برنامج بلدنا بالمصرى
تقديم ريم ماجد
على قناة OTV
تقديم ريم ماجد
يأتيكم من الأحد للخميس في الساعة 8:30 مساءا
الإعلامية المتميزة صاحبة الرؤية الثاقبة ريم ماجد تقدم برنامج بلدنا بالمصرى الذى يمزج السياسة بالقضايا الاجتماعية … يناقش القضايا التى تهم المصريين بوجهة نظر مصرية خالصة و يعبر عن رأى رجل الشارع … البرنامج يعيش مشاكل الشارع المصرى و يتكلم بلسانه، يشاغب الضيوف و يحاورهم و يجادلهم و يعبر عن رأى كل المصريين …ريم تكشف المستور من خلال فقرة كلام فى سركم و تقتحم الاسلاك الشائكة لعالم السياسة و تناقش الكبار … بلدنا بالمصرى … لسان المصريين
شارك الخبر مع اصدقائك على الفيس بوك و تويتر و جوجل +1
ONtv Livestreaming - البث الحي
اتمنى مشاهدة ممتعة
و نبدا
برنامج بلدنا بالمصرى تقديم ريم ماجد على قناة ONTV حلقة الثلاثاء 17 ابريل 2012 يوتيوب كاملة
كله سداح مداح ومحدش فاهم حاجه
يسعد مساكم وحلقة جديدة من بلدنا بالمصري بعد اجازة تبدو قصيرة كان الهدف منها شم النسيم لا اكثر ولا اقل، لكن من خطورة الاحداث اللي حصلت في الكام يوم اللي غبنا فيهم_كما وكيفاً_ عدت علينا الاجازة بالتيلة وكانها 4 شهور مش 4 ايام مافيش غيرهم.. وكلها احداث مثيرة للجدل ان ماكانش للقلق وكالعادة مثيرة لضرب الأخماس في الأسداس واللف والدوران حوالين نفسنا وعينينا في وسط راسنا ولا فيه اي حاجة واضحة، ولا حتى حاجة واحدة توحد ربنا نسمك فيها كدة بايدينا وسنانا ونقول بقلب جامد "وجدتها" الا كله سداح مداح وماحدش فاهم اي حاجة، وآخرتها طبعاً اننا بنعيده تاني وراجعين من أول جديد وبعد الهنا بسنة لقولة "الدستور اولاً ولا الانتخابات اولاً".. لكن المرة ديه المشير بذات نفسه هو اللي بيطالب بالدستور اولا وبيحذر من انتخاب رئيس بلا صلاحيات مع ان سبحان الله دة المسار اللي رسمته "الارادة الشعبية" بقولة "نعم" على التعديلات الدستورية ، اللي اعتبرها المجلس العسكري في يوم من ذات الايام وعلى يدنا وفي البرنامج دة وفي غيره سواء في العلن او بين اربع حيطان: "نعم على شرعية الجيش بنسبة 77%".. فسبحان مغير الأحوال؟!!! ايه بقة اللي اتغير واستجد يا دوب اول امبارح؟! وتصريحات المشير الأخيرة بالخصوص دة اثناء اجتماع المجلس العسكري مع رؤساء الأحزاب، تم الاتفاق عليها ولا كانت مجرد رأي ولا كانت من باب الأمر العسكري مع الشغل والنفاذ؟! وهل معناها نكتب الدستور اوام أوام قبل 30 يونيو ولا معناها تاجيل الانتخابات؟! وايه السيناريوهات والتداعيات المحتملة في كل حالة من الحالات... وغيرها من الأسئلة اللي عقلنا عمال يجيب ويودي حواليها كلها هنفكر في اجابتها بصوت عالي بعد آخر اخبار بلدنا انشاءالله وعلينا خير.
لجنة الانتخابات نظرت طعون المرشحين للرئاسة
آخر أخبار بلدنا هنبدأها من اللجنة العليا المشرفة على انتخابات الرئاسة اللي كانت بتنظر النهاردة في التظلمات اللي تقدم بيها معظم المرشحين المستبعدين واللي أستبعدت المرشحين الـ 10
علي حسن: لا يوجد أي متغير يدفع اللجنة بالعدول عن قرارها
لتفاصيل أكتر عن قرار اللجنة برفض التظلمات إحنا معانا أ/ علي حسن نائب رئيس تحرير وكالة أنباء الشرق الأوسط
أبو إسماعيل يشكك في صحة الوثائق الأمريكية
الشيخ حازم ابو اسماعيل شخصيا او من خلال انصاره، ماخلاش وسيلة الا ولجأ ليها للتشكيك في قرار اللجنة وفي الوثائق اللي استندت عليها لا ثبات ان والدته أمريكية، سواء قبل قرار الاستبعاد أو بعده، قبل تقديم التظلم وبعده.. وقبل اي حاجة لازم نقر ونعترف ان الطريقة اللي تعاملت بيها الجهات الحكومية واللجنة المشرفة على الانتخابات فتحت الطريق من وسع مش بس للتشكيك لكن كمان لعدم الارتياح مش بس من جهة انصار ابو اسماعيل اللي لو حلفنالهم على المية تجمد ان والدة ابو اسماعيل معاها الجنسية الامريكية مش هيصدقوا، لكن كمان من جهة المتعاطفين وحتى من جهة جزء مش بطال ابدا من االمختلفين على طول الخط ومن حيث المبدأ مع الشيخ ابو اسماعيل.. ودول كلهم _ويمكن معذورين_ ماسكين في قولة "وكانت فين الوثائق ديه من الأول؟ وليه ما طلعتش من البداية وتم الاعلان عنها؟ وايه اللي يضمن فعلا انها مش مزورة؟
هشام المياني: إعتصام الشيخ حازم أبو إسماعيل مفتوح
لمزيد من التفاصيل إحنا معانا هشام المياني من أمام اللجنة العليا للانتخابات
هل وثائق جنسية والدة أبو إسماعيل مزورة
الشيخ حازم علق بخط يده على تزوير الوثائق ولكن السفارة الامريكية ومؤيد برأي لخبير قانوني لم يذكر اسمه، بياكدوا على ان المكاتبات الدبلوماسية الامريكية لا يشترط أن تكون مختومة بالختم الأمريكي.. وبالنسبة للبيانات المطموسة اكدت المصادر انه وفقا لقانون "حرية تداول المعلومات في الولايات المتحدة بيتم طمس بعض المعلومات زي التوقيع وعنوان البيت حفاظا على الهوية الشخصية وخصوصية المواطين. مزيد من المعلومات إحنا معانا المستشار محمد حامد الجمل
المرسي: المستندات المزعومة أنها أمريكية ليست أمريكية
إحنا معانا على الهاتف أ/ محمد المرسي محامي حملة حازم أبو إسماعيل
عبد المقصود: مسلسل التلاعب في الانتخابات بدأ اليوم
معنا على الهاتف أ/ عبد المنعم عبد المقصود محامي جماعة الإخوان المسلمين تعليقاً عن خروج خيرت الشاطر
في أولى جلسات قضية مذبحة بورسعيد
في وسط اجواء مشحونة كل الاطراف فيها غضبانة غضب شديد بدأت النهاردة في اكاديمية الشرطة أول جلسة من جلسات محاكمة 73 متهم فى قضية «مذبحة بورسعيد» بتهم القتل العمد والشروع فيه وحيازة أسلحة بيضاء ومواد مفرقعة وحارقة والإهمال الجسيم والتقصير.. في نفس الوقت اللي اتجمع فيه شباب الالتراس بالالافات برة المحكمة يهتفوا ضد المتهمن وضد النظام السابق وضد حكم العسكر، كانوا أهالي الشهدا بيطالبوا بالقصاص العادل وبحق ولادهم.. وأهالي المتهمين بيطالبوا ببراءة ولادهم اللي اتاخدوا كبش فدا للمتهمين الحقيقيين.. والنيابة بتقرا امر الاحالة والاتهامات.. والمتهمين في القفص بيتهموا النيابة بالظلم.. ومحامين المدعين بالحق المدني بيقدموا طلباتهم ومن ضمنها ضم متهمين جداد وأولهم رئيس المجلس الاعلى للقوات المسلحة.. وهيئة المحكمة بترفع الجلسة مرتين قبل ما تقرر التاجيل لجلسة 5 مايو.
اتهامات للحكومة في حريق السويس
بعد 4 ايام من الجحيم المتواصل، أعلن النهاردة محافظ السويس ومدير أمنها عن إخماد الحريق بخزانات شركة «النصر للبترول» بشكل كامل، والبدء في عملية تبريد الخزانات.. الا ان الواقعة ديه اللي لسة ماحدش عارف لها اسباب وان كانت بفعل فاعل ولا قضاء وقدر، مش هتعدي بالساهل لا بالنسبة للرأي العام ولا بالنسبة للبرلمان خاصة في ظل اتهامات واضحة وصريحة للحكومة من بالتقصير والفشل
محافظ السويس: عملية تبريد التنكات تجرى على قدم وساق
معنا على الهاتف محافظ السويس اللواء/ محمد عبد المنعم هاشم للوقوف على أخر مستجدات الوضع بالسويس
ماسبيرو مقصر في تغطية حريق السويس
الاتهامات بالتقصير والتقاعص عن اداء العمل في احداث حريق السويس، طالت كمان قيادات اتحاد الاذاعة والتلفزيون.. الاتهامات وجهتها جبهة ثوار الاعلام في بيان ليها النهاردة وتوجهت بيها كبلاغ للرأي العام وللنائب العام.
صبحي صالح: المجلس العسكري زي كفار مكة
نروح تحت قبة مجلس الشعب اللي كان بيناقش النهاردة في حضور اللواء ممدوح شاهين، تعديلات قانون القضاء العسكري.. ومن باب سبحان مغير الأحوال برده: ان النائب صبحي صالح وبحكم عضويته للجنة التعديلات الدستورية، ياما شفناه هو واللواء ممدوح شاهين على وفاق تام وزي السمن على العسل.. لكن النهاردة، النائب صبحي صالح شبه اعضاء المجلس العسكري ب"كفار مكة" مرة واحدة، فاعتبره اللوا ممدوح شاهين تطاول على القوات المسلحة عمره ما شافه ولا سمع عنه في اي دولة في العالم.
طلب بتحويل صبحي صالح للجنة القيم
تقدم عشرة نواب بينهم عاطف المغاوري، النائب عن حزب التجمع، بطلب لرئيس مجلس الشعب لإحالة النائب صبحي صالح، وكيل لجنة الشئون التشريعية والدستورية بالمجلس إلى لجنة القيم، بعد التصريحات التى وصف فيها أعضاء المجلس الأعلى للقوات المسلحة بأنهم مثل كفار مكة.
وقال مقدمو الطلب إن صبحي صالح مثله مثل النائب زياد العليمي، الذى سبق له وووجه ألفاظ سباب للمشير حسين طنطاوي، رئيس المجلس العسكري وتمت إحالته للجنة القيم، وحذر النواب فى طلبهم من الكيل بمكيالين فى القرارات الخاصة بإحالة النواب للجنة القيم
الدستور و الرئاسة - م. أبو العلا ماضي
على حس الدستور والانتخابات اللي احنا تاني ماعدناش عارفين مين فيهم اولاً: احنا راجعين تاني من أول وجديد ولا داخلين تاني في متاهة جديدة ما يعلم بيها الا ربنا؟!!! مع المهندس ابو العلا ماضي رئيس حزب الوسط
وكإن الجميع اتفاجئ وعلى غفلة كدة يوم الحد اللي فات، من اول المجلس العسكري لحد المواطن العادي بكل اللي بيه واللي عليه، ان خير اللهم اجعله خير ومن ساعة الأغلبية ما صوتت "بنعم" على التعديلات الدستورية، وبمباركة المجلس العسكري اللي اعتبرها "نعم" لشرعية الجيش واللهم ما لا اعتراض، انها حسمت الاختيار والامر لله، لصالح الانتخابات "أولاً" قبل الدستور: سواء البرلمانية او الرئاسية، بدليل ان من ضمن التعديلات اللي صوتنا عليها كان فيه مادة بتنص على شروط الترشح لرئاسة الجمهورية.. طيب يبقى ايه بقى اللي استجد يا دوب اول امبارح عشان يبقى حتما ولا بد نكتب الدستور اولاً؟! وهل دة معناه اننا نكتبه اوام أوام ولا معناه تاجيل الانتخابات؟!!! واللي احنا فيه دة اسمه ايه وممكن يرسيينا على اي بر؟!!! ولحد امتى هنفضل نضرب أخماس في أسداس؟!!! كل ديه أسئلة هنفكر في اجابتها بصوت عالي مع المهندس/ ابو العلا ماضي: رئيس حزب الوسط
ليست هناك تعليقات:
إرسال تعليق