيعية المعارضة .. بالإصرار على مخالفة القانون .. وحملتها مسئولية ما وصفته بالجرائم والأعمال الخارجة على القانون.
ONTube: جمعة المحاكمة القادمة
والي اليمن. في ساحة الحرية بمدينة تعز .. خرج الالاف في جمعة (المحاكمة قادمة) .. للتأكيد على مطلب محاكمة الرئيس المخلوع علي عبد الله صالح وأعوانه .. المتورطين في قتل اليمنيين .. كما جاء على لسان المتظاهرين.
في الفيديو اللي جاي و اللي التقط من قلب ساحة الحرية .. بيظهر المحتشدين بعد أدأهم صلاة الجنازة على الشهيد شرف سلطان .. اللي أعدمته المليشيات الحوثية من أيام في محافظة عمران. وبنشوف المتظاهرين وهتافاتهم المندده بالحوثيين .. اللي بتقول إحداها ( موت أمريكا في العراق .. مش في تعز يا أبواق).
ONTube: إسرائيل تبحث عن العدالة الإجتماعية
من الشأن العربي .. نروح لبعض الشئون العالمية .. و نبداها باخبار الكيان الصهيوني. تظاهر عشرات الإسرائيليين مساء امس السبت بوسط تل أبيب في حي (اور يهود) .. احتجاجا على تدهور الأوضاع الاقتصادية .. وتنديدا بسياسات الحكومة الإسرائيلية الأخيرة على الصعيد الاجتماعى.
و بيظهر في الفيديو الاسرائليين .. وهما بيهتفوا ضد السياسات الإقتصادية و الاجتماعية لحكومة نيتينياهو .. و نددوا كمان بعدم وجود عدالة اجتماعية هناك .. و الطريقة اللي بتتعامل بيها الحكومة معاهم .. و اللي اعتبروها .. زي ما كتبوا على لافتاتهم .. طريقة غير ادمية.
ONTube: ضد سياسات التقشف اليونانية
و الي اليونان .. و فيديو من العاصمة اتينا .. بيوضح خروج مئات المتظاهرين إلى شوارع امبارح السبت.. من بينهم متقاعدين وأعضاء النقابات العمالية .. احتجاجا على تدابير تقشف جديدة متوقع الإعلان عنها قريب .. واللي بتهدف إلى إنقاذ البلاد من جبال الديون اللي غرقانة فيها .. حسب التصريحات الحكومية.
يذكر ان (يانيس بافليديس) المراقب بنقابة المتقاعدين الحكوميين فى أتينا .. قال إن نظام التقاعد أصبح الآن (فى حالة فوضى) .. وإتهم الحكومة اليونانية بعدم الاهتمام بالمتقاعدين.
ومن المقرر أن يصل مراقبو تدابير التقشف اليونانية من الدائنين والبنك المركزى الأوروبى إلى أتينا الأسبوع الحالي .. لإعداد مراجعة جديدة لجهود البلاد فى مواجهة الركود الاقتصادى .. وتعديل العجز المتصاعد فى الميزانية.
ONTube: جولة في أخبار تويتر وفيسبوك اليوم 09/9/2012
ده كان أخر فيديو معانا في الفقرة الإخبارية .. قبل مانروح لفاصل .. هنروح لزميلي زياد سالم عشان نشوف معاه أخر التويتس و الهاش تاجز و الأخبار بصفة عامة اللي إنتشرت على المواقع الإجتماعية خلال اللحظات القليلة الماضية.
مساء الخير زياد .. إيه الجديد عندك؟
ONTube: وصول وزير الرياضة لاستاد برج العرب
معنا مراسلنا محمد الخولي ليوضح لنا المشهد أمام ستاد برج العرب ويؤكد وصول وزير الرياضة العمري فاروق للاستاد وحالة أمنية مشددة .
ONTube: متظاهري محمد محمود يغلقون الطريق
معنا مراسلنا محمد الحداد ليوضح لنا المشهد من شارع محمد محمود ويؤكد أن متظاهري محمد محمود يغلقون الطريق .
ONTube: أزمة شارع النبي دانيال
سوق الكتب بشارع النبي دانيال بالإسكندرية .. يعتبر من أهم الاماكن اللي بتبيع الكتب المستعملة. فـبجنيهات بسيطة تقدر تشتري موسوعات و كتب في كل المجالات. وبما إنها كتب مستعملة و اسعارها دايما قليله .. ده كان بيمكن كل واحد عايز يقرا في أي مجال .. إنه يشتري الكتب اللي هو عايزها .. حتى كتب الكليات والكتب الدراسية للمراحل المختلفة.. كانت بتتباع هناك .. وكانت بتعتبر الحل الوحيد للأسر محدودي الدخل ..عشان يجيبوا الكتب الدراسية لولادهم. لكن المكان ده فجأة اعتبرته شرطة المرافق اشغال طريق وقامت بمحاولة إزالته. وبعد ماكسروا حوالي تسع اكشاك .. اكتشفوا إن أصحاب الأكشاك دي .. معاهم تصاريح. هيكون معانا على سكايب طاهر الحديدي عضو مؤسس لمجموعة كلمة الثقافية بـالاسكندرية.. واحد الزباين الدائمين لسوق الكتب بشارع النبي دانيال. لكن في الأول خلينا نشوف فيديو للي حصل يوم الخميس بليل .. و نرجع نبدأ كلامنا معاه.
ONTube: الإسكندرية تقرأ
من ردود الأفعال ايضا للموضوع ده .. فيه دعوة من بعض الشباب السكندري بـعنوان الإسكندرية تقرأ .. وهو نوع احتجاجي مختلف هيكلمنا عنه الناشط الاخضر او البيئي .. كريم محروس.
ONTube: ساعة من لا شئ
الإكتشافات و الاختراعات لا تتوقف .. و كل يوم بنشوف اختراعات عبقرية جديدة. الفيديو اللي حنشوفه دلوقتي نموذج لإستخدام التكنولوجيا لعمل ما هو أكثر إبهارا. ببساطة هنشوف تجربة لشريحة كمبيوتر متثبت فيها لمبات (led ).. و باستخدام تقني لتحريك الشريحة دي .. بيقوم صاحب المقطع بتحريكها زي المروحة .. و بعد ما بتوصل لسرعة معينة بتجسد شكل مضئ .. قرر صاحب الاختراع ده او اللي قام بتنفيذه في الفيديو .. إنه يكون ساعة حقيقية.
ONTube: إضراب الضيافة الجوية بمصر للطيران
و من اللي حصل في شارع النبي دانيال .. نروح لنوع من الاضرابات اللي قليل لما بنسمع عنها .. لكن لما بتحصل بتأثر على ناس كتير. كل الناس اللي كانت مسافرة من مطار القاهرة يوم الجمعة اللي فاتت رحلاتهم اتأجلت .. وده كان بسبب إضراب طاقم الضيافة الجويه بشركة مصر للطيران .. الأمر اللي أدى الى الغاء أكتر من 50 رحلة طيران .. وتكدس الاف المسافرين في صالات السفر .. و خسائر تعدت الخمسين مليون جنيه.
هنروح نشوف فيديو صوره و بعتوه لأون تيوب هاني سليم .. و هو أحد الأشخاص اللي كانوا مسافرين يوم الجمعة الساعة 7:30 صباحا .. و تم تأجيل رحلته لبعد الساعة 3 العصر. هنشوف الفيديو ونرجع نتكلم مع هيثم المنواتي .. و هو أحد الأشخاص اللي كانوا متواجودين في مطار القاهرة ايضا فجر يوم الجمعة.
معانا على الهاتف الأستاذ تامر السيوفي .. المتحدث الإعلامي بإسم وحدة الضيافة بشركة مصر للطيران .. علشان يقولنا أسباب وظروف الإضراب .. وكمان يكلمنا عن الإجتماع اللي تم مع مستشار رئيس الجمهورية .
ONTube: 15 فرصة ضائعة
الانسان دايما بيندم علي الفرص الضايعة .. خصوصا لما تكون الفرصة في ايده و جيه لحد عنده على طبق من دهب.
الفيديو اللي جاي هنشوف فيه مجموعة من اغرب الفرص الضايعة في كرة القدم. و الصراحة الفرص كلها تعقد صاحبها من سهولتها .. فربنا يكون في عون اللاعيبة اللي ضيعوا الفرص دي .. وفي عون الجمهور و المدربين و في عون حضراتكم لما تشوفوا الفيديو دة.
ليست هناك تعليقات:
إرسال تعليق