شارك مع اصدقائك

24 أكتوبر 2011

برنامج بلدنا بالمصرى تقديم ريم ماجد على قناة ONTV حلقة الاحد 23/10/2011 يوتيوب كاملة

برنامج بلدنا بالمصرى تقديم ريم ماجد على قناة ONTV حلقة الاحد 23/10/2011 يوتيوب كاملة





خطوة يسري فوده في مشوار طويل


يسعد مساكم وحلقة جديدة من بلدنا بالمصري.. يعز علي فريق بلدنا بالمصري وعلى فريق أون تي في وعلي أنا شخصياً إنها تكون أول حلقة من أيام الثورة، ما فيش بعدها ولأجل غير مسمى، البرنامج الشقيق ورفيق الكفاح برنامج "آخر كلام" تقديم الزميل العزيز يسري فودة.. والحقيقة إنه تعددت الوسائل والكفاح واحد والهدف واحد.. بالتأكيد مش من حق أي حد إنه يتكلم بلسان يسري فودة، حتى ولا من فريق أون تي في اللي كانت ومازالت بيته ومترحه_وخصوصاً كمان لإن يسري فودة نفسه هيتكلم قريب جداً وبعضمة لسانه هو وهيقول كل ما بداله.. ومش سر أبداً ومش محتاجة أقول إنه لما هيتكلم هيتكلم أولاً من خلال أون تي في ومن هنا من بلدنا بالمصري_ لكن لحد ما يئون الأوان المناسب، كل اللي اقدر اقوله إن يسري فودة لما علق تقديم برنامجه لأجل غير مسمى، بالتأكيد ما كانش لأسباب شخصية ولا لأسباب لها علاقة بضغوط بعينها أو بحلقات بعينها_ودة واضح جداً في بيانه، إن الأسباب أعم وأشمل وأهم وأعمق، وما تعنيش يسري فودة لوحده، لكن بتعني كل الإعلاميين المصريين اللي بيحترموا وبيقدسوا التلات القيم اللي أكد يسري فودة في بيانه على احترامهم وهم: " الضمير قدام ربنا والواجب تجاه الوطن والحرص على قيم المهنة".. ومش بس الإعلاميين لكن كمان المواطنين _وما اكترهم_ الحريصين على الأقل على احترام عقولهم قبل احترامهم لحرية الرأي والتعبير بكل أشكالها.. وإذا كان فيه جملة واحدة في بيان يسري فودة يجوز نقراها على إنها تلخيص مش بس لأسباب موقفه لكن تلخيص للأزمة الحقيقية اللي بنعيشها كإعلاميين وكمجتمع_ وكل واحد فينا بيقاومها في مكانه وبطريقته اللي بيختارهم بكامل إرادته في لحظة ما وهو مستعد إنه يدفع التمن مهما كان_... فالبتأكيد الجملة ديه هي اللي بيقول فيها: " وقفتي اليوم كإعلامي تدعوني إلى رصد تدهور ملحوظ في حرية الإعلام المهني في مقابل تهاون ملحوظ مع الإسفاف''الإعلامي.. هذا التدهور و ذلك التهاون نابعان من اعتقاد من بيده الأمر أن الإعلام يمكن أن ينفي واقعاً موجوداً أو أن يخلق واقعاً لا وجود له.. تلك هي المشكلة الرئيسية و ذلك هو السياق الأوسع الذي لا أريد أن أكون جزءاً منه''!!! وهو نفسه السياق اللي ما اعتقدش إن فيه إعلامي في الدنيا أو وسيلة إعلامية في الدنيا بتحترم مهنيتها وبتحترم جمهورها ممكن تقبله _ودة حتى كان واضح وضوح الشمس في بيان أون تي في اللي اكدت فيه على إنها " تحترم وتتفهم وتؤيد موقف يسري فودة ووجهة نظره في الرسالة التي يحاول ان يوصلها للجمهور بتعليق برنامجه اخر كلام الي اجل غير مسمي وهي ان هناك تدهور ملحوظ في حرية الإعلام المهني في مقابل تهاون ملحوظ مع الإسفاف الإعلامي".. ويمكن مش خافي على حد إن كتير مننا من قبل الثورة ومن بعدها عافر ولسة بيعافر لرفض السياق دة ومقاومته.. لكن الأهم دلوقتي من الرفض ومن المقاومة هو الوصول لحلول عملية وجذرية لإصلاح السياق دة والأهم من كدة وكدة إن الحلول والخطوات ديه كنت بوقفة الإعلاميين نفسهم وعلى إيديهم وبدعم من المجتمع ومن الرأي العام اللي هو المتضرر الأول من أي إسفاف إعلامي ومن أي تدهور أو انتكاسة أو انتهاك لحرية الإعلام المهني".. وبالتالي على قد ما يعز علينا تعليق برنامج آخر كلام لأجل غير مسمى، على قد ما عزاءنا إن الخطوة ديه قد تكون من باب الضارة النافعة،





ل. إسماعيل عتمان: نحترم يسري فوده ونناشده العودة


ل. إسماعيل عتمان مدير إدارة الشئون المعنوية وعضو المجلس العسكري يناشد يسري فوده العوده لآخر كلام




بلدنا بالمصري: قرار اتهام المتهمين في أحداث السفارة


من آخر أخبار بلدنا، إن النائب العام وافق النهاردة على قرار الاتهام اللي أعدته نيابة أمن الدولة العليا بإحالة 76 متهم لمحكمة جنايات أمن الدولة العليا طوارئ فى قضية اتهامهم بارتكاب أحداث الاعتداء على السفارة السعودية بالقاهرة ومبنى مديرية أمن الجيزة.. مداخلة من عمر حسانين أو حد زيه
من امبارح، بدأ ينتشر خبر على المواقع المختلفة وأولهم طبعاً فيس بوك وتويتر، عن نقل المدون مايكل نبيل من سجن المرج لمستشفى الخانكة للأمراض العصبية، بعد إضرابه هو ومحامين الدفاع عنه عن حضور الجلسة الأخيرة يوم 18 اكتوبر وتم تأجيلها لجلسة 1 نوفمبر لتحويله لمستشفى الخانكة لتحديد مدى مسؤوليته عن أقواله وأفعاله.. لكن على ما يبدو إنه لحد دلوقتي مايكل ما تمش نقله للخانكة وإنه غالباً هيتم نقله بكرة لمستشفى الأمراض العقلية والنفسية في العباسية مش الخانكة




بلدنا بالمصري: مبادرة شرطة لشعب مصر


لأول مرة في التاريخ، تكون مصر من ضمن الدول اللي بتمتلك مدونة سلوك وميثاق شرف مهني وأخلاقي للعمل الشرطي.. الميثاق أعلنت عنه امبارح وزارة الداخلية في مؤتمر صحفي وأكدت إنه دستور مهني لرجل الشرطة وعقد اجتماعي جديد بين جهاز االشرطة والمواطن المصري في إطار الاستراتيجية الجديدة لوزارة الداخلية بعد الثورة وتأكيداً على شعار الشرطة في خدمة الشعب.. احنا في فقرتنا الأخيرة هنناقش بنود المدونة بالتفصيل، لكن قبل البنود هنفهم يعني إيه مدونة سلوك للعمل الشرطي وإيه أهميتها خاصة وإنها كانت مطلب رئيسي في كل المقترحات والدراسات والمبادرات اللي اتقدمت لإعادة هيكلة جهاز الشرطة وإصلاحه.
وعلى ذكر المبادرات في المجال دة، برنامج بلدنا بالمصري كان تبنى من ضمنها وبالتحديد، مبادرة "شرطة لشعب مصر" بمجرد ما تم الإعلان عن خطوطها العريضة.. ومن أهم الأسباب اللي دعتنا لتبنيها دوناً عن غيرها إنها مبادرة على قد ما هي حقوقية لكن ديه بالذات مبادرة شعبية بالدرجة الأولى.. صحيح إنه من ضمن أعضاءها شخصيات عامة وشخصيات حقوقية وظباط حاليين وسابقين وفنانين، إلا إنها من ضمن أعضاءها كمان مواطنين ومفتوحة للمزيد منهم مش بس لدعمها لكن كمان لتطويرها والإضافة عليها... بكرة هتنطلق مبادرة "شرطة لشعب مصر" بشكل رسمي في مؤتمر صحفي في معهد إعداد القادة في الدقي والدعوة عامة لكل مواطن بيطالب ب"شرطة لشعب مصر"




بلدنا بالمصري: دعوة الصحفيين لانتخابات النقابة



لكن رغم المحنة ومر الكاس، إلا إن فيه كتير من القضاة استمروا في ممارسة عملهم وبالتالي كان فيه قضايا بينظر فيها النهاردة في عدد من المحاكم، من ضمنهم محكمة استئناف القاهرة اللي حددت جلسة بكرة للنظر في قرار جهاز الكسب غير المشروع بمنع علاء وجمال مبارك من التصرف فى ودائع قيمتها 352.5 مليون دولار في بنوك سويسرا.. ومحكمة القضاء الإدارى اللي قررت إحالة الدعوى القضائية بحل مجلس نقابة الصحفيين لهيئة مفوضى الدولة لإبداء الرأى القانونى فيها، في حين إن مجلس النقابة قرر دعوة الجمعية العمومية للانعقاد وإجراء الانتخابات يوم الأربع اللي جاي.





بلدنا بالمصري: أزمة المحامين والقضاة على أشدها



الأزمة بين المحامين والقضاة على حس قانون السلطة القضائية لسة على اشدها، بعد سلسلة من الاحتجاجات على مستوى الجمهورية على مدار الأيام اللي فاتت، وبعد مسيرة بالروب الأسود من محكمة شمال القاهرة في العباسية لحد المجلس العسكري، نقابة المحامين هتعقد جمعية عمومية طارئة للاعلان عن موقف المحامين من قانون السلطة القضائية.. في نقس الوقت ورداً على احتجاجات المحامين اللي وصلت في كتير من الأحيان لحد إغلاق المحاكم ومنع القضاة من ممارسة عملهم، نادي قضاة مصر وأندية الأقاليم، أصدروا امبارح بعد اجتماع طارئ، توصية غير ملزمة بتعليق العمل فى جلسات المحاكم بمختلف درجاتها على مستوى الجمهورية.. تعالوا أولاً نطل طلة على الوضع في عدد من المحاكم في ظل الأزمة وبعد توصية نادي القضاة.






بلدنا بالمصري: مد فترة الترشح للانتخابات



فقرتنا اللي جاية على طول، هتكون بداية لسلسلة من الحلقات اللي هنركز فيها بشكل أساسي على الانتخابات اللي جاية اللي المفروض إنها انتخابات "تقرير المصير" اللي هتجيب لنا "برلمان الثورة" اللي دفعنا تمنها غالي ولسة المقابل في علم الغيب.. بس مبدئياً ولحد ما ييجي أوانها، تعالوا نطل طلة على عملية تقديم أوراق الترشح في القاهرة بعد قرار اللجنة العليا للانتخابات بمد فتح الباب الي كان المفروض يتقفل امبارح لمدة 48 ساعة كمات ينتهوا بكرة وعلينا خير






بلدنا بالمصري: خريطة التحالفات الانتخابية

يمكن آن الأوان_دة إن ما كانش اتأخر_ على إننا نبدأ نفهم وبالتفصيل خريطة القوى والنيارات الأساسية في الانتخابات اللي جاية اللي ممكن نسميها "انتخابات تقرير المصير" إن جاز التعبير.. ومش بس الخريطة لكن وجب كمان نفهم بالتفصيل وبشكل عملي إيه اللي في جراب كل تيار وكل تحالف وكل حزب وحتى كل مرشح بما إنن شئنا أم أبينا تلت البرلمان اللي جاي هنختاره بالنظام الفردي.. احنا من بكرة هنبدأ مع الأحزاب، حزب حزب وبرنامج برنامج باللي ليه واللي عليه.. لكن النهاردة هنبدأ بخريطة التحالفات وكل تحالف رسي على إيه وإيه اللي عنده يقدمهولنا مبدئياً..
من أنتم وناويين لنا على إيه، احنا المواطنين بدرجة ناخب؟!!! وإيه اللي يخلينا نديكوا صوتنا بإرادتنا الحرة دوناً عن غيركوا؟!!! أسئلة هنوجهها من هنا ورايح لكل التحالفات والأحزاب والمرشحين اللي قرروا إنهم جديرين بإنهم يكونوا ممثلين للشعب في أول برلمان بعد الثورة أو برلمان "تقرير المصير" إن جاز التعبير.. بس هنبدأ النهاردة بأسئلة مبدئية عن خريطة التيارات والتحالفات الرئيسية وعن مدى استعدادهم للاانتخابات وعن وعودهم المبدئية لشعب دفع تمن غالي عشان ينول حريته وكرامته ويقرر مصيره.
الضيوف
- أ. محمد غنيم: عضو اللجنة الانتخابية للكتلة المصرية
- اللوا/ عادل عبد المقصود: رئيس حزب الأصالة (عضو مؤسس في التحالف الإسلامي)
- المهندس/ طلعت فهمي: عضو حزب التحالف الشعبي الاشتراكي (عضو مؤسس في تحالف الثورة مستمرة)
- الدكتور/ رفعت عبد الحميد: مدير المنظمة المصرية للنهوض بالمشاركة المجتمعية



بلدنا بالمصري: ميثاق شرف مهني وأخلاقي للشرطة


لأول مرة في تاريخ بلدنا، يكون عندنا، أخيراً ميثاق شرف مهني واخلاقي للعمل الشرطي، صدر امبارح عن وزارة الداخلية اللي وصفته بالحرف الواحد بإنه "عقد اجتماعي جديد بين جهاز الشرطة والمواطن المصري".. يعني إيه ميثاق شرف أو مدونة سلوك وأخلاقيات للعمل الشرطي؟!!! ويعني إيه عقد اجتماعي بين الشرطة وبين الشعب؟! والعقد دة بينص على إيه؟! وإزاي يترجم من مجرد حبر على ورق لشريعة بين المتعاقدين مطبقة وملتزم بيها عملياً بين الأطراف المعنية؟! وإزاي ميثاق الشرف دة ممكن يكون خطوة حقيقية على طريق إصلاح جهاز شرطة مهمته يكون في خدمة شعب مصر؟!!! إجابات الأسئلة ديه وغيرها هنحاول نلاقيها عند ضيوفنا النهاردة
- جمال عيد: مدير الشبكة العربية لمعلومات حقوق الانسان
- الدكتور/ محمد محفوظ: الظابط السابق وعضو ائتلاف ضباط لكن شرفاء وعضو رئيسي في مبادرة "شرطة لشعب مصر" اللي سبق وتبناها برنامج بلدنا بالمصري في بداياتها واللي هتنطلق بكرة بشكل رسمي


ليست هناك تعليقات:

إرسال تعليق